Sistemi Fiskal

[Gerrard]

Bizneset kembengulin per uljen e taksave ne paketen e re fiskale


TIRANË-Biznesi këmbëngul për ulje taksash, edhe pse qeveria duket se këtë vit nuk ka ndërmend të bëjë tolerime, përveç uljes së tatimit mbi fitimin. Luan Bregasi, kryetar i Dhomës së Tregtisë, komenton paketën e re fiskale të sapobërë publike nga qeveria. “Ne kemi rënë dakord edhe në bisedimet me FMN-në për një paketë fiskale me taksa të ulëta. Ramë dakord që Shqipëria të ecë me një nivel të ulët taksash, pasi në këtë mënyrë do të reduktohej evazioni fiskal”. Bregasi është i mendimit se sa më i lartë të jetë niveli i taksave, aq më shumë evazion do të ketë.
“Ne kërkojmë që propozimet tona të realizohen që në vitin 2006, sepse në bazë të llogaritjeve tona ato do të sjellin përmirësime mjaft të ndjeshme në buxhetin e shtetit, duke e ulur evazionin, duke nxitur bizneset e reja dhe rritur punësimin”. Vitet e kaluara propozimet e biznesit janë debatuar në nivel politik, por edhe në rangun profesional nga specialistë dypalësh të Drejtorisë së Përgjithshme të Tatimeve dhe doganave.

“Sivjet kjo eksperiencë nuk është ndërmarrë, pasi qeveria shqiptare ka ndërmarrë angazhimin kundër korrupsionit dhe evazionit fiskal, dhe nuk është përqendruar në politikat konkrete, që kanë të bëjnë me uljen e taksave dhe tatimeve,” pohon Bregasi. “Ne realisht e kemi bërë punën tonë, e kemi dorëzuar paketën të ndarë në dy pjesë, në pjesën e politikave dhe atë të administrimit, ndërsa shteti ka bërë një paketë të vetën, por ne realisht nuk e kemi marrë paketën as në mënyrë private, e as në rrugë zyrtare”. Realisht, tashmë është vonë për të filluar një debat të tillë, por, sipas Bregasit, ka disa politika që mund të debatohen dhe mund të realizohen.
Pika më e nxehtë ishte ulja e TVSH-së (biznesi kërkoi uljen në 18 për qind), për të cilin ishte marrë premtimi nga Partia Demokratike që gjatë fushatës elektorale. E ndodhur nën presionin e Fondit Monetar Ndërkombëtar, qeveria u tërhoq nga ky premtim dhe e shty atë për më vonë. Nuk u miratuar as ulja e TVSH-së për energjinë në 6 për qind. Në Paketën Fiskale 2006 është miratuar vetëm përjashtimi nga TVSH-ja e lojërave të fatit, kazinove dhe hipodromeve, si dhe unifikimi i procedurave të nxjerrjes me forcë të detyrimve për TVSH-në.
Kërkesat e biznesit Sigurimet shoqërore. U kërkua ulje e nivelit të sigurimeve shoqërore nga rreth 42 për qind që është sot në rreth 35 për qind. Një premtim i tillë, në fakt, është edhe në programin e 100 ditëve të para të qeverisjes së Partisë Demokratike. Por në paketë parashikohet vetëm vendosja e datës 20 të muajit të parë, pas mbylljes së çdo tremujori, si datë deklarimi dhe pagese për kontributet e sigurimeve shoqërore, nga data 10, duke unifikuar datën e pagesës së kontributeve të detyrueshme të sigurimeve shoqërore e shëndetësore me datën e pagesës së tatimit mbi biznesin e vogël. Akciza.

Biznesi kishte kërkuar uljen e akcizës për disa prodhime të suksesshme të ndërmarrjeve vendëse, në veçanti për birrën dhe pije të tjera alkoolike. Njëkohësisht, Sshoqata e Industrialistëve kishte kërkuar uljen e akcizës për cigaren vendëse, por asnjë nga këto kërkesa nuk është marrë parasysh në paketën fiskale. Ndërsa ndryshimet e tjera që parashikon Paketa Fiskale 2006 janë kryesisht të karakterit administrativ dhe procedurial. Tatimfitimi. Biznesi kishte kërkuar uljen e tatimfitimit nga 23 në 20 për qind. Kjo kërkesë do të plotësohet, por për biznesin kjo nuk përbën ndonjë të re, për faktin se kjo ulje ishte miratuar që në paketën e vitit 2005 (ku u miratua ulja nga 25 për qind në 23 për qind, dhe pas një viti në 20 për qind).
Tatimfitimi i riinvestuar. Vitin e kaluar, bizneset e mëdha u përballën fillimisht me presionin për ta tatuar mbi të ardhurat të gjithë fitimin, pavarësisht nga fakti nëse ai riinvestohej apo u shpërndahej aksionerëve. Pas kundërshtimeve të tyre u vendos që të tatohej vetëm pjesa e fitimit që nuk riinvestohej. Për këtë arsye, biznesi në paketën e vitit 2006 kërkoi të merren masa për uljen e presionit fiskal për fitimin e riinvestuar. Por, në Paketën Fiskale 2006 nuk figurojnë masa për zgjidhjen e këtij problemi.

