Inkriminim i Hapur ne Duty Free Shops

[alumni]

"http://www.shekulli.com.al/koment/25dhjetor2002/mesazhi.htm"

Mesazhi i frikshëm i Duty Free Shop-eve
Nga Gjergj Buxhuku

Pamundësia qeveritare, e përsëritur prej disa muajsh duke filluar nga korriku, për të zbatuar orientimin e BE-së dhe FMN-së për të mbyllur dyqanet Duty Free Shop, është mesazh tepër i frikshëm disapërmasor për të kuptuar se çfarë hibridi i tmerrshëm politiko-ekonomiko-mafioz bën ligjin në Shqipëri.

Së pari, mbyllja e Duty Free Shopeve është domosdoshmëri për të luftuar evazionin fiskal, që bën kërdinë në ekonominë shqiptare. Eshtë absurde të mendosh se efikasiteti i institucioneve fiskale shqiptare duhet të shikohet i shkëputur nga organizimi i formave të tilla të sofistikuara të tregtisë si rasti i Duty Free Shopeve, ku kontrollet janë shumë të vështira. Deri tani ato kanë qenë vrima të zeza të evazionit fiskal, duke mos u dhënë asnjë mundësi institucioneve shtetërore të kontrollojnë aktivitetin e tyre. Për të gjykuar masën e evazionit fiskal në këto vrima të zeza mjafton të kujtojmë se në një pikë të tillë në veri të vendit ku kalojnë vetëm disa qytetarë në ditë bëhet një xhiro prej disa dhjetëra ton cigare në muaj!

Së dyti, shteti shqiptar që sot merr pozën e personit të interesuar maksimalisht për mbylljen e dyqaneve të tilla, ka pjesën e tij të madhe të bashkëfajësisë në aktivitetin e zi të këtij biznesi. Megjithëse, numri i këtyre dyqaneve është objektivisht i kufizuar duke krijuar pothuaj pozita monopol, licensimi i deritanishëm me ligj është shmangur nga gara publike e hapur. Në të gjitha rastet, licensat e Duty Free Shopeve zotërohen nga persona të lidhur me politikën ose që kanë paguar qeveritarët respektivë të çdo kohe të Ministrisë së Financave ose edhe më lart. Nuk ka asnjë rast ku gara e licensimit të ketë qenë publike, duke krijuar terren të shkëlqyer për korrupsion të ligjëruar!

Së treti, vullneti me të cilin politika shqiptare e pozitës dhe opozitës pa dallim, mbron mbylljen e dyqaneve Duty Free Shop, tregon realitetin e turpshem se çfarë përfaqësojnë dhe cilat grupe shoqërore mbrojnë partitë politike shqiptare! Zelli me të cilin politikanët shqiptarë mbrojnë interesat personale të pronarëve të Duty Free-ve, që numërohen me gishtat e dorës, do të ishte i lakmueshëm nëse do të mbronin edhe me një të
mijëtën e tij, interesat e grupeve masive shoqërore të të papunëve, të të varfërve të panumërt, ish –pronarëve ose biznesin prodhues të vendit!

Së katërti, politika e korruptuar shqiptare tregoi edhe njëherë qartë se ajo në thelbin e saj nuk pyet kur vjen fjala për xhepin personal, për orientimet e organizmave të rëndësishme ndërkombëtare dhe as nuk dëshiron për integrimin në BE për të cilën çirret me hipokrizi qesharake dhe tragjike në të njëjtën kohë!

Së fundi, mosmiratimi i përsëritur i projektligjit tregon se qeveria aktuale moralisht është e rrëzuar. Ajo nuk zotëron as numrin minimal të votave të pozitës, duke ndjellë shijen e hidhur të parandjenjës për një krizë qeveritare të afërme!