Kombëtarja Shqiptare - [lajme dhe komente]

[RaPSouL]

Bariç, tri seanca për anti-Maltën

Kombëtarja shqiptare ka zhvilluar dje seancën e parë stërvitore për ndeshjen miqësore ndaj Maltës. Pas grumbullimit rreth orës 14:00 në hotel “Adriatik” në Durrës, të grumbulluarit e Oto Bariç kanë zbritur në “Niko Dovana” në orën 17:00 për seancën e parë stërvitore. Skuadrës iu bashkuan edhe mesfushori Ervin Skela dhe sulmuesi Hamdi Salihi, të cilët mbërritën të fundit në Shqipëri për shkak të impenjimeve mbasditen e së dielës me skuadrat e tyre.
Ndërkohë sot rreth orës 10:30 Bariç do të bëjë një analizë për ndeshjen e nesërme dhe në orën 12:30 do të dalë para gazetarëve për konferencën për shtyp. Më pas sërish drejt stadiumit “Niko Dovana” për një seancë tjetër stërvitore. Ndërkohë ndeshja do të luhet nesër mbrëma në stadiumin “Qemal Stafa” në orën 20:30.

Shqipëria
Portierë: Arjan Beqaj (Anorthosis, Qipro), Isli Hidi (Tirana, Shqipëri)
Mbrojtës: Debatik Curri (Vorskla Potlava, Ukrainë), Armend Dallku (Vorskla Potlava, Ukrainë), Nevil Dede (Tirana, Shqipëri), Erjon Xhafa (Tirana, Shqipëri), Kristi Vangjeli (Aris Selanik, Greqi), Blerim Rustemaj (Horsens, Danimarkë)
Mesfushorë: Ervin Skela (Energji Kotbus, Gjermani), Devis Muka (Tirana, Shqipëri), Ervin Bulku (Krivbas, Ukrainë), Altin Haxhi (Ergotelis, Greqi), Altin Lala (Hanover, Gjermani), Klodian Duro (Tirana, Shqipëri), Jahmir Hyka (Tirana, Shqipëri)
Sulmues: Besart Berisha (Burnlej, Angli), Hamdi Salihi (SV Ried, Austri), Edmond Kapllani (Karlsruher, Gjermani), Erjon Bogdani (Kievo, Itali), Alban Bushi (Apolon Kallamarja, Greqi)

Malta
Portierë: Omar Borg (Birkirkara), Justin Haber (Haidari), Andre Hogg (Valeta), Mario Muskat (Hibernians)
Mbrojtës: Ian Azopardi (Sliema), Luke Dimesh (Maçlesfield Toun), Josef Mifsud (Valeta), Peter Puliçino (Marsakslok), Brian Said (Sliema), Kenet Skikluna (Valeta), Stephen Uelmen (Marsakslok), Aron Ksuereb (Hibernians)
Mesfushorë: Xhilbert Agius (Valeta), Roderik Bajada (Sliema), Roderik Brifa (Sliema), Xhorxh Malia (Birkirkara), Xhemi Paçe (Marsakslok), Kevin Samut (Marsakslok), Garet Skiberas (Marsakslok)
Sulmues: Etien Barbara (Sliema), Daniel Bogdanoviç (pa ekip), Andre Kohen (Hibernians), Kleavon Frendo (Marsakslok), Majkëll Mifsud (Koventri), Terenc Sherri (Hibernians), Andre Shembri (Eintrakt Braunshveig), Ivan Uods (Sliema)

[no name]

Kapllani: Ndeshja kundër Holandës? Me skemën 4-5-1

Sulmuesi i Kombëtares: Do të ishte rreshtimi më i mirë

"Ndeshja ndaj Maltës do të jetë një mundësi e mirë për të përgatitur atë më të rëndësishmen, kundër Holandës". Këto janë fjalët e Edmond Kapllanit, sulmuesit që me tri golat e tij ndaj Luksemburgut është bërë pikë referimi për sulmin kuqezi. Futbollisti mendon se miqësorja do të shërbejë për sfidën e shtatorit kundër "tulipanëve" të Van Bastenit, ndonëse është i ndërgjegjshëm se ata janë të një niveli më të lartë se kundërshtarët, me të cilët është ndeshur kohët e fundit përfaqësuesja jonë. Kapllani nuk trembet nga konkurrenca, ndërsa e sheh veten të avantazhuar për sfidën kundër Holandës, pasi po praktikon me Karlsruhen rreshtimin 4-5-1 që Bariç po mendon të aplikojë në takimet e ardhshme.


