Avokati i Popullit: Mungon vullneti i qeverisë për problemin
Të burgosurit në Shqipëri dhunohen me metoda "naziste". Paralajmërimi vjen nga zyra e Avokatit të Popullit, e cila ka realizuar një raport të detajuar të rasteve të dhunës në qelitë e vuajtjes së dënimit në të gjithë Shqipërinë. Dobjani akuzon si shkaktarë të kësaj dhune policinë e Drejtorisë së Përgjithshme të Burgjeve, e cila akuzohet se ka kryer veprime arbitrare duke dhunuar të dënuarit me akte çnjerëzore. Në raport përmendet se gardianët dhunojnë të paraburgosurit me qentë antidrogë, mbylljen në banjën e të burgosurve gjatë kontrollit të dhomave të tyre, mbajtja për minuta të tëra të të burgosurve me duar lart, me këmbë të hapura dhe mbështetur pas muri, fyerjet, sharjet me fjalor të pistë deri dhe dëmtimi i sendeve personale të të burgosurve, si dhe përdorim i tejskajshëm dhune fizike dhe psikologjike ndaj tyre. Gjithashtu, në raport përmendet se përdorimi në rritje i dënimeve të gjata apo të përjetshme po çon në një shtim të problemeve shëndetësore në popullsinë e burgjeve. Gjendja alarmante është në Burgun e Krujës, ku vuajnë dënimin të dënuar me probleme të rënda të shëndetit mendor dhe të dënuar të moshave të vjetra. Rezulton se këta persona, ndonëse nuk janë të dënuar, mbahen ende brenda sistemit të burgjeve. "Nga hetimet e ndërmarra nga ana jonë, rezulton se veç të tjerash, pengesë për zgjidhjen përfundimtare të këtij problemi është edhe mosplotësimi nga ana e Ministrisë së Shëndetësisë dhe Ministrisë së Drejtësisë të akteve nënligjore për ruajtjen e këtyre personave", thuhet në raportin e Avokatit të Popullit. Sipas tyre, megjithëse kanë kaluar rreth 10 vjet nga dita kur ka hyrë në fuqi ligji "Për shëndetin mendor", një rregullore e tillë ende nuk ka dalë. Aktualisht, 65 persona që kanë kryer vepra penale për të cilët gjykata ka urdhëruar "mjekim të detyruar" qëndrojnë në kundërshtim flagrant me ligjin në një pjesë të Spitalit të Burgjeve. Për këto probleme, Dobjani ka dërguar disa rekomandime. Në përgjigje të rekomandimeve, para disa vitesh, Ministria e Shëndetësisë e ka quajtur të zgjidhur problemin me kalimin kapital që i ka bërë godinës së spitalit të Krujës në vartësi të Ministrisë së Drejtësisë. Kurse Ministria e Drejtësisë në përgjigje të këtij rekomandimi kishte marrë angazhimin se me hapjen e Burgut të Krujës do të fillojë të funksionojë edhe rregullorja e kërkuar. Në realitet, Burgu i Krujës ka filluar nga aktiviteti, por funksionon përsëri si burg dhe jo si institut mjekësor që të sistemohen personat e sipërpërmendur. Ka pasur ankesa se të sëmurëve këtu nuk u janë siguruar ilaçet. "Ne mendojmë se ka munguar vullneti i të gjitha qeverive për zgjidhjen e këtij problemi. Këtë konkluzion e nxjerrim duke parë kohën tepër të gjatë prej 10 vjetësh që ka kaluar që nga hyrja në fuqi e ligjit ‘Për shëndetin mendor‘" thuhet në raportin e Avokati të Popullit.
© Gazeta Shqip - 2006-2007
Përgjigju Duke Cituar
Postuar më parë nga _SheJtaNia_
Krijoni Kontakt