Sot ne Shqiperi

[DYDRINAS]

Sot ne Shqiperi


Desheroj te hap kete teme me synimi qe permes lajmeve te marra nga burime te ndryshme te tregohet flash se cfare ndodh cdo dite ne Shqiperi, por pa koment.



Kryeministri përuron rrugën e re Qafa e Kasharit-Rinas, që lidh autostradën Tiranë-Durrës me aeroportin “Nënë Tereza”


16/3/2007

Sot paradite, Kryeministri Berisha mori pjesë në përurimin e rrugës së re hyrëse Qafa e Kasharit-Rinas, që lidh autostradën Tiranë-Durrës me aeroportin “Nënë Tereza”. Rruga e re, një nga investimet e rëndësishme koncesionare me vlerë 6.366 milion euro, me gjatësi 6.5 kilometra, gjerësi 7.5 metra, shkurton ndjeshëm distancën, me rreth 8 kilometra dhe lehtëson lëvizjen në drejtim të aeroportit “Nënë Tereza”. Shpronësimet janë mbuluar nga fonde të qeverisë me vlerë rreth 1.5 milion euro. Pjesë e këtij investimi janë edhe mbikalimi në autostradën Tiranë-Durrës, një urë mbi linjën hekurudhore Tiranë-Durrës, si dhe një urë e re mbi lumin Tirana.

Në ceremoninë e përurimit ishin të pranishëm edhe Ministri i Punëve Publike, Transportit dhe Telekomunikacionit Lulzim Basha dhe përfaqësues të Tirana Airport Partners.

Kryeministri përgëzoi përfaqësuesit e Tirana Airport Partners për përkushtimin, eficencën dhe kompletimin e kësaj vepre të rëndësishme për vendin. “Sot inagurojmë rrugën dhe në pak ditë aeroportin, vepra këto të një rëndësie të madhe infrastrukture për vendin. Rruga që inagurojmë sot është e shkurtër, por e një rëndësie cilësore të veçantë, sepse së bashku me aeroportin i jep dinjitet më të madh dhe paraqitje më të mirë vendit për të gjithë ata që vizitojnë Shqipërinë. Rruga shkurton distancën duke kursyer kohë, si gjëja më të çmuar”, u shpreh Kryeministri.

Duke përgëzuar kompaninë e ndërtimit të kësaj rruge për punën e bërë, Kryeministri shprehu kënaqësinë që aeroporti dhe rruga ndërtohen nga dy kompani shqiptare, të cilat kanë treguar aftësi, teknicitetet dhe kanë përmbushur detyrimet kontraktuale me kompaninë e huaj që menaxhon aeroportin, duke e ndërtuar rrugën në një kohë më të shkurtër se parashikimi. “Rruga dhe aeroporti, - theksoi Kryeministri, - janë shembull i shkëlqyer i partneritetit publik privat. Ato dëshmojnë se realisht në këtë partneritet qëndron edhe leva e Arkimedit për ekonominë shqiptare dhe për zhvillimin e vendit".

Duke falënderuar të gjithë ata që financuan këto projekte, Kryeministri siguroi investitorët se Shqipëria është e vendosur të nxisë çdo ditë e më shumë partneritetin publik privat, si një ndër mekanizmat kryesor të ndërtimit të veprave të rëndësishme dhe shpejtimit të zhvillimit të vendit.

Departamenti i Informacionit i Kryeministrise

[leci]

17-03-2007



TIRANË- Është zhvilluar dje ceremonia e përcjelljes së kontingjentit të ri të Trupave Komando, që do të marrin pjesë në misionin e NATO-s në Irak. Kompania e trupave komando, njësitë elitë të Ushtrisë Shqiptare, do të vendosen ashtu si dhe kontingjentet e tjera në Veri të Irakut, në qytetin e dytë më të madh të tij, Mosul. Ata do të jenë në përbërje të një brigade shumëkombëshe të drejtuar nga Shtetet e Bashkuara.