Edmond, keni zhvilluar dy ndeshje në Bundesligë dhe në të dyja rastet kanë qenë rezultate të paparashikuara për Karlsruhen...

Po ta shohësh në atë mënyrë, them se fillimi i kampionatit tonë ka qenë i balancuar. Fituam një ndeshje në Nyrenberg, ndoshta të pamerituar, ndërsa pësuam një humbje po aq të pamerituar me Hanoverin. Por kjo është Bundesliga, duhet ta kuptojmë që luajmë kundër lojtarëve më cilësorë se në kategorinë e dytë dhe mund të ndëshkohesh edhe në momentin më të mirë.

Po aplikoni një skemë të re, 4-5-1. A ju krijon vështirësi fakti që jeni i vetëm në sulm?

E kam ditur edhe më parë se do të kemi vështirësi në fillim me këtë skemë, e kam parë një gjë të tillë që në ndeshjen me Shalken për Kupën e Ligës, e më pas në ndeshjet e tjera. Megjithatë, shpresoj me kalimin e kohës të harmonizohemi të gjithë me taktikën e re me një sulmues që ka zgjedhur trajner dhe me lojtarët e rinj që i janë afruar skuadrës. Duhet ta bëjmë sa më parë një gjë të tillë, pasi na duhet të arrijmë objektivat tona, duke bërë një lojë më ofensive në raste të veçanta, nuk luhet gjithmonë në mbrojtje.

Por, me këtë rreshtim ju keni më shumë përgjegjësi...

Përgjegjësia ime në këtë skemë të re është më e madhe, sepse trajneri më kërkon më shumë që të shfrytëzoj topat e gjatë, që të ndihmoj skuadrën dhe në lojën mbrojtëse. Tani loja ime është më shumë në funksion të skuadrës.

Bariç po mendon ta përdorë këtë skemë kundër Holandës. A është ky një avantazh për ju?

Të them të drejtën e shoh veten më të favorizuar dhe është më mirë, pasi duke luajtur me klubin në skemën 4-5-1 mund të mësohem me rolin e sulmuesit të vetëm. Kjo është një skemë e mirë, që mund të na shërbejë edhe në ndeshjen kundër Holandës.

Kombëtarja luan me Maltën të mërkurën. Cilat janë objektivat për këtë takim?

Ky është një test shumë i mirë, si për skuadrën Kombëtare, ashtu edhe për mua personalisht, pasi na duhet që të vazhdojmë atë ecuri rezultatesh pozitive si ndaj Luksemburgut. Por, mendoj se do të jetë një test i mirë edhe në kuadër të përgatitjeve për ndeshjen me Holandën, pasi edhe trajneri do të krijojë taktikën apo do të caktojë pozicionet që ka në mendje.

Holanda nuk është Malta apo Luksemburgu...

Po, është e vërtetë që Holanda nuk është Luksemburgu dhe duhet të djersitim më shumë. Megjithatë, në fushë jemi të barabartë, siç është Luksemburgu, ashtu është edhe Holanda. Duhet të kemi besim te vetja jonë, për të kërkuar një fitore, ndonëse do të ishim të kënaqur edhe me një barazim.




Gazeta Shqip

[RaPSouL]

Bariç: “Rinovimi i kontratës kalon nga Holanda”

