Plagoset vëllai i Nishanit

[Zemrushja]

Një 62-vjeçar e qëllon me thikë, pas një sherri banal në rrugë


Një konflikt banal mes dy drejtuesish të mjeteve motorike ka marrë përmasa të mëdha, për shkak të përfshirjes në të dhe vëllait të vogël të ministrit të Brendshëm, Bujar Nishani. Ngjarja e rëndomtë për rrugët e ngarkuara në trafik të qytetit port ka ndodhur paraditen e djeshme, pranë kryqëzimit të Unazës, në lagjen 17 të Durrësit.

Drejtori i Policisë së Qarkut Durrës, Nikolin Bala, tha për median se gjithçka ka nisur si rezultat i një debati të çastit, pas fërkimit të një automjeti me një motor. Me motorin "Yamaha", me targa DR 040 B, udhëtonte Ilir Nishani, 34 vjeç, banor i lagjes 3 të qytetit të Durrësit. Ndërkaq, automjeti tip "Audi 80", me ngjyrë jeshile dhe targa TR 4048 D drejtohej nga një tjetër shtetas nga Durrësi, Nikolin Lushi, 62 vjeç, banor i lagjes 6. Debati për fërkimin e automjetit me motorin ka shkaktuar irritimin e Nishanit, punonjës i Drejtorisë Rajonale të shërbimit të transportit rrugor në Durrës.

Ngjarja është vlerësuar maksimalisht nga uniformat blu të qytetit bregdetar për më tepër që bëhej fjalë për vëllanë e eprorit të tyre, ministrit të Brendshëm, Bujar Nishani.

Fyerjet reciproke ia kanë lënë vendin grushteve, ndërsa burri në moshë, për t‘i dhënë fund sherrit ka nxjerrë një thikë, me të cilën ka plagosur lehtë në dorën e majtë vëllain e ministrit, po pa e ditur kush ishte ai dhe sa rëndësi do t‘i jepej zënkës ku u përfshi.

Pas kësaj, Lushi ka vazhduar udhëtimin e tij dhe është ndaluar nga shërbimet e policisë në të dalë të qytetit bregdetar, në superstradën Durrës-Tiranë, pranë Sukthit. Drejtuesi i mjetit ka ndalur menjëherë automjetin dhe i është përgjigjur thirrjes së forcave të policisë për ta ndjekur deri në komisariat për sqarimin e rrethanave.

Grupi hetimor e ka pasur të vështirë të vendosë mbi masën e sigurisë të 62-vjeçarit Lushi që, duke mos duruar dot fyerjet e Nishanit, ka nxjerrë thikën për ta kanosur dhe dhënë fund sherrit që nisi si rezultat i një fërkimi mjetesh në lëvizje.

Disa orë pas ngjarjes, Lushi ka qenë thjesht i shoqëruar në ambientet e komisariatit të policisë së Durrësit.

Udhëzimet nga lart për ndjekjen e mëtejshme të çështjes kanë ndikuar në hezitimin e grupit hetimor lidhur me masën e sigurisë ndaj Nikolin Lushit. Ndërkaq, qëndrimi në spitalin rajonal të Durrësit i Ilir Nishanit, me detyrë në sektorin e regjistrimit të mjeteve dhe pajisjes së tyre me targa pranë DSHTR në Durrës, ka qenë vetëm disa minutash. Ka qenë një gërvishtje e dorës nga thika e përdorur prej Lushit ndaj Nishanit.

Madje, në urgjencën e spitalit bënë të ditur se nuk ka mbërritur ndonjë rast plagosjeje me thikë, aq më tepër vëllai i ministrit të Brendshëm. I dëmtuari ka shkuar qetësisht në shtëpi, ndërsa dëmtuesi ka mbetur në ambientet e policisë së Durrësit, në pritje të përcaktimit të fatit të tij të mëtejshëm.


I plagosur

Qëndrimi në spitalin rajonal të Durrësit i Ilir Nishanit, me detyrë në sektorin e regjistrimit të mjeteve dhe pajisjes së tyre me targa pranë DSHTR në Durrës, ka qenë vetëm disa minuta

Agjentë nga kryeqyteti për ngjarjen

Në Drejtorinë e Policisë së Qarkut Durrës, lidhur me ngjarjen, kanë mbërritur dhe dy agjentë të antikrimit nga Tirana, po kur janë njohur me ngjarjen dhe rrethanat e saj kanë kuptuar se s‘ka qenë në kompetencën e tyre. Për më tepër kur kanë mësuar se plagosja ka qenë fare e lehtë, pasi agresori Nikolin Lushi e ka qëlluar me thikë në dorë, në mënyrë që ta trembte. 62-vjeçari është shoqëruar vetëm për disa orë në komisariatin e Durrësit për të sqaruar rrethanat e ngjarjes dhe më pas është lënë i lirë, duke qenë se nuk bëhej fjalë për ndonjë plagosje të rëndë.

© Gazeta Shqip - 2006-2007