[Gerrard]

Dhoma e Tregtisë dhe Industrisë ka shpallur listën e plotë të kërkesave që qeveria duhet t’i marrë parasysh gjatë hartimit të Paketës Fiskale. Kërkesat janë përqendruar në uljen e TVSH-së në 15 për qind, në rishikimin e tarifave të kontributeve të sigurimeve shoqërore e shëndetësore, riinvestimin e tatimit mbi fitimin etj


TIRANË – Komuniteti i biznesit ka paraqitur kërkesat për hartimin e Paketës Fiskale, ku e para renditet ulja e nivelit të TVSH-së në masën 15 për qind dhe përgatitja për vitin 2007 për diferencimin e kësaj tarife. Sipas përfaqësuesve të Dhomës së Tregtisë dhe Industrisë, kjo do të sillte uljen e presionit tatimor dhe rritjen e deklarimeve dhe të të ardhurave tatimore. Ata sugjeruan dje se diferencimi mund të shtrihej gjatë viteve 2006-2007 vetëm për produktet kryesore bujqësore e agroindustriale, me tarifa 6 për qind-10 për qind dhe gjatë vitit 2008-2009 edhe për produktet e shërbimeve publike, të tilla si energjia elektrike, uji, telefonat, TVSH në masën 8 për qind-12 për qind. Ndërsa për banesat dhe qeratë e tyre kërkesat e biznesit kanë qenë për tarifa me disa intervale, 5 për qind, 10 për qind, 15 për qind dhe 20 për qind. “Kurse varianti i uljes së tarifës së vetme duhet të shihet që të zbatohet gjatë vitit 2006 dhe mund të bëhet 15 për qind. Ky është variant përkohësisht më i pranueshëm për shkak të thjeshtësisë së tij dhe lehtësimit në administrim,” tha presidenti i Dhomës së Tregtisë dhe Industrisë Luan Bregasi.


Tatimi i thjeshtuar mbi biznesin e vogël
Gjithashtu, Bregasi propozoi që tatimi i thjeshtuar mbi fitimin për biznesin e vogël të ulet në masën 2 për qind në vitin 2006, si dhe të bëhe disa rregullime të nevojshme në lidhje me klasifikimin e biznesit të vogël. “Duhet që nga viti 2007 të vendoset që të klasifikohet biznesi i vogël vetëm nga xhiroja e vet, e cila duhet të ulet në jo më shumë se 4 milionë lekë, kurse të tjerët të jenë subjekt i tatimit mbi fitimin,” tha presidenti i Dhomës së Tregtisë. Për bizneset profesionale, si mjekë, dentistë, avokatë, etj, është propozuar që tatimi i thjeshtuar mbi fitimin të jetë 2 për qind mbi xhiron, ndërsa për bizneset artizanale, deri në 2 milionë lekë të konsiderohen me taksa fikse vjetore dhe të përjashtohen nga tatimi mbi xhiron. Një tjetër variant që Dhoma e Tregtisë ka paraqitur, është futja e gjithë biznesit (përjashtuar atë ambulant) në TVSH, duke kërkuar deklarimin e tyre në librat e blerjeve, shitjes dhe Formularin e Deklarimit (FDP), jo më shpesh se një herë në tre muaj. Bregasi ka sugjeruar se ky ndryshim duhet të jetë në program për vitin 2007 e në vazhdim.


Sigurimet shoqërore e shëndetësore
Përfaqësuesit e biznesit kanë kërkuar që në Paketën Fiskale të parashikohet në ligjin përkatës të Sigurimeve shoqërore, të parashikohet edhe rregullimi në drejtim të uljes së tarifës të përqindjes së sigurimeve shoqërore në 5 për qind për punonjësit dhe 25 për qind për subjektet. Sipas parashikimeve të Dhomës së Tregtisë, “efektet e kësaj mase do të ishin si në drejtim të rritjes së të ardhurave për shkak të rritjes së numrit të punonjësve të regjistruar, por edhe në drejtim të shmangies së problemeve sociale në të ardhmen e afërt”. Megjithatë, përfaqësuesit e biznesit kanë sugjeruar të bëhen analiza të kujdesshme të efektit negativ nga ulja e tarifës dhe efektit pozitiv në të ardhurat nga rritja e deklarimit në numër dhe në vlerë. Gjithësesi, edhe në këtë pikë Dhoma e Tregtisë ka dhënë një variant alternativ.


TVSH-ja në ndërtim
Përfaqësuesit e biznesit shqiptar kanë kërkuar që TVSH-ja në shitjen e banesave të reja të mos fillojë të zbatohet para vitit 2008. “Kjo sepse niveli aktual i problemeve që duhet të zgjidhen, nisur edhe nga eksperienca e mëparshme, kërkon më shumë kohë për t’u zgjidhur dhe për t’u përgatitur për të filluar zbatimin e TVSH-së,” tha Bregasi. Dhoma e Tregtisë ka propozuar kryerjen e një studimi dhe vlerësimi të situatës legjislative dhe organizative në zyrat e regjistrimit të pasurisë, në Ministrinë e Drejtësisë, me shoqatat e biznesit, etj, për të përcaktuar më pas kohën dhe kushtet e realizimit të shtyrjes së zbatimit të TVSh-së shitjen e banesave. Gjithashtu, niveli i TVSH-së duhet të jetë i diferencuar në varësi të destinacionit të përdorimit, nëse është për përdorim banese apo aktivitet tregtar.


