Emërime, shkarkime, ndryshime listash e falsifikime mandatesh

[Zemrushja]

Berat/ Prefekti Bejko në alarm për ndërtimet pa leje

Fenomeni i pandalshëm i ndërtimeve informale, ka detyruar prefektin e qarkut të Beratit Roland Bejko, të thërras në një mbledhje urgjente në zyrën e tij, drejtuesit e 5 bashkive dhe 22 komunave të qarkut dhe kreun e policisë së Ndërtimit. Bejko u kërkoi krerëve të pushtetit lokal, ndryshimin e menjëhershëm të kësaj gjendjeje dhe marrjen e masave urgjente, për mos lejimin e ndërtimeve të tjera dhe ndërmarrjen e operacioneve urgjente për prishjen e tyre.

Në mbledhjen e djeshme, u tha se do të përqendrohej vetëm në ndërtimet pa leje brenda zonës muzeale të qytetit të Beratit, ndërsa do të thirret një tjetër takim i këtyre përmasave edhe për ndërtimet e tjera informale në zona të tjera urbane, si në zonën naftëmbajtëse dhe në repartin e aviacionit ushtarak të rrethit të Kuçovës, në zonat industriale të qyteteve Berat dhe Poliçan, në zonat rurale të komunave fushore të rretheve Berat dhe Kuçovë etj.

Sipas raportimeve të drejtorit të Degës së Monumenteve të Kulturës, Ajet Nallbani, në këtë mbledhje gjatë muajve të fundit janë evidentuar gjithsej 577 ndërtime të plota dhe të pjesshme, në lagjet muzeale Kala, Mangalem e Goricë, si dhe në faqet lindore dhe perëndimore të kodrës së Kalasë së Beratit, e njohur si "Zona e Mbrojtur".

Prefekti Bejko e konsideroi të pamjaftueshme dhe jo konkrete punën e policisë së Ndërtimit dhe kryetarit të saj, të cilit i komunikoi paralajmërimin për shkarkim nga detyra nëse nuk do të përmbushte të gjitha detyrimet e tij.

Gazeta Metropol

[Zemrushja]

"Shkarkimi i gjyqtares së Tiranës, Anila Capos, i jashtëligjshëm"

ALMA ÇUKA

Gjykata Kushtetuese rrëzon Këshillin e Lartë të Drejtësisë

Gjykata Kushtetuese për herë të parë merr një vendim, i cili hedh poshtë në mënyrë kategorike vendimin e KLD-së për shkarkimin e një gjyqtari. Vendimi ka qenë i njëjtë edhe për Kolegjet e Bashkuara.

Ishte gjyqtarja Anila Capo ajo që ka fituar këtë radhë me KLD-në dhe Gjykatën e Lartë.

Vendimi

Edhe pse është pushuar kati tre vjet më parë, Capos me vendimin e marrë nga Gjykata Kushtetuese i lind e drejta e rigjykimit edhe një herë në KLD. Kushtetuesja i ka quajtur të papajtueshëm me Kushtetutën dy vendimet e marra nga KLD-ja dhe Kolegjet e Bashkuara dhe urdhëron rigjykimin e çështjes.

Anila Capo është gjyqtarja, e cila pasi u pushua nga KLD-ja e më pas me vendim të Kolegjeve të Bashkuara të Gjykatës së Lartë, iu drejtua Gjykatës Kushtetuese si organi më i lartë për zgjidhjen e mosmarrëveshjeve ligjore.

Ish-gjyqtarja përfaqësohej nga avokatët Artan Hajdari dhe Fatmir Braka, ndërsa KLD nga Mine Progonati dhe Selim Kryeziu. Anila Capo u shkarkua nga detyra me vendim nr. 154, datë 31 mars 2004 të KLD-së dhe vendim nr. 15 datë, 29 qershor 2004 të Kolegjeve të Bashkuara në Gjykatën e Lartë.

Gjyqtarja

Anila Capo u shkarkua pasi ishte anëtare e trupit gjykues në një proces ku pjesë e padisë ishte edhe bashkëshorti i saj. Sipas gjyqtares bashkëshorti ka bërë blerjen e një trualli nëpërmjet një ankandi të kryer nga pronarët. Këshilli i Lartë i Drejtësisë dhe Gjykata e Lartë kanë shkelur parimin e prezumimit të pafajësisë dhe paanshmërinë në gjykim.

Sipas Capos edhe KLD-ja dhe Kolegjet e Bashkuara nuk kanë argumentuar shkakun e shkarkimit, pasi nuk ekziston një shkak i tillë. Më pas gjyqtarja e shkarkuar me pretendimin se ka konflikt interesi shtron problemin se nuk ka lidhje midis veprimeve e sjelljeve të saj dhe blerjes së pronës nga shoqëria tregtare ku ortak është edhe bashkëshorti.