Rinovimi i kontratës së Oto Bariç me kombëtaren shqiptare kalon nga përballja e 12 shtatorit me Holandën. Lajmin e ka bërë të ditur vetë trajneri i kuqezinjve në konferencën për shtyp, mbajtur dje në ambientet e hotel “Adriatik” në Durrës. Bariç ka pohuar se Holanda do të jetë “prova e zjarrit” si për të, por edhe për shumicën e futbollistëve të kombëtares.
“Do të kërkojmë të marrim të paktën një pikë ndaj Holandës. Besoj se kemi mundësi të përballemi ndaj një skuadre të madhe, si ajo e drejtuar nga Van Basten, dhe në bazë të rezultatit të asaj ndeshje do të varet në një farë mënyre edhe rinovimi i kontratës me Federatën Shqiptare të Futbollit”, ka thënë Bariç i pyetur nga gazeta “Tirana Observer”. Kroati ka pranuar faktin se është takuar dy ditë më parë me presidentin e federatës Armand Duka me të cilin ka folur edhe për kontratën e re. “Zhvillova një takim me presidentin e federatës gjatë së cilit u bisedua edhe për rinovimin e kontratës ashtu sikundër edhe për vizionin e kësaj skuadre në të ardhmen. Tashmë unë jam në pritje të një ftese nga ana e presidentit për të mbyllur një herë e mirë këtë kapitull”, ka vazhduar më tej 75-vjeçari i kuqezinjve. Ndërkohë përsa i përket shumës që mund të përfitojë nga kontrata e re, Bariç deklaroi se për të kjo nuk përbënte problem. “Paratë nuk janë problemi i rinovimit të kontratës së re. E rëndësishme që puna e nisur të vazhdojë më tej, për të arritur rezultatet e parashikuara në të ardhmen”, ka theksuar Bariç. Në morinë e pyetjeve nuk kishte se si të mungonin ato për ndeshjen e sotme ndaj Maltës, për të cilën kroati deklaroi se nuk çonte ndërmend rezultat tjetër veç fitores. “Miqësorja me Maltën është nj test i mirë për të parë gjendjen e disa futbollistëve dhe për të përgatitur sa më mirë ndeshjen me Holandën. Do të flas edhe me trajnerin maltez për të shikuar mundësinë që të përdorim në këtë ndeshje të gjithë futbollistët që kemi në dispozicion”, përfundoi trajneri Oto Bariç.

[Cimo]

Shqipëria, edhe nje kat më lart në FIFA

Duket se “statistikat” e përmuajshme të FIFA-s e kanë marrë me sy të mirë Shqipërinë. Kombëtarja kuqezi, që sot luan ndeshjen miqësore me Maltën, vetëm ngjitet në arenën botërore të futbollit ku listohen 207 federata futbolli, anëtare të FIFA-s.

Përfaqësuesja jonë në renditjen botërore të FIFA-s për muajin gusht (të publikuar dje) është ngjitur edhe me një vend dhe tani ndodhet në vendin e 66-të. Shqipëria ka marrë një bonus prej 8 pikësh prej ekspertëve të statistikave të FIFA-s dhe tashmë edhe në muajin korrik 2007 ndodhemi në kuotën e 462 pikëve.

Jo pak për një ekip modest si ky i yni, por që gjithsesi ia vlen të evidentohet në mesin e artë europian, kur ndodhemi në zonën UEFA në vendin e 30-të nga 53 federatat e anëtarësuara në qeverinë europiane të futbollit. “Objektivi im është ta çoj Shqipërinë në vendin e 60-të në fund të këtyre eliminatoreve dhe të synojmë që në Botërorin e vitit 2010 të zëmë vendin e dytë në grup”, - tha Bariç në Durrës, gjatë konferencës për shtyp përpara ndeshjes me Maltës, në “Qemal Stafa”. Një objektiv që është në rrugën e realizimit. Renditja më e mirë e Shqipërisë në epokën Bariç me sistemin e ri të llogaritjes është ajo e muajit gusht 2006, kur ndodheshim në vendin e 62. Në janar Shqipëria ndodhej në vendin e 86-të dhe vendi i 66-të do të thotë se brenda tetë muajve kemi “ngjitur” 20 vende në garën e madhe botërore. Shqipëria ndodhet menjëherë pas Hungarisë që ka vetëm dy pikë më shumë se ne (vendi 65, 464 pikë). Pas vendit tonë në renditjen botërore ndodhet Maqedonia me 448 pikë (vendi i 68).



Holanda, kreu i Grupit G



Nga ekipet e tjera në grupin tonë (G) eliminator për Euro 2008, Holanda zbriti një vend dhe tani ndodhet në të shtatin (1211 pikë). Rumania mbeti në vend numëror një vend dhe tani ndodhet në vendin e 13-të (1090 pikë). Bullgaria, që renditet e dyta në Grupin G, është ngjitur një pozicione dhe tani ndodhet në vendin e 29 (856 pikë). Bjellorusia është ngjitur dy vende dhe tani ndodhet në vendin e 69-të (438 pikë). Sllovenia është rrëzuar me gjashtë vende dhe ndodhet në të 94-in (357). Luksemburgu nuk ka lëvizur nga vendi i 174-t me 44 pikë.



