Kombëtarja Shqiptare - [lajme dhe komente]

[RaPSouL]

Rehagel: Nuk shkuam në Botëror nga Shqipëria

Humbja e 4 shtatorit 2004, i kushtoi jo pak Greqisë, kampione e Evropës në fuqi, pasi ata nuk mundën të kualifikoheshin për në fazën finale të Botërorit 2006. "Humbja me Shqipërinë na kushtoi shumë, pasi nëse do të merrnim pikë atje, tani do të shkonim në Botërorin gjerman", tha tekniku i Greqisë. "Mbreti Oto" pësoi një humbje dyfishe, pasi përballë pati "armikun" e tij, Brigel.

[RaPSouL]

Aliaj e Murati: Grekët s'e harrojnë kurrë 4 shtatorin

Ata të dy ishin heronjtë e asaj nate. 4 shtatori i vitit 2004 nuk është harruar ende në Shqipëri, pasi si sot 3 vjet më parë, 11 djem puro shqiptarë arritën të dhuronin një nga netët më magjike të futbollit kuqezi. Dy golat e Aliajt dhe Muratit, i dhanë jetë triumfit 2-1 ndaj Greqisë, kampione e saposhpallur e Evropës. Një fitore që si rrallëherë, bëri që gjithë kryeqyteti shqiptar, por jo vetëm, të mbushej me njerëz të ardhur nga gjithë vendi për të festuar. "Nuk mund të harrohet ajo ditë, pashë nga autobusi se rruga ishte shtruar me të kuqe dhe nuk arrija ta besoja. Vërtetë ne t'ua kishim falur atë gëzim?", shprehet që nga Kroacia Adrian Aliaj, autori i golit të dytë kundër grekëve. "Shikoni, ai publik që unë kam parë atëherë, është numri 1 në botë, nuk besoj se do kem kurrë dyshime për këtë. Shënova një gol? Po si mund ta harroj? Harrohet kjo gjë? Ai publik, ajo atmosferë, ajo mbështetje. Gjithçka ishte magjike. Nuk e di, por kurrë në jetë nuk kam provuar dhe nuk besoj se do të provoj emocione të atilla", shton më tej ish-mbrojtësi i majtë i kombëtares. E majta e tij "alla Roberto Karlos", mbylli llogaritë me atë ekip që vetëm dy muaj më parë kishte vënë kurorën e "mbretit të Evropës". Por, nëse pyet një grek të thjeshtë, emri "Qemal Stafa" për të është një makth. "Është Shqipëria? Një shëtitje, ne mundëm Francën e Portugalinë", thoshin grekët përpara asaj sfide. "Ajo mbrëmje mund të përjetohet vetëm njëherë në jetë", thotë Edvin Murati, njeriu që me golin e tij i hapi rrugën fitores. "Ishin emocione të papara, asnjëherë nuk na kishte ndodhur kështu. Ende e imagjinoj atë publik në "Qemal Stafa". Të mos harrojmë që humbja me ne i eleminoi grekët nga Botërori, e ka thënë edhe vetë Rehagel apo jo? Tani jetoj në Greqi, por të gjithë ma kujtojnë atë ndeshje, madje edhe vetë grekët. Nuk e harrojnë kurrë dhe s'kanë se si. Dhe kjo më bën shumë krenar", thotë më tej që nga Greqia futbollisti kuqezi. "Le të themi që ua ulëm kokën grekëve dhe ata e dinë shumë mirë këtë", shton Adrian Aliaj. Sot mbushen 3 vjet nga ajo fitore dhe çdo shqiptar ka të drejtë të ndjehet krenar. Ashtu si Aliaj e Murati, që edhe pse jetojnë jashtë Shqipërisë, më shumë se çdo gjë kujtojnë 4 shtatorin 2004...

