Energjitika: Inagurohet Hidrocentrali i Ashtës

[Albo]

Fjala e Kryeministrit Berisha në mbledhjen e Këshillit Kombëtar të Ujit

30/6/2007

Në fjalën e mbajtur në mbledhjen e Këshillit Kombëtar të Ujit, Kryeministri Berisha u shpreh:

“Jemi mbledhur sot për të vendosur mbi shfrytëzimin e burimeve ujore të lumit Devoll për qëllime energjitike. Qeveria është tërësisht e përqëndruar në krijimin e burimeve të reja energjitike. Në këtë kontekst vendimi i sotëm për shfrytëzimin në tërë kaskadën e tij të Lumit Devoll në përputhje me një projekt tashmë përfundimtar të paraqitur nga një kompani e madhe austriake përbën një zhvillim të madh, pasi vepra është ndër më të veçantat e këtij lloji në Shqipëri dhe në Europë. Kjo vepër bazohet në ndërtimin e disa hidrocentraleve dhe një sistem tunelesh prej rreth 48 kilometrash. Gjithashtu kjo vepër respekton tërësisht mjedisin dhe bën shfrytëzimin më optimal, më ekonomik të ujrave të këtij lumi, duke shfrytëzuar tërë kaskadën nga fillimi i burimeve të tij deri në Banjë dhe ka një investim prej rreth 1 miliard euro.
Dua me këtë rast të përgëzoj ministritë, ekipin e oponecës teknike dhe ekonomike, ekip i cili muaj të tërë ka punuar me përkushtim në një projekt kaq madhor për të bërë oponencën, si teknike, ashtu dhe ekonomike. Projekti i kaskadës së hidrocenralit të Devollit vjen këtu për tu miratuar për shfrytëzimin e burimeve ujore dhe kalon javën e ardhshme në mbledhjen e Këshillit të Ministrave, për të dalë në tender ndërkombëtar në përputhje me ligjin shqiptar. Natyrisht kompania që ka sjellë projektin do tw ketw 10 % të pikëve.
Ky është aktualisht projekti më i madh në veprat hidroenergitike, por vetëm pak javë më parë ne miratuam të rishqyrtuar hidrocentralin e Kalivacit, i cili është në ndërtim e sipër prej rreth 100 megavat. Kemi çelur tenderin ndërkombëtar për Tec-et e Fierit. Pritet në rikonstruksionin e tyre të përftohen një energji prej rreth 300 megavat. Fillon së shpejti ndërtimi i termocentralit të Vlorës me një kapacitet prej 90 megavat. Kemi miratuar gjatë këtyre muajve në qeveri dhe mbështetur me oponencë teknike dhe ekonomike, rreth 82 Tec-e të vogla, të cilat edhe ato kanë vlerën e tyre. Studime shumë serioze nga kompani të mëdha ndërkombëtare, po behën në lumenjtë Vjosa, Drin, Në Bushat. Ne presim që gjatë muajve në vijim Skavica dhe Bushati të jenë dy HEC të tjera të cilat do të miratohen , do të shpallet tenderi ndërkombëtar dhe do të fillojë ndërtimi.
Qeveria është e vendosur të bëjë cdo përpjekje që pasuritë e mëdha ujore të këtij vendi ti shndërrojë në energji për Shqipërinë.
Në këtë mbledhje ne do të trajtojmë dhe një seri vendimesh shumë të rëndësishme mbi administrimin e ujit. Miratojmë udhëzimin për miratimin e rezervave ujore , miratojmë udhëzimin për legalizimin e puseve të çpimeve , sepse dhe ato duhet të legalizohen, si dhe duhet të vendoset një disiplinë e rreptë në trajtimin, shfrytëzimin, përdorimin e këtyre rezervave.
Gjithashtu do të shtrojmë disa detyra për mbledhjen e ardhshme të këtij institucioni që trajton problemet e ujit të vendit.”

Kryeministria

[Albo]

Këshilli Kombetar i Ujit miraton projektin madhor për ndërtimin e tre hidrocentraleve në kaskadën e lumit Devoll

30/6/2007
Sot u mblodh Këshilli Kombëtar i Ujit, i cili kishte si çështje kryesore në rendin e ditës miratimin e vendimit për përdorimin e rezervave ujore të lumit Devoll për prodhim energjie. Shfrytëzimi I këtyre rezervave do të behet me anë të ndërtimit të tre hidrocentraleve përgjatë tërë kaskadës së tij.

