Lufta ndaj krimit te organizuar

[Brari]

Tosi shkruan ne Shekulli:
------------------------
Industria e krimit - çrrënjosje apo krasitje
Nga Fatos Lubonja

Gjatë të ashtuquajturit aksion "Puna" kundër trafikut klandestin, ndërkohë që policia merrej me bllokimin e skafeve në det, shoferët apo padronët e tyre kryen një akt spektakolar në tokë: grabitjen e bankës së Vlorës. Shtypi e trajtoi këtë si një hakmarrje të skafistëve dhe nuk u thellua më tej. Politikanët u treguan edhe më indiferentë ndaj tij. Në fakt, ky akt "hakmarrjeje", duhej të ishte fokusuar shumë më mirë në vëmendjen si të shtypit edhe të politikës, pasi ai ka një domethënie që flet shumë më tepër nga ç'flet ndonjë krim tjetër, ndoshta më i rëndë përsa i përket dëmit material.

Industria e krimit dhe kompliciteti në ngritjen e saj

Të gjithë e dimë se me hapjen e vendit ndaj tregut të lirë, shqiptarët, meqënëse nuk kishin me se të bënin kompeticion në këtë treg, pasi komunizmi u la një ekonomi më shumë se të rrënuar nga pikëpamja e aftësisë kompetitive dhe po aq të dobët nga pikëpamja e kulturës së kompeticionit, për mbijetesë, i ofruan këtij tregu të lirë "mallrat" e vetme me të cilët mund të bënin kompeticion, që ishin të disa asortimenteve shumë të thjeshta: krahu i punës, në formën e emigracionit masiv dhe pastaj, trafiqet e zeza, ato të klandestinëve, të drogës, të prostitucionit, të fëmijëve, të pastrimit të parave. (Për të theksuar shqetësimin nuk do të merrem në këtë shkrim me atë pjesë të ekonomisë që është bazuar mbi punën e ndershme që pa dyshim nuk ka munguar)
Nuk ka dyshim se ka një fajësi kolektive në pranimin e kësaj lloj mbijetese në sajë të krimit, që, në një farë mënyre, mund të karakterizojë sistemin politiko ekonomiko -social që kemi ngritur gjatë këtyre dhjetë vjetëve. Për të përmendur vetëm një nga pikat kulmore të këtij kompliciteti le të rikujtojmë piramidat: në fakt shqiptarët nuk ishin aq budallenj, sa ç'i kujtoi bota, që të pandehnin se leku mund të pillte lek ashtu kot. Një nga besimet më të përhapura asokohe lidhur me burimet financiare të piramidave ishte ai sipas të cilit këto, në komplicitet me politikanët, merreshin me pastrim parash (që pjesërish besoj se ka qenë e vërtetë) dhe se politikanët tanë po e shfrytëzonin mrekullisht këtë veprimtari kriminale për të mirën e pushtetit, të përfitimit personal, por edhe të të gjithëve.
Të gjithë e dimë se shumëçka nga ato gjëra që po ia ndërrojnë faqen me shpejtësi këtij vendit tonë, shpesh duke shkatërruar natyrën, bregdetin apo vlerat historike, janë rezultat i këtyre pareve të ardhura nga ky "kompeticion". Ka shumë sot që e bekojnë drogën dhe trafiqet kur shohin "zhvillimin" e madh të Shqipërisë, me të cilin na u habitkan edhe të huajt. Ndërkaq, pikërisht për shkak të komplicitetit të përmendur më lart, përveç një dënimi abstrakt e fals të nxitur nga qëllime politike apo zilia e atyre që nuk mund të pasurohen kësisoj, reagimi më i thellë ndaj kësaj "industrie të krimit" ka qenë indiferenca, në mos aprovimi. Sikur shoqëria të ishte vërtet e ndjeshme ndaj trafiqeve, do të mjaftonte krimi i tmerrshëm i trafikimit të vajzave shqiptare për prostitucion në Itali për t'i ngritur intelektualë e politikanë e njerëz të thjeshtë më këmbë për të bërë një demonstrim në breg të Vlorës ku, të kapur dorë për dore, të krijonin një gardh në të cilin të shkruhej: "nuk duam që vajzat shqiptare të nisen prej këtej për t'u bërë prostituta në Itali" e të qëndrohej ashtu, në mënyrë demonstrative, një natë e një ditë. Në fakt ne shkojmë e hamë e pimë rehat në restorantet e ngritura me këto trafiqe duke shkëmbyer me pronarin e mirësjellshëm përshëndetje, pa e kaluar as nëpërmend se detyra më minimale qytetare është t'i bojkotojmë ato. Është tronditëse kur sheh se i vetmi rast kur rinia shqiptare del për të demonstruar është pse nuk i jepen viza për të ikur nga Shqipëria.
Megjithë këtë bashkëfajësi, që i ka rrënjët edhe tek pandjeshmëria tradicionale e shqiptarit ndaj të keqes jashtë klanit të tij -"ai gjarpër që nuk më kafshon mua rroftë 110 vjet" - nuk ka dyshim se janë politikanët shqiptarë si në kohën e PD-së edhe në kohën e PS-së, ata mbi të cilët bie përgjegjësia historike për krijimin e këtij sistemi që, në mënyrë sintetike, mund të përkufizohet si sistemi i bashkëpunimit të politikës me krimin, në të cilin nuk dallohet se ku mbaron krimineli dhe fillon biznesmeni dhe ku mbaron biznesmeni dhe fillon politikani e që kanë ndërtuar strukturat e gjithpërhapura të atij që ndryshe e kam quajtur "shteti informal".


