Fier, humbasin "pa nam e nishan" 35 pasaporta

[Zemrushja]

Skandal në policinë e Fierit. Dokumentet zhduken nëpër sportele. SHKB nis hetimet

Qytetarët detyrohen të paguajnë paratë dy herë

Seksioni i prodhimit të pasa portave në Drejtorinë e Policisë Fier është vënë në epiqendrën e hetimeve të Shërbimit të Kontrollit të Brendshëm, për shkak të humbjes së një numri dokumentesh identifikimi, përpara se t‘u dorëzoheshin qytetarëve. Ankesa të shumta të aplikantëve për pasaporta ka pasur gjatë tre muajve të fundit edhe te titullari i Drejtorisë së Policisë së Fierit, Arjan Bozhaj. Dita e enjte, e përcaktuar për pritjen e popullit, për drejtorin Bozhaj është kthyer në ditë ankesash për pasaportat e humbura në ambientet e omisariateve. Kjo konfirmohet për gazetën jo vetëm nga zyra e prodhimit të pasaportave në Drejtorinë e Fierit, por edhe nga persona të shumtë, sidomos në këto ditë të mbushura me emigrantë. Këta të fundit pohojnë se e kanë faturuar pasaportën me prokurë që nga fillimi i vitit 2007 dhe tani, pas kaq muajsh, nuk kanë mundur ta marrin atë. Sipas tyre, justifikimi që jepet prej sektorit të prodhimit dhe faturimit të pasaportave është prodhimi i tyre dhe humbja në momentin e tërheqjes nga aplikanti. Ndërkohë, titullarë të Komisariatit të Policisë Fier, kanë thënë se problemet vijnë për shkak të tërheqjes së pasaportave nga të afërm të aplikantëve. Vetëm gjatë dy javëve të fundit, numri i ankesave lidhur me humbjen e pasaportave arrin në 35, ndërkohë që radhët e gjata kanë pushtuar sportelin e faturimit dhe tërheqjes së tyre. Vendi i vetëm ku humbasin pasaportat, sipas burimeve zyrtare të policisë Fier, është sporteli i tërheqjes së tyre ose personat e afërt me aplikantin. Kurse, sipas vetë të dëmtuarve, pasaportat humbasin në polici, me qëllimin që ata të paguajnë dy herë, madje edhe me gjobë. Violeta Ahmetaj, një prej "viktimave" të humbjes së pasaportës, thotë se "sipas të dhënave të fundit që kam marrë nga policia, pasaporta ime është prodhuar qysh më 30 mars të vitit 2007, ndërkohë që nuk ka asnjë gjurmë prej saj". Ajo tregon më tej se e ka faturuar pasaportën në datën 4 nëntor 2006. "Pas vonesës kam marrë kontakt me drejtorin e policisë, Arjan Bozhaj, i cili më ka premtuar se do t‘i jepte zgjidhje problemit. Më pas më ka pritur edhe shefi i rendit, shefi i komisariatit, referenti dhe specialisti përkatës i pasaportave, por më kot. Para tri ditësh, kur është vërtetuar se pasaporta ime është prodhuar i jam drejtuar sërish drejtorit të policisë, i cili më ka thënë se duhet të kryej të gjitha veprimet nga e para, duke paguar edhe njëherë paratë. Madje, në sportelin e faturimit, polici Nazër Plaka më ka kërkuar edhe 5 mijë lekë të tjera për gjobën. Nuk e kuptoj se pse duhet të paguaj gjobë unë", tregon Violeta Ahmetaj. Ndërsa Mirjan Hoxhaj, një tjetër "viktimë", tregon se ka tre muaj që e ka faturuar pasaportën dhe i ka humbur pa e tërhequr. Shefi i Komisariatit të Policisë Fier, Asllan Shyti, thotë se "jemi në dijeni të humbjes së pasaportave. Kemi pasur ankesa të shumta, por deklaroj se do t‘i pajisim të gjithë aplikantët me to". Ndërkohë, burime nga SHKB në Drejtorinë e Policisë Fier thonë se po hetohet mundësia e abuzimit nga punonjësit e policisë, me qëllim përfitimin.

