Privatizimi i Albpetrol: Anulohet privatizimi, procesi rinis pas zgjedhje

[Albo]

Ruli: Privatizimi i “Albpetrol”-it do të trefishojë pagat e punonjësve

Ministri Ruli tha dje, gjatë një takimi me sindikatat e naftëtarëve se, privatizimi i kompanisë “Albpetrol” do të sjellë futjen e tyre në treg, duke trefishuar pagat e punonjësve. Ndërkaq, efekti i daljes së një pjese të madhe të punëtorëve nga puna do të mbulohet nga shteti me anë të asistencës sociale

Ministri i Ekonomisë, Genc Ruli, u premtoi dje punonjësve të “Albpetrol”- it, të cilët do të mund të preken nga reformat në sektorin e nxjerrjes së naftës, se do t’i mbështesë me asistencë. Ministri Ruli pati dje një takim me përfaqësues të grupimit sindikal të naftës dhe Konfederatës së Sindikatave të Shqipërisë, ku u diskutua për problemet që hasin në punën e tyre punonjësit e naftës, si dhe për problemet që pritet të bien mbi një pjesë të punonjësve të këtij sektori, si rezultat i reformave që do të zhvillohen në këtë sektor. Si rezultat i reformave pritet që një pjesë e mirë e punonjësve të këtij sektori të dalin pa punë, gjë që ka qenë ndër shqetësimet kryesore të sindikatave. Përfaqësuesit e grupimeve sindikale kanë kërkuar prej ministrit trajtim më të mirë financiar për punonjësit që do të shkëpusin marrëdhëniet e punës me shoqërinë “Albpetrol”, si rezultat i marrëveshjeve hidrokarbure me firmat e huaja apo edhe reformave të herëpashershme në këtë sektor. Siç u shpreh ministri, me privatizimin e shoqërisë “Albpetrol”, një pjesë e mirë e punonjësve do të duhet të dalin pa punë, për arsye se në këtë shoqëri ka patur një numër rreth tre herë më të madh punonjësish në raport me prodhimin e naftës. Kjo sipas Rulit, kjo ka sjellë që edhe pagat e këtyre punonjësve të jenë trefish më të ulëta sesa ajo që ata duhej të merrnin në realitet, nëse administrimi i kompanisë do të ishte bërë siç duhej. Në këtë mënyrë, ministria mendon se privatizimi i kompanisë do të sjellë të paktën trefishimin e pagave të punonjësve të kësaj kompanie. Sipas saj, privatizimi i “Albpetrol”-it është i pashmangshëm dhe se reforma në këtë sektor është e domosdoshme. Kjo vjen pasi, sipas minsitrit, deri më tani këto kompani nuk janë administruar si biznese të mirëfillta, por si skema të asistencës sociale. Në këtë mënyrë, privatizimi do ta fusë “Albpetrol”-in në treg, duke bërë që administrimi i kësaj kompanie të jetë produktiv. Megjithatë, ministra ka marrë parasysh problemet sociale të hapura nga procesi i privatizimit, duke premtuar asistencë sociale ndaj punëtorëve që do të mbeten pa punë nga ky proces. Madje, ministria ka kërkuar edhe pjesëmarrjen e sindikatave në procesin e bërjes së një kalkulimi të mundësive reale të “Albpetrol”-it për pagesën e asistencës. Përfaqësuesit e sindikatës kanë rënë dakord që vetëm pas përllogaritjeve të këtyre mundësive, do të mund flitet se për çfarë afati kohor do të paguhen punonjësit, pasi të ndërpresin marrëdhëniet e punës me këtë kompani. Përfaqësuesit e grupimit sindikal të naftës (ku bëjnë pjesë Sindikata e Punonjësve të Naftës së Shqipërisë, Sindikata e Punonësve të Naftës Patos, Sindikata e Lirë QPN Gorrisht Vlorë, Sindikata e Pavarur QPN Kuçovë dhe Sinditata Autonome e Naftës Patos), e kanë vlerësuar këtë takim të parë njohës të problemeve të tyre, duke u shprehur të gatshëm të dialogojnë me qeverinë në plotësim të kërkesave të tyre.