Capo pretendon se e kanë larguar nga detyra për shkaqe që nuk parashikohen në nenin 147/6 të Kushtetutës; se organet që kanë shqyrtuar çështjen kanë bërë vlerësime të vendimeve gjyqësore të formës së prerë që ajo ka dhënë si gjyqtare, kanë gjykuar mbi mënyrën e zbatimit të ligjit prej saj gjatë ushtrimit të funksionit e për pasojë, kanë cenuar pavarësinë e gjyqtarit dhe të pushtetit gjyqësor në dhënien e drejtësisë.

Kushtetuesja

Gjykata Kushtetuese vlerëson se për shqyrtimin e çështjes ka rëndësi të veçantë përmbajtja e nenit 147, pika 6 e Kushtetutës së Republikës së Shqipërisë si dhe praktika gjyqësore e krijuar prej kësaj gjykate në çështje analoge.

Dispozita e sipërcituar ka parashikuar standarde, të cilat garantojnë patundshmërinë e gjyqtarit.

Në rastin e gjyqtares Anila Capo, Gjykata Kushtetuese vëren se vetëm referimi në dispozitën kushtetuese nuk është i mjaftueshëm për të treguar dhe argumentuar lidhjen midis shkeljeve të disiplinës të kryera nga kërkuesja dhe shkakut të rëndë të kërkuar nga Kushtetuta për largimin nga detyra.

I njëjti argumentim është bërë edhe për vendimin e marrë nga Kolegjet e Bashkuara të Gjykatës së Lartë.

Gjykata Kushtetuese arrin në përfundimin se vendimet e Këshillit të Lartë të Drejtësisë dhe i Kolegjeve të Bashkuara të Gjykatës së Lartë, objekt shqyrtimi, janë rezultat i procesit të parregullt ligjor dhe për pasojë, bien ndesh me Kushtetutën e Republikës së Shqipërisë.

Vendimi

KLD dhe Gjykata e Lartë

Objekt shqyrtimi i Këshillit të Lartë të Drejtësisë dhe Kolegjeve të Bashkuara të Gjykatës së Lartë ka qenë sjellja e gjyqtares gjatë ushtrimit të detyrës dhe ndikimet e jashtme mbi vendimmarrjen e saj. Këto organe kanë konkluduar se veprimet bien në kundërshtim me përmbushjen e rregullt të detyrës, cenojnë autoritetin e pushtetit gjyqësor, janë në kundërshtim me detyrën e gjyqtares dhe si të tilla, përbëjnë akte e sjellje që diskreditojnë rëndë pozitën dhe figurën e gjyqtarit.

Shkeljet e kryera nga kërkuesja janë shkelje të etikës, pasi bashkëshorti i saj ka blerë pronën në konflikt gjyqësor.

Ajo padrejtësisht nuk ka hequr dorë nga gjykimi i kësaj çështjeje, me të cilën ka pasur arsye të forta njëanshmërie, sepse gjatë procedimit disiplinor, ka pranuar se kishte dijeni lidhur me interesin e bashkëshortit për blerjen e pronës në konflikt gjyqësor që gjatë gjykimit të çështjes.

Kërkuesja ka interesa direkt ekonomike mbi pronën e blerë, pasi sipas regjimeve pasurore bashkëshortore ligjore, përfiton 50 për qind të të drejtave nga ajo pasuri.

Arsyetimi

Gjykata Kushtetuese

Gjykata Kushtetuese vlerëson se për shqyrtimin e çështjes ka rëndësi të veçantë përmbajtja e nenit 147, pika 6 e Kushtetutës së Republikës së Shqipërisë si dhe praktika gjyqësore e krijuar prej kësaj gjykate në çështje analoge. Dispozita e sipërcituar ka parashikuar standarde, të cilat garantojnë patundshmërinë e gjyqtarit. Ajo sanksionon se gjyqtari mund të largohet nga detyra vetëm kur vërtetohet një nga rastet e parashikuara shprehimisht në Kushtetutë. Patundshmëria e gjyqtarit nuk përfaqëson një privilegj dhe as nuk nënkupton se kjo kategori nëpunësish shtetërorë janë të pakontrollueshëm. Kufizimi i shkaqeve të largimit të tyre nga detyra dhe parashikimi i tyre drejtpërdrejt nga Kushtetuta ka për qëllim të ndikojë, së bashku me faktorë të tjerë në realizimin e pavarësisë së pushtetit gjyqësor me qëllim mundësimin e ushtrimit prej tij të funksioneve të veta për dhënien e drejtësisë, pa ndërhyrje nga jashtë. Lidhur me sa më sipër, kjo gjykatë është shprehur se paprekshmëria dhe palëvizshmëria e gjyqtarit janë elementë thelbësorë të së drejtës për një proces të rregullt ligjor.

Gazeta Metropol