Vladimir Karaj
04-04-2007
Godina ku kryen aktivitetin sekti "Deshmitaret e Jehovait" ne Mushqete
Mbrapa - Para
Në Mushqetë të Tiranës, ku vetëvarja e një adoleshenti ka rikthyer dyshimet mbi sektin. Pak ditë para vdekjes, Marenglen Tarja kishte thënë: "Po të vdesësh të dielën është mirë..."
Të dielën në darkë, Marengleni është larë, është veshur, ka futur librat në çantë që t'i kishte gati për në shkollë dhe më pas ka dalë nga shtëpia, për të mos u kthyer kurrë. 30 minuta më vonë, i ati, Saliu, e ka gjetur të vetëvarur në një pemë. 30 minuta, që Marengleni të mos mbajë më kurrë në shpinë çantën e librave... Gjysmë ore, gjatë të cilës Sali Tarja, që tani fsheh lotët para burrave, duke mbuluar sytë me dorë, ka humbur fëmijën e tij dhe Marengleni jetën... 30 minuta, që në odën e një shtëpie dykatëshe me mur guri të Tarajve, në Mushqetë të Tiranës, të ulen në rreth një grumbull burrash, të gjithë me mjekra të mbështetura pas kraharorit, që ndërsa rrufisin kafe e mërmërisin fjalë morti, pyesin për të kushedisatën herë: "Si ndodhi?". Saliu s'di të kthejë përgjigje. Ai vetëm qan nën zë, ndërsa fshin sytë me një shami prej cope dhe rrallë të sheh drejt, por pa nxjerrë asnjë fjalë. I vëllai, Zyberi, që pret miqtë përgjigjet gjithmonë me gjysmë zëri, herë duke thënë: "Ja kështu!" herë duke shqiptuar: "Taksirat". Atëherë, ata që kanë pyetur shkundin kokën, duke lëshuar ndonjë psherëtimë dhe bëjnë sikur i kanë marrë veshtë gjitha. Por sytë e tyre, që i ngrenë në të rrallë, për të parë dantellën e bardhë të dritareve apo teksa i numërojnë thekët tapetit të shtruar në konakun e Tarajve, vazhdojnë të pyesin: "Po si ndodhi kështu"?...
"Pemën e premë..."
"Pemën e kemi prerë," -thotë një ndër xhaxhallarët e Genit, siç i thërrisnin shkurt 16-vjeçarit shokët dhe të afërmit."Nuk e shihnim dot..." Mban frymën dy minuta dhe pa na parë në sy rënkon: "Shpirti i vogël". Askush nga të afërmit nuk ka mundur të kuptojë më parë se Geni kishte probleme. Deri para asaj gjysmë ore mungese, ai ishte një djalë i këndshëm dhe i hedhur dhe askujt s'i kishte shkuar mendja se mund të arrinte deri aty. Tani pemën e kanë prerë, litarin ndoshta e kanë djegur dhe njerëzit e shtëpisë shpresojnë që me lot të fshijnë nga mendja tmerrin. "Çfarë na ndodhi, na ndodhi", -thotë Zyberi, burri i vetëm që mund të jepte shpjegime në atë shtëpi, ai të cilit duhej t'i drejtoheshim edhe ne. E thotë si për të treguar se nuk mund të ndodhë asgjë tjetër më e rëndë, që muret e asaj shtëpie të mos e mbanin.
"Tani e kam radhën unë..."