Tema

[Albo]

Kompania amerikane “Patom Bogs” konsulente për privatizimin e “Armo”-s

“Patom Bogs” është një ndër kompanitë më të njohura në botë në dhënien e konsulencës juridike dhe financiare për privatizimin e kompanive që operojnë në fushën e naftës. Parashikohet që brenda vitit të përfundojë konsulenca dhe privatizimi i kompanisë “Armo”. Vlera e saj në treg llogaritet në rreth 110 milionë dollarë

Kompania amerikane “Patom Bogs” është përzgjedhur për të kryer konsulencën për privatizimin e kompanisë publike të përpunimit dhe tregtimit të naftës, “ARMO”, bënë me dije, dje, zyrtarë të Ministrisë së Ekonomisë, Tregtisë dhe Energjitikës. Ata thanë se, aktualisht po punohet për kushtet e kontratës së shërbimit me këtë kompani.

“Patom Bogs” është një ndër kompanitë më të njohura në botë në dhënien e konsulencës juridike dhe financiare për privatizimin e kompanive që operojnë në fushën e naftës. Parashikohet që brenda vitit të përfundojë konsulenca dhe privatizimi i kompanisë “Armo”, që është planifikuar në objektivat e METE-s, thanë burimet. Siç dihet, kompania shtetërore “Armo” është në një proces të gjerë ristrukturimi për të hyrë në procesin e privatizimit, proces i cili mendohet të nisë që këtë vit me shpalljen e tenderit ndërkombëtar. Kompania shtetërore “Armo” mendohet se mund të hyjë në tender për një shifër mbi njëqind e dhjetë milionë dollarë, por të dhënat nga Ministria e Ekonomisë bëjnë me dije se, qëllimi kryesor është që kjo kompani të privatizohet nga një investitor serioz, i cili do të rrisë investimet dhe do ta bëjë atë një kompani të fuqishme dhe të rëndësishme në ekonominë e vendit.

Edhe ristrukturimi i saj dhe konsulenca që do të kryejë kompania e njohur amerikane ka për qëllim vetëm këtë fakt, tërheqjen e sa më shumë të interesuarve të biznesit të huaj, të cilët do të jenë të aftë të ofrojnë një kontratë të tillë të rëndësishme dhe me kushte të mira për ekonominë e vendit dhe më së pari për fuqizimin e kompanisë.

Procesi i privatizimit të ndërmarrjeve të mëdha publike është në një fazë të rëndësishme dhe në të janë përfshirë njëherazi korporata e energjisë KESH me sektorin e saj të transmetimit, “INSIG”-u, etj. Pak ditë më parë përfundoi privatizimi për telefoninë fikse, ku kompania shtetërore “Albtelecom” iu shit një kompanie turke “Çalik Enerji”. “INSIG”-u është në proces dhe brenda këtij viti privatizimi i tij pritet të jetë fakt.

Ndërkohë, për divizionin e transmetimit të korporatës së energjisë procedurat janë po ashtu në proces dhe po vijon konsultimi me Bankën Botërore për këtë gjë.

Tema

[Albo]

Albpetrol del në shitje, qeveria miraton formulën e privatizimit

Qeveria u është rikthyer edhe njëherë privatizimeve strategjike dhe këtë herë bëhet fjalë për Albpetrolin. Dje, në mbledhjen e radhës të Këshillit të Ministrave është diskutuar lidhur me formulën e privatizimit të kompanisë publike të nxjerrjes së naftës. Deklaratat për këtë proces kanë vite që bëhen, por dje, kreu i Ekzekutivit, Sali Berisha, dha edhe detajet lidhur me procedurën që do të ndiqet. Në fjalën e tij ai u shpreh se privatizimi i Albpetrolit do të bëhet sipas ligjit të miratuar në ’98-n për privatizimin strategjik. Kompania e nxjerrjes së naftës nuk është e vetmja që do të privatizohet. Aktualisht qeveria ka në proces INSIGU-n, që është një nga rastet ku ofertat nuk kanë qenë të shpeshta. Sakaq, Albpetroli, pavarësisht sektorit të rëndësishëm që përfaqëson, ka një të kaluar me borxhe dhe me probleme, por vitin e kaluar kompania shleu ndaj buxhetit 8.1 miliardë lekë për 4 muaj. Në kohën kur ministër i Ekonomisë ishte Dritan Prifti, u bënë deklarata se për vlerësimin e kompanisë dhe auditit do të merrej konsulencë ndërkombëtare. Një dilemë e madhe që i është shtruar qeverisë më herët ka qenë ajo e shitjes te privati apo e dhënies me koncesion të kompanisë. Gjithsesi, me kalimin e vendimit për miratimin e formulës së privatizimit, detajet pritet të zbardhen në vijim. Qeveria kohëve të fundit i ka mëshuar fort pjesës së privatizimeve, ku një nga frazat më të lakuara ka qenë ajo e privatizimit të gjithçkaje, me përjashtim të shkollave, hidrocentraleve dhe spitaleve.