Tarifat doganore
Sipas kërkesave të biznesit, tarifat doganore të lëndëve të para që importohen për prodhimin e produkteve të gatshme në Shqipëri, duhet të jenë të barabarta ose më të ulëta se tarifat doganore të po këtyre produkteve që importohen pa taksa doganore. “Kjo duhet të jetë një politikë e përgjithshme e hartimit të pjesës përkatëse të Paketës Fiskale 2006 dhe shërben për të mbrojtur prodhimin vendas,” thuhet në komunikatën zyrtare të Dhomës së Tregtisë dhe Industrisë.


Taksat nacionale dhe kombëtare
Gjithashtu, i është kërkuar qeverisë reduktimi i numrit ë taksave nacionale e lokale. Kështu, taksat e bashkisë nuk duhe të ndahen në shumë taksa, por për biznesin në përgjithësi duhe të ketë taksë të pasurisë dhe një ose disa taksa (numër shumë i kufizuar) për taksat e tjera. Po ashtu, mund të grupohen taksat e tjera për qytetarët dhe për biznese specifike, si trgtia, ndërtimi, etj. Megjithatë, ky ndryshim duhet vërjetur me kujdes se vërtet mund të ulet numri i taksave, por do të rritet vlera e tyre, çka mund të ketë efekt psikologjik negativ tek tatimpaguesit. Kështu, Dhoma e Tregtisë sugjeron të merret parasysh eksperienca e vendeve të tjera. Ndërsa, për efekte të përdorimit të këtyre taksave nga bashkia, ato mund të ndahen në përqindje sipas destinacionit, për pastrim, gjelbërim, etj.


Tatim-fitimi për të varfërit
Përfaqësuesit e biznesit kanë kërkuar që për zonat tepër të varfëra dhe shtrsa gjithashtu të varfëra, në rast se nuk zbatohen tarifa të diferencuara të tatimit mbi fitimin, nga 5 për qind deri në 10 për qind, mund të merret parasysh idea e dhënies së fondeve të pakthyeshme të subjekteve që operojnë në ato zona, ose të shihet mundësia e gjetjes institucionale të projekteve që ndihmojnë shtresat e varfëra për punësim, arsimim, etj.


Masat ndaj subjekteve të parregullta
Teuta Ibrahimaj, presidente e Dhomës së Tregtisë dhe Industrisë të Tiranës ka mbështetur bllokime e ndërmarra nga strukturat shtetërore ndaj subjekteve që kishin paraqitur mangësi, probleme me shlyerjen e detyrimeve dhe evazionin fiskal. “Jemi në mbështetje të masave të marra nga qeveria kundër evazorëve,” tha ajo. Në të njëjtën linjë është shprehur edhe vetë presidenti i Dhomës së Tregtisë, duke përkrahur veprimet e strukturave përkatëse ndaj bizneseve që i shmangeshin detyrimeve ndaj shtetit.

[Gerrard]

Burime nga Drejtoria e Përgjithshme e Tatimeve bëjnë të ditur se “aktualisht nga tatimorët janë propozuar dy variante për vendosjen e kasave regjistruese, dhe së shpejti të gjitha njësitë e shitjes do të njoftohen se çfarë do të bëjnë me kasat regjistruese.


Tatimorët kanë propozuar ndryshimin e sistemit ekzistues të kasave, që nënkupton të kontrollohet nga tatimorët kujtesa e arkës regjistruese apo të sistemeve integrale dhe pajisjeve që përdorin subjekte. Nga tatimet argumentohet se “duhet të vendosim sistemin e licensimit të shoqërive, që do të lejohen të merren me importimin, tregtimin dhe mirëmbajtjen e arkave regjistruese, të cilat do të jenë njëkohësisht përgjegjëse edhe për kontrollin dhe mosprekjen e kujtesës fiskale”.


Ky variant i ri që vendos sistemin e autorizimeve konsiderohet më efikas, sipas tatimorëve, dhe mund të jetë në disa nënvariante: importimi është i lirë dhe mund të kryhet nga çdo firmë, pra shoqëritë që bëjnë fiskalizimin dhe mirëmbajtjen autorizohen nga ministri i Financave dhe importimi i arkave regjistruese. Shitja dhe mirëmbajtja e tyre bëhet nga subjektet që autorizohen nga Ministria e Financave dhe ente të tjera shtetërore të specializuara. Si anë pozitive të këtij varianti, tatimorët përmendin se sigurohet kontroll më i plotë i kujtesës së arkës regjistruese. Ndërsa si anë negative përmenden: duhet të krijohen struktura licensimi në Ministrinë e Financave dhe në ente të tjera shtetërore të specializuara. Mund të ketë paragjykime mbi përzgjedhjen e shoqërive që do të merren me këtë punë. Duke pasur ekskluzivitet që të mirëmbajë arkën, punonjësit e shoqërisë së autorizuar mund të kthehen në “instruktorë” të subjekteve, me qëllim manipulimin e veprimeve me arkën regjistuese.


