Rusia rifillon fluturimet strategjike ndërkontinentale. Bombarduesit në qiell, praktika ishte pezulluar që nga ‘92
Fryn erë Lufte e Ftohtë
Moska i kthehet së shkuarës. Putin: është një lëvizje e motivuar nga nevojat tona
Moska i rikthehet të shkuarës. Nga mesnata e djeshme, bombarduesit strategjikë rusë kanë rifilluar fluturimet me rreze të gjatë, në mënyrë të vazhdueshme, pas plot 15 vitesh pezullim. Kjo është lajmëruar nga vetë Presidenti rus, Vladimir Putin, në provën e fundit të forcës, duke tentuar kështu t‘i tregojë botës se Rusia është kthyer në një superfuqi ushtarake. E në këtë mënyrë, Kremlini i është rikthyer një prej aktiviteteve strategjike të aeronautikës ruse, tipike për epokën e Luftës së Ftohtë. Ky, në fakt, është vetëm një tjetër hap përpara në përballjen me Shtetet e Bashkuara të Amerikës, përballje kjo që i ka vendosur të dyja vendet në pozicione të kundërta në lidhje me mburojën hapësinore e mbi programet ushtarake dhe i shtohet ndërkohë një tjetër provokimi, atij të një jave më parë, kur bombarduesit rusë depërtuan deri pak kilometra larg bazës amerikane të Guam-it, në ishullin e Paqësorit, duke detyruar pilotët amerikanë të ngrihen me emergjencë në qiell. E kështu, Putin ka kujtuar dje, se fluturimet e tilla ishin ndërprerë në mënyrë të njëanshme, në vitin 1992, por "për fat të keq", ka thënë ai, "jo të gjitha vendet kanë ndjekur shembullin tonë. Fluturimet strategjike, nga ana e vendeve të tjera, vazhdojnë". Rifillimi i këtyre fluturimeve, në mënyrë të qëndrueshme, është diktuar "nga nevojat e sigurisë që ka Rusia", ka vijuar Presidenti Putin. "Sot, më 17 gusht, pikërisht në mesnatë, 14 avionë bombardues strategjikë, të armatosur me raketa, avionë mbështetës dhe aerocisterna, janë ngritur në fluturim nga shtatë aeroporte ruse, në pika të ndryshme të vendit. Misioni luftarak ka filluar", deklaroi Putin, ndërsa fliste në malet Urale, ku edhe po merr pjesë në një stërvitje të përbashkët me Kinën, të organizuar nga "Organizata e Shangait". Avionët do të qëndrojnë në fluturim për 20 orë, në kontakt direkt me flotën, ka shtuar Presidenti rus. "Presim që partnerët tanë ta mirëkuptojnë rifillimin e patrullimit. Pilotët tanë, me kërkesën time, kanë qëndruar për shumë kohë me duart kryq. Për ta fillon tani një jetë tjetër", ka vazhduar më tej Putin. Në fakt, ky acarim i marrëdhënieve mes Moskës dhe Perëndimit, ka nisur prej kohësh. Muajin e shkuar Rusia doli nga traktati për reduktimin e forcave konvencionale në Evropë, duke fajësuar vendet perëndimore se nuk e kishin ratifikuar ende versionin e amenduar të traktatit të 1999-ës. Putini gjithashtu ka akuzuar vendet anëtare të NATO-s, se kanë dhunuar traktatin për raketat balistike, me projektin e mburojës hapësinore që SHBA-ja planifikon të ndërtojë në Evropën Lindore. Bombarduesit rusë, ndërkohë, kanë fluturuar së fundmi edhe në afërsi të hapësirës ajrore amerikane në afërsi të Alaskës. Muajin e kaluar, ndërkohë, dy avionë "Tupolev 95", të njohur edhe si "bears" (arinjtë) nisur nga emri i koduar që përdor NATO për ta, devijuan në jug të trajektores së tyre normale të patrullimit, duke iu afruar brigjeve norvegjeze e më pas edhe Skocisë. Dy tornado të forcës ajrore britanike, RAF, u ngritën në fluturim për t‘i detyruar ata të ndryshojnë drejtim. Rusia po përdor bumin e saj në sektorin e naftës dhe gazit, për të fuqizuar forcat e saj të armatosura.
Analistët
Presidenti Putin po sinjalizon edhe një herë tjetër qëllimin e Rusisë për t‘u bërë një prezencë ushtarake e dukshme në skenën ndërkombëtare. Kjo është pjesë e asaj që shumë analistë e shikojnë si një politikë të jashtme më aktive, të nxitur nga të ardhurat e mëdha që vijnë nga nafta dhe gazi
Shqip
Përgjigju Duke Cituar
Krijoni Kontakt