Kombëtarja Shqiptare - [lajme dhe komente]

[RaPSouL]

Bariç: Ja Shqipëria që do përballojë Holandën

Oto Bariç ka zbuluar detajet e formacionit që do të zbresë në fushë kundër Holandës ditën e mërkurë në mbrëmje. Në një konferencë për shtyp mbajtur dje në Durrës, trajneri i përfaqësueses shqiptare ka thënë hapur se do të luhet me një pykë të vetme, që sipas të gjitha gjasave do të jetë Bogdani, ndërkohë që pas tij do të jenë 2 ose 3 futbollistë, kjo mbetet për t'u vendosur në orët para ndeshjes. "Por edhe ata që do të jenë pas sulmuesit, mund të shërbejnë si pyka herë pas here", është shprehur tekniku kroat. "Ne do të luajmë me dy skema, ose 4-3-2-1, ose 4-2-3-1. Duhet të jemi objektivë se kundërshtari është më i mirë, por pavarësisht se kemi shumë dëmtime, unë futem optimist në ndeshje", ka deklaruar trajneri i kombëtares. Sipas tij, përveç mungesës së Berishës, probleme kanë edhe Haxhi me Bushin, por këta të dy do të jenë pa problem në fushë në ditën e sfidës me portokallinjtë.

Duke parë edhe skemat me të cilat mund të zbresë në fushë Shqipëria, është e qartë që sulmuesi i vetëm do të jetë Bogdani, duke parë aftësinë e tij për të tërhequr skuadrën. Por, nga minuta e parë pritet të luajë edhe Alban Bushi, të cilin Bariç e provoi edhe si mesfushor në miqësoren me ekipin U19. "Në fushë do të jetë 90 për qind e asaj skuadre që luajti që nga minuta e parë. Megjithatë, ka edhe një apo dy kandidatë të tjerë që mund të jenë titullarë", është shprehur Bariç. Natyrisht që bëhet fjalë për Haxhin e Bushin, dy futbollistë që kanë patur probleme dhe për këtë nuk ishin në fushë nga fillimi dy ditë më parë. Bariç ka zbuluar edhe detaje të tjera në lidhje me sfidën e 12 shtatorit. Ai do të jetë sot në Holandë për të parë sfidën e ekipit të Van Basten kundër Bullgarisë dhe më pas do të mendojë se cila do të jetë skuadra ideale për t'u hedhur në fushën e lojës. "Takimin Holandë-Bullgari unë do ta shoh në stadium, ndërsa futbollistët i kam porositur që ta shohin nëpërmjet televizorit. Kështu do të kemi një ide më të qartë për atë që na pret ditën e ndeshjes", u shpreh Bariç.

[RaPSouL]

"Kjo Shqipëri, ka vetëm 11 lojtarë të mirë"

Pavarësisht se shprehet se ka në dorë një skuadër të mirë, kroati deklaron hapur se kjo nuk është një skuadër ideale, siç do ta ëndërronte ai

"Ne kemi vetëm 11 futbollistë, kur të kemi 15 apo 16 në një kondicion shumë të mirë, ajo do të ishte skuadra ideale. Për momentin kemi disa lojtarë që mund të luajnë në role të ndryshme, si Curri, Dallku, Berisha apo Cana. Për fat të keq Berishën nuk e kemi në këtë ndeshje. Dëmtimet janë një problem, ju e shihni edhe vetë", tha ai. "S'kemi çfarë të humbim ndaj Holandës? E drejtë, ata janë ndjeshëm favoritë, shikoni renditjen e tyre në FIFA", përfundoi kroati.

[RaPSouL]

Holanda, Van Basten largon 6 lojtarë

Trajneri i Holandës Marko Van Basten, ka lënë jashtë ndeshjeve me Bullgarinë dhe Shqipërinë 6 futbollistë të cilët deri tani kishin bërë stërvitje të rregullt me ekipin

Tekniku i tulipanëve është shprehur se ka patur një zgjedhje shumë të vështirë, duke qenë se bëhej fjalë për lojtarë të një kalibri të lartë dhe që luajnë me skuadrat kryesore të kampionatit holandez. Përveç Rafael Van Der Vartit të dëmtuar, jashtë formacionit janë lënë edhe Ibrahim Afelej i PSV-së, Urbi Emanuelson, Kei Jaliens, Henk Timer dhe sulmuesi i Ajaksit Klas-Jan Huntelar. "Nuk ishte një zgjedhje e lehtë", tha Van Basten në një konferencë për shtyp. "Diferencat në grup ishin mjaft të vogla, por më duhej ta merrja këtë vendim", ka thënë trajneri i tulipanëve.

