Futbolli shqiptar në Maqedoni

[strong_07]

“Muki” tre gola me ekipin e ri, Siluten


Muharrem Bajrami - Muki aktualisht është duke u stërvitur me skuadrën e Silutes dhe jo me të Kaunasit. Ai me skuadrën e tij të re ka shënuar tre gola, dy prej tyre në miqësoren e luajtur kundër Vetras. “Aktualisht jam duke u stërvitur me Siluten. Ky ekip është pronë e pronarit të Kaunasit dhe për këtë arsye gjendem aty. Kam kaluar mirë, pasi kam më shumë hapësirë për të treguar aftësitë e mia. Kemi luajtur tre ndeshje miqësore dhe unë kam shënuar tre gola”, tha Bajrami. Ai ka shtuar se ka shanse të qëndroj gjatë stinorit të ardhshëm në këtë ekip, por sërish për të do të vendosë kryesia e Kaunasit. Kampionati lituan fillon në muajin prill dhe deri atëherë “Muki” do të ketë kohë për të dëshmuar aftësitë e tij.

[strong_07]

Agron Memedi Renova do të jetë në mesin e të parave

Transferimi i Agron Memedit dhe Vullnet Eminit nga Shkëndija ’79 në Renovë u cilësua si sensacional për kushtet e futbollit të Maqedonisë. Mirëpo këto transferime ndodhin edhe në klube më të mëdha. Ishte ky shkas që të zhvillojmë bisedë me Agron Memedin, vetëm një ditë para udhëtimit në për në Ohër, ku skuadra e Renovës do të qëndrojë për një javë në përgatitje shtesë në prag të vazhdimit të pjesës pranverore të kampionatit.

Pyetje: A jeni adaptuar në skuadrën Renovës?
Agron Memedi: Edhe pse kam njohur shumë lojtarë nga Renova, rrethi iri mbetet i ri. Mendoj se jam adaptuar dhe në këtë drejtim nuk do të ketë asnjë problem. Megjithatë gjatë ndeshjeve zyrtare në vazhdim të kampionatit do të shihet qartë.

Pyetje: Gjatë një muajit keni zhvilluar përgatitje në disa faza. Sa jeni të kënaqur ?
Agron Memedi: Deri më sot mund të them se maksimalisht kemi shfrytëzuar kushtet që kemi pasur në disponim dhe në bazë të kësaj mund të them se Renova në vazhdim të kampionatit do të tregon fytyrën e vërtet. Kjo dëshmon qartë se në këtë skuadër është duke u punuar seriozisht dhe për etapa të gjata.

Pyetje: Çka mund të presim në sezonin pranveror?
Agron Memedi: Gjithsesi se do të shënohen rezultate më të mira, por vetëm nëse vazhdojmë të punojmë në këtë stil. Kujtoj se ne mund të arrijmë deri ndër 3-4 skuadrat më të mira. Nuk jemi larg që të sigurojmë edhe pjesëmarrje në kupat evropiane, ky është qëllimi parësor i yni në këtë kampionat. Kemi të gjitha kushtet që të arrijmë qëllimet.

Pyetje: Çka ju premton tifozëve të Renovës në sezonin pranveror?
Agron Memedi: Premtoj një sezon ku do të ketë suksese për klubin tonë. Ne na duhet përkrahja e tifozëve, pasi futbolli pa publik është i varfër. Unë kam besim se Renova në sezonin pranveror do të ketë numër më të madh të tifozëve, ndërsa së bashku sukseset me siguri do të jenë më të mëdha. Premtoj se do të angazhohem deri në atomin e fundit.

