Ekzekutohet me silenciator biznesmeni

[no name]

Vrasje mafioze në Tiranë në orët e mbrëmjes. Qëllohet me 2 plumba pas koke Agim Reçi, administratori i një bingoje


Ekzekutohet me silenciator administratori i një bingoje në Tiranë. Agim Reçi, 45 vjeç, është vrarë mbrëmë nga persona të paidentifikuar, teksa po kthehej në banesën e tij, afër Fakultetit të Histori-Filologjisë, në Rrugën e Elbasanit. Pavarësisht se ende nuk ka autor të identifikuar të këtij ekzekutimi, policia ka ngritur dy pista hetimi. Burimet nga Drejtoria e Policisë së Tiranës bënë të ditur se, rreth orës 19:00 të mbrëmjes, janë njoftuar se një person ishte gjetur i vrarë në afërsi të lokalit "Lion Park", përballë Fakultetit të Histori-Filologjisë. Menjëherë në vendin e ngjarjes kanë shkuar forcat e Komisariatit nr. 1 dhe më pas edhe gjithë krerët e policisë kryeqytetase. Brenda pak minutash, grupi hetimor ka mundur të identifikojë viktimën e gjetur nga një banor i zonës. Sipas policisë, i identifikuari Agim Reçi ishte gjetur nga një qytetar, i cili më pas ka njoftuar një efektiv të policisë rrugore, që ndodhej në Rrugën e Elbasanit. Më pas, efektivi rrugor ka dhënë njoftimin në sallën operative. Sipas të dhënave nga grupi hetimor, Agim Reçi, 45 vjeç, lindur në Dibër dhe banues në Tiranë, ishte ekzekutuar me dy plumba pas koke. "Ai është ekzekutuar me një pistoletë me silenciator, ku autori ka përfituar edhe nga errësira në vendin e ngjarjes. Në vendin e ngjarjes, policia ka nisur menjëherë punën për sigurimin e provave, ku për një kohë të gjatë janë munduar të gjejnë armën e krimit. Nga ana tjetër, grupi hetimor ka ngritur dyshimet se autorët e ngjarjes, të cilët mendohet se janë më shumë se dy vetë, të jenë larguar me motorë. Kështu, policia ka ngritur një sërë postblloqesh në disa pika kyçe të rrugëve të Tiranës. Rreth 40 minuta pas vrasjes së ndodhur, policia e ka dërguar viktimën në morgun e Tiranës, ndërkohë që grupi hetimor ka shoqëruar familjarët e tij.

Gjithashtu, në lidhje me këtë ngjarje, forcat policore kanë shoqëruar edhe disa të dyshuar, pavarësisht se nuk është marr ndonjë masë arresti ndaj tyre. Burimet nga policia kryeqytetase bënë të ditur se për këtë vrasje janë ngritur dy pista hetimi. Uniformat blu shpjeguan se njëra pistë ka të bëjë me aktivitetin e tij si pronar i "Klevi Bingo", në Peshkopi, ndërkohë që nuk përjashtohen edhe dyshime të tjera. Agim Reçi është kushëriri i Flamur Reçit, i cili edhe ky njihet si biznesmen në Tiranë, i cili ka qenë pronari i të njohurës "Ylli Bingo". Madje, ky i fundit është akuzuar nga drejtësia shqiptare për gjobëvënie të një biznesmeni maqedonas. Ndërkohë, viktima është vëllai i Luftar Reçit, person me precedent penal. Policia mendon se Reçi mund të jetë ekzekutuar edhe për konfliktet e vëllait të tij. Agim Reçi, i cili njihej si një biznesmen, më parë ka punuar si mësues fizkulture në Peshkopi, ndërkohë që pas lulëzimit të "Ylli Bingo" në Tiranë, ai hapi një bingo të tij. Ndërkohë, ai është babai i një djali dhe dy vajzave. Policia e ka konsideruar vrasjen e mbrëmshme si një ndër krimet më të rënda që kanë ndodhur në tremujorin e parë të vitit 2007. Për këtë, policia ka ngritur një grup hetimor të kryesuar nga drejtuesit më të lartë të Drejtorisë së Policisë së Tiranës.

Administratori

Ai është ekzekutuar me një pistoletë me silenciator, ku autori ka përfituar edhe nga errësira. Në vendin e ngjarjes, policia ka nisur menjëherë punën për sigurimin e provave, ku për një kohë të gjatë janë munduar të gjejnë armën e krimit.

Gazeta Shqip