Shqipëria dhe Maqedonia, me vullnet të përbashkët për t’u anëtarësuar në NATO

[Zemrushja]

Kryeministri Sali Berisha dhe ministri i Mbrojtjes së Maqedonisë, Lazar Elenovski, gjatë një takimi paraditen e djeshme në Tiranë, shprehën bindjen se vendet e Kartës Adriatik 3, duke u integruar së bashku në NATO, rrisin stabilitetin dhe sigurinë në rajon. Gjatë këtij takimi të dy personalitetet vlerësuan marrëdhëniet e shkëlqyera mes dy vendeve dhe ndanë të njëjtin vullnet për forcimin e bashkëpunimit në të gjitha fushat, veçanërisht në fushën ushtarake, për realizimin e reformave në Forcat e Armatosura, në kuadër të integrimit të të dy vendeve në NATO. Karta e Adriatik 3, nënvizoi kryeministri, është një kuadër shumë i rëndësishëm për përgatitjen e vendeve tona për integrim në NATO. Nga ana e tij, ministri i Mbrojtjes së Maqedonisë, zoti Elenovski, siguroi vullnetin e qeverisë së tij për rritjen e bashkëpunimit dypalësh në të gjitha fushat, veçanërisht në atë ushtarak, duke theksuar se muajt në vazhdim do të jenë shumë të rëndësishëm në përgatitjen tonë për përmbushjen e standardeve, për të merituar ftesën në Samitin e ardhshëm të NATO-s. "Qeveria shqiptare vlerëson përpjekjet konstruktive të qeverisë maqedonase dhe të të gjitha forcave politike në Maqedoni, për implementimin e plotë të Marrëveshjes së Ohrit, si një kuadër shumë i mirë që garanton paqen dhe stabilitetin e Maqedonisë", vlerësoi z.Berisha. Më tej, ai bëri një prezantim të reformave të gjithanshme të ndërmarra nga qeveria shqiptare, veçanërisht në fushën e mbrojtjes, për të realizuar projektin e madh të integrimit në NATO, duke përfshirë edhe rritjen me 2 përqind të GDP-së për Forcat e Armatosura Shqiptare.

Gazeta 55

[no name]

Presidenti Bush nënshkroi ligjin që mbështetet zgjerimin e NATO-s


Autori i Lajmit:
S.M
Presidenti Bush nënshkroi një ligj që rithekson mbështetjen e Shteteve të Bashkuara për zgjerimin e mëtejshëm të NATO-s me anëtarë të rinj.

Ligji, përcakton Shqipërinë, Kroacinë, Gjeorgjinë, Maqedoninë dhe Ukrainën si vende që kualifikohen për ndihmë financiare ndërkohë që përpiqen për anëtarësim në NATO.

Ligji po ashtu kërkon që fondet për ndihmë ushtarake ndaj këtyre vendeve të përfshihen në buxhetin amerikan të vitit të ardhshëm, por në deklaratën e Shtëpisë së Bardhë nuk jepej ndonjë shifër.

Në Moskë, një zëdhënës i ministrisë së jashtme ruse kritikoi veprimin e presidentit Bush, duke thënë se ai nuk do të kontribuonte në stabilizimin politik të Ukrainës