Dëmet e industrisë së krimit dhe një rrezik i ri

Pikërisht kompliciteti i sipërpërmendur shtet informal - shoqëri civile -industri e krimit ka bërë që kjo e fundit të trajtohet shumë pak si rrezik i të sotmes dhe të ardhmes së Shqipërisë; më shumë është preferuar të mbyllen sytë e veshët përpara saj. Gjëra kaq të dukshme: si moszhvillimi i kulturës së punës; numri i madh i krimeve që prodhon kjo botë, pasi krimi pjell krimin, helmimi i klimës shoqërore për shkak të një përmbysje kokëposhtë të vlerave (njerëz që kanë trafikuar femra dhe çuar klandestinët drej vdekjes sot përbëjnë shtresën e pasur, kurse të ndershmit jetojnë në pragun e varfërisë) etj., etj. nuk janë trajtuar thuasje fare si probleme të mëdha morale, ekonomike, politike e sociale që pjell krimi. Madje janë të shumtë njerëzit që të thonë: edhe Amerika kështu u bë në hapet e para. (Në fakt, sa për kujtesë historike, ajo që konsiderohet sot pjesa më e përparuar e botës, ku hyn edhe Amerika, është "bërë" në sajë të frymës së kulturës protestante që predikonte kultin e punës dhe të jetës së përkorë.)
Por ka edhe një rrezik tjetër që po duket në horizont. Tani ka ardhur një moment kur ajo që quhet "bota", duke qenë se jemi në oborrin e saj të pastëm, duke qenë se me këto trafiqe po vazhdojmë të eksportojmë krimin në vendet e tyre, ka filluar ta shtrëngojë gjithnjë e më shumë "lakun". Nuk ka dyshim se edhe së brendshmi, megjithë bashkëfajësinë kolektive, ca nga kërkesat e botës e ca nga presione të brendshme (çuditërisht politika bëhet në emër të parimeve të pastra morale edhe kur ata që e ushtrojnë i mbajnë gjithë ditën duart në pisllëk) po vjen duke u rritur presioni që të marrin fund këto trafiqe.
Pra, me hir dhe me pahir, Shqipëria në këtë moment të tranzicionit të saj duhet të ndërrojë sistem: Kërkohet me ngulm që të ndahet politika nga krimi. Aksioni kundër skafeve dhe ai kundër makinave të vjedhura, ndonëse një veprim fasadë për t'u hedhur hi syve të huajve, është, megjithatë, shprehje e presionit për të hyrë në këtë proces.
Në të mirë të këtij procesi, dua të jap një argument se pse, sipas meje, djegia skafeve dhe kapja e makinave të vjedhura, ndërkohë që së jashtmi mund të mashtrojë të huajt, së brendshmi mund të shndërrohet thjesht në një krasitje të pemës së industrisë së krimit që mund ta bëjë atë të lëshojë degë edhe më të fuqishme në pjesë të tjera të trungut shoqëror sa kohë që rrënjët e saj janë të implementuara thellë në jetën tonë politike dhe shoqërore. Pra, tek e fundit, se lufta kundër trafiqeve, e industrisë së krimit në përgjithësi, duhet të zhvillohet ndryshe.

Vjedhja e bankës
Vjedhjen e bankës së Vlorës, si reagim i skafistëve, e shoh metaforikisht si përgjigje që i jep krimi projektit të imponuar nga Perëndimi për pastrimin e industrisë së krimit. Sinjali që dha me vetëdije apo pa vetëdije ky akt, në kontekstin që shtjellova më lart ishte: në (dega trafik e industrisë së krimit) deri tani nuk ju kemi rënë në qafë sepse jemi marrë me punën tonë, kemi bërë trafiqe për në Perëndim, ju kemi sjellë makina të mira që i keni blerë lirë, ju kemi siguruar lekë me të cilat punojnë shumë biznese që nga restorantet e deri tek ndërtimet e me të cilat paguhen ryshfetet e administratës; por po na mbyllët këto rrugë, atëhere ne do t'i futemi rrugëve të tjera. Për të perifrazuar thënien e një ekonomisti që kohët e fundit tha se paraja është si uji që ku gjen vrimë futet edhe krimi është si uji, ku gjen pengesë ndalet e kthehet për atje ku mund të rrjedhë lirisht. Pra kultura e fitimit të lehtë nëpërmjet krimit ka mundësi të kthehet nga Perëndimi për së brendshmi. Ata që trafikonin deri dje prostituta e klandestinë e drogë, po e panë të mbyllur këtë rrugë, më shumë sesa t'i kthehen punëve të ndershme, ka gjasë t'i kthehen pengmarrjeve, raketingut, grabitjeve të pasurive etj., etj.
Në këtë kontekst duhet vënë në dukje edhe një rrezik tjetër. Shtrëngimi i lakut ndaj krimit, që nënkupton edhe funksionimin e drejtësisë, do të bëjë që të fillojnë edhe krimet mafioze të tipit vrasje. Shumë njerëz janë çuditur se si në Shqipëri mafia nuk vret - kam fjalën se si nuk vriten gazetarët investigativë apo denoncuesit apo dëshmitarët. Kjo nuk ndodh jo pse mafiozët shqiptarë (këtu përfshij edhe shumë nga politikanët) janë burra më të mirë se ajo mafia që vret, por për një arsye tjetër: atje ku ata vrasin funksionon drejtësia kështu që një gazetar apo një hetues apo një dëshmitar është vërtet i rrezikshëm, sepse ai të fut në burg. Kurse këtu tek ne sistemi politiko -ekonomik i bashkëpunimit të shtetit informal me krimin e trafiqeve, ka bërë që të mbretërojë mosdënimi. Shteti informal ka një nga karakteristikat e tij mosfunksionimin e drejtësisë, pasi duke qenë se krimi është i lidhur zinxhir hallkë pas hallke që çojnë deri lart, nuk ka kush të dënojë. Prandaj dhe mafia s'ka pasur pse të ndyej duart e të vrasë - gjer tani shumë shumë një gazetar mund të quhet llapaqen në një gazetë tjetër apo në një televizion të blerë, ose t'i mbyllet goja me ndonjë llokmë, një hetues apo dëshmitar paguhet me para, një dëshmitar i bëhet shantazh për gjërat që ka bërë ai vetë. Kurse tani punët mund të ndryshojnë.
Në këtë situatë më duket se bëhet e qartë se sa virulent mund të bëhet krimi nëse në vend se të punohet për tharjen e rrënjëve të tij do të krasiten ato degë që e çojnë atë në Perëndim. Me këtë, largqoftë, nuk dua të nënkuptoj se është më mirë t'i lemë skafistët dhe trafikantët të bëjnë punën e tyre në Perëndim. Duke theksuar këto rreziqe dua të them se industrisë së krimit i duhen tharë rrënjët jo krasitur degët. Dua të them se procesi i pastrimit të krimit është shumë më kompleks dhe se për fillimin e këtij procesi para së gjithash duhet punuar për ndarjen e politikës dhe politikanëve nga krimi, për eliminimin e shtetit informal. Ndërsa kur më një anë ndërmerren veprime për pastrim të degës së trafiqeve të industrisë së krimit dhe, nga ana tjetër, rehabilitohen politikanët e lartë të akuzuar për lidhje direkte me trungun e saj, këtu kemi të bëjmë me krasitje të rrezikshme sepse, shteti informal, duke vazhduar të kërkojë të ushqejë strukturat e veta me para, që, siç e thashë më lart, shpesh e kanë origjinën tek trafiqet, do të bëhet edhe më i rrezikshëm kur të kërkojë burime të tjera të brendshme.
Sikur të mos ishte industria e krimit, ata që i gëzohen restoranteve luksoze dhe makinave që i japin Shqipërisë një pamje evropiane do të ishin shumë më pak entuziast pasi nuk do të ekzistonte as çereku i tyre, rrugët e Tiranës ndoshta do të ishin ende me biçikleta dhe shumë nga ata pallatet e larta që po ngrihen nuk do të ofronin apartamente luksoze për elitën e politikës dhe të krimit. Por, në fakt, zhvillimi i një shoqërie nuk pasqyrohet me numrin e pafundëm të lokaleve luksoze, as të vilave dhe hoteleve dhe moteleve dhe pallateve me xham. Nëse mund të flitet për një progres drejt qytetërimit, ky mbi të gjitha matet me përparimin e njeriut drejt dijes dhe lirisë, dhe rrugët dijes e lirisë dhe rrugët e krimit janë rrugë që shkojnë në drejtime krejtësisht të kundërta.



