Eja më 30

[skipetar]

http://vetevendosje.org/sh/images/st...endosje_92.pdf

Eja më 30

Shqiptar Oseku

Krerët e korruptuar kanë nisur ta shajnë “Evropën kurvë”, pa u kujtuar fare se kjo sjellje bën pjesë në mostrën e dështimeve të tyre politike. Zemërimi i tyre i shpifur kërkon ta fsheh fajin e tyre në dramën e Kosovës. Por protestat, që tani po ngriten edhe në institucionet koloniale të UNMIK-ut, po ua paralajmërojnë fillimin e fundit

“Uh! Evropë, ti kurvë e motit
qi i rae mohit besës Zotit
po a ky a shej i qytetnis
me da tokën e Shqypnisë
per me mbajt këlysht e Rusisë?”.

Vargjet e Gjergj Fishtës, bardit të nacionalizmit shqiptar, shkruar para njëqind vjetësh, janë përsëritur nga plot breza shqiptarësh zemërplastë. Mjerisht, ato janë keqkuptuar goxha shpesh. Pse austriakët na kishin faj që bajraktarët në Shalë e Shosh s’lejonin të vihet kufiri, meqë kishin rënë në gjak për një lopë, a një arë, a diçka të ngjashme? Na kanë faj neve evropianët sot, që i kemi lënë ata të ekipit negociator ta shkërryejnë veten e neve në sytë e botës?
Ne na e kanë anuluar demokracinë me dekret, e dikush ende e luan “deputetin” në “parlament”. Ne na vrasin rrugaçë të huaj këtu në shtëpi, e disa negociojnë matanë shtatë malesh për “pavarësi”. Dikush deklaron miliona euro të ardhura pa prekur punë me dorë, e të pabukët ua qajnë hallin, “ranë copë për Kosovë të shkretët, po ç’e do”...! E pra, kush na ka faj? Kush guxon të thotë, se ne s’paskemi mundur të bëjmë më shumë?
Gjysmë shekulli pas Luftës së Dytë Botërore, kur bashkësia ndërkombëtare vendosi të thoshte njëzëri “Kurrë më!”, në Kosovë po reprizohet sërish Mynihu 1938. Perëndimi po e sakrifikon një vend të përcëlluar nga pastrimet etnike, për t’i kënaqur pasionet nacionaliste të shtetit agresor. Veçse, për dallim nga çekët e sllovakët, që ranë pré e një thepisjeje historike, shqiptarët po shkelen në orën e triumfit global të demokracisë. Çekët mbase s’mund të bënin gjë, meqë ishin kohëra të turbullta. Por ne sot mund të bëjmë goxha fort më shumë se ç’kemi bërë gjer tash për veten, për vendin tonë, e për familjet tona.
Ka dallim për Bushin, Putinin e diplomatët e tyre, a dalin dhjetë mijë, apo një milion burra, gra e fëmijë në rrugët e sheshet Prishtinës, për të kërkuar mëvetësi. Ka dallim kur brohorisim ca e vejmë në shtëpi, e kur e zaptojmë Prishtinën për ta shprehur paqësisht por me ngulm pakënaqësinë tonë, me ditë, me javë, a me muaj po qe nevoja. Për bashkësinë ndërkombëtare, ka dallim absolut a u vemi pas krerëve të korruptuar si cjapi pas kasapit, apo i sfidojmë ata.
E pra, ka ardhur momenti t’u themi atyre: Mjaft! Hidhërimi i shtirur i bajraktarëve ndaj lojës me afate është loja e tyre e fundit. Ai është sajuar për ta maskuar fajin e tyre personal e kolektiv në këtë tragjedi. Tash ata vetë e shajnë “Evropën kurvë”, pa u kujtuar fare se si e paskan prurë athua punën që t’u përsëritet kështu historia. Ata shajnë “kurvë”, shkaku që t’u shpëtojnë sharjeve vetë.
Ekipi negociator është ai qeni i keq, që na e ka prurë ujkun në torishtë. Ne i akuzojmë ata si fajtorë, pse kanë pranuar ta negociojnë pavarësinë. I akuzojmë ata si fajtorë, pse e kanë pranuar anulimin e demokracisë qytetare. I akuzojmë ata si fajtorë, pse kanë pranuar një “zgjidhje” që e sakatos Kosovën. I akuzojmë ata si fajtorë, pse persekutojnë qytetarë që ushtrojnë të drejtën demokratike për t’u shprehur kundër. I akuzojmë si fajtorë, pse po hamenden sërish të nisen një rruge që sjell veç zezonë për të gjithë ne. I akuzojmë si fajtorë, por edhe si të marrë, pse u kanë hyrë këtyre aventurave, ndërsa miqtë e aleatët tanë janë të përqendruar tjetërkah. Gjer sot, çmimin e fajit dhe marrisë së tyre e kemi paguar edhe unë e ti, e familjet tona. Gjeniu Fishta, që na sheh nga qielli, sikur të kish shkruar për ta:

“O Perendi a ndjeve
tradhtarët na lanë pa Atdhé.
E Ti rrin e gjuen me rrfé,
Lisat n’për male kot!”

Them se në kushtet tona, ky citat vlen goxha më fort se ai për “Evropën kurvë”. Por me 30 qershor, ti ke mundësi të zgjedhësh se cilin prej tyre e preferon më shumë. Nëse do të plakesh nën tulet e shkurtesave ndërkombëtare, pa shtet, pa të drejta, e pa liri, rri në shtëpi – e truje Evropën. Nëse do më mirë, eja me ne. Zgjedhja është e jotja, qytetar i Kosovës.

[Ali Baba Tepele]

Plotësisht e drejtë. Më mir vonë se kurrë.
Po citoj këtu Ismail Qemalin i cili ka thënë:
"Një fëmij që fle,rritet!
Një komb që fle,vdes."