Një dhelpër bashkëjeton me pulat në një vend

[Manci]

Çudia në Berat, një dhelpër bashkëjeton me pulat në një vend

Pronari i një lokali pohon se e ka gjetur kafshën grabitqare në rrugë

Fëmijëve të sotëm nuk do t‘u bëjnë më përshtypje përrallat e La Fontenit, ku dhelpra si dinake që është mund të hante pulat apo gjelat. Në Berat, një dhelpër bashkëjeton paqësisht me tri a katër pula që i vërtiten rrotull. Rasti i rrallë ka ndodhur në një fshat të Beratit, Qafë-Hoxhaj, ku një kafshë mishngrënëse bashkëjeton me pulat. Pronari i një lokali në fshatin Qafë- Hoxhaj, Komuna Vërtop, vetëm 5 kilometra larg qytetit ka arritur të mbajë një kafshë mishngrënëse si dhelpra dhe ta vendosë së bashku me pulat në një vend të përbashkët. Gëzim Dauti, 40 vjeç, banor në këtë fshat, ka gjetur një dhelpër në rrugë, që po vuante nga uria pasi nuk kishte gjetur dot ushqim prej kohësh. Kur pronari i lokalit e kishte parë dhelprën të lodhur e të pa ngrënë i është afruar dhe e ka kapur. Sulmin e pronarit të lokalit dhelpra nuk e ka kundërshtuar, pasi nuk kishte më forca për t‘u larguar me shpejtësi. Pronari i lokalit, Gëzim Dauti, pasi e ka kapur dhelprën e ka ushqyer me mish dhe brenda 24 orëve e ka bashkuar në një ambient me pulat që mbante për t‘i konsumuar për lokalin. Në të njëjtën kohë pronari vazhdonte ta ushqente dhelprën me mish. Dhelpra, duke shijuar shijen e mishit, nuk vrapoi të sulmonte pulat që ndodheshin me të në një ambient. "Kanë kaluar plot 10 ditë dhe dhelpra është miqësuar me pulat dhe nuk i sulmon ato. Është për t‘u theksuar se dhelpra është zbutur aq shumë, sa dhe pulat kërcejnë mbi kurrizin e saj", thotë pronari i lokalit, Gëzim Dauti. "Tashmë kjo kafshë mishngrënëse është miqësuar aq shumë, sa dhe fëmijët kur afrohen pranë saj ajo nuk trembet fare, por i shikon ata në sy, sikur do të thotë që dhe unë jam zbutur", tregon më tej ai. Sipas pronarit të lokalit, në fillim dhelpra ishte katandisur në pikë të hallit sepse nuk po gjente dot ushqim prej disa ditësh dhe kishte mbetur në mes të rrugës, ku kërkonte ushqim. "Më e rëndësishme është se kjo dhelpër është barsë dhe së shpejti do të lindë disa këlyshë që do të zbuten ashtu si e ëma. Unë po përgatis një ambient më të zgjeruar, që kur të lindin këlyshët e saj, t‘i mësoj që të bashkëjetojnë me pulat dhe të mos bëhen agresivë", ka vijuar më tej ai. Sipas specialistëve veterinarë, dhelpra është në një gjendje të mirë dhe së shpejti do të lindë disa këlyshë. Specialistët thonë se kjo zonë njihet si një nga zonat për shtimin e dhelprave nga vetë pozicioni që ka dhe shumë nga këto dhelpra vizitojnë çdo natë fshatin, por nuk arrijnë të grabisin dot pulat, sepse vetë fshatarët kanë përgatitur çarqe. Shumë dhelpra kanë rënë në grackat e tyre në momentin që kanë tentuar të futen nëpër kotece. Sipas banorëve, në këtë fshat kanë rënë në grackë 30 dhelpra, të cilat i kanë vrarë. - Gazeta Shqip

[Cimo]

Pas ujkut, policia liron edhe dhelprën, shoqe me pulat

Policia e Beratit përfundon me sukses lirimin e dhelprës. Kafsha e izoluar në një kotec me pulat, duke bashkëjetuar me to prej më shumë se 1 muaji është dërguar sërish në pyll ditën e djeshme.

Vendimi i Ministrisë së Mjedisit për të hequr nga ambientet publike të të gjitha kafshëve të egra dhe precedenti i mëparshëm në Laç ka detyruar forcat e rendit të Qarkut Berat të angazhohen në realizimin e urdhrit. Paraditen e djeshme, në fshatin Vërtop, pikërisht në lokalin e Gëzim Dautit, buzë rrugës nacionale Berat-Çorovodë kanë zbarkuar papritur uniformat blu. Pasi i kanë komunikuar urdhrin pronarit, ata kanë futur në një kafaz dhelprën për ta lëshuar më pas në pyjet periferikë të qytetit. Mësohet se Dauti nuk ka bërë asnjë reagim për të mos u përballur me forcat e policisë. Ai nuk e ka fshehur zhgënjimin, pasi jo vetëm kishte harxhuar një shumë të mirë parash për të blerë dhelprën kur ishte vetëm 1-javëshe, por dhe se kishte arritur që ta bënte atë të jetonte bashkë me pulat, pa qenë rrezik për shpendët shtëpiakë. Bashkëjetesa e dhelprës me pulat i kishte siguruar lokalit të Dautit dhe një fluks të madh klientësh, jo vetëm udhëtarë të rastit, por kureshtarë që vinin nga qytetet për të parë me sytë e tyre kafshën dinake që hante e pinte në një vend me pulat. Pronari i dhelprës tregoi pak ditë më parë, se dhelprën e kishte vendosur fillimisht jashtë kotecit ku mbante pulat, derisa të siguronte një vend të përshtatshëm për strehën e saj. Por, vetë dhelpra i ishte afruar kotecit, pa asnjë shenjë se kërkonte të ushqehej me to. Prova e këtij dyshimi u vërtetua pasi pronari vendosi që ta fuste brenda rrethimit dhelprën. Jo vetëm ditën e parë, por për më shumë se 3 javë ajo nuk ka përbërë rrezik për pulat, duke ngrënë të njëjtat ushqime që u hidheshin shpendëve. Sipas pronarit, por dhe dëshmitarëve të shumtë që i afroheshin kotecit me dhelprën brenda ajo nuk u afrohet fare pulave, duke shënuar kështu një tjetër çudi në natyrën e kafshëve. Ende asnjë specialist nuk ka komentuar për këto ngjarje që natyra po ofron së fundi, nëse bëhet fjalë për një mutacion apo thjesht zbutje e egërsirave në moshë të vogël, duke u bërë të pranueshme dhe për llojet e tjera të kafshëve që në kushtet e zakonshme përbëjnë gjahun e ditës. Por, para se të bëhen objekt studimi, kafshët janë lënë të lira nga policia, pas një urdhri që Ministria e Mjedisit e ka nxjerrë prej disa javësh.

Panorama