Vendimi u miratua bazuar në projektet e kompanisë së njohur austriake EVN. Kjo kompani ka paraqitur projekte për ndertimin e tre HEC-ve me kapacitet rreth 400 megavat së bashku.

Këto HEC-e do të ndërtohen bazuar në një sistem tunelesh rreth 50 km të gjatë. Shuma e investimeve për realizimin e tyre do të jetë nga 700 milion deri në 1 miliard Euro. Qeveria do të miratojë së shpejti çeljen e tenderit për ndertimin e këtyre hidrocentraleve.

Kryeministri informoi Këshillin se pas miratimit të ligjit të ri të koncesioneve janë miratuar për ndertim 82 HEC-e të vogla, ka përfunduar shqyrtimi i kontratës për HEC-in e Kalivacit me kapacitet 100 megavat, ka filluar ndërtimi i TEC-it të Vlorës, si dhe është çelur tenderi për TEC-in e Fierit.

Duke folur për projektet e shfrytëzimit të energjisë ujore në tërë kaskadën e Lumit Devoll, Kryeministri Berisha e vlerësoi atë si një zhvillim të madh, si një vepër ndër më të vecantat e këtij lloji në Shqipëri dhe në Evropë. Kryeministri theksoi se kjo vepër respekton tërësisht mjedisin dhe bën shfrytëziminmë optimal dhe më ekonomik të ujrave të këtij lumi.
Kryeministri u shpreh gjithashtu se qeveria është e vendosur të bëjë çdo përpjekje që pasuritë e mëdha ujore të këtij vendi ti shndërrojë në energji për Shqipërinë.

Kryeministria

[Qerim]

Me sa di une lumi Devoll nuk ka shume potencial energjie.Hidrocentrali i Banjes qe filloi ne kohen e komunizmit kishte me shume rol per ujitje.

[Albo]

Energo GORA prezanton tek kryeministri Berisha projektin e ndërtimeve të pesë hidrocentraleve në Shqipëri

13/7/2007

Përfaqësues të grupit Energo GORA janë pritur sot paradite nga kryeministri Berisha, në zyrën pranë Këshillit të Ministrave. Në këtë takim grupi slloven i ka paraqitur kryeministrit kërkesën për ndërtimin e pesë hidrocentraleve të vogla, me kapacitet 50 megavat, në zonën veriore të Shqipërië, konkretisht mbi lumin e Shalës dhe lumin e Cemit.


Copyright (c) Keshilli i Ministrave - Departamenti i Informacionit

[Albo]

Berisha-Copelouzos, termocentral në Korçë me fuqi 300 megawat

Shqipëria vuan nga kriza energjetike, prandaj qeveria po merr masa për ta shmangur situatën duke hyrë në tratativa me investitorë të huaj që operojnë në fushën e energjetikës.
Lidhur me këtë çështje, kryeministri Sali Berisha zhvilloi dje një takim me një grup drejtuesish të Copelouzos Group, të përfaqësuar nga Dimitris Copelouzos, president dhe drejtori i Përgjithshëm i kompanisë së njohur që operon në fushën e energjisë.
Kompania i ka prezantuar kryeministrit një projekt për ndërtimin e një termocentrali me gaz në zonën e Korçës, me fuqi prodhuese 300 megawat.
Copelouzos Group ka aplikuar në tenderin për ndërtimin e Termocentralit të Fierit me kapacitet prodhues 200 megawat.
Ideja për këtë vepër energjetike ka qenë prej shumë vitesh dhe pas një studimi të kujdesshëm u mundësua paraqitja e këtij projekti para kryeministrit Berisha. Projekti përfshin edhe ndërtimin e një gazsjellësi Greqi-Shqipëri për të furnizuar me gaz termocentralin.
Në këtë takim, Berisha është shprehur i gatshëm për ta mundësuar këtë projekt energjetik. Sipas tij, ekonomia e Shqipërisë së bashku me ekonomitë e vendeve të tjera në Ballkan është një ekonomi dinamike që po zhvillohet me ritme të shpejta. Kohët e fundit, investitorët e huaj kanë shtuar investimet në vendin tonë, pasi tregu ballkanik është i etur për energji. Kështu, duke u bazuar në këto kushte të vështira që po përjeton populli i Ballkanit dhe sidomos Shqipëria, qeveria shqiptare i ka cilësuar veprat energjetike të të gjitha llojeve, të mbështetura në teknologji moderne, si prioritet të qeverisë.
E. Sako