INSIG në proces privatizimi
Kompania shtetërore “INSIG” është prej kohësh në proces privatizimi. Pak kohë më parë u bë dhe ndryshimi i çmimit dysheme, i cili nga 40 milionë euro që ishte, u ul pasi interesi i investitorëve për privatizimin e kësaj kompanie ka qenë shumë i ulët. Përveç kompanive të huaja, tani oferta mund të bëjnë edhe kompanitë shqiptare për privatizimin e INSIG-ut.

Panorama

[Albo]

Komisioni i Ekonimisë, OK privatizimit të Albpetrol

TIRANE- Komisioni për Ekonominë dhe Financat miratoi sot pa votat e opozitës projektligjin e ministrisë së Ekonomisë për privatizimin e shoqërisë publike të naftës Albpetrol sh.a. Patos. Gjatë diskutimeve opozita u shpreh kundër privatizimit të shoqërisë Albpetrol sh.a, duke kërkuar që shoqëria të jepej me konçesion.

Më herët Komisioni për Çështjet Ligjore, Administratën Publike dhe të Drejtat e Njeriut shqyrtoi dhe miratoi projektligjin “Për përcaktimin e formës dhe të strukturës së formulës së privatizimit të shoqërisë “Albpetrol”, sh.a. Patos”.

Nëpërmjet këtij procesi, qeveria synon të sigurojë investime private për zhvillimin e sektorit të naftës , të përmirësojë teknologjinë dhe sistemin e menaxhimit, standartet mjedisore në këtë sektor, si të dhe krijojë kushtet për liberalizimin e tregut të hidrokarbureve.

Panorama

[Edvin83]

Qeveria privatizon naftën nën tokë
2011-12-16

Bashkë me Albpetrol” shitet edhe qiraja e puseve që i janë transferuar koncesionarëve

Kuvendi miratoi dje me 72 vota shitjen e “Albpetrol”, por nga ana tjetër qeveria nuk ka publikuar asnjë të dhënë çfarë burimesh nafte dhe asetesh disponon shoqëria. Në Shqipëri dihet që ka gjithsej 230 milionë fuçi (1 ton baras me 6.2 fuçi) naftë të nxjerrshme me teknologjinë aktuale, por kjo naftë gjendet pothuajse tërësisht në duart e kompanive private. Këto shoqëri që shfrytëzojnë puset e naftës të “Albpetrol” me anë të koncesionit paguajnë te qeveria rreth 1/6 e çmimit të fituar nga shitja.

Privatizimi i “Albpetrolit” po bëhet paksa ndryshe. Edhe pse qeveria nuk jep asnjë të dhënë se sa janë rezervat e kësaj kompanie, fakti është se privatizimi i saj sjell edhe privatizim të rezervave. Në historinë e Shqipërisë, pasuritë natyrore janë dhënë me koncesion, por nuk janë shitur kurrë, as në kohën e Ahmet Zogut.
Faktet mbi naftën

Shumë spekulime janë hedhur mbi rezervat e naftës në vend dhe legjendat mbi depozitat me vlerë disa miliardësh dollarë, por nga ana tjetër faktet tregojnë se shteti nuk ka fituar aq sa duhet në raport me pritshmëritë. Pavarësisht se të ardhurat e kompanive koncesionare arrijnë në qindra milionë dollarë në një vit, shteti shqiptar nga renta minerare, sipas ministrit të Ekonomisë, në 4 vitet e fundit ka përfituar vetëm 90 milionë dollarë.

