Gjinkallat e Edvinit i zë Zhegu

[TOKE GEGA]

Gjinkallat e Edvinit i zë Zhegu


I sapoardhur nga pushimet, Edvini shfaqet i nevrikosur, duke konfirmuar se në Europë s’ia ka kaluar shumë mirë. Si hakmarrje, ai shpall në Tiranë se nuk do të bashkëpunojë me qeverinë për reformat e se do ta likuidojë politikisht Nanon përmes lëvizjes kineze “Edvini kuvendon me Shqipërinë”. Çmendurive të zhegut iu bashkëngjit edhe LSI, e cila premton konflikt të ri, për hir të kauzës së ylberizmit


Në kulmin e fushatës zgjedhore për zonën 31, por edhe në zemër të një debati të rëndësishëm reformimin e mëtejshëm të Partisë Socialiste, Edvini ka treguar se ka ardhur nga pushimet, më i lodhur sesa është nisur. Në një intervistë të gjatë për një të përjavshme, që mban si simbol emërtesën e zhvlerësimit në epokën komuniste, Rama ripërsëriti mallkimet për zgjedhjet kushtetuese që bënë një grup deputetësh të majtë për ta shpëtuar vendin nga një krizë e pafalshme presidenciale, por edhe vendimin përfundimtar për të mos bashkëpunuar me Sali Berishën e mazhorancën e tij, as në kryerjen e reformave, as në emërimin e kryeprokurorit të ri, e afërmendsh, as për një ofertë të gjerë bashkëpunimi, në kuadër të përpjekjeve për anëtarësimin e Shqipërisë në NATO. Nga pushimet e Edvinit nuk posedojmë ende ndonjë foto, për t’ia ofruar publikut, megjithatë marrim vesh se ai është kthyer njëlloj obstruksionist si më parë, ndoshta sipas një parimi frojdist, edhe për shkak të aversitetit që i vjen nga mospërmbushjet personale. Edvini dhe “gjinkallat” e tjera të së majtës, ku spikat natyrshëm Ilir Meta me pseudoprotestat e tij, i janë kthyer gjuhës së mosbashkëpunimit, duke shuar shpresat për një detantë politike vjeshtën e ardhshme. Edhe Zhegu i revizionuar në PS, i përgjigjet të njëjtës gjuhë konflikti, kur s’harron të përsërisë se e kërkon zonën 31 me çdo kusht, pasi është me të vërtetë çun lagjeje e i rritur denbabaden në Tiranë, pavarësisht se mijëra durrsakë të dëshmojnë përditë se si e kanë parë Luanin të rritet në vendlindjen e tij, në një lagje të Durrësit.
Edvinit i punon në këtë zheg mendja veç për grupin armiqësor të Fatos Nanos, të cilin ka ndërmend ta likuidojë politikisht nëpërmjet nismës maoiste të shtatorit “Edvini kuvendon me Shqipërinë”. Pra gjinkalla socialiste vjen nga jashtë, si një palë tjetër, si një alien politik dhe kuvendon me shqiptarët, me të vjetrit, në këtë rast me socialistët e Fatosit, kuvendon për t’u mbushur mendjen t’i blejë (politikisht) për partinë e tij të re, për ylberizmin. Bllokimi i krejt të majtës dhe abstenimi i saj nga përpjekjet e përgjithshme për kryerjen sa më të shpejtë të reformave që kërkohen nga Komisioni Evropian janë një lajm i keq që i vjen opinionit publik në këtë gusht. Gjithsesi gjinkallat e të majtës, të kapluara nga zhegu, e kanë vetë në dorë të marrin vendimin që politikisht mendojnë se u intereson. Pavarësisht se ai mund të mos jetë shumë kompatibël me interesat e shqiptarëve, i përket atëhere mazhorancës të kërkojë interlokutorë të rinj gjetkë, për të krijuar shumicën e duhur që do të kryejë reformat, e afërmendsh edhe do të ndajë më pas dividentët politikë që rrjedhin nga afrimi i vendit me strukturat euroatlantike