18 Korrik 2007
Albania

[Albo]

Miratohet vendimi për hapjen e tenderit për dhënien me koncesion të hidrocentraleve të lumit Devoll

18/7/2007

Në mbledhjen e sotme të Këshillit të Ministrave u miratua vendimi për hapjen e tenderit për dhënien me koncesion të hidrocentraleve në kaskadën e lumit Devoll.

Duke vlerësuar projektin e paraqitur nga kompania e njohur austriake EVN për kaskadën e Devollit, Kryeministri theksoi se kjo kompani ka hartuar një projekt për ndërtimin e një serie hidrocentralesh në tërë gjatësinë e lumit Devoll. Në projektet e këtyre hidrocentraleve parashikohen të ndërtohen tunele, me një gjatësi të marrë së bashku rreth 50 kilometra. Investimi për këtë projekt shkon rreth 1 miliardë euro.

Projekti garanton një shfrytëzim maksimal të potencialit ujor të këtij lumi, një respektim maksimal të luginës në të cilin ai rrjedh. Grupi i oponencës, i ngritur pranë ministrisë së Ekonomisë, ka shqyrtuar për muaj të tërë projektin e kompanisë për lumin Devoll dhe e vlerëson atë një projekt unik në llojin e tij.

Gjithashtu, Kryeministri Berisha tha se edhe kompani të tjera të mëdha botërore, po tregojnë një interes të madh në rritje për burime të tjera ujore të vendit. Veçanërisht Vjosa është më shumë në vëmendjen e tyre. Kryeministri shprehu besimin se gjatë muajve ne vijim do te hapet tenderi edhe për këtë projekt.

[Albo]

Përfaqësues të Fratelli rone dhe SEA prezantojnë projektet e tyre tek Kryeministri Berisha

7/9/2007

Kryeministri Berisha ka pritur në zyrën e tij, pranë Këshillit të Ministrave, përfaqësues të dy kompanive të mëdha Fratelli rone dhe SEA, të cilët janë pjesë e grupit italiano- shqiptar të hidrocentralit të Currajt. Qëllimi i këtij takimi ka qenë prezantimi i projektit përfundimtar për këtë hidrocentral dhe shprehja e interesit për projekte të tjera po në fushën e energjetikës.

Kryeministri Berisha, pasi i ka falënderuar për punën cilësore të kompanisë, u ka prezantuar përfaqësuesve edhe një herë procedurat sipas ligjit të koncesioneve për veprat energjetike hidro.
Duke bërë një përshkrim të zhvillimit të shpejtë e të madh në këtë fushë, Kryeministri Berisha ka theksuar se qeveria ka ndjekur një rrugë specifike për të siguruar shfrytëzimin sa më të mirë të burimeve ujore shqiptare për prodhim energjie.

Kryeministri është shprehur në këtë takim se i fton të gjitha kompanitë e interesuara, ato të huaja e vendase, që të paraqesin projekte e tyre për ndërtimin e hidrocentraleve të vogla, të mesme e të mëdha.

Kryeministri ka bërë me dije se kompani të ndryshme kanë filluar tashmë hartimin e projekteve konkurruese në të njëjtët lumenj të Shqipërisë. E kjo sjell përzgjedhje më të mirë të projekteve për shfrytëzimin e lumenjve. Gara është hapur jo vetëm për lumenjtë kryesorë, por edhe për degët e tyre, nga veri deri në jug të Shqipërisë.

Kryeministria

[brooklyn2007]

Hajde inshalla po bejne ndonje gje kesaj rradhe. Mbase u mbushet mendja te hedhin ndonje para per te investuar ne ate vend.