-----------------
Eh mer Fatos djali.. ja keta kriminelet solle ti ne pushtet me Koha jone-n e 97-ten tende...

Nejse... mir ka folur Lubonja ketu.

[Beqari002]

Mafia, Lufta sapo ka nisur

28 grupet kriminale shqiptare. Policia zbulon hartën e krimit të organizuar, por edhe rrezikun për lindjen e mafias së ardhshme. Alarmi i kryeprokurorit Sollaku: Kriminelët mund të ulen nesër në parlament.

nga Erjon Tase



Prostituta shqiptare ne rruget e Milanos

Jorgji Kule, deri një muaj më parë ishte një biznesmen i respektuar i qytetit të Fierit. Menaxhonte hotelin e tij shtatëkatësh dhe me këto fitime mund t'i lejonte vetes një makinë luksoze dhe një jetë pak më të shfrenuar se banorët e tjerë të qytetit. Gjithçka deri një muaj më parë. Kur policia bllokoi një ngarkesë heroine në makinën e tij, por edhe dokumentat e falsifikuara të disa prostitutave të huaja në dhomat e hotelit luksoz. Në ato momente, imazhi i biznesmenit u zëvendësua shumë shpejt me atë të trafikantit Kule.

Në të vërtetë, Jorgji Kule është vetëm njëri nga 124 personat e hetuar në këto dy vitet e fundit për akuzën e trafikimit. Apo e thënë ndryshe, ushtarët e krimit të organizuar shqiptar. Të huajt preferojnë ta cilësojnë si një mafie të re, ndërsa në raportet e Ministrisë së Rendit, edhe pse jo për klane të tilla, flitet për organizata të vërteta kriminale. Vetë shifrat e kësaj ministrie flasin për 28 grupe kriminale, të identifikuara në këto dy vitet e fundit në të gjithë vendin, të specializuara në të gjitha trafiqet e mundshme ndërkombëtare. Që nga ai i makinave të vjedhura, drogës e armëve, e deri tek rekrutimi dhe shfrytëzimi i tetë mijë prostitutave shqiptare në Evropë. Fitime miliardëshe, që investohen më pas në ndërtime turistike dhe pallate shumëkatëshe, si ai i Kules, për të siguruar statusin e duhur të bisnemenit të respektuar. Ndoshta një ditë, edhe mbështetjen e duhur politike për të zënë një vend të qetë në majat e pushtetit. Alarmi i lëshuar javën e fundit nga Kryeprokurori Theodhori Sollaku vërtetoi edhe njëherë këtë rrezikshmëri transformimi të kriminalitetit shqiptar: "Krimi i organizuar duhet luftuar tani. Nesër, drejtuesit e këtyre organizatave do të zënë vend këtu, në sallën e Parlamentit".