Kompania shqiptare është e kompletuar me të gjitha materialet teknike, pajisje dhe armatime që i përgjigjen nevojave të misionit dhe vetëm një pjesë e mbështetjes logjistike realizohet nga forcat amerikane. Trupat Komando Shqiptare janë të angazhuara në ruajtjen e Aeroportit të Mosulit, patrullime në qytete, shoqërimin e autokolonave ushtarake apo civile, e deri në shpërndarjen e ndihmave të ndryshme për popullsinë e atjeshme.

Që prej vitit 2003, Ushtria Shqiptare iu bashkua koalicionit ndërkombëtar në Irak të drejtuar nga Shtetet e Bashkuara. Trupat e saj veprojnë në misione paqeruajtëse dhe në Bosnje e Afganistan, ndërsa pas pak muajsh pritet që një njësi tjetër të marrë pjesë edhe në Liban, nën komandën italiane.

[Brari]

Dydrins.. nji shkrim te Meros per komisioneret dhe prokuroret a ma sjell ktu te lutem nga Tema?


korrieri..


Banda politike dhe parti politike
E Shtune, 17 Mars 2007
Nga Fatos Lubonja

"Shikoni hajnat e qytetit të Prishtinës, atyre që iu është dhënë gjithçka për të ndërtuar dhe kanë pasur në dorë të bëjnë. E çfarë i kanë bërë qytetit? Shikoni spitalin dhe arsimin, dhe e shihni çfarë kemi bërë. Ky vend është plot me hajna, banditë dhe të pazot për të formuar shtetin".

Duke lexuar këto radhë të shkrimit të Baton Haxhisë "Fondet", botuar në “Tema” para disa ditësh, nuk mund të mos bëja paralelizmin e Kosovës me Shqipërinë dhe klasën politike të saj, e të shtroja pyetjen që jo rrallë e shtrojmë: Ku duhet t'i kërkojmë ne shqiptarët shkaqet e paaftësisë për të krijuar një shtet të tillë, që të mos e shikojmë atë thjesht dhe vetëm si një instrument për të dhunuar e vjedhur bashkëqytetarët tanë? Çfarë e bën të veçantë rastin shqiptar në tërë shtetet e Evropës për sa i përket kësaj paaftësie? Sepse të gjithë e dimë, se edhe në një shtet si Serbia, që gjatë viteve ‘90 pati tërë ato luftëra e ato trazira të brendshme, megjithatë funksionoi shumë herë më mirë si administratë shtetërore, sesa tek ne që ishim në paqe. Mjafton të kujtojmë se vetëm tri orë i ikën dritat Beogradit para disa vjetësh, dhe ministri i Energjetikës dha dorëheqjen. Mos vallë pasi të ikin ndërkombëtarët, të cilët Haxhia i sheh sot për sot të domosdoshëm pikërisht për t'i shpëtuar shqiptarët nga shqiptarët me parti politike, njerëzit e thjeshtë të Kosovës (d.m.th ata që nuk pasurohen nëpërmjet politikës) do të fillojnë të qajnë kohën kur ishin pjesë e Jugosllavisë?

Por le të mos keqkuptohemi. Me këtë shkrim nuk po dua t'i hyj analizës së shkaqeve historike, kulturore e me radhë, që shpjegojnë paaftësinë tonë për të ndërtuar shtetin apo vonesën tonë në ndërtimin e shtetit (kjo temë, në fakt, mund të kërkonte një konferencë më vete mbarëkombëtare). As t'i jap përgjigje, në këtë kontekst, ndonjërit që do të më thotë se edhe Perëndimi nuk duhet idealizuar, sepse edhe atje gjen Berluskonin apo edhe Bushin që e përdorin politikën për interesa të cilat janë kundër interesave të mbarë vendit. Thjesht këto që thashë më lart, i bëra si hyrje për një koment të shkurtër për qeverinë e re.