"Tani e kam radhën unë...Po të vdesësh të dielën është mirë, se ringjallesh të hënën..." Pas këtyre copëzave bisedë të Genit janë kapur të gjithë ata që hyjnë e dalin në shtëpinë e Tarajve.Pas këtyre fjalëve kapen dhe mbahen lotët, që prej tre ditësh nuk ndalen në këtë shtëpi. Kur dikush vdes nga një sëmundje, njerëzit ia faturojnë atë natyrës a kujt të munden, por kur një 16-vjeçarvret veten, ai lë pas të pashpjegueshmen, pyetjen që nuk merr asnjëherë përgjigje, para së cilës mbeten memecë burrat me mjekër të mbështetur në gjoks, që i lëshojnë vendin njëri -tjetrin në konakun që nuk mbetet asnjëherë bosh. Ekur të gjithë kanë filluar të gërmojnë për të gjetur pse-të, kanë mësuar se Marigleni, para pak kohësh kishte filluar të frekuentonte sektin e "Dëshmitarëve të Jehovait". Zyberi, xhaxhai që qëndron në krye të dhomës së pritjes, na thotë se ditë më parë, Genin e kanë parë të zbresë nga një furgon i "Dëshmitarëve të Jehovait". "Djali shkonte atje, ka pasur dhe libra nga ato që i shpërndajnë shtëpi më shtëpi",- thotë Zyberi, duke u përpjekur të jetë i qetë, megjithëse zëri i dridhet dhe herë-herë duhet të ndalet për të shfryrë me një "uf", si për të nxjerrë gjithë dufin. Zyberit i kanë treguar se ata predikonin që po të vetëvriteshe të dielën, do të ringjalleshe në parajsë të hënën. "Nuk e di çfarë është kjo fe kështu,"- thotë ai, duke mbledhur supet. Shokët e 16-vjeçarit i kanë treguar që para një apo dy ditësh, para se të vetëvarej ai kishte thënë se i kishte "ardhur radha". Të afërmit e lidhin këtë me faktin se adoleshenti kishte humbur brenda vitit dy shokë të ngushtë. Njëri ishte mbytur në verë në lumë, ndërsa tjetri ishte një nga viktimat e aksidentit të fillim marsit në Bërzhitë. "E kanë gjetur ashtu të dobët dhe ia kanë marrë mendjen djalit",- thotë ai gjithmonë duke pasur në mendje sektin e "Dëshmitarëve të Jehovait"."Ata vijnë shtëpi më shtëpi dhe sjellin libra, por ne nuk i pranojmë dhe ata gënjejnë fëmijët. Kemi një mësues në shkollë me ta dhe u flet fëmijëve për ringjalljen a çfarë janë këto," -kështu futet në bisedë pa e pyetur kush një meso- burrë që thotë se edhe vetë është mësues. Se vajza e një të afërmi të tij, kishte shkuar një ditë në shtëpi duke folur për vdekjen dhe ringjalljen dhe kishte treguar se këtë ia kishte thënë mësuesi në shkollë, i cili i kishte dhënë edhe libra. "E kemi ngritur problem," -thotë ai, por deri tani nuk është marrë asnjë masë.
Frika prej dëshmitarëve...
Rruga për në Mushqetë është e njëjtë me atë që të çon nëElbasan dhe para se të arrish atje, duhet të kalosh në Bërzhitë e Ibë. Këtu ku ndalemi për të pyetur për herë të parë, për vendin ku ka ndodhur vetëvrasja, një grua me një buzëqeshje të hidhur thotë: "Dëshmitarë të Jehovait" jeni ju." Dhe pasi është sqaruar: "Jo se ju pamë me çantë të zezë dhe menduam..." Pastaj ndërsa ne kemi vendosur të heqim qafe çantën e zezë, arrijmë të kuptojmë se të gjithë të huajt shihen në këtë zonë me të njëjtin sy. "Jemi bërë me hije",- thotë një burrë, që e gjejmë në shtëpinë e Tarajve. "Tani ose shteti duhet t'i ndalojë këto, ose ne nuk duhet t'i lëmë më fëmijët të dalin nga shtëpia",- vazhdon ai, ndërsa buza i dridhet prej ndonjë tiku nervor. "Ata na e morën djalin,"-shton një grua e moshuar që na afrohet thuajse me vrap, pasi na ka parë prej së largu. Ajo i mallkon nëpër dhëmbë dhe ikën andej nga rrinë gratë.Të tjerë njerëz që takojmë prej rrugës nga Tirana në Mushqetë, shfaqin të njëjtin panik prej atyre që shpërndajnë libra nëpër dyer dhe ndërsa e ngatërrojnë emrin "Jehova" (një nga emrat e Zotit në hebraisht) me Havai (ishull në Amerikë), kërcënojnë se do t'i largojnë prej zonës së tyre. Vetëm fakti që një adoleshent me probleme i kishte frekuentuar e më pas kishte vrarë veten, është i mjaftueshëm për të nxitur zemërimin e këtyre njerëzve, që nuk dinë sesi ta shpjegojnë vetëvrasjen e një fëmije, në mos me faktin se para se të kryente aktin, ndodhej në një makinë me njerëzit e sektit të "Dëshmitarëve të Jehovait"...Në 30 minuta në shtëpinë prej guri të Sali Tarjas ne mësuam gjithë sa mund të mësonim, prej asaj që kishte ndodhur. Gjysma e orës që i mjaftoi Marenglenit 16 -vjeç t'i jepte fund jetës, sigurisht nuk është e mjaftueshme që të tjerët të shpjegojnë të pashpjegueshmen. Ndërsa dalim, ne na fiksohet në mendje djali që buzëqesh prej fotografisë dhe pamja e pemës së prerë ku ai vrau veten, të dielën në darkë, ndërsa ishte bërë gati që të nesërmen të shkonte në shkollë.