Zonat e nxehta

Një raport i fundit i Ministrisë së Rendit, ka identifikuar 28 grupe kriminale me rreth 400 anëtarë, që veprojnë në territorin shqiptar. Një organizim mbi bazën e njohjeve apo lidhjeve farefisnore, që ka për qëllim trafikimin e drogave, rekrutimin e vajzave për shfrytëzim prostitucioni apo riciklimin e makinave të vjedhura. "Këto grupe bëjnë pak nga të gjitha. Ai që merret me transportin e drogës, mund të jetë edhe një rekrutues femrash apo një tutor", saktëson shefi i sektorit të antitrafikut në Ministrinë e Rendit, Avni Jasharllari. Bandat janë ndërtuar mbi bazën e njohjeve shoqërore, si ato në Berat, Fier, Shkodër, por edhe mbi bazën e lidhjeve farefisnore, si grupi i Laçit dhe Fushë Kuqes. Sipas këtij studimi, aktiviteti i këtyre grupeve brenda Shqipërisë është i kufizuar në rekrutimin e vajzave, që më pas do të kthehen në lëndën e parë për trafikun e prostitucionit në trotuaret Evropiane. Çdo grup ka në krye një drejtues, i cili është edhe personi që siguron fitimet më të mëdha nga trafiqet dhe, sigurisht, atij i binden ushtarë të caktuar. Femrat që do të trafikohen, përzgjidhen me kujdes në fshatra apo zona të thella, ku është edhe më e lehtë që të mashtrohen me një martesë apo premtimin për një jetë të lumtur. Pasi rekrutuesit sigurojnë prenë e duhur, në lojë hyjnë hallka të tjera të organizatës, të cilat vënë në dispozicion ambientet e strehimit, pajisjen e tyre me dokumentat, vizat e huaja dhe transportin. Pjesëtarë të tjerë të grupit, të cilët qëndrojnë jashtë vendit, "kujdesen" më pas për vajzat dhe dorëzojnë pjesën e duhur të fitimit tek drejtuesit e grupit në Shqipëri. Të dhënat zyrtare të Ministrisë së Rendit, tregojnë se rreth 8 mijë prostituta shqiptare ndodhen aktualisht në vendet fqinje, dhe mbi 80 për qind e tyre janë mashtruar apo detyruar nëpërmjet forcës që të marrin këtë profesion. Nëpërmjet dëshmive të vajzave që kanë gjetur guximin të dalin nga rruga, është arritur që gjatë këtyre nëntë muajve të fundit të dënohen 17 persona të implikuar në këtë trafik të mishit të bardhë.

Të njëjtat hallka të rëndësishme në të dyja anët e Adriatikut të këtyre grupeve, bëjnë të mundur edhe trafikun dhe shpërndarjen e drogave që kalojnë tranzit në Shqipëri, canabis-in "Made in Albania", por edhe riciklimin e makinave luksoze të vjedhura. Pjesa më e madhe e fitimit grumbullohet në duart e drejtuesve të grupeve, të cilët i investojnë më pas në pasuri të paluajtshme, dhe vetëm një pjesë e vogël shpërndahet për pjesëtarët e bandës.

Mafia shqiptare?

"Për fat të mirë, është ende herët për të folur për një strukturë mafioze", sqaron njeriu i antitrafikut. Sipas Jasharllarit, krimi i organizuar shqiptar është ende në fillesat e tij dhe nuk mund të flitet për struktura të mirëfillta klanesh mafioze. Një vlerësim i tillë mbështetet në vetë natyrën e organizimit të këtyre grupeve. Sipas kësaj analize, bandat kriminale vendase nuk janë të qëndrueshme, pra veprojnë mbi lidhje të momentit dhe jo afatgjata. Nuk ekzistojnë elementë lidhjesh gjaku apo farefisnorë në drejtimin dhe përbërjen e tyre. Ndarja e fitimit u lihet në dorë drejtuesve dhe, si rrjedhojë, anëtarët e thjeshtë mbajnë gjithnjë një pjesë të vogël të ardhurash. "Mbi të gjitha, këto grupe nuk kanë arritur ende të sigurojnë edhe një strukturë mbështetëse në drejtësi apo polici për të siguruar aktivitetin e tyre. Rastet e korruptimit të administratës shtetërore mbeten spontane", thotë kreu i antitrafikut. Si rrjedhojë, edhe goditja e policisë e këtij trafiku ka qënë më efikase. Gjatë dy viteve të fundit, për akuzën e trafikut dhe pjesëmarrjes në organizata kriminale, janë hapur 87 çështje penale dhe proceduar 124 persona. Por krimi i organizuar shqiptar nuk përfundon këtu.

Vetë Kryeprokurori Sollaku paralajmëron rrezikun e fuqizimit të tij të shpejtë, nëse nuk merren masa të mëtejshme. "Lidhjet me krimin rajonal dhe ndërkombëtar po i fuqizojnë çdo ditë grupet shqiptare. Organizatat e huaja po i furnizojnë me infrastrukturën e duhur për të kryer aksionet e trafikimit", u shpreh Kryeprokurori Shqiptar pak ditë më parë. Për shkak të trafiqeve ndërkombëtare, organizatat kriminale shqiptare sigurojnë gjithnjë një bashkëpunim të ngushtë me kolegët e tyre të vendeve fqinje. Raportet e prokurorisë antimafia italiane flasin gjithnjë e më të shqetësuar për fuqizimin e grupeve shqiptare në vendin e Apenineve. Nga vasalizmi, këto grupe kanë kaluar tashmë në bashkëpunim në pozita të barabarta me vendasit, duke "hequr qafe" konkurrencën e mafias së frikshme ruse apo kineze.