Renditja FIFA

7 Holanda, 1211 pikë

13 Rumania, 190 pikë

29 Bullgaria, 856 pikë

66 Shqipëria, 462 pikë

69 Bjellorusia, 438 pikë

94 Sllovenia, 357 pikë

174 Luksemburgu, 44 pikë

Renditja UEFA

5 Holanda, 1211 pikë

10 Rumania, 190 pikë

21 Bullgaria, 856 pikë

30 Shqipëria, 462 pikë

32 Bjellorusia, 438 pikë

39 Sllovenia, 357 pikë

50 Luksemburgu, 44 pikë

Renditjet e Shqiperise gjate vitit 2007

* Gusht, vendi 66

* Korrik, vendi 67

* Qershor, vendi 69

* Maj, vendi i 78

* Prill, vendi 77

* Mars, vendi 88

* Shkurt, vendi 87

* Janar, vendi 86

www.albania-sport.com

[no name]

Albania 3 - 0 Malta

22' [1 - 0] H. Salihi
46' [2 - 0] B. Berisha
60' [3 - 0] K. Duro


Kombetarja jone deklason Malten sot ne ndeshjen miqesore.

[Qerim]

Albania 3 - 0 Malta

22' [1 - 0] H. Salihi
46' [2 - 0] B. Berisha
60' [3 - 0] K. Duro


Kombetarja jone deklason Malten sot ne ndeshjen miqesore.

Pervec lojes se mire te te rriturve, luajten mjaft mire edhe te rinjte si Salihi,Vangjeli (i cili ka disa krosime vrasese!!!),Hyka ,i mirenjohuri tashme Berisha etj.

[miki_al2001]

Bravo kombetarja,na kenaqet.E ndoqa sot si gjithmone por me komentet e tifozave kuqezi dhe sportisot.tk
ishalla ndeshjen me Hollanden e shofim live ne internet.Shpresoj te na gezoje edhe me Hollanden.

[RaPSouL]

Shqipëria shkelë Maltën, me rezultat 3:0

Hamdi Salihi shënoi në pjesën e parë, ndërsa Besart Berisha e Klodian Duro rritën epërsinë në pjesën e dytë të ndeshjes, për fitoren e Shqipërisë 3-0.


Shqipëria kështu arriti një fitore të vlefshme, që ishte dhe sinjali më i mirë për Holandën për ndeshjen e 12 shtatorit.

Trajnerë të kombëtares së Holandës ishin prezentë në “Qemal Stafa” ku për së afërmi përcollën ekipin kombëtar dhe telashet që mund t’ua sjellë atyre, në ndeshjen e 12 shtatorit që zhvillohet po në këtë stadium.

Befasia e parë nga ana e trajnerit Bariç, ishte kur hodhi në fushë nga minuta e parë mbrojtësin e Arisit të Selanikut, Kristi Vangjeli, në vend të Debatik Currit, i cili nuk u çmua nga stafi se ishte i aftë për këtë takim nga dëmtimi që mori ditë më parë.

Në minutën e 22-të erdhi dhe ndërrimi i parë, Erjon Bogdani, i la vendin sulmuesit të Riedit në kampionatin austriak, Hamdi Salihit, i cili me nuhatjen e tij të jashtëzakonshme, realizoi në minutën e 34 golin e parë për Shqipërinë. Shkodrani shfrytëzoi në maksimum gabimin e portierit maltez dhe i ndodhur midis katër mbrojtësve kundërshtarë në afërsi të portës me një gjuajtje të zgjuar shënoi për kombëtaren Shqiptare, duke realizuar njëherësh edhe golin e parë të tij me fanellën kuq e zi.

Pjesa e dytë nisi me pesë zëvendësime nga ana e Kombëtares, por dhe me golin e shpejtë, 2-0, të realizuar nga kosovari, Besart Berisha, i cili realizoi në minutën e 46, një gol indentik me atë që shënoi kundër Anglisë B.

Goli i tretë mban firmën e Klodian Duros, që pasi mori një top nga Hamdi Salhi gjuajti fuqishëm me të majtën jashtë zonës duke e çuar topin në rrjetë në minutën e 60. Në minutat e tjera kombëtarja jonë ishte pranë golit të katërt.

Malta krijoi vetëm disa shanse, gjatë ndeshjes, që u dominua nga Shqipëria. Për të dyja ekipet kjo ndeshje miqësore ishte testuese për ndeshjet kualifikuese për Euro 2008.