Përdorimi i kasave me dëshirë
Varianti i dytë ka të bëjë me lënien në fuqi të së njëjtës situatë. Nëse do të vendoset që të vazhdohet të veprohet me sistemin aktual të liberalizuar, sipas të cilit blerja, instalimi, fiskalizimi dhe mirëmbajtja e arkave regjistruese janë lënë të lira, pra që të sigurohet nga vetë tatimpaguesi, do të thotë se arkat regjistruese nuk do të konsiderohen si elementi kryesor dhe i vetëm i përcaktimit të detyrimeve të subjekteve. Në këtë rast, sipas raportit për kasat regjistruese të Drejtorisë së Përgjithshme të Tatimeve, “ato do të kenë më tepër funksion transparence subjekt–konsumator, dhe administrata tatimore do të përdorë edhe metoda të tjera për përcaktimin e detyrimit”.
Importimi i kasave mund të bëhet nga kushdo importues që u përgjigjet parametrave të kërkuara me udhëzim. Varianti, si anë pozitive, nuk ka nevojë për ndryshime ligjore; nuk ka paragjykime për përzgjedhje firmash, të cilat do të autorizohen për importimin apo mirëmbajtjen e arkave. Sipas këtij varianti, Ministria e Financave dhe Drejtoria e Përgjithshme e Tatimeve nuk e kanë përgjegjësinë e licensimit e të autorizimit të firmave, si dhe nuk detyrohen t’i mbikëqyrin ato. Ndërsa si anë negative tatimet nënvizojnë se arka regjistruese mbetet një ndër mjetet e evidentimit të qarkullimit. Kujtesa fiskale dhe regjistrimet në të i nënshtrohen vetëm kontrollit spontan të punonjësve të tatimeve.


Problemet e kasave
Sipas të dhënave nga Drejtoria e Përgjithshme e Tatimeve, një pjesë e madhe e subjekteve e ka arkën regjistruese, pavarësisht se nuk përdoret në mënyrë të përhershme. Por, sipas punonjësve tatimorë, edhe për atë kategori subjektesh, që në pamje të parë e përdor arkën, nuk ka garanci se detyrimet tatimore i paguan në bazë të xhiros reale që regjistron dhe deklaron, pasi nuk ka institucion të specializuar e të autorizuar për ta kontrolluar kujtesën fiskale të arkës regjistruese. Një problem i madh për mungesën e kasave regjistruese është dhe pamundësia e sigurimit të arkave regjistruese, pasi numri i shoqërive që kanë importuar produkte të tilla ka qenë i kufizuar (1-2 të tilla). Kjo, për faktin se shoqëritë para se t’i importojnë arkat regjistruese kërkojnë siguri që do ta shesin mallin, pasi vlera që investojnë është relativisht e madhe dhe, nëse arkat ngelen stok i pashitur, bllokohet veprimtaria e ndërmarrjes.

[Gerrard]

Pergjysmohen taksat per bizneset e vogla, Stimohet qe humbjet jane te vogla


TIRANË – Qeveria miratoi projektligjet për përgjysmimin e taksave për biznesin e vogël. Këshilli i Ministrave mori dje vendim për t’i propozuar Kuvendit ndryshimin e dy projektligjeve, “Për taksën vendore për biznesin e vogël” dhe “Për tatimin mbi të ardhurat”. Ky vendim i qeverisë së re vjen në përmbushje të premtimeve elektorale për përgjysmim të taksave për biznesin e vogël. Kështu, sipas ndryshimeve të fundit, tatimi i thjeshtuar mbi fitimin për biznesin e vogël nga 3 për qind u përgjysmua në 1,5 për qind. Ndryshimi i ligjit “Për tatimin mbi të ardhurat” ka të bëjë me pikën 1 të Nenit 33 të këtij ligji. “Shkalla tatimore e tatimit të thjeshtuar mbi fitimin, për tremujorin e tretë e të katërt të periudhës tatimore 2005 e në vazhdim, është 1,5 për qind.”

Gjithashtu edhe ndryshimet në ligjin ”Për taksën vendore për biznesin e vogël”, që përfundoi së përgatituri tri ditë më parë nga Ministria e Financave; janë përgjysmuar të gjitha taksat vendore për biznesin e vogël, ndryshime që u miratuan sot nga Këshilli i Ministrave. Përgjysmimi i detyrimeve fiskale të biznesit të vogël ndaj buxhetit të shtetit, i kritikuar nga krerë të qeverisë socialiste dhe nga Fondi Monetar Ndërkombëtar, në fakt përbën një humbje minimale në buxhet. Të ardhurat tatimore nga biznesi i vogël zënë rreth 6,5% të totalit të të ardhurave që, pas një përgjysmimi, në rastin më të keq do të sillnte një humbje prej rreth 3%, kundrejt një efekti social pozitiv, nëpërmjet përgjysmimit të barrës fiskale për biznesin e vogël.

Të ardhurat tatimore nga biznesi i vogël për vitin 2005 janë parashikuar në 3,9 miliardë lekë, që do të thotë se përgjysmimi i detyrimeve, i llogaritur sipas këtyre parametrave për vitin 2006, do të rezultonte me një faturë prej rreth 2 miliardë lekësh, apo rreth 17 milionë euro më pak në buxhet.