Akuza e xhaxhait të 16-vjeçarit për predikuesit e sektit "Dëshmitarët e Jehovait"
Zyber Tarja: 99 për qind, ata e shtynë të vetëvritej
Ju dini ndonjë arsye se përse u vetëvra nipi?
Po ku dihen këto gjëra tani. Ai që i dinte, i mori me vete. Por djali shkonte me këta të "Jehovait" dhe atë ditë e kanë parë të vinte me ta nga Krraba. Ai kishte humbur më parë dy shokë dhe këta thonë që kishte thënë diku se tani ishte radha e tij.
Keni dyshuar se mund të ndodhte një gjë e tillë?
Jo, ai atë ditë ishte mirë. Nuk kishte shfaqur asnjë problem. Shkoi në Krrabë dhe u kthye. Bëri çantën gati, u la, u pastrua, u bë gati për shkollë dhe doli. I ati që doli ta kërkonte se ishte darkë dhe se dinte ku ishte, e gjeti të varur në një pemë aty poshtë.
Keni ndonjë arsye të dyshoni se ka të bëjë me dëshmitarët e "Jehovait"?
Ne prova nuk kemi. Nuk është se i dëgjuam vetë apo i pamë. Por e dimë që atë ditë ishte me ta në makinë dhe na thanë që ata predikojnë ringjalljen. Pastaj djali tani e bëri këtë, kur kishte disa ditë që shkonte tek ta e merrte libra e gjëra.
Ka lënë ndonjë fjalë djali, para se të vetëvritej?
Asgjë nuk ka lënë. Vetëm seç i ka thënë një shoku që kishte mësuar se po të vdiste të dielën, do të ringjallej të hënën, prandaj edhe unë them që ata e kanë bërë. 99 për qind për ne ata e kanë shtyrë të vetëvritej.
REAGIMI
"Dëshmitarja e Jehovait": Ne nuk predikojmë vdekjen
Avdije Allkurtin e njohin të gjithë në vendin e quajtur "Kafja e Xhafës", edhe pse banakierja e një lokali aty pranë na thotë se askush nuk hyn e del në shtëpi të tyre. Avdija është pjesëtare e "Dëshmitarëve të Jehovait" , që e kanë qendrën në këtë zonë, na pret në shtëpi e sjellshme dhe përpiqet të na sqarojë atë që ajo e quan të vërtetë. Së bashku me djalin i cili nuk pranoi të na e thotë emrin, Avdija tregon se ata predikojnë jetën dhe jo vdekjen, ndërsa mohon të kenë njohur djalin që kishte vrarë veten pak ditë më parë. "Nuk e kemi parë fare",- thotë ajo. Por i biri, që vjen disa minuta më vonë dhe që nuk e ka dëgjuar këtë fjali, na thotë se: "ai vinte ndonjëherë, po kishte pak kohë". Ndërsa më pas pohon se as që e njihte adoleshentin dhe se nuk e kishte pasur në makinë, edhe pse siç thotë ndonjëherë merrte rrugës edhe pasagjerë. Para se të ikim, Avdija përmend një "Allah, Allah", ndoshta për forcë zakoni, por që tingëllon krejt çuditshëm në gojën e saj prej besimtareje të "Jehovait", e cila para se të ndahet thotë se: "këto ishin shenjat e fundit të botës". Ndërsa akuzat i shpjegon me sulmin që do u bëhej dëshmitarëve, në ditët e fundit.