[strong_07]

Bashkimi planifikon edhe dy kontrolluese


Futbollistët e Bashkimit pas kthimit nga Bajnat e Negorcit, kanë pushuar dy ditë, ndërsa sot përsëri vazhdojnë me përgatitjet. Përpos seancave stërvitore ekipi dëshiron që deri në fillim të kampionatit të zhvillon edhe dy ndeshje kontrolluese.
Për aktualitetet në klub trajneri, Erkan Jusuf tha: “Sot vazhdojmë punën e planifikuar gjatë përgatitjeve, me qëllim që sa më parë ta komponojmë ekipin e ri. Siq dihet nga klubi ynë u larguan shumë futbollist dhe stafi i trajnerëve është i detyruar që me çdo kusht ta kompenzojë mungesën e fubollistëve të larguar. Gjatë ndeshjeve të deritanishme kontrolluese, reparti i mbrojtjes ishte në nivel të duhur dhe nuk ka pësuar asnjë gol, ndësa po çalon sulmi. Gjatë ndeshjeve kontrolluese katër gola kanë shënuar mbrojtësit. Jemi të detyruar të kërkojmë një sulmues cilësor.
Përpos seancave të zakoshme stërvitore planifkojmë të zhvillojmë së paku edhe dy ndeshje kontrolluese. Jemi në kërkim të kundërshtarve të përshtatshëm dhe shpresoj se gjatë kësaj jave ekipi ynë do të zhvillon edhe dy ndeshje kontrolluese që do të mjaftojnë për stafin e trajnerëve të shikon formën e futbollistëve të cilët konkurojnë për ekipin e parë. Klubi ynë gradualisht është duke u konsoliduar dhe po vijnë ditë më të mira”, përfundoi Jusufi.

[strong_07]

Nuri Mustafi - Do të shkëlqej edhe në Finlandë

Tani më Nuri Mustafi është bërë pjesë e futbollit finlandez, duke u bashkuar me ekipin FC Popa. Shkëndija 79 mbetet edhe pa një futbollist të madh i cili shumë shpejt shpreson të veshi një fanelë tjeter kuq e zi, ate te kombetares shqiptare
Shkëndija’79 në sezonin pranveror do të jetë më e varfër për një lojtarë cilësorë, fjala është për Nuri
Mustafin i cili që nga dita e sotme udhëton për në Finlandë, për t’u bashkangjitur me ekipin e tij të ri FC Popa.
Nuri Mustafi ka arritur marrëveshje për një vit, mirëpo me mundësi për të vazhduar kontratën.

Pyetje: Si e përjetoni largimin tuaj nga klubi ku jeni rritur dhe afirmuar si futbollistë?

Nuri Mustafi: Është hera e parë që unë ndahem nga klubi ku jam nga fëmijëria. Do të më mungojnë bashkëlojtarët dhe posaçërisht tifozët “Ballistët” nga të cilët gjithmonë kam pasur përkrahje të madhe.

Pyetje: Ju keni kontakte edhe me FSHF-në. Çka ka të vërtet në këtë drejtim?

Nuri Mustafi: Kontaktet i ka mbajtur shefi i stafit teknik të Shkëndija’79 Edmond Miha, i cili edhe i ka dhënë karakteristikat në FSHF. Tani jemi në pritje të përgjigjes, ndërsa mendoj se do të kem përgjigje pozitive.

Pyetje: Si do ta vlerësoni angazhimin angazhimin eventual?

Nuri Mustafi: Kombëtarja është nder dhe obligim i madh. Megjithatë është rast i mirë për të dëshmuar cilësitë e futbollisti profesionist. Premtoj se nuk do të zhgënjejë ata të cilët kanë besim tek unë, e as profesor Edmond Mihën e as Federatën e Futbollit Shqiptar.

Pyetje: A mendoni të ktheheni në ekipin e Shkëndijës?

Nuri Mustafi: Është e sigurt se Shkëndija është dhe do të mbetet në shpirtin tim. Në këtë klub kam kaluar çaste të lumtura, ndaj edhe premtoj se do të kthehem përsëri. Shkoj kryelartë, pasi kam qenë pjesë e një klubi të madh që është simbol i futbollit shqiptar në Maqedoni.