Ndërkaq, ministri i Financave, Ridvan Bode, ka thënë se ulja e taksave përbën goditje për evazionin fiskal dhe nxit regjistrimin e bizneseve. Sipas tij, kjo masë e marrë sot nga qeveria do të shoqërohet me disa ndryshime të tjera, të cilat në tërësinë e tyre do të garantojnë një ambient të përshtatshëm për biznesin, por edhe mundësi të pakta për të bërë evazion fiskal. “Them se ulja e miratuar sot nga Këshilli i Ministrave krijon kushte dhe mundësi që të gjithë të futen nën veprimin e ligjit e të konkurrojnë në mënyrë të barabartë e të ndershme,” tha Bode, duke shtuar se masa e pagesës nuk është e tillë që të pengojë krijimin e kushteve që çdo biznes i vogël të regjistrohet. Ai shpjegoi se pjesa dërrmuese e tatimit ka të bëjë me të ardhurën mbi xhiron, e cila ulet në nivelin 1,5%, që do të thotë se i korrenspondon një biznesi me një normë fitimi 8 për qind deri në10 për qind mbi xhiron. “Kjo ulje do të shoqërohet me një përmirësim thelbësor në administrim, pasi 1,5 për qind do të aplikohet mbi xhiron nga 0 deri në 8 milionë lekë të reja.

Diapazoni që i nënshtrohet taksës është tepër i madh, dhe sigurisht mundësitë për të përcaktuar në mënyrë objektive dhe ekonomike taksën janë gjithnjë të kufizuara nga niveli i administrimit,” tha ministri i Financave. Sipas Bodes, ulja e këtij niveli takse nuk do të thotë në tërësi rënie e të ardhurave nga biznesi i vogël, për arsye se administrimi i deritanishëm ka qenë i tillë që e ka çuar në absurd këtë taksë; që në Tiranë, në sheshin “Skënderbej”, një butik paguan sa një dyqan ushqimesh në Babrru, apo masa e taksës së një dyqani në një qytet të madh është e barabartë me atë që paguan një dyqan në periferi. Lidhur me rezistencën që FMN-ja u ka bërë ndryshimeve fiskale të qeverisë së re, Bode është shprehur se “për çdo ndryshim të bërë deri më sot është diskutuar dhe negociuar me ata, dhe ka një pranim.

Kjo është një çështje që nuk vendoset, por që është negociuar edhe më përpara me këto institucione,” tha ai. Ministri i Financave deklaroi se qeveria ndodhet në fillimin e procesit të negociimit të marrëveshjeve të reja me Bankën Botërore dhe me FMN-në; shumë shpejt misionet respektive të këtyre institucioneve ndërkombëtare do të asistojnë në Shqipëri për të përgatitur marrëveshjen e re të bashkëpunimit me qeverinë.

[Gerrard]

Drejtoria e Përgjithshme e Tatimeve (DPT) synon t’i trajtojë tatimpaguesit si klientë, dhe ka parashikuar të krijojë për këtë qëllim qendra të shërbimit ndaj klientit




Tiranë - Drejtoria e Përgjithshme e Tatimeve ka parashikuar të zhvillojë një politikë të re për modernizimin e praktikave të saj të punës dhe themelimin e një shërbimi modern ndaj taksapaguesve. Kështu, Drejtoria e Përgjithshme e Tatimeve ka shpallur “vizionin e saj të ri”, “T’u ofrojmë tatimpaguesve të Shqipërisë shërbim me cilësi të lartë, duke i ndihmuar në kuptimin e përgjegjësive të tyre, dhe duke aplikuar ligjet e tatimeve me integritet dhe drejtësi për të gjithë”. Për ta realizuar këtë synim, Tatimet do të fusin për herë të parë konceptin e klientit. Burime zyrtare nga DPT-ja tregojnë se tatimorët shumë shpejt do të fillojnë t’i trajtojnë tatimpaguesit si klientë me të gjitha atributet që vijnë në një shërbim ndaj klientit. Kështu, do të krijohet një Departament i Shërbimit ndaj Klientit, i cili do të përfshijë një rrjet të qendrave të shërbimit ndaj klientit në nivel lokal dhe rajonal. “Filozofia jonë është ta sjellim administratën pranë klientëve që u shërbehet, duke siguruar një fokus në shërbimin ndaj klientit. Vizioni është të themelojmë qendra të Shërbimit ndaj Klientit, atje ku ai ndodhet,” shprehen tatimorët. Sipas tyre, ky ndryshim do të ndihmojë në përmirësimin e shërbimit ndaj klientëve, nëpërmjet sjelljes së praktikave më të mira të shërbimit ndaj klientit nga sektori privat, si dhe ofrimit të teknologjisë. Qëllimi i Tatimeve është t’i ndihmojë njerëzit nëpërmjet ngritjes së standardeve të shërbimit, duke bashkuar operacionet e shërbimit ndaj klientit për të gjithë vendin, nën një strukturë të vetme menaxhimi, dhe duke ofruar standarde të larta. Shërbimi ndaj klientit do të specializohet në çështje të tilla si përpunimi i dokumentacionit e të dhënave, duke përfshirë formularët, pagesat, asistencën, si dhe gjithçka që i shërben klientit. Ky lloj specializimi i orientuar në shërbimin ndaj klientit synon të ndihmojë në transformimin e Drejtorisë së Përgjithshme të Tatimeve, në një agjenci që ka detyrë parësore t’i përgjigjet kërkesave të klientëve të saj, të cilët janë tatimpaguesit. Ky drejtim i ri, sipas DPT-së, do të sjellë në mënyrë të pashmangshme rritjen e të ardhurave. Kjo sipërmarrje e re pritet ta ndryshojë mentalitetin në menaxhim, dhe të kontribuojë në riinxhinierimin e proceseve dhe në investimet teknologjike. Burimet nga Tatimet shprehen se zbatimi i këtij projekti pritet të sjellë një ndryshim radikal në mënyrën se si punon DPT-ja, duke e ndihmuar nëpërmjet rritjes së transparencës, edhe luftën ndaj korrupsionit. “Në qoftë se i bindim njerëzit të paguajnë vullnetarisht, kjo do të ishte më eficente se t’i detyronim të paguanin me forcë. Të gjitha aktivitetet e shërbimeve ndaj klientit do të shihen si suport për zbatimin e ligjit,” thuhet në një komunikatë të DPT-së.