Të njëjtin rrezik, të mafias së ardhshme shqiptare, paralajmëron edhe Jasharllari. "Në të njëjtin stad të krimit të organizuar kanë kaluar më parë edhe ato që sot cilësohen si grupe të vërteta mafioze. Nëse nuk do të goditen dhe shkatërrohen pasuritë e këtyre bandave, brenda pak viteve ky transformim mund të ndodhë", thotë ai. Pjesa më e madhe e drejtuesve të grupeve kriminale shqiptare që veprojnë jashtë vendit, zgjedhin Shqipërinë si rezidencë të tyre. Si rrjedhojë, kapitalet e fituara nëpërmjet shfrytëzimit të prostiucionit dhe trafikut të drogës, rikthehen në vend për t'u investuar në pasuri të paluajtshme dhe biznese të ndryshme. Pikërisht, në këtë hallkë të rëndësishme të pastrimit të parave të pista, goditja e drejtësisë është edhe më e dobët. Kryeprokurori Sollaku ka kërkuar përmirësimin e legjislacionit dhe ndihmën e institucioneve shtetërore për të hartuar një strategji më efikase ndaj pastrimit të parave të pista. Si njëra prej zgjidhjeve më efikase, e propozuar prej Sollakut, është edhe ajo e sekuestrimit të pasurive të paluajtshmve dhe depozitave bankare, që vijnë nga pastrimi i parave të pista dhe vendosja e tyre në dispozicion të prokurorisë dhe organeve të tjera shtetërore. Në këtë mënyrë mund të sigurohet infrastruktura e duhur, për të zbuluar dhe goditur këtë krim të organizuar. Sigurisht, përpara se ai të korruptojë policët dhe prokurorët, apo të zërë edhe një vend të respektuar në sallën e parlamentit.
-----------------------------------------------------
------------------------------------------------------
Oj sharki e lehte si era , a ka ardhur ne Shqiperi pranvera?

[erzeni]

Beqari, pergezime per shkrimet interesante qe sjell ne forum.

Korrupsioni e kriminaliteti nuk luftohen po nuk levizen njerzit e tu behet "bira minit 100 grosh" hajdutvete

Me pelqeu kjo nisme e studenteve.

Gaz Shqip



Aktiviteti te Juridiku

Studentët, debat për korrupsionin


-----------------------------------------------------------------------

a.s

Të rinjtë debatojnë mbi korrupsionin dhe japin leksione debati për të rriturit. Organizata Kombëtare e Debatit, në kuadër të aktiviteteve kundër korrupsionit, do të zhvillojë sot në Fakultetin e Drejtësisë një seancë debati me studentët, lidhur me këtë fenomen.
Debati do të organizohet sipas skemës së Karl Poperit (filozof), ku do të krijohen dy blloqe me tre veta secili, opozitë dhe qeveri, ndërkohë që katër studentë të tjerë do të jenë juria.
Qëllimi i këtij aktiviteti, i cili do të zhvillohet më pas edhe në universitetet e tjera të vendit, është zhvillimi i kulturës së debatit dhe disktimi lidhur me korrupsionin.
"Studentët nuk përfaqësojnë palë të vërteta, por luajnë role. Megjithatë këto aktivitete shërbejnë për të futur etikën e një debati frytdhënës", shprehen përfaqësuesit e Organizatës Kombëtare të Debatit.
Sipas tyre, studentët nuk mbajnë qëndrime për ato që thonë, por thjesht diskutojnë argumentet që hidhen.

Kjo faqe mundësohet nga Koalicioni Shqiptar kundër Korrupsionit

[ilir_m]

Tema eshte shume e bukur. Pa dyshim kanceri me serioz i Shqiperise, ne te gjitha aspektet, eshte krimi i organizuar. Per fat te keq organizimi duket sikur deri tani eshte shembullor dhe deri diku ka krijuar rrenje e nje bazament te palekundshem. Keto fjale i them sa per hyrje sepse te gjithe jemi aq te mesuar me keto tema sa kemi filluar te mos ti veme re.

Ajo te cilen e kemi me te veshtire per te mos vene re eshte gjendja e veshtire ne te cilen ndodhet Shqiperia. Te thuash se krimi tek ne eshte sporadik e i paorganizuar eshte tu hedhesh hi syve njerezve. Nuk ka nevoje te jesh ekspert kriminalistike sepse pasojat duken sheshit. Krimi ekziston dhe nuk leviz nqs nuk bejme diçka, dhe nqs nuk e bejme shpejt.

Lufta kunder krimit ka famen e keqe e te qenit e gjate, e shtrenjte dhe jo fort e efektshme. Te zbulosh dhe arrestosh keto persona duket si e kote sepse nuk degjojme aq shpesh per persona qe vuajne denimin e merituar aq sa degjojme çdo dite per operacione policie "heroike". Faktikisht lidjet e çdo lloji te krimit jane te shumta dhe duket sikur arrijne kudo. Me nje sistem mbrojte reciproke te gjithe ato qe jane perfshire te japin pershtyjen e nje sistemi te pasulmueshem (larg nga imazhi i krimit sporadik qe mundohet ti jepet per hir te opinionit). Biznesmeni i respektuar Kule mund te shnderrohej shume thjesht ne Deputetin Kule, dyfish me te rrespektuar, figure kjo qe nuk do te zevendesohej kurre ne ate qe eshte sot, dhe qe do te vazhdonte ti shkaktonte deme te shumefishta shoqerise.

Menyra se si do ta zgjidhja une kete nyje eshte e thjeshte ne koncept, por e ndersjellte ne perfundime. Kosto dhe efektiviteti jane dy pikat me te dobta te te gjitha perpjekjeve te deritanishme. Shteti shqipetar nuk eshte i pasur aq sa te perballoje koston e vertete te nje lufte te tejzgjatur. Shpenzimet e shtetit duhet te jene te matura mire dhe te perqendruara ne pak pika. Nuk kemi kohe, as mund ti lejojme vehtes luksin per te ndertuar nje shtet social per momentin. Shpenzimet shteterore duhet te ulen ne çdo fushe perveç arsimit, shendetesise dhe, aty ku merr forme formula ime, drejtesise. Nyja e koklavitur qe jemi mesuar tashme vetem ta shikojme me keqardhje per mendimin tim ka nje themer Akili, jo te lehte per tu goditur menjehere, por te pakten konkrete dhe te arritshme.