[RaPSouL]

Holanda, Van Basten humb edhe Landzat

Pas Arjen Roben, trajneri i Holandës Marko Van Basten ka humbur edhe mesfushorin Deni Landzat për dy sfidat e rëndësishme ndaj Bullgarisë dhe Shqipërisë. Lojtari i Uiganit në kampionatin anglez, ka pësuar një dëmtim në sfidën e të shtunës kundër Njukasëllit në "St. James Park" dhe dje është mësuar se nuk mund të luajë kundër tulipanëve. Megjithatë, nuk bëhet fjalë për një mungesë shumë të rëndësishme, duke parë faktin se Landzat nuk ishte titullar në formacionin portokalli. Ish-lojtari i Alkmarit pritet të mungojë disa javë.

[RaPSouL]

Berisha nuk vjen, FSHF bën presion

Besart Berisha përfundimisht nuk do të jetë në dispozicion të Oto Bariç për takimin e 12 shtatorit kundër Holandës. Sulmuesi i kombëtares shqiptare ka njoftuar dje teknikun kroat se nuk mund të udhëtojë për shkak se dëmtimi i pësuar është shumë i rëndë. Në komunikimin që ka pasur me Bariç, Berisha ka sqaruar të gjitha detajet e problemit të tij, gjë që më pas është mirëkuptuar edhe nga kroati, ndonëse ky i fundit i pati kërkuar që të udhëtonte drejt Shqipërisë dhe ta shikonte fizioterapisti i skuadrës kombëtare Akim Bulinger. Por, asgjë nuk ka mbaruar këtu, pasi Federata Shqiptare e Futbollit ka llogaritur edhe faktin se lojtari kuqezi mund të ketë pasur ndonjë presion nga klubi për të mos udhëtuar drejt Shqipërisë. Nisur nga kjo, dje FSHF i ka dërguar një faks klubit anglez ku i ka kërkuar që të lejojë Berishën të vijë në Shqipëri që të kontrollohet nga stafi mjekësor i kombëtares shqiptare. "Normalisht që ai mund të ketë edhe një presion nga klubi dhe kjo është arsyeja që i dërguam një faks për ta lejuar. Natyrisht që nuk do të futet në fushë nëse nuk është në gjendje për të luajtur, megjithatë ne duam që të kontrollohet njëherë nga Bulinger", tha zëdhënësi për shtyp i FSHF-së Lysjen Nurishmi. Sipas tij, ende nuk është humbur mundësia që Berisha të jetë në Tiranë, teksa në Durrës, Bariç e ka mbyllur tashmë si çështje.

[RaPSouL]