[Gerrard]

Për tatimpaguesit e kaluar në pasiv, të cilët aktualisht e kanë riaktivizuar veprimtarinë e tyre, duke ruajtur të njëjtat të dhëna identifikuese, Drejtoria Teknike do t’i heqë të gjitha gjobat e gjeneruara automatikisht nga sistemi informatik i tatimeve


Drejtori i përgjithshëm i Tatimeve, Ardian Kamberi, sqaron se për tatimpaguesit e kaluar në pasiv, të cilët aktualisht e kanë riaktivizuar veprimtarinë e tyre, duke ruajtur të njëjtat të dhëna identifikuese (përfshirë NIPT-in), Drejtoria Teknike, sipas kërkesës së paraqitur nga çdo tatimpagues duhet t’i heqë të gjitha gjobat e gjeneruara automatikisht nga sistemi informatik.
Këto gjoba gjenerohen automatikisht për mosdeklarim, për periudhën që nga momenti i kalimit në pasiv deri në momentin e riaktivizimit, duke qenë se sistemi nuk është programuar t’i paraprijë këtyre rrethanave, pra kur subjektet kalojnë në pasiv. Kamberi sqaron se për tatimpaguesit e kaluar në pasiv, që në të ardhmen do të dëshirojnë ta riaktivizojnë veprimtarinë e tyre, duke ruajtur të njëjtat të dhëna identifikuese (përfshirë NIPT-in), detyrimi për të deklaruar do të rifillojë që nga çasti kur statusi i tyre do të ndryshojë, nga pasiv në aktiv, pa përfshirë periudhën gjatë së cilës ata ishin pasivë.

Nëse gjatë periudhës, në të cilën tatimpaguesi është kaluar si pasiv, nga organi tatimor vërtetohet se tatimpaguesi ka ushtruar veprimtari; detyrimi i tij për të deklaruar përfshin edhe periudhën gjatë së cilës ai ishte pasiv, duke përfshirë këtu edhe gjobat. Sipas kreut të Tatimeve, për tatimpaguesit që paraqesin formularët e deklarimit, edhe pse mund të mos ushtrojnë aktivitet, nuk mund të bëhet kalimi në pasiv. Nga burime pranë Drejtorisë së Përgjithshme të Tatimeve mësohet se Kamberi ka lëshuar një urdhër, sipas të cilit ngarkohet Drejtoria Teknike dhe Drejtoria e Teknologjisë së Informacionit, në bashkëpunim me degët e tatimeve, të marrin masat e duhura për zbatimin e këtij urdhri, duke përfshirë edhe ndryshimin e formularit përkatës të ndryshimeve në regjistrim.

Ekspertët e Drejtorisë së Tatimeve e motivojnë këtë veprim duke u bazuar në legjislacionin tatimor. Kështu, sipas Pikës 3, të Nenit 32 të ligjit “Për Procedurat Tatimore”, organet tatimore kanë të drejtë të çregjistrojnë nga regjistri aktiv i tatimpaguesve çdo tatimpagues, kur provohet se ai, për çfarëdo arsye, në vitin e fundit fiskal nuk ka ushtruar veprimtari.
Ndërsa, sipas një udhëzimi të ministrit të Financave, në zbatim të ligjit të mësipërm, përcaktohen edhe masat që duhet të ndërmarrin organet tatimore para se të vendosin për kalimin si pasiv të tatimpaguesve. Në po këtë udhëzim theksohet se për tatimpaguesit e kaluar në pasiv nuk është e detyrueshme të printohen formularët e deklarimit e të pagesës së detyrimeve fiskale, pasi që nga ky çast ata nuk do të jenë më të detyruar të deklarojnë.
Megjithëse ndodhemi në një situatë të ngarkuar paszgjedhore, ky është udhëzimi i dytë që Drejtoria e Përgjithshme e Tatimeve lëshon për strukturat e saj dhe tatimpaguesit. Në deklaratën e tij të parë, para pak ditësh, kreu i Tatimeve, Kamberi, u bëri thirrje tatimpaguesve të mos i anashkalonin detyrimet e tyre ndaj Tatimeve, por t’i shlyenin ato me korrektësi.