Pavarësisht këtij vendimi, këta futbollistë mund të thirren sërish nëse në takimin me Bullgarinë do të ketë të dmëtuar apo lojtarë që do të plotësojnë numrin 2 të kartonave. Në fakt, holandezët kanë 8 futbollistë që kanë një karton dhe që rrezikojnë të mos jenë në ndeshjen e të mërkurës në Shqipëri. "Pavarësisht se ndonjë nga djemtë mund të ketë mbetur keq nga ky vendim, do të ketë një mundësi rishikimi pas sfidës me Bullgarinë", tha Van Basten. Trajneri i Holandës njoftoi gjithashtu se Van Der Vart do të vazhdojë të qëndrojë me ekipin në stërvitje, pasi për të do të merret një vendim nga stafi mjekësor për takimin në Tiranë. Holandezët do të kenë sonte në mbrëmje, në orën 20.30, një takim delikat kundër Bullgarisë së Dimitar Penev, një skuadër aspak e lehtë duke parë emrat që ka në përbërje.
v

[RaPSouL]

Sedorf e Shnejder, rrezik pezullimi ndaj Shqipërisë

Për trajnerin e kombëtares, Oto Bariç do të ishte një lajm mëse i mirë. Ndërsa për tifozët e futbollit ndoshta jo edhe aq. Klarens Sedorf dhe Uesli Shenider janë dy nga dhjetë futbollistët holandezë që rrezikojnë pezullimin për kartonë për ndeshjen me Shqipërinë. Në rast se ylli i Milanit dhe ai i Real Madrid do të marrin karton të verdhë në takimin e mbrëmjes së sotme ndaj Bullgarisë në “Amsterdam Arena”, atëherë ata nuk do të udhëtojnë drejt Shqipërisë për ndeshjen e 12 shtatorit, pasi pezullohen automatikisht nga UEFA për dy kartonë të verdhë.
Përballja Shqipëri-Holandë, përveç një ndeshjeje luksi, për kuqezinjtë tanë është edhe një rast unik i tifozëve vendas për të parë më nga afër futbollistë si Rud van Nistelroi, Klarens Sedorf, Uesli Shneider, etj. Pikërisht këta dy të fundit duhet të bëjnë kujdes në mbrëmjen e sotme për të mos rënë në “bllokun” e verdhë të spanjollit Luis Medina Kantalejo, çka do të thoshte pezullim për takimin e radhës ndaj Shqipërisë në stadiumin “Qemal Stafa”. Ashtu sikundër Sedorf e Shneijder janë edhe tetë “tulipanë” që rrezikojnë të mos udhëtojnë me skuadrën drejt Tiranës për shkak të kartonëve të verdhë. Xhovani van Bronkhorts, Rafael van der Vart, Najxhell de Jong, Robin van Persie, Joris Mathijsen dhe Deni Landzat janë gjashtë lojtarët, të cilat kanë nga një karton të verdhë të marrë në takimet e para të këtij kompeticioni kualifikimesh dhe rrezikojnë të mos luajnë ndaj kuqezinjve në rast se marrin edhe një të dytë në përballjen ndaj Bullgarisë. I shpëton pezullimit, në një farë mënyre për ndeshjen me Shqipërinë Rafael van der Vart dhe Deni Landzat, të cilët deri në ditën e djeshme rezultonin si të dëmtuar dhe nuk do të luanin ndaj Bullgarisë. Ndërsa përsa i përket kombëtares shqiptare duhet të bëjnë kujdes në takimin ndaj Holandës sulmuesit Erjon Bogdani, Edmond Kapllani dhe Alban Bushi, mesfushorët Altin Lala dhe Ervin Bulku, si dhe mbrojtësit Nevil Dede dhe Armend Dallku. Të shtatë kuqezinjtë, në rast se marrin një karton të verdhë në përballjen e 12 shtatorit, do të pezullohen për takimin e 13 tetorit ndaj Sllovenisë në Lubjanë.

Për holandezët rrezikojnë...

1. Klarens Sedorf
2. Xho van Bronkhorts
3. Rafael van der Vart
4. Najxhell de Jong
5. Uesli Shneijder
6. Robin van Persie
7. Joris Mathijsen
8. Deni Landzat

Për kuqezinjtë rrezikojnë...