Bariç: Kjo skuadër më mbush me optimizëm

Ka gjetur atë ambient që priste. Oto Bariç është dukur i kënaqur pasi ka biseduar me futbollistët e ekipit kombëtar, në ditën e parë të grumbullimit për ndeshjen me Holandën. Tekniku kuqezi është parë në formë të mirë, teksa një gjë të tillë e ka vërejtur edhe tek të thirrurit për këtë sfidë. "Kam besim për një rezultat pozitiv", kanë qenë fjalët e para të Bariç. "Unë fola me lojtarët dhe pashë që ekzistonte shumë optimizëm dhe besim. Kjo më ka bërë edhe mua të tillë. Kjo është ajo që unë dua të shoh në takime të tilla. Them se do të bëjmë një surprizë të bukur", kanë qenë fjalët e para të teknikut kuqezi thënë dje në hotel "Adriatik" në Durrës. Bariç ka qenë tepër i kënaqur edhe me formën fizike, teksa nga biseda me lojtarët ka mësuar se asnjëri prej tyre nuk ka pasur probleme fizike. Që do të thotë se përveç Besart Berishës, të gjithë të tjerët do të jenë në dispozion për sfidën e 12 shtatorit.
Grumbullimi
Futbollistët e kombëtares kanë ardhur që dje në grumbullimin në hotel "Adriatik" në Durrës, ndonëse në seancën e pasdites nuk morën pjesë të gjithë për shkak të udhëtimit të lodhshëm. Të fundit që do t'i bashkohen skuadrës janë Erjon Bogdani dhe Arjan Beqaj, që do të jenë vetëm sot në Durrës. Sulmuesi ka kërkuar leje që të vijë me një ditë vonesë për shkak se sapo kaloi në një klub të ri dhe i duhet pak kohë për t'u përshtatur dhe për të bërë transferimin e plotë. Ndërsa portieri Beqaj ka qenë në fushë dje, në takimin që skuadra e tij Anorthosis Fagamusta, fitoi me rezultatin 2-1 në fushën e Enosis Paralimni.
Stërvitja
Ekipi kombëtar ka zhvilluar dje seancën e parë stërvitore, të drejtuar nga ndihmësit e Bariç Duro e Kovaçiç. Në seancën e zhvilluar në stadiumin e Durrësit "Niko Dovana" kanë marrë pjesë vetëm pak vetë, për shkak se ata që luajnë jashtë kanë ardhur pasdite dhe kanë qenë jo pak të lodhur nga udhëtimi. Megjithatë, seanca e djeshme ka qenë më shumë relaksuese, më shumë që lojtarët të ruanin formën, teksa stërvitja e vërtetë do të nisë sot paradite. Bariç ka porositur nga FSHF edhe kasetën e ndeshjes Zvicër-Holandë, për të mësuar diçka më shumë nga formacioni kundërshtar. Kuqezinjtë do të luajnë nesër edhe një miqësore me kombëtaren U17.

[RaPSouL]

Arbitri më i kritikuar i Ligës angleze për Shqipëri-Holandë

Duket sikur e ka tërhequr zvarrë tersin pas vetes trajneri i kombëtares shqiptare, Oto Bariç. Para ndeshjes me Maltën, kroati uronte dhe shpresonte që ndaj Holandës të kishte minimumi një arbitër të paanshëm. Dhe, si këmbim nga UEFA mori anglezin Majk Rilej, arbitrin më të përfolur dhe kritikuar gjatë viteve të fundit në kampionatin anglez të futbollit dhe në Kupat e Evropës.
Majk Rilej, 42 vjeç, arbitër i FIFA-s që nga janari i vitit 1999, do të jetë gjyqtari kryesor, ndërsa ndihmës të tij do jenë Darren Kan dhe Majk Mullarkej. Gjyqtari i katërt është caktuar Rob Stajll, edhe ky anglez. Rilej është gjyqtari i parë anglez që gjykon Shqipërinë në këto eliminatore. Në takimin e parë kundër Holandës, më 11 tetor në Amsterdam, gjykoi izraeliti Alon Yefet, i cili dukshëm mbajti anën e “tulipanëve” me mosdhënien e dy penalltive të pastra. Duke i referuar gabimeve të izraelitit, Oto Bariç kishte shpresuar që të kishte për ndeshjen e kthimit ndaj “tulipanëve” një gjyqtar më ekspert dhe më të drejtë. Duke mos dashur të hedhim hije dyshimi mbi Rilej, mjaftohemi me analizën e ndeshjeve më të rëndësishme dhe njëkohësisht problematike të këtij gjyqtari në Ligën angleze si dhe në Kupat e Evropës. Rilej u akuza më 2004-n nga drejtuesit e Mançester Junajtid, se kishte mbajtur haptazi anën e Arsenal, duke i dhënë kësaj skuadre rekordin e rezultateve pozitive në gjithë historinë e Premier League. Në sezonin 2005-2006, Rilej u akuzua nga trajneri i Boltonit, Sam Allardajs, se kishte marrë para nga disa tifozë fanatikë të Bllekbërn para ndeshjes me Bolton. Rilej ishte arbitri edhe i “masakrës” Reading-Çelsi, 14 tetorin e vitit të kaluar. Ai u kritikua për lojën shumë “angleze” të tij teksa vendasit e Reading po luanin shumë ashpër ndaj kampionëve të Anglisë. Në atë takim u dëmtua rëndë portieri i Çelsit, Petr Çeh dhe ganezi, Majkëll Esien. Ndërsa sezonin e kaluar bëri bujë edhe sulmi që trajneri i Çelsit, Hoze Mourinjo, i bëri atij gjatë ndeshjes çerekfinale të Kupës së Anglisë, Çelsi-Totenhem. Ndërsa në Kupat e Evropës, Rilej u bë një shënjestër për tifozët e Levskit të Sofjes pas ndeshjes Levski-Shakle të 30 marsit 2006. Anglezi i nxori me karton të kuq mesfushorin e Levskit, Sedrik Bardon, pas një ndërhyrjeje në dëm të një futbollisti të Shalkes. Por, në të vërtetë dhe në atë çka u pa edhe më vonë, nuk kishte pasur asnjë kontakt mes dy futbollistëve.