Perpara se te ndaloj me djate tek permiresimi thelbesor i sistemit gjyqesor dhe i menyres se si populli e koncepton ate, do desha te them dy fjale per uljen e ketyre shpenzimeve, qe te vrasin syrin kur i shikon dhe qe jane po aq te paafta per te permiresuar situaten. Eshte fakt qe sistemi fiskal ne Shqiperi eshte tejet i ngarkuar per nje shtet si i yni (ne fakt mendoj se do te konsiderohej i tejngarkuar edhe per çdo shtet tjeter, por le ti permbahemi Atdheut, qe ka me shume probleme dhe na dhemb me shume ne zemer). Ulja e shpenzimeve te pergjithsme do de bente te mundur nje ulje (drastike) te taksave pa sforcuar defiçitin buxhetor(nje kancer me vete). Nuk dua te zgjatem me shifrat por mendoj se perqindja e te ardhurave e tatuar s'duhet t'i kaloje 20en. Nje ekonomi e lehte dhe e manovrueshme si kjo do te jepte vend per frymemarrje biznesit, i cili do t'a ndjente me pak nevojen e menyrave te jashteligjshme. Une fajsoj kete sitem teper te rende fiskal sepse i shtyn personat (biznesmenet e mundhem e te ndershem) drejt rrugeve me pak te deshirueshme. Njerezit me diçka duhet te merren per te jetuar dhe mjedisi qe shteti "social" deri me sot ka krijuar eshte i papershtatshem.

Shpenzimet e shtetit duhet te kufizohen me arsimin, shendetesine, administraten (e detyrueshme, por qe duhet lehtesuar) dhe me DREJTESINE. Nje sistem i mire dhe i forte drejtesie do te ishte antidoti me i mire ne rastin tone. Nuk mund ti lejojme vehtes nje kure te komplikuar, te perbere nga lufte ne shume fronte. Drejtesia duhet te jete e pavarur, e afte, dhe e vetekenaqur. Shpenzime te konsiderueshme ne kete drejtim do ti realizonin te gjithe efektet (kombinuar me ndryshimet e duhura ne legjislature, qe per fat kushtojne pak fonde por shume vullnet).

Si perfundim kjo do te shkaktonte me pak mbrojtje per krimin dhe me shume lufte, me nje prapavije te patundur siç eshte drejtesia. Nuk mendoj se zgjidhja eshte e utopike, apo se rritja e shpenzimeve do te bente nje sistem drejtesie te perkryer. Jam megjithate i sigurt se ndryshimet do te ishin te dukshme! Te tjerat me kohe, eshte nje diskutim qe del jashte kufijve te kesaj teme.

Falemnderit per mundesine qe me dhate te shpreh ato qe mendoj. Çdo koment apo kritike do me nderonte.

Per Shqiperine!

[FATJON SOFTA]

Krimi i organizuar

Nje percaktim i rende dhe te mendosh progresin e gjitha per 12 vjet.
Kam takuar rastesisht nje tregtar ne traget dhe per kuriozitet e pyeta si eshte bere bsnesmen.Me tha kam nisur me vjedhjen e xhepave ne autobuz,me pas me bixhoz me grupin e Gjinushit,pastaj mora ca kurva dhe punoja me to,me miel te bardhe tani nuk merrem me sepse ndertoj pallate.Kemi me vete deputete i japim shtepi.Te pastrehet e parlamentit moren 50 milion leke nga parlamenti per strehim dhe ne i thame ato mbaji qe kur te pyesin i ke blere me ato leke.Ky ishte si fillim.I thashe pse nuk behesh deputet,vota ne shqiperi po i blejne duke i dhene nje celular dhe nje karte,i vejne nje melodi me cifteli apo ku di une dhe te bejne deputet,te pakten nuk ke per te paguar njeri.Ke te drejte me tha ai bisnezmeni,tani ashtu u be ,nuk merret vesh deputetet se cbejne te pakten ne do ta bejme Shqiperine me mire se ato.Une e "pergezova" per "kurajon" e madhe qe ai mund te behet deputet,sepse ai do veje te tjeret ne pune dhe keshtu shqiperia do bej progres.
Ndoshta ndonje shok i tij behet prokuror,gjykates,etj eshte edhe me mire sepse do ja fusin grupet njeri tjetrit dhe ne kemi se cfare te themi qe dhe shqiperia po e lufton krimin e organizuar,dhe mund te ngjisim disa shkalle nga klasifikimi qe na ka bere Amerika.Nuk ishte progres qe u ndaluan gomonet,ne ne Itali jemi me te qete sepse dhe Italianet nuk flasin me ,biles erdhe dhe Berluskoni.Edhe Prodi u lodh ne fillim,nxorri viktimat e Otrantos dhe te gjithe ne qame,hodhem dhe lule ne dete.
Po hecim drejt progresit,pse vetem ne Itali te vrasin deputet apo kryeminister.Ne Shqiperi nuk te falin,Azemi u krujt shume,beri dhe arkivolin e Nanos dhe doli i armatos para kryeministrit.Prandaj e vrau Klosi,tani rame ne qetesi,jemi me te qete.Marreveshja sotme eshte shume e mire,nuk kemi me probleme.

[Albo]

Komisioneri i Bashkimit Europian në SHBA: Për këtë mjafton të pyesni FBI-në

Paten: Krimi i organizuar në Shqipëri është shqetësim


--------------------------------------------------------------------------------

al.kre.

UASHINGTON

Pyesni FBI-në dhe çdo organizatë tjetër policore në botë për kriminalitetin shqiptar", ky është deklarimi tronditës i komisionerit të BE-së Kris Paten në një takim në Uashington, SHBA. Paten tha se në Ballkan krimi dhe korrupsioni është shumë i lartë, por Shqipëria qëndron në krye.

