PASHKË 2007
EJANI MERRNI DRITË …!
“Ejani merrni dritë prej dritës që s’perëndon dhe lavdëroni Krishtin që u ngjall së vdekurësh”.
Çdo vit ndalemi në këtë himn kuptimplotë, ngaqë ky himn na kujton se e vetmja dritë që nuk shuhet kurrë, e vetmja shpresë që nuk venitet asnjëherë dhe i vetmi gëzim që qëndron gjithmonë me ne, vjen vetëm nga kjo dritë, sepse kjo është e vetmja dritë autentike: AJO ËSHTË DRITA E ZOTIT.
Të dashur motra e vëllezër!
Ne jemi të vetëdijshëm se jeta e sotme po karakterizohet nga një konfuzion i madh shpirtëror dhe ky konfuzion, i shfaquar në urrejtjet, dyshimet, mërirat dhe grindjet e ka bërë jetën e njeriut të kotë, të lodhshme dhe plot stres, e ka mbushur atë me frikë dhe dëshpërim, e ka zhveshur atë nga paqja dhe gëzimi, duke u bërë kështu pengesa më e madhe për të hyrë në jetën e vërtetë, sepse me të vërtetë jeta jonë ka nevojë për dritë dhe për gëzim.
Për këtë arsye Kisha na fton të marrim pjesë në dritën e Ngjalljes së Krishtit, për të përjetuar gëzimin që vjen nga kjo ditë. Ajo na fton të përjetojmë Ngjalljen e Zotit, sepse vetëm nëpërmjet këtij përjetimi ne mund të ndiejmë gëzimin e gjallë dhe ngazëllimin e papërshkruar të kësaj ngjarje, që është dhurata më e madhe që Perëndia i ka bërë të gjithë njerëzve nëpërmjet Jisu Krishtit.
Duke u ngjallur së vdekurësh Zoti hapi rrugën e çlirimit, duke mundësuar realisht shpresën për mundjen e vdekjes për të gjithë ne. Duke mundur vdekjen na aftësoi të mundim frikën dhe dëshpërimin dhe ti japim kështu jetës sonë shpresë, kuptim dhe gëzim.
Në këtë ditë të shenjtë do të doja t’i përshëndes të gjithë me lajmin e gëzuar se KRISHTI U NGJALL!
Gëzuar dhe për shumë vjet Pashkët!
Mitropoliti i Korçës,
Pogradecit, Kolonjës,
Devollit dhe Voskopojës
Joani
Krijoni Kontakt