Pyetje: Porosia juaj për klubin tuaj të zemrës?

Nuri Mustafi: Ekipit të zemrës i dëshiroj suksese që një ditë të realizoj ëndrrën e vet dhe të adhuruesve të saj për të dalë në arenën ndërkombëtare. Dëshiroj që publikisht të falënderoj korrektësinë e kryesisë së klubit që treguan në këto momente, por edhe dy menaxherët e mi Sabedin Shabani dhe Besim Isa të cilët arritën me sukses të menaxhojnë këtë transferim timin që mund të them se është i volitshëm

[strong_07]

Armend Nexhipi / Kërkoj të jem titullar

Armend Nexhipi, tani më lojtar i ri i skuadrës çeke Slavia Pragë e ka filluar bisedën e tij duke thënë se është tepër i kënaqur me kushtet dhe me mikpritjen që ia kanë bërë bashkëlojtarët e rinj. Në këtë skuadër ai po zhvillon disa stërvitje intensive dhe pret të bëjë debutimin e tij të parë me fanellën e re.
“Më kanë pritur shumë mirë. As që kam mundur ta paramendoj një gjë të tillë. Kushtet janë të mrekullueshme. Jam i vendosur përkohësisht në një hotel dhe më pas do të më gjejnë një banesë tjetër, ku do të qëndroj me bashkëlojtarët e tjerë”, tha fillimisht Armend Nexhipi.
Ai pranon se stërvitjet në këtë klub kanë shumë dallime nga ata që ka bërë deri tani te skuadra e Slloga J.
“Stërvitjet janë mjaft intensive dhe po mundohem që të adaptohem sa më shpejt. Gara për të qenë titullar është mjaft e rreptë dhe pikërisht këtu shtohet motivi për të dhënë maksimumin. Ambiciet e klubit janë të fitojë titullin e kampionit. Deri tani në ndeshjet miqësore kam qenë në formën më të mirë, por do të mundohem të jem titullar edhe gjatë ndeshjeve kampionale”, tha Nexhipi.
Armend Nexhipi është i vetmi futbollist shqiptar në këtë skuadër dhe ka pohuar se aty do të prezantojë siç është më së miri futbollin shqiptar. Te skuadra e tij e re, ai do të kërkojë të mbajë në fanellë numrin 16, siç e ka mbajtur deri tani, por nuk i prishet qejfi nëse do të merrte edhe ndonjë numër tjetër.
Debutimi i Armend Nexhipit me fanellën e Slavia Pragë pritet të bëhet me 12 mars në takimin kundër rivalit kryesor në tabelë, Liberec.

[strong_07]

Trajneri shqiptar tregon zhvillimet e fundit tek kuqezinjtë

Shkëndija ’79 po zhvillon pjesën e fundit të stërvitjeve të fazës përgatitore të dimrit. Trajneri Edmond Miha ka sqaruar rrjedhën e stërvitjeve dhe ka krahasuar skuadrën në stinorin pranveror dhe me atë që do të luaj në pjesën e mbetur të kampionatit. Mbi të gjitha ka vlerësuar lojën kolektive, pasi nuk janë më shumica e lojtarëve më aftësi personale të dëshmuara.

Pyetje: Jeni në prag të përfundimit të fazës përgatitoret dimrit. Sa është e përgatitur Shkëndija ‘79?

Miha: Kemi punuar profesionalisht ashtu siç kërkon programi stërvitor. Për këtë unë jam i ndërgjegjshëm por edhe lojtarët. Është e rëndësishme për mua pasi kemi punuar në drejtimin taktit, ku baza kryesore është futbolli racional dhe problemi i krijimtarisë dhe improvizimit të këtyre lojtarëve. Duke u nisur nga fakti se shumë lojtarë kanë ikur, tani jemi bazuar në lojën kolektive. Nuk kemi më liderë për të krijuar një skuadër solide dhe për të krijuar emër më të madh dhe më të fuqishëm. Unë mendoj se mbi bazën e lojës kolektive dhe mbi bazën e disiplinës edukative dhe profesionale Shkëndija do tregojë futboll të bukur që do të gëzojë përkrahjen edhe të tifozëve tanë, Ballistët.