Majk Rilej
Datëlindja: 17.12.1964; Vendlindja: Uest Jorkshajer, Angli; Arbitër në Premier League: 1994; Arbitër internacional: 1999


Gjyqtarët e ndeshjeve të Shqipërisë për “EURO 2008”

Bjellorusi-Shqipëri 2-2
Gjyqtar: Toni Asuma (Finlandë)

Shqipëri-Rumani 0-2
Gjyqtar: Olegario Benkuerenca (Portugali)

Holandë-Shqipëri 2-1
Gjyqtar: Alon Jefet (Izrael)

Shqipëri-Slloveni 0-0
Gjyqtar: Jozef Atuard (Maltë)

Bullgari-Shqipëri 0-0
Gjyqtar: Jonas Erikson (Suedi)

Shqipëri-Luksemburg 2-0
Gjyqtar: Lasha Silagava (Gjeorgji)

Luksemburg-Shqipëri 0-3
Gjyqtar: Paulius Malzinskas (Lituani)

5 ndeshjet e rëndësishme të gjykuara nga Rilej

1) Finalja e FA Cup
4 Maj 2002
Arsenal-Çelsi 2-0
Stadiumi: “Millennium”, Kardif
Shënues: 70’ Parlour, 80’ Ljungberg
Kartonë të verdhë: Henry, Vieira (Arsenal), Gudjohnsen, Le Saux, Terry (Çelsi)

2) Finalja e Carling Cup
29 shkurt 2004
Bolton–Midlesbroug 1-2
Stadiumi: “Millennium”, Kardif
Shënues: 21’ Davies, 2’ Job, 7’ Zenden
Kartonë të verdhë: Campo, Charlton, Frandsen (Bolton), Boateng, Ricketts (Midlesbroug)

3) Kampionati “Euro 2004”
14 qershor 2004
Suedi-Bullgari 5–0
Stadiumi: “Jose Alvalade”, Portugali
Shënues: 32’ Ljungberg, 57’, 58’ Larsson, 78’ Ibrahimovic, 90’ Allback
Kartonë të verdhë: Ibrahimovic, Linderoth (Suedia), Petkov, Jankovic, Kirilov (Bullgaria)

4) Kampionati “Euro 2004”
19 qershor 2004
Letoni-Gjermani 0–0
Stadiumi: “Dragao”, Portugali
Kartonë të verdhë: Astafjevs, Isakovs (Letoni), Friedrich, Frings, Hamann (Gjermani)

5) Finalja Hong Kong Cup
19 Maj 2007
South China-Happy Valley 3-1
Stadiumi: “Hong Kong”, Hong Kong
Shënues: 22’ Detinho, 27’ Chan Chi Hong, 85’ Cheng Siu Ëai, 48’ Poon Yiu Cheuk
Kartonë të verdhë: Lee Chi Ho (South China), Denisson Ricardo De Souza (Happy Valley)

Gabimet më të mëdha të arbitrit Majk Rilej

1. Majk Rilej është akuzuar për gabimet e shumta në përballjen Arsenal-Mançester Junajtid më 2004, fitore e cila i dha skuadrës së Arsenalit rekordin e rezultateve pozitive në gjithë historinë e Premier League. Rilej dha një penallti shumë të dyshimtë për Ljunberg, e kthyer më pas në gol nga vetë suedezi.