"Dua të them se situata në drejtim të krimit të organizuar dhe korrupsionit është e rëndë në të gjithë Ballkanin dhe veçanërisht në Shqipëri", tha dje komisioneri për marrëdhëniet me jashtë i Bashkimit Europian. Ai më pas iu drejtua të pranishmëve në takim me fjalët: "Nëse doni të dini se sa serioze është çështja e krimit të organizuar në Shqipëri, pyesni FBI-në ose çdo organizatë tjetër policore në të gjithë botën", njofton Zëri i Amerikës në gjuhën shqipe. Pas këtij cilësimi tepër të rëndë për krimin e organizuar dhe korrupsionin në Shqipëri, Paten tha se BE-ja ka nevojë për bashkëpunimin serioz të autoriteteve shqiptare për të përballuar situatën. Duke folur për vizitën e tij në Tiranë pak javë më parë ai tha se kryeministri, ministri i Jashtëm dhe ministri i Shtetit për Integrimin e kishin siguruar se autoritetet shqiptare do të bashkëpunojnë me organizmat europiane për të luftuar krimin e organizuar dhe korrupsionin si dhe për të rritur aftësinë institucionale të administratës. "Kjo do të jetë e nevojshme që Shqipërisë ti pranohet kërkesa për të vazhduar procesin e asociim-stabilizimit, përsa i takon këtij procesi", tha Paten. Ai shtoi se Shqipëria nuk është në fund të procesit, por në prag dhe se Shqipërisë po i jepet një mundësi. "Ne po i fillojmë negociatat me sinqeritet, po i japim një shans Shqipërisë që të tregojë se ishte me të vërtetë koha e duhur për fillimin e tyre", tha komisioneri i BE-së. Sipas tij rritmi i negocitave dhe kohëzgjatja e tyre është tërësisht në duart e shqiptarëve.

[Ushtari i mire]

Jo per te dale kundra rrymes, megjithese e kam dhe zakon kundershtimin(lol) po krimi i organizuar e ka nje te mire.
Eshte me i civilizuar se sa ai ordineri.
Pra, cfare po perpiqem te them eshte se, krimi i organizuar, ka nje prirje per tu legjitimizuar, po ta shohesh kudo ne bote ka ndodhur kjo gje.
Se shpejti ata trafikantet do fillojne te merren me biznese te ligjeshme, se paraja nuk mbahet kot, pra do fillojne te marrin ne pune llogaritare, ekonomiste, te hapin fabrika, nderrmarrje etj.
Ky eshte mendimi im, se sapo te perforcohet dhe sistemi bankar(letu do propozoja nje amnisti per paret, pra te mos pyetet se nga erdhen per nja 6 muaj) leku nuk do mbahet me neper thesa, dhe rendi do filloje te rivendoset.
E di qe tingellon pak naive, po shpresoj qe fjalet e mia te jen profetike.

[Vinny_T]

Italia ka me shekuj qe behet ose me parate e grabitura nga romaket apo nga kolonite qe kane patur me vone e kete shekull nga mafia italiane e spo e çan njeri koken po e kane futur ne komunitetin evropian dhe qeveriset nga nje kryemafioz si Berluskoni. Zvicra po ashtu u krijua dhe u fuqizua deri sa u be nga shtetet me te pasura ne bote me gjithe parane e piset te droges kolumbiane, parane e korupsionit, te trafikanteve te armeve, te mafies ruse, te partive politike evropiane, dhe me vone te prostitucionit dhe me thene te drejten perveç disa artikujve neper gazeta dhe disa debateve ne parlament se ka çare njeri koken per me teper... Kur vjen puna per Shqiperine ndryshon gjithçka! Kris Patten preokupohet jashte mase per mafjen shqiptare eshte shume problematike. Pyetja eshte e thjeshte para viteve 90 si ja benin trafikantet e droges, prostitucionit, te femijeve, kur shqiptaret nuk kishin mundesi te dilnin jashte Shqiperise?!
Shqiperia ka organizata keqberese te karakterit mafioz jo me shume se Italia, Franca, Spanja, Anglia apo Gjermania, problemi eshte se keto vende kane krijuar nje imazh te paster ne syte e botes dhe per to flitet vetem kur bie fjala per ekonomine, shpikjet teknollogjike apo problemet boterore e jo kur flitet per mafijen dhe krimin e organizuar pasi kete ja kane lene si etikete Shqiperise dhe vendeve te ballkanit.

[Brari]

Nga Shekulli .........