[Gerrard]

Ministri i Financave Arben Malaj premton se kapitali themeltar i shoqërive nuk do të tatohet, në ndjekje të politikave lehtësuese për biznesin


Kapitali themeltar i shoqërive tregtare nuk do të tatohet. Ky është premtimi që ministri i Financave Arben Malaj bëri dje nga një tribunë në selinë e Partisë Socialiste, ku ai shpalli disa nga synimet dhe politikat fiskale të kësaj partie për mandatin e ardhshëm.

“Dividenti i riinvestuar apo i rikapitalizuar nuk do t’i nënshtrohet asnjë lloj tatimi apo takse, duke ndjekur në këtë mënyrë politikat lehtësuese që qeveria zbaton ndaj biznesit,” sqaroi Malaj.
Kështu, sipas ministrit të Financave, ortakët e shoqërive tregtare që për t’iu shmangur tatimit prej 10% mbi dividentin (fitimi i çdo ortaku) e riinvestojnë, apo në rastin tonë, e fusin atë për të zmadhuar kapitalin themeltar, nuk rrezikojnë të paguajnë detyrime, të paktën jo në të ardhmen e afërt.
Rikapitalizimi i dividentit mbetet aktualisht varianti më joshës për t’iu shmangur detyrimit tatimor, pasi në rast se ai riinvestohet, nevojitet edhe dëshmi konkrete për destinacionin e tij, që jo gjithmonë është e një “leverdie praktike” për firmat.
Nga ana tjetër, kur dividenti deklarohet se po shkon për të zmadhuar kapitalin themeltar, teorikisht, ajo shumë nuk preket, pasi në rast se vërtetohet e kundërta, shkelësi rrezikon të ndëshkohet me burgim.
Mirëpo në aspektin praktik gjasat janë të papërfillshme që Tatimet të arrijnë të kontrollojnë me imtësi dhe të garantojnë pacenueshmërinë e kapitalit themeltar për të gjitha shoqëritë tregtare. Prej këtej, kjo zhvendosje e fitimit, qoftë reale apo fiktive, mbetet zgjidhja më e mirë për t’iu shmangur tatimit prej 10% mbi dividentin e shpërndarë.
“Formalizimi” i aktivitetit Sqarimet e Drejtorisë së Tatimeve se kalimi i dividentit për rritjen e kapitalit themeltar dokumenton një pjesë të aktivitetit të një firme, mund të përkthehen se gjithashtu, kjo procedurë shërben për ta “formalizuar” këtë aktivitet.

Edhe vetë ndryshimi në ligj, ku kërkohet deklarimi i destinacionit të dividentit, në rastin kur ky i fundit riinvestohet, përveçse shmang manipulimet (riinvestimet e rreme), shërben gjithashtu për të formalizuar ato investime konkrete, të cilat më parë, edhe pse realizoheshin, nuk deklaroheshin nga pronarët. Kjo për arsye se në rast falimentimi, firma nuk vë në rrezik një pjesë të rëndësishme të aktiveve të saj, siç mund të jenë pajisje, ndërtesa, në disa raste dhe fabrika. Gjithashtu, edhe në raste të problemeve me bankat – kur firma ka marrë kredi – duke qenë se aktivet e siguruara nëpërmjet riinvestimit nuk deklarohen dhe nuk janë regjistruar në emër të firmës, banka nuk mund t’i prekë ato për të kompensuar borxhin.
Kështu, në të dyja rastet – edhe kur bëhet fjalë për riinvestim të dividentit me destinacion të deklaruar, edhe kur dividenti transferohet për të rritur kapitalin themeltar – kemi të bëjmë me një dokumentim të një pjese të aktivitetit të firmës dhe si rrjedhojë, edhe me “formalizim” të aktivitetit të saj.

[Gerrard]

Ekspertë sudeze në fushën e tatimeve trajnuan tatimorët shqiptarë në drejtim të permiresimit te proçedurave...

Tiranë – Ekspertë sudeze në fushën e tatimeve trajnuan tatimorët shqiptarë në drejtim të përmirësimit të procedurave të kontrollit. Kjo fazë trajnimi është në vijim të misionit të radhës të asistencës teknike të Administratës Tatimore Suedeze të financuar nga SIDA (Shoqata Ndërkombëtare e Zhvillimit Ndërkombëtar) për Drejtorinë e Përgjithshme të Tatimeve që zhvilloi një program pune dyjavor me një grup ekspertësh tatimorë suedezë. Nëpërmjet këtij programi të miratuar më parë, grupi i specialistëve suedezë prezantoi pranë Administratës Tatimore Shqiptare përvojën mbi metodat e kontrollit tatimor në telekomunikacion, turizëm dhe lizing (leasing). Sipas burimeve zyrtare të Drejtorisë së Përgjithshme të Tatimeve, ky trajnim e të tjera të këtij lloji bëjnë që inspektorë tatimorë në mbarë vendin, si dhe një pjesë e stafit të strukturave drejtuese të kontrollit në këtë drejtori, do të kenë mundësinë t’i zgjerojnë njohuritë e tyre në aspektet e kontrollit tatimor. Kjo vlen veçanërisht për fushat ku u zhvillua trajnimi, duke i ardhur në ndihmë Tatimeve shqiptare për kontrollin e aktiviteteve të biznesit të këtyre drejtimeve, ku njohuritë e deritanishme për vetë fushat që prezantojnë këto biznese kanë nevojë për ekspertizë të kualifikuar. Gjithashtu, ekspertët suedezë kanë këmbyer me kolegët shqiptarë eksperiencë mbi legjislacionin tatimor të fushave përkatëse, teknikat dhe instrumentet e kontrollit, matjen e cilësisë së kontrolleve, si dhe programet e informatizimit që përdoren për lehtësimin dhe saktësinë e kontrolleve. Në takimet e zhvilluara është diskutuar edhe mbi listën e elementeve të cilësisë së një kontrolli tatimor, që përfshijnë që nga planifikimi i një kontrolli, mbajtja dhe gjetja e dokumentacionit të nevojshëm, rezultatet e veprimtarisë kontrullese dhe, në përfundim përmbledhja e gjykimi mbi aktivitetin tatimor të ushtruar. Takimet e misionit suedez u përqendruan në Tiranë e Durrës, përkatësisht në aspektet e trajnimit të inspektorëve të Drejtorisë së Përgjithshme të Tatimeve, të Degës së Tatimpaguesve të Mëdhenj dhe në Degën e Tatimeve Durrës.

