Pranga babait, ngacmoi vajzën

[Davius]

Elbasan, arrestohet prindi pas denoncimit të 14-vjeçares në polici

Pranga babait, i cili akuzohet se ka ngacmuar seksualisht vajzën e tij 14-vjeçare. Asqeri Malo, 45 vjeç, është arrestuar pasditen e djeshme në kryeqytet, pasi ishte shpallur në kërkim nga policia e Elbasanit. Aksioni është zhvilluar në harkun e dy orëve të pasdites së djeshme në rrethana tepër sekrete nga agjentët e policisë kriminale të Komisariatit të policisë së Elbasanit, në katin e dytë të një banese pesëkatëshe në lagjen "Vullnetari" të këtij qyteti. Megjithëse me rezervë, mund të thuhet se "udhërrëfyesja" e aksionit të policisë ka qenë vetë 14-vjeçarja e përdhunuar, që ka kërkuar ndihmën e policisë pasi ka marrë kurajën të bëjë një denoncim të tillë. Mësohet se vajza 14-vjeçare, A.M., ka denoncuar mëngjesin e djeshëm babain e saj, Asqeri Malon. Pas këtij denoncimi, agjentë të sektorit të krimeve kanë ushtruara një kontroll të befasishëm në banesën e saj, më tepër për të këqyrur rrethanat e familjes.

Burime të rezervuara bëjnë të ditur se vajza jetonte me të ëmën e saj dhe me babain, i cili kohët e fundit kish nisur ngacmimet e turpshme ndaj saj. Vetë kjo e fundit ka deklaruar aktin e turpshëm të Malos, por më vonë do t‘i nënshtrohej edhe një akt ekspertize për të mësuar diçka më shumë për ngacmimet ndaj saj. Sipas komunikatës zyrtare është ndaluar dhe arrestuar Asqeri Malo, 45 vjeç, pasi në banesën e tij janë gjetur dhe sekuestruar në cilësinë e provës materiale një pistoletë e tipit TT, 3500 fishekë pistolete, si dhe 53 gramë heroinë dhe 23 gramë kanabis. Mësohet zyrtarisht se Malo ka qenë person i dënuar më parë për trafik të lëndëve narkotike, por krahas akuzës për këtë lloj trafikimi, tashmë mbi të rëndon vepra e turpshme e përdhunimit të vajzës së tij, provuar sipas ekspertëve të policisë se ngacmimet e turpshme i kryente prej kohësh. Ndërkohë, 14-vjeçarja ndodhet e shoqëruar në polici dhe në ruajtjen e forcave të rendit. Pas arrestimit në Tiranë, Malo është përcjellë në dhomat e paraburgimit të Komisariatit të policisë së Elbasanit. Ndaj tij tashmë rëndojnë dy akuza, ajo e prodhimit dhe shitjes së lëndëve narkotike, si dhe për vepra të turpshme.

Gazeta Shqip