Specialistët e Ministritë së Ekonomisë paraqitën dje në Kuvend disa shifra jo fort të qarta. “Rezervat gjeologjike të vlerësuara në vendburimet ekzistuese janë rreth 440 milionë tonë naftë në shtresë. Këto nuk janë të nxjerrshme teknikisht, por sasia e nxjerrjes së tyre kushtëzohet nga teknologjitë që përdoren për nxjerrjen e këtyre rezervave. Në vlerësimet e bëra deri në 2008, rezerva të nxjerrshme konsiderohen 84 milionë tonë. Nga këto deri në 2010 janë nxjerrë rreth 53 milionë dhe janë për t'u nxjerrë 30 milionë tonë rezerva nafte. Pra nëse në vendburimin e Patoz-Marinzës janë rreth 250 milionë tonë, që i bie të jetë vendburimi më i madh i naftës në tokë në Europë. Nga këto rezerva janë të nxjerrshme 18 milionë tonë”, thotë Stavri Dhima, drejtor në METE për sektorin e hidrokarbureve. Nisur nga shifrat e paraqitura nga specialisti i ministrisë, me çmimin e tregut të naftës në bursa, 18 milionë tonë rezerva të mbetura vlejnë rreth 7 miliardë dollarë, por nga ana tjetër nuk sqarohet se kujt i takojnë këto rezerva, “Albpetrolit” apo kompanive aktuale koncesionare, si “Bankers” apo “Stream Oil” etj. Aktualisht qeveria i merr kompanive në formë takse 10 për qind nga shitja e naftës bruto, kurse 1 për qind shkon për “Albpetrol”, sikurse me ligj shoqëritë duhet të derdhin edhe 50 për qind të fitimit të krijuar, por kjo nuk para ndodh, për shkak se janë në fazë investimi.
Naço: Pse po e shesim

Për më shumë se katër orë diskutime, rreth 30 deputetë debatuan dje me njëri-tjetrin lidhur me projektligjin “Për përcaktimin e formës dhe të strukturës së formulës së privatizimit të shoqërisë “Albpetrol SH.A Patos”. I takonte ministrit të Ekonomisë, Nasip Naços të jepte sqarimet e duhura se pse qeveria zgjodhi ta shiste kompaninë 100 për qind dhe jo ta kalonte te privati me koncesion. “Nga shitja totale bëhet e mundur që për shtetin shqiptar të sigurohet edhe një sasi e konsiderueshme e vlerave monetare që në fillim të këtij operacioni, nëpërmjet privatizimit të aseteve që administron ‘Albpetrol’, siç janë toka dhe çdo pus dhe objekt të trupëzuar që aktualisht janë në inventar, duke përfshirë edhe të drejtat dhe lejet që shoqëria disponon, të cilat në vetvete kanë një vlerë të konsiderueshme në treg”, tha Naço. Sipas tij, të gjitha ato asete që ndër vite u janë dhënë koncesionarëve pa shpërblim, sot nëpërmjet këtij ligji, kërkohet që të shiten me tender të hapur ndërkombëtar për të marrë një vlerë të maksimalizuar fitimi dhe për të arkëtuar direkt në buxhetin e shtetit. Gjithashtu do të vazhdohet të merren edhe të ardhura nga shfrytëzimi i rezervave hidrokarbure si renta minerare, tatimfitimi, taksa të ndryshme, të cilat do të arkëtohen direkt në buxhetin e shtetit.

[Albo]

Eshte sterprovuar ne keto 70 vjetet e fundit qe nafta e Ballshit eshte nje nafte qe ka nje kosto te larte rafinimi dhe sipas studimeve qe kam lexuar, edhe kompania aktuale kanadeze qe ka marre ARNO ka thene se cmimi i nxjerrjes se nje fucie nafte ne ballsh eshte $70. Nje cmim teper i larte ne fakt. Qe do te thote, qe nje fuci nafte ne tregun boteror duhet te jete me i larte se $70 ne menyre qe kjo kompani te nxjerri nje fitim.

Arsyeja perse privatizimi eshte gjeja me e mire eshte se:

1. Do te afroje ne Shqiperi korporata gjigande te naftes qe jane gjithmone te interesuara te privatizojne puse dhe jo te marrin me koncension. Investimi fillestar qe kerkon nafta eshte teper i larte dhe eshte e veshtire te marresh me koncension nje pus per 20 vjet, me shpresen se do te rekuperosh investimin fillestar qe mund te kapi shifra disa miliard $ brenda 20 vjetesh, e te nxjerresh edhe nje fitim. Kini parasysh qe cmimi i naftes nuk eshte fiks, por diktohet nga tregu nderkombetar. Rritja e konkurences se privatizimin e Albpetrolit do te rrisi edhe vleren e privatizimit te kesaj ndermarrje publike.