[Gerrard]

Per projektligjet qe mund te miratoj qeveria ne nuk dime gje, ne zbatojme vetem detyren..

Pas njgjarjes se fundit ne skenen ekonomike shqiptare ku tatimet prekin edhe kuoten e dividentit keta te fundit qe kane menduar drejt te rrisin kapitalin themeltar meqe nuk eshte subjekt tatimi.
Pas njoftimit qe ndoshta eshte ne projektligj qe tatimi do te preki edhe kapitalin themeltare. Tatimoret pergjigjen qe nuk jane aspak ne dijeni per kete.
Por ne te njejten kohe ata nuk e mohojne per parashikimin e ketij projektligji.

Ata deklarojne vetem se ato zbatojne ligjet dhe nuk kane pergjegjesi per efikasitetin e tyre.

Nese do te benim nje krahasim me shtetin fqinj ITALINE edhe atje fakulteti i kthimit te dividentit ne kapital themeltare eshte i lire.Atje dividenti nuk eshte subjekt taksues.
Atje mos marrja e dividentit e bejne me prespektive per mirmbajtjen dhe rregullimin e lokaleve ku operojne ose per zgjerimin e aktivitetiti pra per koston qe do kene ose thjesht per zgjerimin e kapitalit themeltare e cila rrit besueshmerine dhe sigurine ndaj te treteve.

[Gerrard]

igji mbi tatimet per ate shtrese te sipermarresve qe bejne pjese ne shoqerite e kapitaleve po i nxit keta te fundit te mos gezojne te drejtat e tyre mbi dividendet....



Kur flitet per dividentet nenkuptohet fitimi neto te bilançit te shoqerive kapitalesh qe u shperndahet mbajtesve te aksioneve.
Eshte thjesht te kuptohet qe ftimi i i nje shoqerie kapitalesh (fitimi neto pra pasi ne bilanç te jene hequr edhe tatimet e detyrueshme) u shperndahet atyre personave qe jane titullar i aksioneve te shoqeris ne perqindjen e nenshkruar.

Por ligji parashikon qe edhe pasi ne bilanç te jene hequr tatimet e parashikuara persa i perket ushtrimit te aktivitetit, te jene subjekt i nje klasi tatimesh tjeter edhe ajo pjese e fitimit qe u shperndahet aksionisteve ose ortakeve.

Ligji parashikon qe nje shoqeri gjithashtu ka fakultetin e zhgjedhjes per zgjerimin e kapitalit themeltar te saj nepermjet fitimit neto. Pra ne vend qe ai fitim ti shperndahet titullareve te aksioneve ose ortakeve, me anen e asemblese te pergjitheshme ky fitim me proçedure legale me ane te gjykates qe nenshkruan aktin kontribuon ne zgjerimin e kapitalit.

Kapitali themeltar eshte mjaft e rendesishme per nje shoqeri sepse ajo eshte nje garanci per klientet e saj. Sepse nje shoqeri kapitalesh pergjigjet per aktet dhe faktet qe ajo nenshkruan me pasurine e saj ku ben pjes edhe kapitali themeltar.
Kuptohet pra qe nje shoqeri eshte me e sigurt se nje shoqeri tjeter kur pasuria e saj(qe perbehet edhe nga kapitali themeltar) eshte me e madhe, sepse garanton ne nivel me te larte detyrimet qe ajo nenshkuan.

Pra ligji parashikon tatimet mbi dividendet e cila aktualisht jane ne permasen 10%, ne kete menyre shoqerite kane menduar te rrisin kapitalin themeltar e cila aktualisht nuk eshte objekt tatimi dhe nuk sjell ndonje detyrim, por shume juriste mendojne se kjo eshte nje manover e qeverise shqiptare qe ka per obiektiv pikerisht ate qe po ndodh.
Ne kete menyre nese projktligji qe mendohet te hyj ne parlament vitin tjeter per tatimet mbi kapitalin themeltar do te vinte sipermarresit me shpatulla pas muri te cilet do kene rritur ne permasa te joshura kapitalin themeltar dhe sdo kene me mundesi devijimi per mospagimin e tatimit.