Pyetje: Sa jeni të kënaqur me formën e lojtarëve, pas ndeshjeve kontrolluese?

Miha: Testi kryesor për mua ishte ndeshja me Pobedën. Skuadra manifestoi shenja shumë pozitive, bëri lojë krijuese dhe luajti një futboll të shpejtë. Edhe më i rëndësishëm është fakti se në skuadër ka disiplinë. Testi tjetër i lojës kolektive është ky i ndeshjes së fundit me Vëllazërimin. Unë jam shumë i kënaqur nga këto lojtarë, sepse kanë treguar disiplinë dhe kanë dhënë mundin e tyre në të gjitha seancat stërvitore.

Pyetje: Çfarë mundë të pritet nga ekipi i Shkëndijës në sezonin vijues?

Miha: Mua më vjen keq se gjithmonë kur kam marrë Shkëndijën ka pasur këso situatash, si ndërtimin e lojtarëve, largim të tyre, por jam profesionist dhe nuk i trembem punës. Unë besojë në grupin e të rinjve, në shkollën e Shkëndijës, te Ballistët. Kam krijuar një mentalitet tek skuadra, ndjenjën e fitores. Pra gjithmonë do të jem optimist.

Pyetje: Aktualisht ka disa përforcime në ekipin e Shkëndijës, a mundë të priten përforcime të tjera?

Miha: Këto përforcime aktuale vetëm sa kanë mbyllur disa boshllëqe. Nuk mund t’i krahasojmë lojtarët si Tolevski, Dimitrovski dhe Maxhunarov me Emërllahun, Eminin, Memetin apo me Nuri Mustafin. Shkëndijës i kanë ikur mbi tetë lojtarë cilësor, duke përmendur përveç të lartpërmendurve edhe Pollozhanin, Ismailin dhe Ibrahimin. Në qoftë se do të kisha këtë grup lojtarësh unë do isha i garantuar përpara publikut shqiptarë në Maqedoni, se do të luftoja për titull kampioni ose në tri vendet e para, për Kupën e UEFA-së apo për Kupën e Kampionëve.

[strong_07]

Nderim Nexhipi, oferta nga Korea dhe Ukraina

Mesfushori i kampionati aktual të Maqedonisë, Nderim Nexhipi është duke bërë stërvitje intensive bashkë me ekipin tij në Antali të Turqisë. Por shfaqja e tij në takimet miqësore ka bërë që Nexhipi të vihet në qendër të vëmendjes nga skuadra të ndryshme. Ai ka pohuar se ka oferta nga skuadra të Koresë dhe Ukrainës, por kryesia e Rabotniçkit deri me një mars do të vendosë nëse do ta lëshojë këtë futbollist. Rabotniçki të premten pritet të kthehet në Shkup.

[strong_07]

Merr karton të kuq gjatë ndeshjes

Zekerija Ramadani - Zeka ka luajtur për 78 minuta në ndeshjen miqësore kundër skuadrës së Ligës së parë të Bullgarisë, Marek. Këtë takim me rivalin e tabelës së klasifikimit, Bellasica Petriç e ka fituar me rezultat 3:1. Në këtë ndeshje Ramadani ka luajtur në mënyrën e tij më të mirë, por pas një ndërhyrje të palejuar dhjetë minuta para përfundimit është ndëshkuar me karton të kuq.