Ndeshjen e ardhshme Shqipëria, e cila gjendet në grupin G, e zhvillon si nikoqire kundër Holandës, më 12 shtator. Malta do të presë Turqinë (grupi C), ndeshje që do të zhvillohet më 8 shtator.
Kryesuesja e grupit G, Rumania (17 pikë), fitoi kundër Turqisë, me rezultat 2-0; Bullgaria, e cila renditet e dyta në këtë grup (15 pikë), humbi në vend të saj nga Uellsi, derisa humbje ka shënuar edhe Holanda (14 pikë), si mysafire e Zvicrës. Shqipëria gjendet e katërta në këtë grup me 9 pikë.

[RaPSouL]

Rekordi kuqezi, 5 ndeshje pa humbur, 5 pa pësuar gol

Kombëtarja shqiptare është duke përjetuar momentet më të mira në gjithë historinë e saj. Fitorja e mbrëmjes së djeshme ka qenë e treta radhazi dhe rezultati i pestë pozitiv në pesë ndeshjet e fundit zyrtare. Kuqezinjtë kanë barazuar 0-0 me Slloveninë dhe Bullgarinë në fundin e muajit mars. Më pas ka shpërthyer me dy fitore ndaj Luksemburgut 2-0 dhe 3-0 për të ardhur tek miqësorja e djeshme ndaj Maltës. Por ajo që është edhe më i rëndësishëm është fakti se mbrojtja, reparti më problematik ka treguar një qëndrueshmëri dhe pjekuri duke nisur që nga gardiani, Arjan Beqaj për të vazhduar me Nevil deden, Armend Dallkun, Debatik Curri, dhe Kristi Vangjelin. Përsa i përket ndeshjes së djeshme trajneri Oto Bariç u mundua të provonte të gjithë futbollistët në dispozicion për të përgatitur sa më mirë takimin e 12 shtatorit ndaj Hollandës në “Qemal Stafa”. Për atë takim do të mungojë Ervin Skela i pezulluar për kartonë dhe Elvin Beqiri i dëmtuar. Ndërsa do të kthehet Lorik Cana në mesfushën e kombëtares. Ndërkohë Holanda dje humbi me Zvicrën në një ndeshje miqësore.

[RaPSouL]

Turqit e “vegjël” marrin hak, 2-0 ndaj U-21 të Shqipërisë

Nuk vonon shumë hakmarrja turke. Pas vetëm gjashtë muajsh U-21 të Turqisë i kanë kthyer reston U-21 të Shqipërisë, duke fituar në fushën e stadiumit “Ruzhdi Bizhuta”. Gjashtë muaj më parë, më 17 janar të këtij viti, skuadra e Artan Bushatit kishte fituar në Turqi ndaj kësaj skuadre po me të njëjtin rezultat. Ndeshja e djeshme u zhvillua nën piskun e vapës, aq sa gjyqtari i takimit, Bardhyl Pashaj u detyrua ta ndërpresë dy herë lojën për t’u dhënë mundësi lojtarëve që të freskoheshin dhe pirë ujë. Ndeshja u shoqërua nga një spektakël “Fair Play” nga të dyja skuadrat, aq sa rezultati dukej gati i papërfillshëm nga të dyja kampet. Turqit, të cilët u impenjuan më shumë, shënuan golin e parë në minutën e 16-të. Ndërsa shënjestra e dytë u siglua në minutën e 37-të, pas një gabimi të portierit shqiptar të Palermos, Samir Ujkani. Pjesa e dytë filloi me shumë ndërrime nga të dyja skuadrat. Në fakt trajnerët kishin deklaruar që më parë se donin të provonin sa më shumë futbollistë. Në fund të lojës në minutat 85-së dhe 87-të Turqia mund të shënonte edhe golin e tretë, por që të dyja rastet u neutralizuan nga portieri i U-21 të Shqipërisë. Në prag të ndeshjes zyrtare me Italinë, më 11 shtator në “Niko Dovana” trajneri Artan Bushati do të grumbullojë edhe disa nga emrat më cilësorë të Shpresës së Shqipërisë, të cilët nuk ishin në këtë takim.

Shqipëri 0
Turqi 2

Shënues: Ergyn 16’, Serdar 37’
Stadiumi: “Ruzhdi Bizhuta”, Elbasan
Gjyqtar: Bardhyl Pashaj