Tmerr - djali mbyt nenen

[vagabondo_nyc]

Fier, djali mbyt nënën 68-vjeçare, mister shkaku

Loli Çeçoaliaj
26-07-2007

Aleksandër Filoqi

Fier- Djali ushtron dhunë fizike mbi nënën dhe më pas e mbyt, duke e lënë të vdekur. Ngjarja e rëndë, që shënon tjetër viktimë në radhët e krimit brenda familjes,ndodhi mbrëmjen e së martës në qytetin e Fierit, në rrethana ende të pa qartësuara mirë. Sipas policisë, autor është Aleksandër Filoqi, 35-vjeç, i cili ka mbytur, duke e kapur për fyti nënën e tij, Vajdona Filoqi, 68-vjeç. Pas krimit, ai nuk është larguar nga shtëpia dhe i është dorëzuar pa bërë asnjë rezistencë policisë, që mbërriti në vendin e ngjarjes pas një telefonate nga fqinjët e viktimës. Por, 35-vjeçari, deri dje, në orët e vona, nuk ka rrëfyer asgjë për ngjarjen dhe motivet që e çuan në këtë krim makabër.
Ngjarja

Krimi brenda familjes Filoqi ndodhi në lagjen "Liri" të qytetit të Fierit rreth orës 22.30 të së martës, ndërkohë që më parë gruaja e shtëpisë, nëna e Aleksandrit, Vajdona Filoqi, ka qenë pre e dhunës së madhe fizike që djali i saj ushtroi mbi të. Sipas burimeve nga vendi i ngjarjes, mësohet se djali ka qenë më parë i martuar e tashmë i divorcuar. Por nga martesa, sipas burimeve zyrtare, nuk ka pasur fëmijë. Fqinjët, që banojnë në të njëjtën ndërtesë dykatëshe me familjen Filoqi tregojnë se atë mbrëmje kanë dëgjuar shumë zhurmë dhe thirrje për ndihmë. «Por nuk u treguam shumë të kujdesshëm, pasi kohët e fundit prej shtëpisë Filoqi vinin shpesh herë thirrje të tilla dhe mendonim se thërriste djali, që njihej si me probleme mendore»,- tregojnë ata. Të mësuar me këtë situatë, nuk ia kanë vënë veshin thirrjeve të dëshpëruara të gruas, që nuk mundi t'i shpëtojë dot 'rebelimit' të të birit.

Mbytja

Vetëm kur njëri prej familjarëve ka bërtitur i alarmuar për ndihmë, ndërsa ka parëpërtokë gruan 68-vjeçare, fqinjët kanë rendur me vrap për ta ndihmuar, por ishte tepër vonë. Ndërkohë që dikush njoftoi edhe policinë. Ekspertët, që bënë këqyrjen e kufomës vunë re shenja të dukshme në trup, që sipas tyre ishin pasojë e dhunës së madhe të ushtruar mbi të. «Shenjat e gjetura nga ekspertët në pjesë të ndryshme të trupittregojnë qartë se mbi 68-vjeçaren, Vajdona Filoqi është ushtruar dhunë e rëndë»- thonë ata, ndërsa sqarojnë se vdekja e menjëhershme e gruas është shkaktuar nga mbytja në fyt që i ka bërë djali. «Shenjat e qarta të lëna në fyt në momentin që e ëma po mundohej t'i shpëtonte nga duart tregojnë qartë se kjo dhunë e ushtruar është shkaku final i vdekjes së gruas»,- thonë ekspertët, nga të dhënat paraprake të ekspertizës mbi trupin e viktimës.

Arrestimi

Vrasësi i nënës u gjet nga policia në banesë, ndërkohë që e ëma ishte përtokë e pajetë. Në kohën që policia ka shkuar në vendin e krimit, 35-vjeçari ka qenë në dhomën tjetër të shtëpisë. I pyetur nga policia lidhur me ngjarjen, mësohet se ai e ka pohuar vrasjen dhe në këto kushte policia e ka shoqëruar në komisariat. Sipas burimeve policore nuk jepet ndonjë e dhënë e saktë rreth motiveve. Gjithsesi autori i krimit kishte kohë që herë pas here shfaqte shenja depresioni dhe këtë fakt e pohojnë edhe familjarët, por edhe komshinjtë. Ndërkaq, policia lidhur me këtë vrasje po tregohet e kujdesshme në hetimin e motiveve që shkaktuan krimin në familje. Mësohet se ende po punohet për zbardhjen e plotë të ngjarjes, shkaqet dhe motivin. Ndërsa autori do të përballet me pasojat ligjore për krimin e rëndë që kreu.

Fqinjët: Dëgjuam thirrje për ndihmë

Mbrëmjen e krimit fqinjët e familjes Filoqi pranojnë se kanë dëgjuar thirrje për ndihmë. Por pranojnë gjithashtu se nuk i kanë kushtuar vëmendje, pasi sipas tyre kohët e fundit, sidomos në ditët e nxehta, djali i shtëpisë, Aleksandri, bërtiste shumë herë. Sipas tyre, ai kishte shfaqur shenja depresioni, për të cilat nuk janë në gjendje të përcaktojnë shkaqe apo arsye.