1. Erjon Bogdani
2. Altin Lala
3. Nevil Dede
4. Armend Dallku
5. Edmond Kapllani
6. Ervin Bulku
7. Alban Bushi

[RaPSouL]

Bariç “përgjon” Holandën për të fiksuar formacion titullar

Njëmbëdhjetshja titullare e kombëtares shqiptare do të varet nga ndeshja e mbrëmjes së sotme të Holandës ndaj Bullgarisë. Një gjë të tilla ka lënë të kuptojë trajneri i kombëtares shqiptare Oto Bariç dje në konferencën e shtypit. Kroati ka deklaruar se do të shikojë me kujdes lojën e skuadrës së Marko van Bastenit dhe më pas do të vendosë se me çfarë skuadre titullarësh do të zbresë më 12 shtator në tapetin e “Qemal Stafës”. “Për formacionin titullar do të vendos në ditët në vazhdim. Natyrisht që do të shikoj me kujdes edhe përballjen e Holandës me Bullgarinë dhe më pas do të kem një ide më të qartë se si mund t’ia dalim mbanë me këtë skuadër”, ka thënë Bariç. Më tej tekniku ka pohuar se skuadra e tij tashmë mund të quhet e konsoliduar dhe nuk ka pse të mos kërkojë rezultat edhe përballë një skuadre si Holanda. “Mendoj se kjo skuadër tashmë ka arritur në standardet që unë kërkoja. Kemi katër muaj që nuk pësojmë dhe kemi arritur një maturi, kështu që besoj se do të luajmë mirë ndaj Holandës dhe do të kërkojmë një rezultat”, ka thënë Oto Bariç.

[RaPSouL]

Van Basten përzgjedhin 18 lojtarët

Marko Van Basten përzgjodhi 18 lojtarët prej të cilëve do të dalë edhe 11-shi që do të ndeshet kundër Bullgarisë. Trajneri i Holandës nuk thirri për këtë ndeshje Afellay, Emanuelson, Huntelar, Jaliens, Timmer dhe të dëmtuarin Van der Vart. Trajneri tha për shtypin holandez se nuk ishte e lehtë të merrte vendimin, por gjithsesi ai pret shumë prej këtyre të rinjve në të ardhmen. Nga lista e të larguarve vetëm Van Der Vaart mund të përfshihet në ndeshjen kundër Shqipërisë.

[RaPSouL]

Biletat, 200 euro për Shqipëri-Holandë

Kush dëshiron të shikojë live Shqipëri-Holandë duhet të “sakrifikojë” një shumë të mirë parash. Biletat për këtë takim tashmë kanë kapur çmime goxha të kripura. Një biletë e sektorit D2 në stadiumin “Qemal Stafa” është shitur dje 1 mijë deri në 2 mijë lekë të reja më shumë nga çfarë është vendosur nga Federata Shqiptare e Futbollit.
Ndërsa biletat për në tribunë qendrore A jo vetëm që nuk kishte në qarkullim ose gjendeshin veçse me mik, arritën shifrën e 200 eurove në tregun e zi. Federata pati deklaruar para disa ditësh se do të hidhte në treg vetëm bileta për sektorët D1, D2, D3, C dhe E me çmime të cilësuara 3 mijë, 2 mijë dhe 5 qind lekë të reja në biletaritë pranë stadiumit kombëtar “Qemal Stafa” dhe pranë pallateve 9-katëshe. Ndërsa ato për tribunën qendrore tashmë janë shitur ose dhuruar kompanive ose institucioneve të ndryshme që i patën prenotuar që muaj më parë. Por një pjesë e mirë e këtyre kanë përfunduar edhe në tregun e zi, ku mund të dallosh fare mirë persona që i shesin dy hapa larg qendrave të biletarive, natyrisht me një çmim shumë herë më të lartë. Sipas njoftimit zyrtar të FSHF-së në treg do të shiten bileta deri mesditën e së martës, por sipas gjasave një gjë e tillë nuk do të vazhdojë gjatë, pasi biletaritë patën ulur qepenin që mbasditen e djeshme. Kapaciteti i stadiumit kombëtar “Qemal Stafa” është rreth 16 mijë vende, ku nuk do të mungojnë edhe dy tifozeritë më të zjarrta, ato të “tifozëve kuqezi” dhe të “portokallinjve”. Këta të fundit do të jenë rreth 400 të pranishëm dhe do të akomodohen në tribunën D1. Për të mos lejuar asnjë një përplasje me tifozerinë kuqezi e cila do të akomodihet në sektorin ngjitur D2 fansat e kombëtares holandeze do të largohen nga stadiumi 15 minuta pas atyre të kombëtares shqiptare. Në shërbim të ruajtjes së qetësisë jo vetëm në stadium por edhe në ambientet pranë “Qemal Stafës” do të jenë rreth 1 mijë punonjës të forcave të rendit. Ditën e ndeshjes rrugët që të çojnë drejt stadiumit do të bllokohen 6 orë para fillimit të ndeshjes dhe nuk do të lejohet të shiten bileta pranë stadiumit.