Sali Berisha ndryshoi katër ministra. Shkarkoi edhe drejtorin e KESH-it, duke e zëvendësuar me një tjetër. Këto, si dhe disa shkarkime në zona humbëse, (së fundi po flitet edhe për ristrukturim në PD) qenë shenja e jashtme që na dha PD-ja, të reflektimit për rezultatin e dobët në zgjedhjet lokale. Nuk dua të hyj fare në meritat apo jo të atyre që ikën apo të atyre që vijnë. Por nuk mund të mos bëj konstatimin se këto ndryshime e në përgjithësi mënyra e reagimit të PD-së pas 18 shkurtit, nuk mjaftojnë për të na bindur se vërtet ka pasur një reflektim për humbjen e zgjedhjeve në qytetet kryesore dhe një shqetësim serioz sesi të rikuperohet kjo për të na ngjallur shpresën se tani punët do të shkojnë ndryshe dhe më mirë.

Po çfarë do të kuptonim me një reflektim serioz? Disa thonë se shenjë reflektimi serioz do të duhet të ishte dorëheqja e Sali Berishës, sepse, tek e fundit, qeveria e parë ishte fortësisht nën shenjën e tij dhe kjo e dyta, po ashtu do të mbetet. Por, sipas meje, problemi i reflektimit nuk ka të bëjë thjesht me dorëheqjen e Berishës apo të dikujt tjetër. Problemi ka të bëjë me pyetjen bazë që ngrihet edhe në Prishtinë, ku nuk është Saliu kryeministër: Si t'ia bëjmë që nga parti banda të krijojmë parti politike? Kjo është çështja. Kush ngulmon vetëm e vetëm tek dorëheqja e Berishës, thjesht nuk bën tjetër, veçse i shërben bandës rivale. Problemi pra është të kthehemi tek premtimi kryesor që na dha Berisha në vitin 2005, se do të krijonte shtetin që do t'i shërbente qytetarit, si kundërvënie ndaj shtetit që e kishte vjedhur atë. Kuptohet se të gjithë ishim e mbetemi të vetëdijshëm, se kjo nuk mund të kryhej sa hap e mbyll sytë, por se disa shenja inkurajuese të vullnetit të mirë në këtë drejtim duhet të jepeshin, por mbi të gjitha të mos jepeshin shenjat e vazhdimësisë së metodave socialiste. Nuk mund të thuhet se kjo është një qeveri më e korruptuar se ajo socialiste, as se ka ministra më të korruptuar, të paktën duke i matur me nivelin e korrupsionit që arritën ata në kohën kur humbën. Por, nga ana tjetër, nuk mund të thuash kurrsesi, se kjo u shndërrua në një qeveri të shërbimit. Po përse? E këtu duhet të fillonte reflektimi serioz i PD-së: pse nuk mundën dot të japin shenjat inkurajuese se po ndërtojnë një qeveri të shërbimit. E ky reflektimi nuk mund të mos na çojë tek konstatimi se në thelbin e vet, kjo qeveri dhe administrata poshtë saj mbeti me filozofinë e vjetër të përdorimit të pushtetit politik si mjet për shpërblimin dhe vetëshpërblimin e atyre që luftojnë për marrjen e pushtetit. Mbeti me filozofinë, se të mitë mund të bëjnë çfarë të duan pa u hyrë gjemb në këmbë. Mbeti pra, tek partia bandë. Dhe kjo tendencë në përshkallëzim e PD-së u vu re fort mirë nga qytetarët. Në shumë dikastere do të dëgjosh, kur flitet për njërin apo tjetrin të emëruar, se janë njerëz të Saliut apo njerëz të Jozefinës që rregullojnë punët e të vetëve me ligj dhe pa ligj, rrallë do të dëgjosh për njerëz të aftë që mbesin apo që emërohen në vende kyçe, aq më rrallë për njerëz të ndershëm që respektojnë vetëm ligjin. Dhe kjo nuk është pa lidhje edhe me qeverisjet paraardhëse. Ka ministra që japin një argument jo pavend mbi zëvendësimet në administratën e tyre. Ata thonë se u duhet të venë atje njerëzit e tyre, sepse socialistë që ishin më parë, nuk janë të motivuar të punojnë, pasi janë të lidhur me padronët e vjetër. Por e keqja më e madhe qëndron në faktin se, shkaku i demotivimit vjen ngase ata merrnin atje një rrogë të vogël, kurse fitimet e mëdha i nxirrnin me të tjera "burime", nëpërmjet lidhjes me ministrin. Pra, ata ishin aty jo pse qenë më të aftë, por pse ishin të besuar të ministrit, apo pse ishin besnikë të partisë. Atëherë ministri me të drejtë vendos njerëzit e tij që janë më të motivuar, por, nga ana tjetër, askush nuk na garanton se nuk i ka vënë atje, pasi kështu ndërton grupin e tij të vjedhjes apo të shpërblimit për militantë që luftojnë për votën. Dhe nuk mund të mos të të lindë ky dyshim, kur sheh se përzgjedhja bëhet edhe duke përjashtuar të aftë, kur sheh se ata që kërkojnë të zbatohet vetëm ligji, duken të bezdisshëm që duhen hequr qafe, kur vëren se si, pasi merret pushteti, humbet nevoja për të respektuar e dëgjuar ndokënd që ka ndonjë ide, pasi, në fakt, edhe më parë ai nuk është çmuar për idetë që ka shprehur, por pse mendohej se ishte kundër bandës rivale. Tek e fundit, kur sheh se gjithçka fillon e reduktohet tek rivaliteti se kush po përfiton më shumë. Po t'i shtojmë kësaj edhe ndjenjën e pasigurisë së madhe që kanë një pjesë se do të qëndrojnë në pushtet, çka nënkupton edhe ankthin për të marrë e gllabëruar sa më shumë në minimumin e mundshëm të kohës, gjendja vjen e degjenerohet edhe më tej. Frenimi i këtij degjenerimi më duket se është puna e parë e reflektimit që do të duhet të bënte PD-ja e që nuk më duket se e ka bërë.

