Londer-u Zhvillua Protesta Perpara Ambasades Greke

[Shijaksi-London]

Emigrantët shqiptarë akuzojnë nga Londra: Tirana reagoi dobët

"Dhuna, Karamanlis të na kërkojë falje"

Nga Londra/Muhamed Veliu

Emigrantët shqiptarë në Angli kanë protestuar dje para ambasadës së Greqisë në Londër për dhunën e ushtruar nga policia helene ndaj dy të miturve shqiptarë. Me pankarta në duar, ku shkruhej "Ndal racizmit" dhe "Karamalis, kërkoju falje shqiptarëve", për dy orë ata kanë protestuar paqësisht. Protesta e shqiptarëve në Angli vjen dy ditë më pas tubimit masiv të emigrantëve tanë në Greqi. Përmes një organizimi model, në pak kohë klubi londinez i lëvizjes "Mjaft" bëri të mundur mbledhjen e dhjetëra shqiptarëve në këtë protestë, e para e këtij lloji, organizuar nga shqiptarët e Anglisë. Shumë britanikë kanë ndaluar të habitur për disa momente, duke parë protestën e rrallë para ambasadës greke, që ndodhet në një ndër zonat më të shtrenjta të kryeqytetit britanik.

Letra proteste për ambasadorin grek

Demonstruesit në kor dhe pa ndërprerje, gjatë të gjithë kohës kanë hedhur parulla në anglisht, si "Ksenofobia fjalë greke" etj. E gjithë protesta është ndjekur me vëmendje nga punonjësit e ambasadës, të cilët shpeshherë u afroheshin dritare për të hedhur ndonjë shikim vjedhurazi rreth asaj që ndodhte përjashta. Policia metropolitane londineze, në kohë rekord pranoi kërkesën e klubit londinez të "Mjaft" dhe lëshoi lejen e duhur. Që nga momenti i shfaqjes së videos në ‘YouTube‘, ku dukej shefi i policisë së stacionit të Omonias, duke keqtrajtuar dy minorenë shqiptarë, kjo ka qenë temë dite te shqiptarët e Anglisë. Tejet të indinjuar nga kjo ngjarje, shumë prej tyre, në mënyrë private i kanë dërguar letra proteste ambasadorit grek në Londër.

Një letër edhe për Karamanlis

Nëpërmjet një letre zyrtare adresuar Kryeministrit grek, Kostas Karamanlis, të firmosur nga të gjithë pjesëmarrësit e protestës, "Mjaft London Club" ka shprehur indinjatën e shqiptarëve të Britanisë së Madhe ndaj videos shokuese dhe institucionalizimit të dhunës në strukturat shtetërore greke. Lëvizja i ka kërkuar qeverisë greke t‘i kërkoje falje publikisht popullit shqiptar, dorëheqjen e ministrit të Rendit Publik, Viron Polidoras, dhe zhvillimin e një investigimi të brendshëm policor me transparencë të plotë rreth ngjarjeve brutale. Gjatë dorëzimit të letrës nga Alketa Ceci, Ralf Gjoni dhe Andi Rrugia te personeli i ambasadës, organizatorët u siguruan se kjo letër do të transmetohej nga ambasadori te Kryeministri grek dhe se ata do të merrnin një përgjigje nga qeveria greke për shqetësimet e tyre.



REAGIMET


Emigrantët: Tregoi se mbi gjithçka vë çështjet partiake
"Pakënaqësi dhe për ministrin Basha"

Shqiptarët në Angli, krahas indinjatës së tyre të thellë për videon, nuk e kanë pakënaqësinë për Tiranën zyrtare, në veçanti për ministrin e Jashtëm, Lulzim Basha, i cili nuk reagoi. "Protesta jonë, në fakt, duhet të kishte filluar fuqishëm nga shteti ynë amë, Shqipëria. Sidoqoftë, gjithsecili mban peshën e turpit për vete. Qeveria shqiptare duhet të reagonte më shpejt dhe më ashpër për këtë çështje. Por siç u pa, ata u shpërngulën në Pogradec me zgjedhjet, duke treguar se mbi gjithçka vendosin çështjet partiake të tyre. Duhet falënderuar iniciativa e klubit londinez të lëvizjes "Mjaft", që bëri të mundur realizimin e kësaj proteste dhe që për mendimin tim është një reagim i duhur", u shpreh emigranti Andi Rrugia. Ndërsa një tjetër emigrant shqiptar, Besim Gërguri, gjithashtu, pjesëmarrës në protestë, mbledhja e shqiptarëve para ambasadës greke në Londër merr rëndësi të veçantë, pasi tregon se ngjarje të dhunshme nuk kalohen në heshtje nga shqiptarët. "Ne do të jemi gjithmonë të zgjuar, pa u kursyer të dalim në të tilla protesta sa herë të jetë e nevojshme", tha ai. Gërguri e konsideron reagimin e zbehtë të qeverisë shqiptare si "frikë për të ngritur zërin, pasi në Greqi jetojnë me qindra mijëra shqiptarë". Megjithatë, sipas tij, do të vijë momenti që reagimet zyrtare të Tiranës do të jenë më të ashpra dhe ky moment do të jetë atëherë kur emigrantët atje të jenë legalizuar plotësisht.
"Iu bashkova kësaj proteste, pasi ishte e vetmja mënyrë për të ngritur zërin kundër dhunës dhe racizmit grek ndaj të rinjve shqiptarë", thotë Olsi Vullnetari, ekspert në fushën e emigracionit. Më tej, ai shprehet se dhuna greke ndaj shqiptarëve ka 15 vjet që po ndodh, veçse fatkeqësisht, kjo dhunë po dokumentohet më së miri përmes të tilla videosh shokuese, si ajo e publikuar para pak ditësh. "Ato që kanë ndodhur më parë janë edhe më të tmerrshme e më të dhunshme. Kjo është e papranueshme të ndodhë në një vend anëtar me të drejta të plota në BE", shprehet i indinjuar ai. Ndërsa Alketa Ceci, një aktiviste e klubit londinez të lëvizjes "Mjaft" shprehet se ngjarje të tilla nuk mund të mbeten në heshtje. "Unë jam shqiptare që jetoj në Londër. Po identiteti im nuk ka lidhje me vendndodhjen. Si shqiptare që jam, tronditem përballë pamjeve tronditëse në atë video. Ndaj vendosëm ta ngremë zërin tonë këtu në Londër. Mendoj se të njëjtën gjë duhet të bëjnë shqiptarët në çdo vend të botës që ndodhen, para përfaqësive greke", kërkon ajo. Alban Bytyqi, një nga organizatorët e protestës shpjegon se manifestimi u organizua nga me pjesëmarrjen e gjerë edhe të shoqatave të tjera në Britaninë e Madhe. "Qëllimi kryesor i kësaj proteste ishte shprehja e indinjatës shqiptare ndaj ksenofobisë të vërejtur kohët e fundit në strukturat institucionale greke", tha ai.