Kush janë "Dëshmitarët e Jehovait"
Jehova apo JHËH, në hebraisht është një nga emrat e Zotit, për hebrejtë dhe të krishterët dhe në shqip do të përkthehej si shpëtimtari. Por në shkrimin e mësipërm "Jehova" është përdorur për të shënuar sektin "Dëshmitarët e Jehovait". Sektiështë krijuar nga mesi i shekullit të 19 dhe nuk ka lidhje me krishterimin edhe pse propagandon biblën (në disa variante të tjera). Bibla e tyre për të krishterët quhet e deformuar. Numri i ndjekësve të tyre në të gjithë botën është rreth 6.7 milion (sipas statistikave që ata pohojnë). Emrin që kanë sot e morën nën presidencën e Zhozef Franklin Rutherford, ndërsa si themelues i tyre njihetÇarles Taze Rusell.
Sipas wikipedia.org
Rastet në 2005
12 shkurt
Alda Cena, nxënëse në klasën e pestë në qytetin e Fierit u gjet e vetëvarur në tualetin e shtëpisë. Fillimisht u fol se vajza e mitur kishte përqafuar "Dëshmitarët e Jehovait" dhe kjo u bazua në disa fletushka që policia gjeti në shtëpinë e viktimës. Ky version i policisë u hodh poshtë që në fillim nga të afërmit e viktimës. Edhe versioni zyrtar e përjashtoi një gjë të tillë. I ati i Aldës, e lidhi këtë akt me një premtim që i kishte bërë së bijës për ta çuar në Llogara ditën kur dhe ndodhi ngjarja, por planet ndryshuan dhe vajza nuk mund të shkonte në pikën turistike për të luajtur me dëborë.
17 shkurt
Vetëm pesë ditë pas vetëvrasjes së Aldës, vetëvaret bashkëmoshatarja e saj nga Tirana, Joana Rajdho, me prindër të divorcuar. Joana u gjet e vetëvarur nga gjyshërit e saj (nga nëna) në banjën e shtëpisë. Fillimisht, si shkak i vetëvrasjes u cilësua një notë katër, që ajo kishte marrë në lëndën e matematikës, por më pas dhe problemet familjare. Por shokët dhe shoqet e Joanës deklaruan të kundërtën. Ata thanë se vajza e vetëvrarë ishte "Dëshmitare e Jehovait". Dëshmitë e bashkëmoshatarëve të viktimës janë hedhur poshtë nga nëna e Joanës.
20 shkurt
Vetëvaret në kasollen e bagëtive 13-vjeçarja Eriola Elezi, nga fshati malor i Velçanit në Mokrën e Sipërme në Pogradec. Sipas hetimeve të policisë, vajza nuk kishte asnjë arsye familjare që t'i jepte fund jetës. Ndërsa policia nisi hetimet intensive për zbardhjen e motiveve të kësaj ngjarjeje, kryetari i komunës, Ramazan Rapçe, deklaroi se viktima prej 3 muajsh frekuetonte një shoqatë fetare nga Gjermania. Ata çdo të premte kryenin predikime fetare dhe 13-vjeçarja Eriola Elezi që në fillim ka qënë frekuentuese e rregullt e kësaj shoqate fetare.
27 prill
Vetëvaret 13-vjeçari Viron Dhani. Adoleshenti nga fshati Ndërmënas i rrethit të Fierit u gjet i vetëvarur me citate të broshurave të Jehovait. Sipas familjarëve, prej një viti, Vironi vuante nga epilepsia. Ende nuk janë saktësuar rrethanat e kësaj vetëvrasjeje, por burime të policisë që shkuan në vendngjarje thanë se adoleshentit iu gjetën në xhep citate të sektit "Dëshmitarët e Jehovait". Vironi ishte djalë i vetëm i familjes. Ai ka lënë pas një motër, një vit më të vogël. Ai ishte nxënës në klasën e shtatë dhe siç treguan mësuesit dhe shokët e tij, ai ishte një nxënës me rezultate të mira.
1 maj
Athina Nunka, 13 vjeç, nga fshati Dishnicë i rrethit të Korçës u gjet e helmuar. Ngjarja ndodhi në ditën e Pashkës, dhe sipas policisë adoleshentja ishte vetëhelmuar. Por një gjë e tillë nuk u pranua kurrsesi nga prindërit e saj. Sipas të afërmve, prindërit dhe motrat e Athinasë ishin në kishë kur ndodhi ngjarja. Viktima donte të shkonte me ta në kishë, por prindërit i kanë thënë se dikush duhet të qëndronte në shtëpi. Familjarët thanë se kishin gjetur në shtëpi karamele të dyshimta, që sipas tyre duhej t'i kishte sjellë dikush.
shekulli.com.al
Krijoni Kontakt