Sillu nga sillu dhe zbulojmë se jemi po te filozofia e besnikëve të partisë të kohës së Enver Hoxhës, veçse tani të ndarë në dy parti-banda dhe përsëri tek pyetja e fillimit: Si mund të dalim nga gracka ku na kanë futur ato? Është e trishtueshme, por paradoksalisht, përgjigja më realiste është se prej kësaj gracke do të mund të dalim veçse nëpërmjet kompeticionit të këtyre dy bandave politike, drejt asaj se cila do të mund të kthehet më shpejt dhe më mirë në parti politike. Sigurisht ky kompeticion nënkupton mbi të gjitha presionin e votuesit për të dalë nga gracka, nënkupton, prandaj, edhe votën e lirë si kusht të domosdoshëm. Por ai nënkupton edhe reflektimin serioz të palëve, për faktin se në këtë grackë ndodhemi të gjithë, edhe ata që pandehin se janë jashtë saj, pasi janë të privilegjuar nga pushteti politik që kanë. Ai nënkupton po ashtu edhe frikën e ballafaqimit me votën e lirë të ardhshme, por edhe një frikë edhe më të madhe: atë të dënimit nga historia. Fatkeqësisht, deri tani shenjat e këtij reflektimi janë në nivelet më të ulëta, aq sa mund të shtrohet pyetja që na fut në rreth vicioz, si këtej edhe andej kufirit, në Kosovë, por edhe Maqedoni: A mund të pritet nga bandat politike që të kthehen në parti politike?



korrieri

[DYDRINAS]

Kryeministri Berisha përshëndet dekretin e Presidentit Bush për mbështetjen e Shqipërisë drejt NATO-s dhe marrëveshjen me KE-në për liberalizimin e vizave


11/4/2007
Kryeministri Berisha ia kushtoi hapjen e mbledhjes së sotme të Këshillit të Ministrave dy zhvillimeve të rëndësishme për Shqipërinë: firmosjen nga Presidenti i SHBA-ve George W Bush të ligjit, të miratuar nga Kongresi amerikan, për mbështetjen e Shqipërinë në përpjekjet e saj për anëtarësim në NATO, si dhe parafimin e marrëveshjes ndërmjet qeverisë shqiptare dhe Komisionit Evropian për liberalizimin e vizave.

