Tenton vetëvrasjen në shtyllën e tensionit të lartë, 4 rrethe në errësirë
Ngjarja në Ballsh. 40-vjeçari zbret vetëm në orën 21:30, pas negociatave të gjata me policinë dhe premtimit se nuk do të arrestohej
Tentativa e vetëvrasjes së një 40-vjeçari ka lënë pa drita gjithë Jugun e vendit dje në mbrëmje. Një banor i qytetit të Ballshit ka hipur në majën e një shtylle të tensionit të lartë, pranë Termocentralit (TEC), në orën 19:00, duke tentuar të hidhet prej andej. Për të shmangur tragjedinë, drejtuesit e TEC-it të Ballshit vendosën të ndërpresin rrymën elektrike në shtyllë, duke lënë kështu pa energji elektrike gjithë Jugun e vendit, që nga Ballshi deri në Gjirokastër.
Personi që ka tentuar të vetëvritet është Isa Haxhi Malaj, që sipas banorëve të qytetit të Ballshit njihet si njeri me probleme mendore. Mësohet se 40-vjeçari ka hipur në shtyllë pas një sherri që ka pasur me një fqinjën e tij. Burri ka pasur frikë mos fqinja e denonconte në polici dhe sipas dëshmitarëve ka deklaruar që nga maja e shtyllës 30-metërshe se do të vetëvritej për të mos rënë në duart e policisë.
Pak minuta pasi burri ka hipur në shtyllë, në vendngjarje kanë mbërritur dy furgonë të Policisë së Komisariatit të Mallakastrës me 25 efektiva dhe me në krye shefin e këtij komisariati, Kudret Strumi. Sipas këtij të fundit, ka qenë shumë e vështirë të negociohej me 40-vjeçarin që kishte hipur në shtyllë, për shkak të gjendjes së tij të trazuar.
Pas dy orësh, policët i kanë premtuar 40-vjeçarit Isa Malaj se nuk do ta arrestonin dhe janë larguar nga shtylla, për t‘i dhënë atij siguri. Më pas, një punëtor i linjave të tensionit të lartë është ngjitur në shtyllë dhe pasi ka biseduar për pak minuta me Malajn, e ka bindur dhe e ka ndihmuar të zbresë në tokë.
Në orën 21:20, Isa Malaj ka zbritur nga shtylla i pa shqetësuar nga policia, duke i rikthyer në këtë mënyrë dritën gjithë Jugut të Shqipërisë.
Shefi i Komisariatit të Mallakastrës tha pas zgjidhjes së situatës, se ndaj Isa Malajt nuk do të merret asnjë masë, pasi është i papërgjegjshëm. "Malaj është shoqëruar në polici vetëm për disa minuta, për t‘i marrë një deklarim, në prani të familjarëve. Nuk e arrestojmë, sepse ai është i sëmurë dhe mbajtja në polici vetëm do t‘ia përkeqësonte gjendjen", tha Strumi.
Isa Malaj kishte hipur në shtyllën e linjës nr.2 të sistemit unazor të tensionit të lartë. Kjo linjë, që e merr energjinë nga Elbasani, furnizon me energji elektrike rrethet e Mallakastrës, Tepelenës, Gjirokastrës dhe Përmetit. Termocentrali i Ballshit, që prej disa vitesh nuk prodhon energji, luan tani rolin e një stacioni shpërndarjeje për Jugun.
Nuk dihet nëse Isa Malaj ka qenë i vetëdijshëm për pasojat që mund të sillte hipja e tij pikërisht në shtyllën e kësaj linje të rëndësishme, por ai ka udhëtuar rreth 5 kilometra që nga shtëpia e tij në skajin perëndimor të qytetit deri te shtylla, që ndodhet në skajin lindor të tij.
Në verën e vitit të shkuar, një defekt në të njëjtën linjë transmetimi la pa energji elektrike për gjashtë orë Mallakastrën, Tepelenën, Gjirokastrën dhe Përmetin.
© Gazeta Shqip - 2006-2007
Përgjigju Duke Cituar
Krijoni Kontakt