[Albo]

Pesë kompani çeke kërkojnë të investojnë në energjitikë

Pesë kompani çeke, pjesë e “CREA Alliance”, prezantuan aktivitetin dhe shërbimet që ofrojnë në fushën e rinovueshme të energjisë. Kryetari i “CREA”-s, Bretislav Skacel, u shpreh se, Shqipëria ka shumë potenciale hidrologjike dhe shumë mundësi për zhvillimin e burimeve të reja hidrike. “Ajo çfarë ne po shohim tani është se qeveria është duke krijuar një mjedis shumë të favorshëm kundrejt burimeve më të pastra energjitike siç janë ndërtimet e hidrocentraleve”, - tha Skacel. Ndërsa, kryetari i Agjencisë Kombëtare të Burimeve

Natyrore (AKBN), Milo Kuneshka, duke prezantuar aktivitetin e agjencisë krijuar dy vjet më parë, nënvizoi se, “kjo është pjesë e strategjisë qeverisëse për të vënë në pah dhe për të shfrytëzuar në mënyrë sa më të mirë burimet natyrore të Shqipërisë, të cilat i ka të shumta, si ato ujore, ashtu edhe ato minerale. “Ne jemi të bindur se në qoftë se shfrytëzohen me efikasitet burime hidrike të Shqipërisë për prodhimin e energjisë elektrike, nuk do të ketë më probleme më të cilat ajo përballet sot, siç është mungesa e energjisë elektrike”, - nënvizoi Kuneshka. Bashkëpunimi mes AKBN dhe “CREA Alliance”, synon t’i vijë në ndihmë biznesit shqiptar në fushën e ndërtimit të hidrocentraleve të vegjël. Fakti që një grup kompanish të Çekisë kërkon të investojë në Shqipëri në fushën e energjisë së rinovueshme është një nga lajmet e mira për ekonominë dhe energjinë e këtij vendi. Deri më tani, projektet më të rëndësishme në fushën e energjisë po mbizotërohen nga termocentralet me naftë, të cilët kanë një kosto të madhe dhe njëherazi janë ndotës të mëdhenj të ambientit. Aktualisht, është duke u folur për një termocental në Porto Romano në Durrës dhe për një tjetër në Berat. Nevojat për burime të reja të energjisë në Shqipëri, tashmë janë në pikë kritike dhe ndërtimi i tyre është në rrugë e sipër. Projektet e reja në këtë lëmë si ky i grupit të pesë kompanive çeke janë pasuri tjetër në këtë drejtim. Vendi sot kërkon të konsumojë më shumë se gjashtë miliardë kilovatorë energji në një vit, në një kohë që ai mund të prodhojë jo më shumë se dy miliardë e gjysmë kilovat-orë në një vit me reshje normale dhe jo në një vit të thatë si ky i këtij viti. Pavarësisht faktit se sistemi energjitik i vendit tonë është i varur nga burimet ujore, nuk janë thjesht ato problemi i mungesës së energjisë. Burimet ujore të vendit nuk janë shfrytëzuar plotësisht, madje ato janë shfrytëzuar sipas vlerësimeve në masën e dhjetë përqindëve.