Duke përshëndetur këto dy ngjarje të rëndësishme, Kryeministri shprehu mirënjohjen për Presidentin Bush dhe Kongresin e SHBA-ve, Bashkimin Evropian dhe vendet e tij anëtare për mbështetjen që vazhdojnë t’i japin Shqipërisë në rrugën e saj të progresit dhe integrimit. Këto dy zhvillime shumë pozitive, - vlerësoi Kryeministri, - vijnë si rezultat i vlerësimit nga qeveria e SHBA-ve dhe nga Komisioni Evropian të reformave të suksesshme të ndërmarra nga qeveria shqiptare gjatë kësaj periudhe. Kryeministri siguroi se qeveria është e përkushtuar të bëjë çdo përpjekje për të përmbushur standardet e domosdoshme në proceset e integrimit dhe është e vendosur të vazhdojë në rrugën e saj të reformave.

Më tej, duke folur për këto dy evenimente, Kryeministri bëri këto vlerësime:

“Dje ka pasur dy evenimente shumë të rëndësishme. Presidenti Bush ka firmosur ligjin, me të cilin qeveria e SHBA-ve autorizohet të ndihmojë edhe financiarisht Shqipërinë, Kroacinë, Maqedoninë, Gjeorgjinë dhe Ukrainën në përpjekjet e tyre për anëtarësim në NATO. Kjo nismë e Kongresit të SHBA-vë dhe senatorit Lugar, pas vizitës së tij të suksesshme në Shqipëri, u kurorëzua dje me firmën e Presidentit dhe kjo përbën një inkurajim shumë të madhe në përpjekjet tona për të arritur standardet dhe plotësuar kriteret e domosdoshme për të merituar ftesën në samitin e Bukureshtit, që do të jetë edhe samiti në të cilin do të vendoset zgjerimi i Aleancës së Atlantikut të Veriut.

Në emër të qeverisë dua të shpreh falënderimin dhe mirënjohjen për Presidentin Bush, qeverinë e SHBA-ve, senatorin Lugar dhe Kongresin e SHBA-ve për këtë ligj shumë të rëndësishëm për Shqipërisë dhe t’i siguroj se do të bëjmë çdo përpjekje për të përmbushur kriteret dhe detyrimet që rrjedhin nga procesi i anëtarësimit në NATO. Dua t’ju informoj se vetëm pak ditë më parë kemi shqyrtuar, së bashku me ministrat dhe drejtuesit e agjencive respektive, të gjitha konkluzionet që delegacioni i lartë i NATO-s, i kryesuar nga asistenti i Sekretarit të Përgjithshëm të NATO-s, ka lënë në Shqipëri. Mund t’u them se janë marrë të gjitha masat që këto konkluzione dhe detyrime të shndërrohen në realitet, në mënyrë që të shkojmë sa më afër në procesin anëtarësimit.

