Konsumatori shqiptar të sillet si mbret

[Davius]

Konsumatori shqiptar të sillet si mbret

REXHEP SHAHU

Konsumatori kudo në botë është mbret në të vërtetë, dhe duhet të sillet si mbret. Kjo fjalë duhet thënë e para. Sepse po ndodh përditë që konsumatori nëpërkëmbet, tallet. Sepse vetë ai nuk po di të sillet si mbret. Tregtari që është shërbëtor i konsumatorit e terrorizon këtë të fundit. Si në kohën e ekonomisë së centralizuar. Konsumatori qorrazi shkon e blen çfarë t’i dalë në udhë. Nuk është aq i pashkolluar konsumatori shqiptar sa të mos dijë të lexojë një datë skadence, pasi shkrim e lexim dinë gjithë njerëzit. Por mendësia e dikurshme komuniste që shteti mban përgjegjësi për gjithçka që edhe hanë e pinë njerëzit, vazhdon ta dëmtojë konsumatorin shqiptar. Me këtë nuk dua të heq përgjegjësinë e shtetit që duhet të kontrollojë rreptësisht, të monitorojë, analizojë. Por, njerëzit që blejnë, konsumatorët, duhet më në fund të binden se nuk janë zyrtarët e shtetit ata që shkojnë në treg dhe blejnë mallra për gjithë familjet shqiptare. Jo. Njerëzit blejnë vetë dhe kanë se çfarë të zgjedhin në një treg ku nuk mungon asgjë asnjëherë në çdo ditë e stinë. Zyrtarët e shtetit nuk mund të kontrollojnë çdo tezgë, shesh, njësi, magazinë se do të duhej të kishte kaq kontrollorë sa ka blerës në tregjet tona.

Kur del në treg për të blerë, konsumatori të shohë e të mendojë për një çast. Aty para këmbëve ka vezë fshati në qese plasmasi për tokë, në pluhur kur temperatura është mbi 35 gradë celsius. Ka gjizë, djathë e çdo gjë. Pesë hapa më larg është njësia tregtare që vezët dhe produktet e tjera i ka në temperaturë normale për to, të mbrojtura nga mizat dhe pisllëqet. Konsumatori në këtë rast, po të jetë normal, po ta dojë veten e fëmijët e tij, s’mund të blejë vezët që janë për tokë. Po kështu edhe mishin. Rendin njerëzit të blejnë mish në rrugë, në pluhur, mbuluar nga mizat për shkakun se mendojnë se është i freskët dhe po e shohin me sytë e tyre duke u therur. Por kjo nuk është normale, sepse ai viç që po theret është i pakontrolluar. Edhe kur shkojnë inspektorët apo edhe policët (se shteti ka angazhuar edhe policët për të ndaluar therjet në rrugë), kasapët vrapojnë e dalin pas pallateve. Për çudi, blerësit, konsumatorët, rendin dhe shkojnë edhe ata pas pallatit për të blerë mish. Po këtu kush është fajtor. Shteti apo konsumatori.

Nëpër rrugë ende shitet qumësht. Ministria e Bujqësisë, Ushqimit dhe Mbrojtjes së Konsumatorit thërret: O qytetar, mos e blej qumështin e hapur apo në pagure plastike në rrugë, të pa pasterizuar, sepse është i frikshëm nga shumësia e bakterieve, është i rrezikshëm për shëndetin dhe lë pasoja të rënda. Konsumatori shkon dhe e blen. Kur pengohen nga strukturat e shtetit shitësit, konsumatori rend dhe e gjen shitësin edhe pas pallateve e skutave. Kush është fajtori në këtë rast. Konsumatori, pa ditur se çfarë qumështi blen, të cilës lopë, pa ditur se çfarë sëmundje mund të ketë lopa që ka dhënë atë qumësht, e porosit shitësin t’ia sjellë paguret e qumështit në shtëpi. Por shteti, strukturat e tij, s’mund të rrinë roje dyerve të pallateve se kush po vjen dhe kush po sjell qumësht.

Konsumatori shkon në treg dhe edhe nga pamundësia financiare, por edhe nga mungesa e kujdesit total për veten e fëmijët e tij, blen sallam që kushton dyqind lekë kilogrami. Ai sallam që kushton dyqind lekë, vetëm sallam nuk është dhe vetëm me mish nuk është. Por konsumatori shqiptar, mjeran nga trutë e kokës, e blen edhe atë sallam, pa menduar se çfarë pasojash mund të shkaktojë në shëndetin e fëmijëve të tij.

Ushqime të skaduara edhe ka. Tregtarët me çdo kusht duan të shesin. Por konsumatori shqiptar, i cili sot ka mundësi të zgjedhë më shumë se kurrë, duhet të fillojë ta dojë veten e tij, të kujdeset për veten e tij, të fillojë të sillet më dinjitetshëm me veten e tij, të sillet si mbret dhe të shpëtojë nga mendësitë komuniste, që shteti është përgjegjës edhe pse bie shi, apo borë apo nxeh dielli shumë. Konsumatori shqiptar, që është mbret, por nuk e di dhe nuk e beson, ka të gjitha shanset e mundësitë që të diktojë tregun edhe për cilësi edhe për çmime. Përfytyrojeni sikur të bojkotojnë konsumatorët një produkt ushqimor, se jetohet një muaj e më gjatë pa konsumuar një produkt. Çfarë do t’i ndodhte tregtarit. Por konsumatori shqiptar nuk ia din vlerën vetes së tij dhe pranon ushqime të pakontrolluara, të pa etiketuara, të paambalazhuara, të skaduara, të pa seleksionuara. Po të dojë konsumatori tregu bëhet model dhe shëndeti i konsumatorit nuk rrezikohet kurrë.
Shteti i ekonomisë së tregut krijon hapësira e mundësi. Por shteti nuk ua fut lugën në gojë njerëzve, nuk i mëkon si bebet e vogla. Shteti i ekonomisë së tregut i ka dhënë shansin konsumatorit të jetë mbret i vërtetë. Sillu si mbret, o konsumator shqiptar!

TIRANA OBSERVER

[Borix]

Me lejo te tregoj nje ndodhi interesante te veres se kaluar.

U futa me dike ne nje dyqan te madh (ose minimarket, sic i thone ketej nga Tirana) dhe menjehere me terhoqen vemendjen tre pike-cuditese ne fund te nje shprehje te varur ne mur, fill pas shiteses: "Bosi eshte Mbret!!!". Teksa kjo shprehja nuk eshte se thote ndonje gje te madhe, pervecse behet qesharake, konsumatori shqiptar eshte gjithnje apatik dhe ul koken aty ku duhet ta ngreje. Nese e ngre koken, ka mundesi te medha ta perzene dhe t'i thone te mos kthehet me. Arsyeja qe bizneset ku bosi eshte mbret nuk falimentojne ne Shqiperi, eshte se konsumatori shqiptar e pranon fare thjesht nje gje te tille. Fare thjesht? Jo, e kisha fjalen per shkak te apatise.

Prandaj, jam dakord me thirrjen e Rexhepit "Konsumatori shqiptar te sillet si mbret"!