[strong_07]

Shkëndija do të mbetet edhe pa Idrizin


Tetovë– Edhe një futbollistë i Shkëndijës ka paralajmëruar largimin e tij nga skuadra kuqezi. Është ky sulmuesi Mensur Idrizi, i cili ka pohuar se këtyre ditëve ka pasur oferta për të luajtur jashtë vendit. “Kam oferta të luaj jashtë Maqedonisë, por tani për tani nuk do të bëj publike emrat e ekipeve, të cilët janë të interesuara për mua”, tha Idrizi. Ai thotë se do ta pres përfundimin e stinorit pranveror dhe pastaj do ta braktisë skuadrën kuqezi. ”Tani nuk do të ndodh largimi im nga skuadra e Shkëndijës, do të presë të përfundoj edicioni i sivjetmë dhe pastaj të shoh më tutje se çka do të vendosi. Kam kohë të mjaftueshme dhe mundësi për të shqyrtuar ofertat e tjera”, u shpreh sulmuesi i Shkëndijës.

Sipas burimeve jozyrtare të gazetës “Koha” bëhet fjalë për klube, të cilat janë nga Finlanda dhe Kroacia, por një gjë të tillë Idrizi nuk deshi ta vërtetojë, duke ia lënë kohës, që të tregoj për të ardhmen. Mensur Idrizi në sezonin vjeshtor ka qenë autor i disa golave të rëndësishëm, të ndeshjeve të zhvilluara në Tetovë. Karrierën futbollistike e ka filluar në Shkëndijë, ku është edhe sot e kësaj dite. Lojtari i fundit që u largua nga Shkëndija ishte mbrojtësi Nuri Mustafi, që ka kaluar në Kampionatin finlandez, respektivisht në skuadrën e FC Popa.

[strong_07]

Mbrojtësi Shaban Rexhepi flet për përgatitjet e skuadrës

Ekspedita e Renovës të dielën kthehet në Tetovë pas një qëndrimi tetë ditor në Ohër. Të shtunën kjo skuadër e zhvillon ndeshjen e fundit përgatitore me ekipin e Ohrid-it, ndërsa mbrojtësi Shaban Rexhep është shprehur i kënaqur me rrjedhën e deritanishme të përgatitjeve me ekipin e tij. “Jemi shumë të kënaqur me kushtet këtu në

Ohër. Kjo është hera e dytë që klubi ynë i zhvillon stërvitjet jashtë Tetovës. Më herët ishim në Dojran, kurse tani në Ohër. Përgatitjet kanë kaluar në mënyrë profesionale, sepse ne kemi një trajner shumë të mirë. Shpresoj se në stinorin pranveror do të arrijmë suksese më të mira sesa ato të vjeshtës”, ka pohuar mbrojtësi Rexhepi. Ai thotë se deri tani Renova ka zhvilluar disa ndeshje kontrolluese, prej të cilave janë ndarë të kënaqur me rezultatet dhe angazhimin e bashkëlojtarëve të tij në fushën e lojës.

“Kemi luajtur pesë takime miqësore, ku prej tyre kemi shënuar 2 fitore (Miravcin 3:0, Teteksin 1:0), 2 barazime (Vëllazërimin 1:1, Pelisterin 2:2) dhe një humbje nga Sileksi 3:2. Për ne nuk kanë qenë rezultatet në rend të parë, por loja që do ta krijonte trajneri Kostov për ndeshjet kampionale, sepse ne jemi përforcuar me disa lojtarë të rinj. Kështu që trajnerit më shumë i ka interesuar se si ato lojtarë do të inkorporohen në skuadër”, vijoi Rexhepi.

Renova të dielën në mëngjes zhvillon seancën e fundit stërvitore në Ohër dhe pastaj ekspedita e tyre do të kthehet në Tetovë. Miqësorja me Ohrid-in është testi i fundit i trajnerit Vllatko Kostov para fillimit të stinorit pranveror dhe ndeshjes me Bregallnicën. Ndryshe, mbrojtësi Shaban Rexhep para një viti nga skuadra e Bashkimit pat përforcuar Renovën, duke i luajtur pothuajse të gjitha ndeshjet kampionale në fanellën bardhekaltër.