Po dje në Bruksel midis përfaqësuesve tanë dhe Komisionit Evropian është parafuar marrëveshja e liberalizimit të vizave ndërmjet Shqipërisë dhe vendeve të Bashkimit Evropian, marrëveshje e cila do të firmoset së shpejti midis Shqipërisë dhe BE-së dhe do të ratifikohet më pas edhe nga Parlamenti Evropian. Kjo marrëveshje përbën një hap shumë të rëndësishëm në procesin e integrimit të vendit, pasi një nga gjërat më të prekshme për qytetarët shqiptarë në këtë proces është lëvizja e lirë. Unë jam i bindur se shqiptarët e kanë të qartë se anëtarësimi i plotë për ta nuk do të thotë mirëqenie e plotë e menjëhershme, por ajo është rruga drejt mirëqenies. Një nga faktorët kryesorë që i bën ata më mbështetës për procesin e integrimit është lëvizja e lirë, për të cilën shqiptarët, për disa specifika, kanë më shumë nevojë sesa kombet e tjera. Marrëveshja ofron procedura të përshpejtuara në marrjen e vizave, një taksë të ndryshuar për vizat, reduktimin e dokumenteve që duhet të paraqiten, si dhe viza afatgjata me shumë hyrje dhe dalje. Ajo që është specifike dhe shumë pozitive është se marrëveshja përfshin të gjitha shtresat e shoqërisë shqiptare që nga familjarët që kanë fëmijët e tyre emigrantë, me banim të ligjshëm në vendet anëtare të BE-së, studentët që duan të studiojnë apo janë me studime në universitetet e këtyre vendeve, gazetarët që rendin pas një hapësire më të gjerë informative, biznesmenët të cilët janë në krye të përpjekjes së vendit për integrim. Rikujtoj se 70 për qind e shkëmbimeve tregtare të Shqipërisë zhvillohen me vendet e BE-së dhe kjo marrëveshje ju mundëson biznesmenëve shqiptarë të kryejnë më me lehtësi detyrimet e tyre. Marrëveshja përfshin organizatat jo qeveritare, punonjësit e administratës, botën akademike të vendit, është një nga marrëveshjet më të gjera që Komisioni nënshkruan në këtë stad me një vend. Gjithashtu ka edhe disa përpjekje pozitive nga disa vende anëtare në këtë drejtim.

Si dekretimi i ligjit të ndihmës financiare për qëllimet e progresit drejt anëtarësimit në NATO nga Presidenti Bush në Shtëpinë e Bardhë, ashtu edhe parafimi i marrëveshjes së liberalizimit të vizave midis Komisionit Evropian dhe qeverisë shqiptare përbëjnë dy zhvillime shumë pozitive, të cilat vijnë si rezultat i vlerësimit nga qeveria e SHBA-ve, nga Komisioni Evropian dhe vendet anëtare të reformave të suksesshme të ndërmarra nga qeveria shqiptare gjatë kësaj periudhe. Ndaj dhe ne mbetemi të përkushtuar dhe të vendosur si ditën e inaugurimit tonë, në shtator të vitit 2005, të procedojmë me reformat. Për ne, alfa dhe omega e veprimtarisë sonë kanë qenë, janë e do të mbeten reformat, të cilat në mënyrë të padiskutueshme, pavarësisht nga pakënaqësitë e përkohshme që krijojnë, pavarësisht edhe nga dhimbjet që krijojnë në grupe të caktuara apo nga kundërshtinë normale që zgjojnë në një shoqëri të lirë, kanë për rezultat final lehtësimin jo vetëm të pasojave imediate që sjellin, por një lehtësim të madh të të gjitha proceseve normale në shoqërinë shqiptare.

Duke shprehur edhe një herë mirënjohjen e thellë për Presidentin Bush për ligjin që dekretoi, për Komisionin Evropian për marrëveshjen që parafuan, vendet anëtare të tij, të vazhdojmë në këtë kurs të thellë reformash të cilat çdo ditë po japin ndryshime të rëndësishme. Dy ditë më parë, një statistikë që vjen nga një qendër prestigjioze në Londër, fakton se në vitin 2006 investimet direkte të huaja në Shqipëri u rritën me 130 dollarë për frymë nga vetëm mesatarisht 28 dollarë për frymë që ato kanë qenë në 2000-2004, një rritje rreth 3-4 herë më shumë. Natyrisht ne do të donim e do të përpiqemi që ato të jenë jo 130, por 1300, sepse ky vend ka uri të jashtëzakonshme për investime. Sot Ministri i Arsimit më informoi për një rritje të ndjeshme substanciale të nxënësve në shkollat e mesme. Ne vërtet liberalizuam universitetet, por për një komb e shoqëri treguesi parësor është përqindja e qytetarëve me shkollë të mesme. Politika e nisur për të inkurajuar në mënyra të ndryshme vazhdimin e shkollës së mesme nga nxënësit, zgjerimi i sektorit të arsimit profesional po jep fruta të ndjeshme, derisa të arrijmë në nivelet më të larta dhe unë jam shumë optimist me këtë. E ritheksoj se reformat janë të gjithanshme dhe do të vazhdojnë”.