Krimi dhe Ndëshkimi

Nga Ilir Hashorva

Një program televiziv amerikan mbi veprimet e policisë në vende të ndryshme të botës, në përpjekje për të luftuar krimin, u hap me eksperiencën kineze, në Shangai.
U tha se gjatë vitit 1993, megjithëse një qytet me 13 milionë banorë, pati vetëm 11 krime vrasjeje.
Më një ndjenjë qortimi, por edhe habie e zilie, komentatori amerikan shpjegonte se në Kinë nuk i bëhet asnjë lëshim krimit, se kriminelët kapen, gjykohen dhe, kur gjenden fajtorë, dënohen dhe ekzekutohen edhe brenda 10 ditëve.
Komentatori tha se Kina, megjithëse ka një popullsi sa gjashtë herë atë të SHBA-së, ka gjashtë herë më pak krime.
Është e kuptueshme se ndëshkimi maksimal i krimit, shkakton një gjendje qetësie dhe sigurie për qytetarin e rregullt.
Që krimi në Shqipëri bën kërdinë, këtë e pranon gjithkush. Shkaqet janë të ndryshme.
Shumë persona kanë shkruar për zbulimin dhe vlerësimin e shkaqeve të krimit. Secili i sheh ato nga një kënd vështrimi i caktuar dhe secili zotëron, brenda arsyetimit që bën dhe fakteve që jep, një pjesë të së vërtetës.
Në këtë shkrim, për vendin tonë, përmes disa statistikave, do të vëmë në dukje përmasat dhe ndikimin e një shkaku që, edhe pse anashkalohet e nuk i kushtohet vëmendja e nevojshme, mund të jetë ndër kryesoret e uljes së kriminalitetit dhe vendosjes së qetësisë.
Është fjala për ndëshkimin e krimit që reflektohet në numrin e të burgosurve që mbahen në burgjet shqiptare. Nuk mund të them se faji për kriminalitetin shqiptar është vetëm i prokurorëve, i gjykatësve, i policisë etj.
Faji është shumë kompleks, por kryesorin e mban, padyshim, politika shqiptare e cila ka për detyrë të harmonizojë dhe të vendosë në punë të gjitha mundësitë dhe organet e specializuara të shtetit për luftimin e krimit dhe, sidomos, të heqë vetë dorë nga krimi.
Gjatë kohës së komunizmit, krimi ishte shtetëror dhe zbatohej në përputhje me aksiomën e njohur, që e kanë zbatuar të gjitha diktaturat: "një ditë terror, një vit qetësi".
Sipas statistikave jo shumë të plota, gjatë periudhës komuniste, nga shteti u dënuan me vrasje për shkaqe politike dhe u ekzekutuan rreth 5500 persona si dhe një numër personash të tjerë, shumë më pak, të papërcaktuar ende, për shkaqe ordinere. Një masakër e vërtetë e kryer nga një shtet kriminel.
Megjithëse këto dënime ishin kryesisht të karakterit politik, efektet e tyre ndiheshin edhe në çkurajimin e krimit ordiner. Krimet e rënda ordinere në atë kohë ishin mjaft të ulëta.
Pas vitit 1991 shteti hoqi dorë nga ushtrimi drejtpërsëdrejti i krimit, por hoqi dorë edhe nga ndëshkimi i tij.
Gjatë periudhës nga viti 1992 deri në vitin 2001 shteti me indiferencën dhe papërgjegjshmërinë e tij, la të vriteshin mes njëri -tjetrit 4183 persona.
Në shifra relative, po të marrim parasysh kohëzgjatjen, vrasjet në demokraci e në liri dalin rreth 4 herë më të larta se vrasjet gjatë diktaturës komuniste. Vetëm kjo shifër mjafton për ta zhvlerësuar krejt demokracinë dhe lirinë e sotme shqiptare.
Kulmin në vrasje e mban viti 1999, me 1007 raste.
Vetëm po të kishim parasysh vrasjet dhe jo tentativat për vrasje ose plagosjet, në burgjet shqiptare do të duhej të kishim sot disa mijëra persona të dënuar me burgim të përjetshëm.
Por, për habi të të gjithëve, sipas statistikave të sotme zyrtare, në burgjet shqiptare vuajnë dënimin vetëm rreth 1500 persona me dënime për krime gjithfarësh, ndërmjet të cilëve 70 persona me burgim të përjetshëm.
Shqipëria, me një popullsi prej rreth 3 milionë banorë e me 1500 të burgosur, ka në burg rreth 0.05% të popullsisë së saj ose, e thënë ndryshe, ka 1 person për 2000 banorë .
Po tu hynim krahasimeve qofte edhe me shtetet fqinje, kjo eshte shifër tepër e ulët. Kjo nuk do të thotë aspak se në Shqipëri kemi mungesë krimi. Përkundrazi.
Është për të ardhur keq që përmes këtij shkrimi nënkuptohet nevoja për shtimin e ndëshkimit, për shtimin e numrit të të burgosurve.
Por, shoqëritë njerëzore mund të disiplinohen e të ecin përpara vetëm nëpërmjet ndëshkimit të krimit në atë masë, sa kriminelët dhe keqbërësit, që ekzistojnë gjithnjë realisht e potencialisht, të bëhen të paaftë për të dëmtuar shtetin dhe atë pjesë të shoqërisë që nuk kryen krim.
Pjesa e ndershme e shoqërisë, pjesa më e madhe e saj , nuk ka pse shqetësohet fare nga forcimi dhe zbatimi i ligjeve të cilët kanë objektiv ndëshkimin e krimit.
Numri i nevojshëm i të burgosurve për një vend, përveç të tjerave, është tregues i luftës që i bën ai vend krimit, i luftës që ai bën për ta mbajtur krimin në nivele standarde me dëm të pranueshëm.
Ai është një taksë që i duhet paguar lirisë nga keqbërësit.
Lirinë duhet ta gëzojnë vetëm ata që nuk abuzojnë me të.

......nga Shekulli....





......

[Honezmi]

Deklarata e Krye Prokurorit Sollakut eshte nje deklarat sa per te justifikuar punen e tije ,dhe se s'pasqirone realitetin.
#Krimi nuk rrezikon te ulet ne te arthmen ne Parlamentin Shqiptar,por eshte ulur (bere pal) prej kohesh ne Parlamentin aktual Shqiptar.
#"Lufta" qe po bene Sollaku eshte -nje verre ne uje-.Ai nuk meriton qe te jete ne krye te prokurorise ,eshte i pa afte te sulmoi krimin.Lufta e tije qe ka bere deri tani jane; deklaratat,dhe nxjerja si te pa fajshem te (femijve te Arta Dedes qe plagosen ne mes te Tiranes me arme)dhe nxjerja nga pergjegjsia te (femijve te Brahos qe kan shkelur ligjin disa here).
Sollaku po tregohet indiferent karshi akuzave qe po bene opozita, karshi qeverise dhe pushtetarve te korruptuar.
Sollaku di vetem nje pune te bej miree keshilloi presidentet.