2. Privatizimi i Albpetrol do te sjelli ne vend teknologjine me te fundit si ne nxjerrjen e naftes nga nentoka, edhe ne rafinimin e saj. Sic e zura ne goje me lart, keto investime jane shume te medha, dhe kane per qellim qe te rrisin si sasine e naftes qe nxirret nga nentoka, edhe do te pershpejtoje edhe shitjen e kesaj nafte ne treg. Privati do te jete gjithmone i interesuar qe te nxjerri sa me shume nafte ne nje kohe sa me te shkurter, pasi kjo dikton edhe fitimin e tij.

3. Privatizimi eshte ne interesin e shtetit shqiptar, pasi shteti do te vjeli te ardhura te mira jo vetem nga privatizimi, por edhe nga perqindja qe shteti mban nga cdo fuci nafte qe privati nxjerr ne treg. Sa me shume nafte prodhohet ne Ballsh nga privati, aq me shume para ne buxhetin e shtetit nga shitja e kesaj nafte. Keto te ardhura te konsiderueshme te buxhetit te shtetit do te financojne prioritetet e tjera te qeverise sic jane infrastruktura e arsimi.

4. Prania ne Shqiperi e korporatave gjigande te energjise, do te ndihmoje ne konsolidimin dhe zgjerimin e kesaj industrie ne vend. Korporatat do te investojne ne gjithe territorin e vendit per te kerkuar burime nafte e gazi natyror. Keto korporata sjellin jo vetem eksperiencen, teknologjine, tregun, por sjellin edhe kapitale eksploruese: shteti shqiptar nuk ka as kapitalet dhe as teknologjine per te bere dicka te tille.

5. Konsumatori shqiptar do te perfitoje nga privatizimi pasi sa me e larte sasia e naftes se prodhuar ne vend ne treg, aq me i ulet do te jete cmimi ne tregun shqiptar. Shqiptaret do te shpetojne nga kostoja e korrupsionit: vjedhja qe u behet resurseve natyrore nga ministrat e burokratet shteterore sic ka ndodhur ne keto 20 vjet. Privati nuk ka lidhje me ministrat e qeveritaret, dhe eshte gjithmone i prirur per ti sherbyer sa me mire konsumatorit. Arsyeja tjeter perse konsumatori do te perfitoje nga ky privatizim, eshte se do te shkaterrohen me ne fund monopolet e naftes ne vend dhe do te rritet ndjeshem konkurenca mes naftes se importuar e prodhuar ne vend. Nga konkurenca, fiton gjithmone konsumatori pasi cilesia e sherbimit do te rritet, cmimi i naftes do te bier.

6. Perfitimi tjeter i madh do te jete konsolidimi i industrise se naftes ne vend. Deri me sot, kjo industri ka qene e lene pas dore dhe e mbarsur me vjedhje dhe korrupsion. Me hyrjen ne treg te korporatave private, do te rriten rrogat e punetoreve te Albpetrol, do te rritet eksperienca dhe kultura e tyre e punes, do te rritet kerkesa e ketyre kompanive per krahe pune te kualifikuara, do te rriten kerkesat ne universitetet shqiptare per studente qe studiojne ne kete fushe. Shtysa do te jene pagat e larta krahasimisht me profesionet e tjera ne vend.

Privatizime te tilla, nuk i shohin me sy te mire, vetem ata njerez te korruptuar ne politike dhe ne administraten e shtetit, qe duan ti kene keto ndermarrje publike ne duart e tyre, qe sa here qe vijne ne pushtet, te mund ti vjedhin e perdorin per interesat e tyre. Arma me e mire ndaj korrupsionit ne vend eshte privatizimi.

