Presidenca e Nanos rregullon balancat që prishi drejtori i Komunales Edvin Rama!

[TOKE GEGA]

Presidenca e Nanos rregullon balancat që prishi drejtori i Komunales Edvin Rama


Megjithëse po ngushtohen ditët e agonisë presidenciale për politikën shqiptare, kjo fundit ku me dëshirë apo ku pa dëshirë kërkon ta largojë sa më shumë nga vetja këtë proces, duke i qëndruar larg e më larg e duke u ruajtur nga ky “sherr” që gjithsecili nuk e do pranë. Nëse demokratët janë tashmë më të qartë në qëndrimin e tyre duke përcaktuar kandidaturën e parë provokative Bamir Topin, socialistët nuk guxojnë të servirin asnjë emër qoftë ky edhe njeriu më i afërt i Ramës apo i Metës. Megjithëse këta të fundit belbëzojnë shpeshherë për rikandidim të Moisiut, asnjëherë nuk kanë qenë të vendosur për këtë figurë të cilës i bëjnë qejfin vetëm për hir të fenomenit Sollaku.Të ndodhur nën trysninë e kandidimit të pavarur që ka bërë lideri i të majtëve shqiptarë Fatos Nano, tashmë asnjë socialist nuk ndihet i sigurtë nëse duhet të prononcohet pro apo kundër kësaj kandidature, duke fshehur brenda vetes frikën që mund të sjellë një rikthim i mundshëm në politikën shqiptare të këtij të fundit. Themi frikën pasi nëse alternativa “Nano President” dështon, atëherë do të kemi një rigrupim të ri socialist me në krye Nanon i cili do i ribëjë plagë tjetër të majtëve pas asaj çarje që i bëri Ilir Meta, i cili tashmë është kthyer si bir plangprishës në selinë e kësaj partie nga ku kërkon ridimensionim të figurës së tij në kuadër të një konfederate të majtë. Një çarje tjetër për socialistët nga ish-lideri i tyre do të thotë një oponencë e gjatë dhe një rrugë e gjatë gërmëresh të cilat mund ta leqendisin këtë formacion politik si dhe humbje pozitash për lidershipin e ri autoritar. Pra në këto kushte ku Sali Berisha me kandidaturën e Topit është i bindur se nuk ka asnjë përqind shans për ta zgjedhur, me këtë rast e ka kthyer këtë të fundit në personazh qesharak që më shumë ngjan me Uran Butkën në kandidimin përballë Berishës për kreun e PD, se sa në një personazh serioz që mund të kandidojë për postin e presidentit. Ndërkohë që Edvin Rama në krahun tjetër, duke ndjerë frikën e Nanos president i cili në sintoni me Berishën do të largojë nga rruga e tyre Sollakun, Moisiun si dhe ndonjë personazh tjetër i cili pengon qëllimin e tyre final, kërkon me çdo kusht të mbajë në frontet përkatëse këta persona që tashmë janë tutorët e tij politikë dhe ligjorë. Tashmë një Nano president për Ramën do të thotë hapje të “shpellës” me para dhe me “qelb” korruptiv që quhet Bashki e Tiranës dhe nga ku kanë buruar financime të dyshimta dhe të qelbura për kurorëzimin e tij në politikë si dhe pasurimin e tij dhe të klaneve që e rrethojnë. Realisht kundër Nanos sot janë të gjithë miliarderët politikanë të Shqipërisë të cilët nga varfanjakë dje, sot qarkullojnë kapitale dhe janë pronarë të fuqishëm firmash ndërtimi, kompanish telefonike apo dhe lavatriçe parash të pista. Kundër Nanos sot renditen ata njerëz që erdhën nga balta dhe llumi, nga koka e palarë dhe thonjtë e paprerë për t’u shndëruar në klasën e re pasanike të Shqipërisë, klasë kjo e krijuar nga vjedhja e taksave të shqiptarëve, ku bashkëfajtor me ta është padyshim edhe vetë Fatos Nano. Pra burimi i kundërshtisë së tyre për kandidaturën Nano vjen nga politika e babëzitur e socialistëve, nga ajo politikë që tashmë e shikon pushtetin një çiflig të tyren dhe jo një hapësirë për të gjitha palët,fraksionet apo dhe kundërshtarët, tashmë kjo politikë është pjesë e deformuar e imoralitetit politik të kreut të ri socialist Rama në bashkëpunim me djallëzitë e fshatarizuara të kolegut të momentit Ilir Meta. Kjo dyshe tashmë prodhon politika klienteliste dhe konfliktuale në interes të pasurimit të tyre dhe qarqeve që i rrethojnë dhe nuk mund të pranojë një lojë jashtë suazës së vet politike dhe ekonomike. Nëse do të zgjidhet Nano president, gjë që është shumë e vështirë dhe varet nga ndërthurja dhe konsensusi që mund të jepet nga të gjithë faktorët e brendshëm dhe të jashtëm, do të kemi një prishje të aleancave të rrezikshme të krijuara në grupimin e majtë si dhe do të kemi një ridimensionim të politikës shqiptare e cila sot ka humbur balancën e vet. Në një krah qëndron lideri historik i të djathtëve Sali Berisha i cili deri tani nuk ka një pasardhës të vetin, ndërkohë që krahu i majtë përbëhet nga politikanë amatorë që shikojnë interesat e momentit jashtë politikave dhe interesave nacionale. Nëse Nano do të rizgjidhet president këto balanca do shërbejnë për një ridimensionim të ri të opozitës shqiptare e cila ka rënë pre e lojërave idioteske të drejtorit të komunales së qytetit të Tiranës Edvin Rama. Ndërkohë që dyshja Nano-Berisha do të vazhdojnë të dominojnë në politikën shqiptare duke i dhënë njëri-tjetrit energji pushteti që varion me qeverisjen e Berishës deri në 2009 e më pas rikonfigurime të reja sipas zhvillimeve në formacionet politike përkatëse.