© Gazeta Shqip - 2006-2007

[Zemrushja]

Ankohen pesë emigrantë: Numrat e dokumenteve tona të identifikimit nuk janë unikë, na kthyen në kufi

Shefi i komisariatit: Kemi raste kur tri dokumente kanë të njëjtin kod

Zyra e prodhimit të pasaportave Fier vazhdon të jetë në epiqendër të shqetësimeve jo vetëm të vetë policisë, por edhe të qytetarëve të shumtë. Gjatë ditës së djeshme, pesë ankesa në drejtim të kësaj zyre kanë alarmuar Drejtorinë e Policisë së Fierit. Ato kishin të bënin me prodhimin e pasaportave që u përkasin personave të ndryshëm, por që mbajnë të njëjtin numër serie.

Shefi i Komisariatit të Policisë Fier, Asllan Shyti, pranon për gazetën se janë shënuar raste kur numri i një pasaporte është i njëjtë edhe me dy të tjera, por ai e ka justifikuar këtë si një defekt teknik, duke garantuar madje edhe se prodhimi i pasaportave të reja për këta persona do të përballohet financiarisht nga vetë komisariati i policisë.

Pesë personat, pasaportat e të cilëve nuk kanë një numër unik serie, janë të gjithë emigrantë. Së bashku me të afërmit e tyre, ata përballen prej tri ditësh me dyert e mbyllura dhe me indiferentizmin e drejtuesve të policisë Fier, duke mos marrë asnjë shpjegim. Sipas njërit prej tyre, pasaporta me të cilën kishte kaluar dy herë kufirin shqiptar, është konsideruar e parregullt në udhëtimin e fundit, tri ditë më parë, kur ka rezultuar se kishte numër identik me pasaportën e një tjetër shtetasi shqiptar.

"E kam nxjerrë pasaportën time më 4 janar të vitit 2006 dhe kam kaluar kufirin shqiptar dy herë me parë me të pa u përballur me asnjë problem. Kam ardhur nga Italia në fillim të muajit prill dhe kur kam dashur të iki sërish, tri ditë më parë, në Portin e Vlorës më kanë kthyer, duke me shoqëruar me një fletë në të cilën shkruhej se pasaporta ime i përkiste në numër edhe një personi tjetër. Këtu në policinë e Fierit askush nuk më pret", tha për gazetën "Shqip", Rovenato Lina.

"Po humbas punën time në Greqi, për të vetmin fakt se pasaporta doli me numër që i përkiste edhe një personi tjetër. Pronari andej më ka lënë një afat, i cili ka kaluar prej tri ditësh dhe nuk di çfarë të bëj. Këta të policisë Fier po na zvarrisnin, madje nuk na presin fare", thotë Sokrat Licaj.

Ndërsa Elidon Guraj, banor i qytetit të Patosit thotë: "Kisha tre vjet pa ardhur në Shqipëri dhe me këtë që më ndodhi as që do të mund të mendoj të kthehem më. Lus Zotin vetëm të iki".

Sipas emigrantëve, i vetmi kontakt që kanë mundur të marrin me kryeinspektorin e rendit, për Drejtorinë e Policisë Fier, Bejkush Sinaj, ka qenë paraditen e djeshme, kur dhe u është thënë "Prisni se nuk kemi linjë".

Por shefi i Komisariatit të Policisë së Fierit, Asllan Shyti, i pyetur nga gazeta "Shqip", ka thënë se "Nuk janë vetëm këto pesë raste, por edhe shumë të tjera, që kanë rezultuar me numër të njëjtë në dy pasaporta".

RASTI

Humbja e pasaportave

Përpara dy ditësh, gazeta "Shqip" botoi një artikull në lidhje me një tjetër problem që lidhet me prodhimin e pasaportave në komisariatet e Drejtorisë së Policisë së Fierit. Të paktën 35 qytetarë janë ankuar gjatë javëve të fundit, se pasaportat e tyre kishin humbur brenda ambienteve të komisariateve, menjëherë pas prodhimit. Edhe drejtori i policisë së Fierit, Arian Bozhe, e pranoi se kishte marrë 35 ankesa për këtë çështje. Ndërkohë, qytetarët thanë se punonjësit e zyrës së prodhimit të pasaportave u kishin kërkuar të dëmtuarve që të paguanin edhe një herë tarifën prej 5 mijë lekësh për nxjerrjen e pasaportave të reja, si dhe 5 mijë lekë gjobë, për humbjen e tyre. Burimet zyrtare të policisë së Fierit konfirmuan gjithashtu, se Shërbimi i Kontrollit të Brendshëm në Drejtorinë e Policisë ka nisur hetimet për këtë çështje.

© Gazeta Shqip - 2006-2007

[Fabio_gr]

ouuuuuuu c'jane keto gjera qe po ndodhin me qytetin tone njerez
..e pafalshme per shefin e komisariatit kjo histori