2. Ndërsa gjatë ndeshjes Reading-Njukastëll, të 30 prillit 2007, Rilej u bë protagonist për ngatërrimin e një pupaci me anësorin e tij. Rilej anulonte një aksion shumë të qartë goli për miqtë, duke ngatërruar duart e pupacit me flamurin e anësorit. Ai kishte kuptuar sikur anësori i tij i jepte një sinjalizim për jashtë loje, çka nuk rezultoi i tillë.

3. Rilej u bë një shënjestër edhe për tifozët e Levskit të Sofjes dhe presidentit Todo Batkov, pas ndeshjes Levski-Shakle, të 30 marsit 2006. Anglezi i nxori kartonin e dytë të verdhë mesfushorit të Levskit, Sedrik Bardon, i cili u kthye automatikisht në karton të kuq pas një ndërhyrjeje në dëm të një futbollisti të Shalkes. Por, në të vërtetë dhe në atë çka u pa edhe më vonë, nuk kishte pasur asnjë kontakt mes dy futbollistëve.

4. Ndërsa sezonin e kaluar bëri bujë edhe sulmi që trajneri i Çelsit, Hoze Mourinjo, i bëri gjyqtarit Rilej gjatë ndeshjes çerekfinale të Kupës së Anglisë, Çelsi-Totenhem. Tekniku i bluve e shante në gjuhën portugeze arbitrin pas disa faulleve të dyshimta të dhëna në dëm të skuadrës së Çelsit.

5. Ish-trajneri i Boltonit, Sam Allardajs, pati akuzuar vitin e kaluar gjyqtarin Majk Rilej se kishte marrë para nga disa tifozë fanatikë të Bllekbërn para ndeshjes me Bolton. Por më pas Allardjas bëri prapa-ktheu në deklarata. Gjithsesi, ai u gjobit nga federata angleze, me 2 mijë stërlia, për deklarata të rreme.

6. Ishte Rilej arbitri i “masakrës” Reading-Çelsi, 14 tetorin e vitit të kaluar. Ai u kritikua për lojën shumë “angleze” të tij teksa vendasit e Reading po luanin shumë ashpër ndaj kampionëve të Anglisë. Në atë takim u dëmtua rëndë portieri i Çelsit, Petr Çeh dhe ganezi, Majkëll Esien. Natyrisht që pas asaj ndeshjeje për ditë me radhë trajneri Jose Mourinjo dhe mediat nuk pushuan së kritikuari mënyrën e tij të gjykimit.

[RaPSouL]