Do të ndërtohet edhe një linjë e madhe e transmetimit të energjisë me Kosovën

Brenda tre muajve do të jetë gati studimi për ndërtimin e një linje të re të interkonjeksionit 400 kV Vau i Dejës- Kosovë. Studimi është ndërmarrë nga një grup ekspertësh të bankës gjermane KfW. Efektet e kësaj linje të re të transmetimit të energjisë do të jenë mjaft të mëdha për të lidhur vendin tonë dhe Kosovën me tregun rajonal të energjisë. Shqipëria dhe Kosova, me anë të kësaj linje të madhe të transmetimit të energjisë do të mund të funksionojnë plotësisht si një një pjesë e tregut dhe e rrjetit të energjisë. Sipas specialistëve, në Shqipëri energjia prodhohet kryesisht nga HEC-et, ndërsa në Kosovë nga TEC-et. Duke qenë dy sisteme të ndryshme, shkëmbimi i energjisë mes tyre sjell efekte pozitive në plotësimin alternativ të kërkesave të konsumatorëve me energji elektrike. Kjo do të jetë linja më e rëndësishme e transmetimit të energjisë së vendit tonë me jashtë dhe së bashku me linjën e transmetimit me Malin e Zi, do të bëjnë të mundur që vendi ynë të mos ketë asnjë problem me importin e energjisë dhe mund të importojë energji aq sa të jetë nevoja.
Të dhëna nga Ministria e Ekonomisë dhe Energjitikës bëjnë me dije se, pas ndërtimit të linjës së transmetimit të energjisë me Malin e Zi, Tiranë-Podgoricë dhe pas ndërtimit të termocentralit të Vlorës, vendi ynë dhe korporata e energjisë KESH nuk do të kenë më asnjë vështirësi për të furnizuar pa ndërprerje konsumatorët me energji.
E vetmja pengesë do të jetë puna e korporatës së energjisë KESH, nga e cila do të varet mbledhja e faturave të energjisë. Në rast se korporata, me çmimet e reja, nuk do të mund të dalë me fitim, domethënë nuk do të mundë të mbledhë të gjitha faturat e energjisë, atëherë sërish do të ketë probleme me furnizimin me energji, por tashmë jo për arsye të mungesës së energjisë. Linja e transmetimit të energjisë me Malin e Zi ka nisur nga puna dhe do të jetë gati për të transmetuar energji sipas parashikimeve para vitit 2009.
Të dhëna nga korporata shqiptare e energjisë tregojnë se linja me Kosovën, e cila po studiohet nga ekspertët e Bankës Gjermane për Zhvillim, KfW, do të shërbejë, jo vetëm për të importuar energji apo për të depozituar energji, por do të shërbejë edhe për tregtim të energjisë nga kompani apo biznese të kësaj fushe, në një kohë të dytë, kur vendi të ketë burime energjie më të mëdha dhe kur Shqipëria të jetë pjesë e tregut të energjisë së rajonit.

Tema

[Albo]

Kryeministri Berisha: Kompanitë e huaja interes të madh për ndërtimin e HEC-ve në Shqipëri

Në mbledhjen e sotme të Këshillit të Ministrave, Kryeministri Berisha e vuri theksin në projektvendimet e paraqitura nga Ministria e Ekonomisë, Tregtisë dhe Energjitikës për dhënien me koncesion dhe miratimin e bonusit për Hidrocentralet “Ujanik 2”, “Radovë” dhe “Thanë”.

Kryeministri informoi se një sërë kompanish të mëdha evropiane kanë shfaqur interes dhe kanë paraqitur projektet e tyre për ndërtimin e disa HEC-ve mbi lumenjtë e Alpeve, si Shalë, Nikaj, Curraj, Valbonë, të cilët ndonëse modest në ujëra, shfaqen të fuqishëm në prodhimin e energjisë. “Me të gjitha këto projekte, të marra së bashku - shpjegoi kryeministri, mund të përfohet një sasi më e madhe energjie sesa në Vaun e Dejës.

Kryeministri theksoi se ky proces po shoqërohet me një garë konkurence të madhe të paprecedent në Shqipëri.

“Vetëm në njërin prej lumenjve të Alpeve kanë dorëzuar projektet 4 kompani të mëdha evropiane. Ana më pozitive e këtij procesi është gara e konkurencës së jashtëzakonshme që po ndodh, ku natyrisht do të fitojë më e mira – tha kryeministri.

Gjithashtu, Kryeministri bëri të ditur se më 1 tetor grupi i oponencës publike do të dorëzojë shqyrtimin për HEC-in e Skavicës me një projekt të ri, i cili është i konceptuar në dy tunele që zbresin nga Skavica deri në afërsi të liqenit të Fierzës dhe që do të mundësojë prodhimin e energjisë me një kapacitet prej rreth 550 megavat.

Ndër të tjera, Kryeministri siguroi se parvarësisht nga interesi gjithnjë në rritje I sektorit privat për prodhimin e energjisë nga burime ujore, qeveria do të investojë çdo vit në ndërtimin e termocentraleve dersa të balancohet plotësisht prodhimi ujor me atë termik, duke mos krijuar varësi nga kushtet atmosferike.


Më tej, Kryeministri u shpreh:

“Kryefjala e mbledhjes së sotme janë sërish hidrocentralet. Në këtë mbledhje ne vendosim të japim bonusin projektit të paraqitur në Ministrinë e Ekonomisë, Tregtisë dhe Energjitikës për hidrocentralin e “Ujanik 2”, projektin për hidrocentralin “Radovë” dhe projektin për hec-in “Thanë”.