[miki_al2001]

Shpresat (U-21) fituan sot me Kroacine 1 me 0.U kenaqa shume per me teper qe Kroacia eshte nje ekip shume i forte .Shpresoj qe shembullin e tyre ta ndjeki te merkuren edhe kombetarja shqiptare.
Forca Shqiperia .

[Cimo]

U-21, Shqipëria fiton me Kroacinë 1-0

E pasueshme. E ëndërruar. Shqipëria mund Kroacinë me një gol të vockël që mban firmën e Nevian Canit, falë bashkëpunimit me shkodranit tjetër, Gilman Likës. Më shumë se sa ka gëzuar fitorja Bushatin, ka trembur trajnerin e Italisë, Kaziragin, që vuajti shumë për të marrë tripikëshin kundër Ishujve Faroe (2-1). Kundër tyre do përballemi të martën e ardhshme. Ndoshta me pak fat, edhe mund të hakmeremi për atë turp 4-0 në Itali. Shqipëria ndihet e barabartë të paktën me pikë: Italia, Kroacia, Shqipëria e Greqia (që fitoi 2-0 me Azerbajxhanin) kanë nga gjashtë pikë. Befasisht shfaqemi pretendentë. Pas nje pjesë të parë të bardhë (0-0), erdhi edhe momenti kulmor. Në të 74’, Gilman Lika lëshoi një top për Nevian Canin, i cili pasi i shpëtoi mbulimit të një mbrojtësi kroat, shmangu edhe portierin kundërshtar duke shënuan golin për Shpresat tonë. Gjashtë minuta më pas, ishte Lika që nuk shfrytëzoi një rast të artë në minutën e 37-të. Por, ajo që vlen është statistika e ndeshjes, ashtu si dhe ato pak sekonda të Reinaldo Ramës së ardhur nga Greqia, për të nënshkruar emrin në fitoren e dytë të Shpresave, pas asaj me Ishujt Faroe, me të njëjtin rezultat: 1-0, dhe në të njëjtin stadium “Ruzhdi Bizhuta”. Pas Kroacisë, Shqipëria U-21 do të përballet në Durrës, më 11 shtator (ora 16:00) me Italinë, ndaj së cilës ka humbur ndeshjen e parë me rezultatin e thellë 4-0. Ndoshta edhe “Niko Dovana” sjell fat.





GRUPI A

7 shtator

Itali-Ishujt Faroe 2-1

8 shtator

Shqipëri-Kroaci 1-0

Azerbajxhan-Greqi 0-2

11 shtator

Shqipëri-Itali

Ishujt Faroe-Greqi

Kroaci-Azerbajxhan

RENDITJA

Skuadrat N P

Kroacia 3 6

Italia 2 6

Greqia 3 6

Shqipëria 3 6

Azerbjaxhani 0 2

Ishujt Faroe 3 0



www.albania-sport.com

[Wind_of_Change]

Bravo ekipin tone te Shpresave. Ju lumte qe arriten te fitonin ndaj nje kundershtari qe konsiderohet me i forti ne grup.Ky rezultat eshte shume i befasishem edhe disi i paprishtem edhe nga tifozat me te zjarrte, gjithsesi urime per fitoren. Shpresoj qe te marten ne durres do te marrim hak nga Italise per ate humbje turperuese qe na ben atje :@
Edhe une do jem nje nder perkrahesit e shumte qe do te jete ne Niko Dovana te marten duke uruar qe pse jo te fitojme

sot pashe ne Rinas trajnerin tone te kombetares Oto Baric duke iku per ne Gjermani, ku nga aty do te udhetoje per ne Hollande per te pare takimin Holande - Bullgari qe fillon pas pak minutash.
ishalla e shikon me sa me shume vemendje ate takim edhe te gjej piket e dobeta te Hollandes ne menyre qe ta godasim te merkuren ne Qemal Stafa