Paguani taksat, fitoni bileta për Holandën

Paguani taksat dhe fitoni bileta falas me Holandën. Është kjo nisma më e re e Mini Bashkisë numër 10 në kryeqytet, që duke përfituar nga supersfida e 12 shtatorit kundër tulipanëve, ka vendosur që të organizojë një shorte me të gjithë banorët e zonës. Duke filluar që nga dita e sotme, të gjithë banorët që do të paguajnë taksat vendore deri në datën 10 shtator, do të jenë automatikisht pjesëmarrës në shorteun që do të organizohet për biletat e ndeshjes me Holandën. Kryetari i Mini Bashkisë 10, Gerti Bogdani, ka qenë ideatori i këtij projekti, që synon ndërgjegjësimin e banorëve, duke shfrytëzuar edhe pasionin e tyre për futbollin dhe sidomos për të parë "live" në stadium ekipin kombëtar. "Çmi i parë i shorteut do të jenë dy bileta për takimin me Holandën më 12 shtator, ndërsa çmimet e tjerë përfshijnë bluza dhe fanela të kombëtares me autograf si edhe topa futbolli po të autografuara nga lojtarët e përfaqësueses kuqezi", thuhet në një deklaratë për shtyp të kryetarit të Mini Bashkisë 10. Takimi mes Shqipërisë dhe Holandës do të luhet të mërkurën e ardhshme në stadiumin kombëtar "Qemal Stafa" dhe duke parë kërkesat e larta për bileta nga ana e tifozëve shqiptarë, ato do të mund të merren jo vetëm në sportelet e hapura nga Federata enkas për këtë punë, por edhe duke zgjedhur një rrugë pak më qytetare: pagimin e taksave. I pranishëm në short do të jetë edhe sulmuesi kryesor i përfaqësueses kuqezi, Erjon Bogdani, i cili është gjithashtu një banor i Mini Bashkisë 10.
Biletat
Biletat për ndeshjen Shqipëri-Holandë do të dalin në treg ditën e premte. Është ky vendimi i marrë dje nga organizatorja e takimit, Federata Shqiptare e Futbollit. Nëpërmjet një komunikate zyrtare për mediat, FSHF ka bërë të ditur se biletat do të tregtohen pranë pikave të shitjes në sportelet e stadiumit kombëtar "Qemal Stafa" si edhe në pikat e shitjes tek 9 katëshet. Çmimi i tyre është bërë i ditur tashmë, tribuna karshi (D2) do të kushtojë 3 mijë lekë, anësoret e karshisë, (D1 e D3) nga 2 mijë lekë dhe pjesa prapa portave (E) nga 500 lekë. Përsa u përket biletave të tribunës kryesore, ato kushtojnë 5 mijë lekë, por nuk do të nxirren në treg, pasi janë që tani të prenotuara. Po kështu, në ditën e ndeshjes nuk do të shiten më bileta në sportelet e miratuara tashmë, ndonëse nuk përjashtohet që edhe kësaj radhe të mos mungojë fenomeni i tregut të zi, pasi bëhet fjalë për një ndeshje të madhe.

[RaPSouL]

Berisha, dëmtimi i kushton operacionin

Besart Berisha nuk do të vijë përfundimisht në Shqipëri edhe pas insistimit të Federatës Shqiptare të Futbollit që sulmuesi të paraqitej për një kontroll të stafit mjekësor të kombëtares. Mjekët anglezë kanë sjellë dje një përgjigje zyrtare, ku konfirmojnë dëmtimin, por edhe faktin se futbollisti i përfaqësueses shqiptare do të bëhet operacion.

[RaPSouL]

Lorik Cana: Holanda s'do ta ketë të lehtë

Lorik Cana ka qenë një nga më optimistët në kampin kuqezi, për sfidën e 12 shtatorit kundër Holandës. Mesfushori i përfaqësueses shqiptare ka deklaruar dje se tulipanët nuk do ta kenë aspak të lehtë. "Natyrisht që ne do të ishim shumë të kënaqur me barazimin, por mendoj se mund të marrim edhe fitoren. Nuk duhet ta marrim me frikë", ka thënë mesfushori kuqezi.

[RaPSouL]

Kombëtarja, lojtarët probleme me avionët

Armend Dallku, Debatik Curri, Erjon Bogdani dhe Arjan Beqaj, i janë bashkuar vetëm dje pasdite ekipit kombëtar në hotel "Adriatik" në Durrës. Shkak për këtë vonesë kanë qenë linjat e avionëve, pasi shoqëria "Austria Airlines" i kishte anuluar ditën e hënë fluturimet nga Vjena për në Tiranë. "Më vjen keq që sot po shoh më shumë gazetarë sesa futbollistë në grumbullim, por ata mungojnë për arsye të ndryshme. Disa kanë patur ndeshje të dielën dhe të hënën, ndërsa Dallku dhe Curri kanë patur probleme me avionët, pasi janë anuluar fluturimet", u shpreh në konferencën e djeshme për shtyp Oto Bariç. Gjithsesi, lojtarët kanë qenë të gjithë në stërvitjen e zhvilluar dje pasdite.