Departamenti i Informacionit te Kryeministrit

[DYDRINAS]

Fondi prej 35 milionë USD akordohet nga Banka Islamike për Zhvillim për ndërtimin e aksit Kalimash-Rrexhepaj

U nënshkrua sot Memorandumi i Mirkuptimit për miratimin e kredisë prej 35 milionë dollarësh për financimin e segmentit Kalimash-Rrexhepaj, pjesë e korridorit Durrës-Kukës-Morinë, me pjesëmarrjen e përfaqësuesve të Bankës Islamike për Zhvillim dhe Ministrit të Punëve Publike, Transportit dhe Telekomunikacionit z.Lulzim Basha

Banka Islamike për Zhvillim i bashkangjitet partnerëve të tjerë ndërkombëtarë si Banka Botërore, Fondi Opec dhe bankat e tjera, të cilët së bashku me Qeverinë Shqiptare po financojnë ndërtimin e këtij korridori.

Kjo kredi siguron edhe financimin e fundit për segmentin e autostradës Durrës-Kukës-Morinë, Kalimash-Rrexhepaj

Kredia do të miratohet nga Bordi i Bankës në muajin Maj dhe më pas do të procedohet me prokurimin e kontraktorit dhe supervizorit. Punimet priten të fillojnë në fund të vitit 2007 ose fillim 2008 dhe do të përfundojnë në Maj të vitit 2009.

Kjo eshte kredia me e madhe që Banka Islamike jep per vendin tone

Segmenti rrugor Kalimash-Rrexhepaj me gjatësi 5.6 km do të jetë me katër korsi.

Financimi i kësaj rruge me rëndësi strategjike, ka qënë dhe mbetet prioritet i Qeverisë Shqiptare. Kjo e fundit pas negociatave të bëra ra dakort që kjo pjesë e mbetur e aksit Durrës-Kukës-Morinë të financohet nga Banka Islamike për Zhvillim.

Të dhëna teknike mbi rrugën:

70% e gjatësisë së këtij segmenti rrugor do të jetë ndërtimi i trupit të rrugës jashtë aksit ekzistues duke kaluar në shpatet shkëmborë të zonës

Parametrat teknikë të projektimit janë të standartit Italian CNR për rrugë me katër kalime të ndara mes tyre, të cilat mundësojnë vazhdimësinë e trafikut normalisht

Gjërësia e trupit të rrugës do të arrijë në 23 m. Trupi i rrugës do të përfshijë ndërtimin e dhjetë viadukteve për katër kalime me gjatësi totale prej 800 m dhe lartësi maksimale të kolonave deri në 48 m. Do të ndërtohen gjithashtu edhe 200 m linear ura dhe vepra arti të madhësive të ndryshme. Rruga do të ketë nënshtresa rrugore me trashësi 50 cm si dhe shtresa asfaltike me trashësi 20 cm.

Gjithashtu janë marrë masa për sigurinë rrugore duke përdorur të gjithë elementët bashkohor të sinjalistikës horizontale dhe vertikale në përputhje me standartin e projektimit.


Tirane 13 Prill 2007

Faqja zyrtare e MPPTT

[DYDRINAS]

Qeveria shqiptare ne mbledhjen e saj te sotme, vendosi qe te akordoje 2 miliarde leke, per tenderin e prodhimit dhe pajisjes se shtetasve shqiptare me karta identiteti me te dhena biometrike.

[Albo]

Per kete teme ne kemi hapur nje forum te tere te quajtur "Tema e Shtypit te Dites" ku mund te sillni lajmet KRYESORE te dites pasi jo cdo lajm neper gazetat shqiptare perben interes per anetaret e forumit.

Albo