Albo

[Albo]

Berisha në Francë për privatizimin e Albpetrol

Kryeministri Sali Berisha ka shfrytëzuar punimet e seminarit “Bota e Re 2012: Rritje, Ndryshim, Risi” për të ftuar investitorët e huaj të marrin pjesë në privatizimin e Albpetrolit. Kreu i qeverisë u pyet në këtë seminar për zhvillimin e vendit, si dhe për krizën ekonomike. “Gjithsecili duhet të bëjë më të mirën. Prandaj unë besoj që duhet forcuar fibra kombëtare e reformave të çdo vendi dhe duhet proceduar me reforma të thelluara. Kjo është rruga e vetme e përballimit të krizës dhe e zhvillimit. Duke përfunduar, edhe diçka tjetër, në Shqipëri janë duke u ndërtuar 63 hidrocentrale. Në vendin tonë ka kompani ndërkombëtare si “Statkraft” që po investon në energji. Janë duke punuar dhjetëra kompani nga Izraeli deri në Norvegji. Ju ftoj të shihni dhe të ndiqni shumë seriozisht privatizimin e afërt të Albpterolit që ka nisur”, u shpreh kreu i qeverisë. Sipas Berishës, synimi i qeverisë është që Shqipëria të bëhet një vend i gjelbër. “Po punojmë në pyllëzimin e vendit nëpërmjet drurëve frutorë. Vendi im ka shumë pak tokë bujqësore, për momentin ka 1800 m për frymë, më e ulëta në Europë. Por potenciali është shumë i madh nëse zbatojmë pyllëzimin nëpërmjet drurëve frutorë, sepse vendi im është një vend ideal për arrorët. Prandaj ne kemi vendosur të mbjellim 250 milionë drurë arrorë të të gjitha llojeve të arrorëve. Po mbjellim 50 milionë ullinj”.

Panorama

[juanito02]

Fazlliç mbërrin për Albpetrolin. Shoqërohet nga seksioni VIP në aeroport


I mirënjohuri si sekser i Familjes në pushtet, Damir Fazlliç, ka mbërritur të enjten në orët e vona me linjën e Alitalia-s, për të qenë prezent në hapjen e ofertave të shitjes së Albpetrol-it. Fazlliç, i cili ka lobuar pranë qeverisë në favor të Gazprom-it rus, arriti në Rinas rreth orës 12:00 të natës. Për shkak të disa kamerave që prisnin në holl të aeroportit, ai u mor nga njerëz të afërt të kryeministrit me veturë brenda aeroportit, nga seksioni i VIP-ave, dhe shmangu filmimet.

Edhe pse Fazlliç nuk është zyrtar i lartë i shtetit shqiptar dhe as diplomat, shoqërimi i tij formal si VIP bëhet vetëm për shkak të lidhjeve me familjen Berisha.

[Albo]

