Per nje grusht "evro" me teper-arrestohen 70 vjecaret

[BARAT]

Ndjekje penale për çiftin 70-vjeçar, falsifikuan për pension në Greqi

08/07/2007

Riza e Ëngjëllushe Xhema u përpoqën të merrnin pasaporta me emrat e një çifti minoritar

Një çift të moshuarish nga Kuçova, por banues në Elbasan, do të ndiqen penalisht. Riza e Ëngjëllushe Xhema 70 e 68 vjeç janë penalizuar për shkak se 10 ditë më parë janë zbuluar nga policia pasi kanë falsifikuar aktet e gjendjes civile të një tjetër çifti për të përfituar dokumentet minoritare, për përfitim pensioni në shtetin grek.

Zbulimi

Sipas burimeve zyrtare në këtë qark, ata jetojnë që prej 17 vjetësh në shtetin grek dhe burime brenda sektorit të antikrimit ekonomik thanë për gazetën se në paraditen e djeshme nga sektori i pasaportave është zbuluar se çifti 70-vjeçar 10 ditë më parë ka dorëzuar dokumentet për t’u pajisur me pasaporta ndërkombëtare. Por sapo punonjësja ka futur në kompjuter fotot e çiftit, ka kuptuar se në dokumente ka një falsifikim.

Sipas këtyre burimeve, çifti Xhema ka pasur në dokumentet e identifikimit vetëm fotot, pasi emri dhe të gjitha gjeneralitetet kanë qenë të çiftit po nga Elbasani Jani dhe Urani Bashura 65 e 62 vjeç të cilët kishin bërë pasaporta disa vjet më parë. Sapo ka zbuluar skandalin, punonjësja referente e pasaportave ka lajmëruar organet kompetente.

Kanë qenë oficerët e policisë të sektorit të antikrimit ata që kanë marrë e sekuestruar dokumentet e aplikimit për pasaporta në cilësinë e provës materiale si dhe kanë përpiluar dosjen përkatëse për dy 70-vjeçarët me akuzë atë të falsifikimit, akuza këto të parashikuara nga nenet 206 e 209 të Kodit Penal.

Sipas neneve përkatëse, dy të moshuarit rrezikojnë dënimin nga gjobë deri në 4 vjet burg. Burime të policisë sqaruan për gazetën se arsyeja e këtij falsifikimi ka qenë synimi që Riza dhe Ëngjëllushe Xhema të pajiseshin me pasaporta me emrat e Jani dhe Urani Bashurës, dhe të arrinin më pas të merrnin pension në shtetin grek.

Zanafilla

Falsifikimi që ka çuar në ndjekje penale dy 70-vjeçarët e ka zanafillën një vit më parë, kohë në të cilën kanë njohur çiftin minoritar Jani e Urani Bashura ku dhe kanë banuar komshi në qytetin e Elbasanit.

Pasi kanë mësuar se çifti në fjalë ka marrë dokumentet greke dhe ka përfituar pension, janë joshur nga përfitimi. Çifti Xhema ka menduar se do t’u shpëtonte halleve ekonomike nëse do të përfitonin dokumentet e minoritetit nëpërmjet mashtrimeve dhe falsifikimeve. Kështu, në qershor të vitit 2006, çifti Xhema ka marrë aktet e gjendjes civile të çiftit Bashura dhe i transferon ato në lagjen “Çlirim” të Fierit më pas transferimit të dokumenteve me fotot e tyre çifti Xhema i ka bashkangjitur gjeneralitetet e çiftit Bashura. Me certifikatat e falsifikuara janë paraqitur në sportelin e bërjes të pasaportave për të aplikuar për t’u pajisur me dokumentin ndërkombëtar.

Por sapo operatorja ka futur të dhënat dhe fotot në kompjuter për të prodhuar pasaportat, ka parë se dokumentet kanë qenë të falsifikuara dhe për këtë ka lajmëruar organet kompetente. Menjëherë ka nisur ndjekja penale për çiftin Xhema nga Elbasani në mungesë, pasi sapo çifti falsifikues ka mësuar se policia e ka zbuluar, është larguar menjëherë prej nga kishte ardhur.

Falsifikim i dyfishtë

Çifti Xhema, në kërkim edhe nga Interpoli

Sikur të mos mjaftonte ky falsifikim një tjetër iniciativë “e çmendur” e çiftit Xhema ka qenë transferimi i dokumenteve të çiftit Bashura nga qyteti i Fierit për në lagjen “Çlirim” të qytetit të Beratit. Në qytetin e Beratit Xhema ka bërë të njëjtin veprim, por këtë radhë nuk kanë udhëtuar nga Greqia, por kanë dërguar një prokurë të posaçme ku i moshuari ka autorizuar vëllain e tij dhe ky i fundit ka ndjekur procedurat, pasi ka marrë dokumentet e identitetit, pra aktet e gjendjes civile. Certifikatat i ka paraqitur në sportelin blu ku ka aplikuar për dokumentin ndërkombëtar, pasaportën, por edhe në këtë rast operatorja ka zbuluar abuzimin dhe ka lajmëruar organet kompetente të cilët kanë ngritur dosjen përkatëse.

Vëllai i autorizuar ka qëndruar deri në momentin e zbulimit dhe sapo ka mësuar se është zbuluar, është larguar pa lënë adresë. Në këto kushte çifti 70-vjeçar Riza dhe Ëngjëllushe Xhema kërkohen nga dy komisariate për të njëjtat akuza.

Burime të policisë thanë për gazetën se tashmë policia e antikrimit ekonomik, pasi ka përpiluar dosjen përkatëse me dy akuzat, ia ka përcjellë në paraditen e djeshme organit të prokurorisë për të vazhduar hetimet e mëtejshme për zbardhjen e këtij abuzimi.

Po sipas burimeve policore edhe me bashkëpunimin e organit të prokurorisë dy fotot e Riza dhe Ëngjëllushe Xhema janë shpallur në kërkim ndërkombëtar nga Interpoli.

gazeta metropol 9-07-2007