I pari ndodhet në një degë të lumit Tomorricë, kurse dy të tjerët janë në segmentin e mesëm të lumit Çarçovë, degë e lumit Vjosë. Këto bonuse i marrin shoqëritë, “Busa”shpk “Tulla T” Shpk dhe shoqëria “Delia Grup” shpk. Këto projekte ndodhen afër urës të sapoinaguruar. Vjosa është burimi më i lakmuar ndonëse projektet për burime të tjera ujore janë të shumta.
Më 1 tetor sipas programit, grupi i oponencës publike dorëzon shqyrtimin e HEC-it të Skavicës me një projekt të ri, i cili në variantin e digës së vogël, jep rendimentin që do të jepte diga e madhe. Koncepti i ri bazohet në dy tunele që zbresin nga Skavica deri në afërsi të liqenit të Fierzës dhe mundëson marrjen e një kapaciteti energjie prej rreth 550 megavat. Pas finalizmit të ekspertizës nga ana e grupit të oponenecës publike projekti vjen në qeveri dhe kalon në tenderat ndërkombëtarë ku konkurrues ka kompaninë e projektit si dhe kompani të tjera ndërkombëtare.

Gjatë kësaj periudhe ka patur një interes shumë të madh për lumenjtë e Alpeve. Ka shumë kompani të cilat kanë paraqitur projekte për ndërtim Hec-sh në lumenjte Shalë, Nikaj, Curraj dhe Valbonë, të cilët për shkak të zbritjeve të mëdha që kanë, ndonëse modest në ujëra shfaqen shumë fuqishëm në prodhimin e energjisë. Në këto lumenj mund të përfitohet me projeket e paraqitura, të marra së bashku, një sasi më e madhe energjie sesa në Vaun e Dejës.

Në Vjosë kanë dorëzuar projektet derin tani kompania EVN, kompania Samsung, Deutche Bank së bashku me Bek, një kompani e njohur turke në fushën e HEC-ve dhe pritet që edhe dy kompani, ndër më të mëdhatë në Evropë, të paraqesin projektte e tyre në mënyrë që oponenca publike të shqyrtojë, të vendosë për cilin nga projektet do të jepet bonusi. Mund të them se një vendim i mëparshëm , i këtij procesi për të inkurajuar ndërtimin kaskadë dhe jo vetëm në një segment të caktuar, është provuar jashtëzakonisht i suksesshëm për sa u përket projekteve, por ana më pozitive e këtij procesi është gara e konkurencës së jashtëzakonshme që po ndodh.

Ka një konkurencë të panjohur më parë për këtë vend. Vetëm në njërin prej lumenjve të Alpeve kanë dorëzuar projektet 4 kompani të mëdha evropiane. Natyrisht do të fitojë më e mira, por gara është e jashtëzakonshme. Ky kompeticion ka sjellë një kthjelltësi shumë të madhe në këtë process. Natyrisht për kontrata e mëdha do të marren kompani konsulentce sepse keto kontrata janë kontrata që shkojën nga 600 milion deri në 1 miliard euro. Sigurisht që kemi kapacitet tona , por këto kapacitet do ti mbështesim , forcojmë dhe me konsulencë ndërkombëtare, në mënyrë që me këto kontrata të fitohet levedisshëmria maksimale që mund të fitohet në partneritetin public privat. Të gjitha këto janë investime në sektorin privat. Shpresoj që projekti për Bushatin të përfundojë shumë shpejt pasi me këtë po merret Korparata Financiare Ndërkombëtare e cila ka kontratuar një kompani për realizimin e studimit të mjedisit. Në kët drejtim duhet të bëhet një studim shumë serioz I mjedisit për të ruajtur ekosistemin e mrekullueshëm të asaj zone.

Po pavarësisht nga interesi i jashtëzakonshëm i sektorit privat për prodhimin e energjisë nga burime ujore, qeveria do të qëndrojë e vendosur në parimin e saj, për të investuar çdo vit në termocentrale derisa të balancojmë plotësisht prodhimin ujor me prodhimin termik dhe të mos mbetemi më të ndikuar nga thatësirat e tejzgajtura, të cilat parashikohet të vazhdojnë.

19/09/2007
Keshilli i Ministrave