Pollo: Kundër ligjit, karteli i yshtur i interesaxhinjve

[Zemrushja]

Ministri i Arsimit sulmon ashpër rektorët dhe dekanët që kundërshtuan projektligjin e universiteteve

Ministri i Arsimit shfaq haptazi mendimin e tij për të gjithë ata që kanë pasur kundërshti për projektligjin e arsimit të lartë. Pas deklaratave të përcjella herë pas here mes rektorëve dhe ministrit Pollo, dje në një takim me studentët e shkencave sociale, kreu i shkencës ka guxuar edhe më tej me kundërshtitë e tij ndaj rektorëve. "Duket qartë se një pjesë e mirë e sulmeve vjen nga një kartel mjaft i yshtur që këtë projektligj e do për të kënaqur interesa individuale dhe parcela të vogla dhe jo për të shërbyer të mirën publike në vendin tonë, jo për të promovuar arsimin e lartë që vërtet i shërben gjithë shoqërisë shqiptare", tha ministri Genc Pollo. Dje, në takimin me studentët, ai ka diskutuar për çështje më të rëndësishme kohët e fundit. Në këtë bashkëbisedim me studentët, Pollo ka përfituar nga rasti për të përcjellë mesazhin se projektligji për arsimin e lartë u jep atyre hapësira dhe mundësi maksimale. Po ashtu, ky projektligj sipas tij është kundërshtuar, sepse palëve që nuk bien dakord nuk u përputhen interesat vetjake. "Projektligji, që së shpejti do të miratohet në Kuvendin e Republikës, jep një hapësirë maksimale për rolin e studentëve, rol të cilin unë kam besim që do ta kryeni me sensin e përgjegjësisë", u tha ministri studentëve. Pollo theksoi se projektligji synon të vendosë standarde sa më të larta në universitete. "Synojmë që diplomat e lëshuara nga universitetet të jenë letra realisht me vlerë, që pasqyrojnë një dije të dobishme për diplomantin dhe për gjithë shoqërinë". Për të treguar objektivitetin e tij, ministri deklaroi se e ka për detyrë që të dëgjojë me vëmendje çdo vërejtje dashamirëse dhe konstruktive. Ndërkohë që rektorët e universiteteve prej një kohe të gjatë, që kur projektligji ishte në formën e draftit, kanë shprehur se ndryshimet e paraqitura lënë për të dëshiruar, pasi cenojnë autonominë universitare. E bashkë me këtë autonomi ka edhe të meta të tjera. Por Pollo ka sqaruar edhe një herë dje, se projektligji parashikon raportin dhe balancën e duhur midis autonomisë universitare, që tani e tutje zgjerohet shumë më tepër në njërën anë, si dhe përgjegjshmërinë, hapjen ndaj shoqërisë dhe transparencës së universiteteve në anën tjetër. Një javë më parë konferenca e rektorëve diskutoi mbi projektligjin për arsimin e lartë. Në fund të kësaj konference, kreu i universitetit të Tiranës, Shezai Rrokaj, tha se ky projektligj së bashku me ndryshimet që u propozuan në konferencën e rektorëve do të ishte një hap i rëndësishëm. Projektligji së bashku me ndryshimet e propozuara do t‘i paraqitet komisionit të ligjeve për diskutim. Nëse këto sugjerime nuk pranohen, universitetit i mohohet e drejta e autonomisë.

Konferenca e rektorëve ishte plotësisht kundër nenit 95 të projektligjit të paraqitur nga MASH. Sipas rektorëve, ky nen paragjykon ende pa filluar zgjedhjet e drejtpërdrejta në universitet, kompetencat që ka rektorati, senati dhe këshilli i administrimit.


Procesi i Bolonjës

Roli i studentëve, të marrin pjesë në çdo vendim

Roli dhe përgjegjësia e studentëve me shkollat e larta, në vijim të procesit të Bolonjës, është tepër i rëndësishëm. Sipas Pollos, ky proces nuk i ndihmon ata vetëm të bëhen qytetarë më të mirë, apo të jenë të suksesshëm në tregun e punës, por edhe të jenë gjithëpërfshirës në vendimet që merren në fakultete.

"Roli dhe organizimi i këshillave studentore në vendimmarrjen në fakultete dhe universitete, është pjesëmarrja në këshilla e senate, përfshirja e të tërë studentëve në zgjedhjen e dekanit apo rektorit, e drejta dhe detyra për të përcjellë informacion, sidomos atë që ka të bëjë me shpenzimet buxhetore në shkollat e larta e me radhë, është edhe e drejtë e studentëve", tha Pollo.

© Gazeta Shqip - 2006-2007

[DYDRINAS]

Qeveria Berisha ka nevoje per disa Pollo te tjere qe te vazhdoje me sukses reformat.
Vecanerisht te kishte nje Pollo ne Ministrine e Puneve te Jashtme dhe ate te Kultures dhe Turizmit.

[Zemrushja]

• Sipas Ministrit te Arsimit, Genc Pollo sistem i ri per kualifikimin e mesuesve do t’i motivojë ata të rrisin standardet e tyre ne mësimdhënie.

Të gjithë mësuesit që duan të ngrihen në kategori apo të përfitojne një shtesë page prej 10% duhet t’u nënshtrohen provimeve kualifikuese nga MASH cdo 5 vjet. Një udhëzim i fundit i MASH detyron mësuesit të japin provime me shkrim ose me goje për të mbrojtur dijet dhe njohuritë e tyre. Provimet do të jenë të asaj shkalle kategorie si matura shtetërore. Provimet e para kualifikuese për mesuesit do të nisin në 26 maj.

“Deri më sot, kualifikimi i mësuesve është bërë në bazë të një udhëzimi të lëshuar 16 vjet më parë, pa u lidhur fare me aftësitë individuale të secilit mësues. Ky nuk është një sistem i drejtë dhe nuk i shërben cilësisë dhe etikës në arsim. Prandaj, pas përgatitjeve të nevojshme, këtë vit, ne po lançojmë një sistem të ri kualifikimi, ku rregullat e provimit për mësuesit do të jenë të ngjashëm me ato të Maturës Shtetërore. Ky sistem do t’i motivojë mësuesit që të rrisin standardet e tyre të mësimdhënies. MASH do ta mbështesë këtë proces. Shumica e provimeve do të kryhen vetëm me shkrim, me një test unik për lëndën dhe kategorinë, i cili do të hartohet nga Qendra e Trajnimit Kombëtar të Kualifikimit (QTKA), do korrigjohet po prej saj në Tiranë. Ata mësues që do të kualifikohen fitues, do të sigurojnë ngritjen në kategori dhe shtesën në pagë” tha Ministri i Arsimit Pollo.

(News24/Blaknweb)