Pas HEC-eve shtyhet dhe privatizimi i Albtelekomit

Kur dukej se qeveria e kishte me urgjencë privatizimin e aseteve të mbetura “pezull” për të krijuar sa më shumë të ardhura, duket se strategjia ka ndryshuar. Pas hyrjes së afatit të privatizimit të katër hidrocentraleve, tani është vendosur që edhe paketa që qeveria zotëron te kompania “Albtelekom” të shitet në muajin dhjetor, afat që është lënë për prezantimin e ofertave. Supozohej se kjo shitje, në fakt, duhet të bëhej në muajin maj, por tashmë njoftimi është zyrtar. “Ministria e Ekonomisë, Tregtisë dhe Energjetikës njofton zgjatjen e afatit kohor për paraqitjen e ofertave të ankandit publik për shitjen e paketës së aksioneve të zotëruara nga shteti në Albtelekom sh.a, nga 02 maji 2012, ora 12:00, në 10 dhjetor 2012, ora 12:00″, thuhet në një njoftim të Ministrisë së Tregtisë dhe Energjetikës. Qeveria zotëron 24 për qind të aksioneve të Albtelekomit, ndërkohë që 76 për qind e tyre janë blerë vite më parë nga një grup turk. Albtelekomi është ndër të paktat privatizime të mbetura “pezull” dhe që kanë kohë që diskutohen lidhur me shitjen e aksioneve që qeveria ka në këto kompani. Në kohën kur “lumit” të privatizimeve po i vjen fundi për shkak se një pjesë e mirë e tyre kanë përfunduar, qeveria po përpiqet që të maksimizojë fitimet të paktën nga ato asete që ende kanë mbetur. Përveç shitjes së hidrocentraleve Ulzë, Shkopet, Bistrica 1 dhe Bistrica 2, që do të bëhen në muajin shtator, janë edhe një sërë privatizimesh të tjera në diskutim e sipër, siç është INSIG-u, Albpetroli apo edhe Albtelekomi. Privatizimet duket të jenë shpresa e vetme e qeverisë për të ulur deficitin që ka në buxhet si rrjedhojë e mosarkëtimit të të ardhurave në planet e parashikuara. Në jo pak raste është diskutuar mundësia e ndryshimit të buxhetit, shkurtimet e të cilit për këtë vit janë më të vonuara sesa në vitet e kaluara. Nën zë ka pasur deklarime se një ndryshim buxheti do të bëhet në një moment të dytë pas rezultateve të privatizimeve, por kjo nuk është konfirmuar asnjëherë nga Ministria e Financave, e cila ka lënë të hapur mundësinë për ndryshime. Përveç privatizimeve të rëndësishme, paralelisht qeveria vijon edhe me privatizimet e një sërë godinave të listuara më herët nga institucione si Ministria e Mbrojtjes apo të tjera, të cilat nuk i kanë më në përdorim. Lidhur me këto privatizime është Ministria e Financave ajo që bën edhe lajmërimet për datat e zhvillimit të ankandeve.
Haxhinasto fton bullgarët në garën për HEC-et
Ministri i Ekonomisë, Tregtisë dhe Energjetikës u ka bërë thirrje investitorëve bullgarë që të investojnë në Shqipëri, duke u sjellë atyre në vëmendje privatizimin e katër hidrocentraleve, që pritet të bëhet në shtator. Gjatë një takimi të zhvilluar me ambasadorin e Bullgarisë në Shqipëri, Dimitar Arnaudov, Haxhinasto e ka fokusuar fjalën e tij te sektori i energjisë. Muajt në vijim pritet që të zhvillohen edhe një sërë aktivitetesh të përbashkëta me biznesin bullgar dhe atë shqiptar. “Muajt në vazhdim do të bihet dakord për një datë të përshtatshme lidhur me zhvillimin e sesionit të radhës së Komisionit të Përbashkët me Bullgarinë, që do të zhvillohet në Tiranë. Ky sesion do të shoqërohet dhe me një forum biznesi shqiptaro–bullgar”, është shprehur Haxhinasto.

Panorama

[Albo]

Albpetrol, ofertat do paraqiten më 7 shtator

Ofertat e kompanive të interesuara për privatizimin e Albpetrolit do të paraqiten më datë 7 shtator. Ministria e Ekonomisë, ashtu sikurse pritej, ka shtyrë datën e paraqitjes së ofertave duke e lënë këtë pas verës, njëlloj sikurse ka vepruar edhe me privatizime të tjera. “Ministria e Ekonomisë, Tregtisë dhe Energjetikës njofton se data e paraqitjes së ofertave, e specifikuar në Dokumentet Standarde të Tenderit për privatizimin e kompanisë ‘Albpetrol’ Patos, shtyhet nga 26 korriku 2012, ora 12:00 më 7 shtator 2012, ora 12:00″, thuhej në një njoftim të METE-s. Shtyrja e datës së paraqitjes së ofertave për Albpetrolin nën zë u bë me dije 10 ditë më parë, dhe kjo, edhe pse e argumentuar se është kërkuar nga kompanitë, më shumë tingëllon si një strategji e qeverisë për ta “kuotuar” shtrenjtë Albpetrolin nën ndikimin e kohës dhe rritjes së numrit të kompanive pjesëmarrëse. Përfaqësues të Ministrisë ditët e fundit kanë deklaruar se numri i kompanive pjesëmarrëse që kanë shprehur interes për privatizimin e Albpetrolit është rreth 14, ndërkohë që deklarimi i një numri kaq të lartë flet për një pritshmëri të lartë të ardhurash të gjeneruara nga ky privatizim. Albpetroli mbetet aktualisht “shpresa” e qeverisë për të ardhura të majme, pasi cilësohet si një privatizim strategjik, por kjo mbetet për t’u parë. Vala e privatizimeve pritet të fillojë në muajin shtator, duke u hapur me Albpetrolin e duke vazhduar më pas, më datë 10, me hidrocentralet Ulzë, Shkopet dhe më datë 13 me hidrocentralet Bistrica 1 dhe Bistrica 2. Këtë valë pritet që ta mbyllë privatizimi i paketës që ka qeveria të Albtelekomi, e lënë për paraqitje ofertash më 10 dhjetor.

Panorama