Ministria kremton Ditën e Monumenteve

[Zemrushja]

Petrika Grosi

Në Ditën Ndërkombëtare të Monumenteve dhe Siteve Arkeologjike, e shpallur si e tillë në vitin 1982 nga Këshilli Ndërkombëtar joqeveritar ICOMOS, që ka të bëjë me promovimin e vlerave të trashëgimisë kulturore, mbrojtjen e tyre, me aktivitete në këto site arkeologjike, muze etj., ministri i Turizmit dhe Kulturës, Ylli Pango, ka mbledhur Bordin Kombëtar të Parqeve Arkeologjike. Në takim nuk mungonin përfaqësues nga Ministria e Brendshme, Ministria e Mjedisit, Komisioni i UNESCO-s në Ministrinë e Jashtme, Instituti i Arkeologjisë, Instituti i Monumenteve të Kulturës. Pango ka theksuar faktin se duhet të ndëshkohen të gjithë ata që dëmtojnë monumentet e kulturës dhe ligji duhet të tregohet i rreptë me ta. “Aq më tepër kur 18 për qind e këtyre monumenteve, apo 700 syresh kanë pësuar dëmtime”, - është shprehur mes të tjerash ai, duke vijuar se “në këtë sens edhe një herë lëshoj alarmin për të gjithë njerëzit e ndjeshëm ndaj këtij problemi, për t’i mbrojtur këto monumente, ndërkohë që kemi marrë masat emergjente për të ndëshkuar kundërvajtësit dhe njëkohësisht po punojmë për të sanksionuar më mirë statusin e parqeve të reja arkeologjike, për të cilin po zhvillohet ky takim”. Sipas kreut të MTKRS-së, dita e djeshme duhet të ishte më tepër se një ditë ceremonish, përurimesh dhe vizitash falas në muze të ndryshme të vendit. Ndërgjegjësimi i munguar vazhdon të jetë një nga armiqtë dhe rrezikuesit e integritetit të monumenteve të kulturës. Në anën tjetër, edhe në rrethe, Dita Ndërkombëtare e Monumenteve është shoqëruar me aktivitete të ndryshme kulturore. Në Gjirokastër, kryebashkiaku Bime, duke pohuar se koha e promovimit të vlerave të Gjirokastrës është mbyllur, pasi tashmë ato njihen në mbarë botën, ka deklaruar themelimin e “Forumit qytetar për shpëtimin e Gjirokastrës”. Në Bylis ka pasur gjithashtu vizita dhe arkeologët e specialistët kanë folur për historinë dhe rëndësinë e qendrës antike mesjetare afër Ballshit.
Ndërkaq, Durrësi e ka pritur mes të tjerash këtë ditë me ekspozitë fotografike të monumenteve të kulturës dhe parqeve arkeologjike, apo të mozaikëve të njohur, që kemi si trashëgimi e rrallë kulturore.

Gazeta Albania