Sa universitete na duhen?

[Cimo]

Tani për tani, kemi 26 institute të arsimit të lartë.

Këtyre mund tu shtohet së shpejti edhe Universiteti Myzeqeja(!) Kryeministri, në një nga mbledhjet e fundit të qeverisë u shpreh, ndër të tjera, se “premtuam Universitetin Myzeqeja dhe, zoti ministër i Arsimit, vitin që vjen ky universitet do të jetë realitet!”. Hollësi të mëtejshme, mbi këtë nismë të qeverisë, nuk di dhe nuk është asnjëherë mirë të kritikosh diçka menjëherë, por këtë herë, ama, do të bëj një përjashtim, sepse Universiteti Myzeqeja nuk është gjë tjetër, veçse vazhdimi i një inflacioni akademik, që u fillua në ethet e fushatës zgjedhore të 2005-s nga qeveria “Nano” dhe që u vazhdua më pas nga qeveria “Berisha”. Është një nismë, e cila vazhdon të nxjerrë në tregun e punës gjithnjë e më shumë njerëz të diplomuar, por që do të kenë në duar diploma të një cilësie të ulët, diploma që nesër apo pasnesër nuk do tu vlejnë për gjë. Sa universitete ka vendi ynë tani për tani? Hmmm, pyetje interesante! Gjithsej, universitete të përgjithshme kemi në Tiranë, në Shkodër, në Elbasan, në Korçë, në Vlorë, në Gjirokastër e në Durrës. Por, përveç këtyre, kemi edhe Politeknikun dhe Bujqësorin në Tiranë, së bashku me Akademinë e Arteve dhe atë të Edukimit Fizik, po në Tiranë. Gjithsej, kemi 11 institute publike të arsimit të lartë. Përveç këtyre, kemi gjithashtu edhe 15 institute private të mësimit të lartë, të cilat janë hapur vitet e fundit. D.m.th., gjithsej, publikë e privatë kemi 26 institute të arsimit të lartë. E këtyre 26-ve do tu shtojmë së shpejti, apo së largëti, edhe Universitetin Myzeqeja...

Këto universitete, njësoj si ligjërimi i pronësisë mbi tokën të të shpërngulurve nga zona të ndryshme të vendit, nuk janë gjë tjetër, veçse një përpjekje e qeverive tona për të fituar ca vota më tepër për zgjedhjet e ardhshme. Është qesharake që, në vend që të përqendrohen ato burime të pakta të shtetit në disa shkolla kryesore e ti lihet vend privatit, për të përmbushur nevojën e të tjerëve, shteti vazhdon të hapë institute të arsimit të lartë, sikur po hap kurse për luftimin e analfabetizmit. Jemi në vitin 2007, nuk mund të ecim më përpara me shkolla gjysmake!

Nga Llukan Tako

akullnaja thotë:

Shkurt 2007, 5:52 pm

Sa universitete i duhen Shqipërisë? Duke parë centrifugën që drejton popullin tonë, duke bërë edhe ca ekstrapolime mbi bazën e numrit të partive për kokë, them se i duhen dhe nja 30 000 copë, gjithmonë duke marrë parasysh se jo të tërë të lindurit do ti frekuentojnë universitetet. Është qesharake që, në vend që të përqendrohen ato burime të pakta të shtetit në disa shkolla kryesore e ti lihet vend privatit për të përmbushur nevojën e të tjerëve, shteti vazhdon të hapë institute të arsimit të lartë, sikur po hap kurse për luftimin e analfabetizmit.

Lawman thotë:

Shkurt 2007, 6:00 pm

Nuk vjen e keqja nga numri i universiteteve, Llukan. E keqja vjen nga kualiteti i edukimit! Shumica e këtyre bizneseve/universitete janë paçavure. E njëjta gjë, që është edhe në Amerikë. Ka nevojë për një sistem akreditimi apo unifikimi standardesh që, në bazë të situatës në Shqipëri, them se do të realizohet brenda mijëvjeçarit të tretë. Deri atëherë, le ti ziejnë e ti pinë lëngun, universiteteve, profesorëve dhe diplomave, së bashku, në një kazan. Ka ikur koha kur Partia vendoste për çdo gjë, me direktiva nga lart. Numrin e vendos tregu! Sa kohë që ka kërkesë për tu futur në universitete, e ka parë për të paguar dhe do të vazhdojnë të mbijnë si kërpudha.

blete thotë:

Shkurt 2007, 6:11 pm

Më i vlefshëm do të ishte një studim për tregun e punës për të diplomuarit e këtyre universiteteve dhe shkollave te larta.

Fakti që ka kaq shumë shkolla, tregon edhe interesin për shkollim, që është gjë shumë e mirë. Më tërë ato drama që ndodhën në shtator me pranimet nëpër fakultete, shyqyr që ka kaq shkolla private për të përmbushur nevojat. Ndryshe, rinia e mërzitur do ti drejtonte fuqitë e veta në drejtime të tjera.

Idris thotë:

Shkurt 2007, 6:43 pm

Mungon edhe një universitet, ai i “Mamurrasit”, për diploma të marrjes së pushtetit me “trima”. O, e shpëlaftë mortja! Për mendimin tim, edhe NJË ka qenë tepër, për një popull që dijet i ka “të trashëguara me tepricë”. Shiko sa dijetarë ka të trashëguar nga fusha e letërsisë sot, për të menduar se çfarë skarcitetesh do të nxjerrin “furriqet e pulave” të teorive universitare nesër.

Dhe, përsa i përket seriozitetit të problemit, kujtoni vetëm se shumë popuj janë historikisht në dekada prapa. Por, të ngjashëm me ne sot, mezi arrinin të mbanin me dinjitet vetëm një të tillë. Sepse, universitetet nuk mund të jenë produkt i “glasave’ të qeverisë apo të Ministrisë së Arsimit. Në një shtet, ku çdo gjë me vlerë bastardohet nga dijetarë të dalë nga shkolla e demokracisë, si teoria enveriane që ”komunizmin e mësuam në praktikë”. Përfytyroni se çfarë produktesh intelektuale do të dalin për të marrë fatet e Shqipërisë në dorë. Jo thjesht, tregu i punës, por edhe studime të superorganizuara nuk do të argumentonin dot se përse duhen kaq njerëz me arsim të lartë.

Ina thotë:

Shkurt 2007, 6:55 pm

Hahaha, këta nuk po kontrollojnë dot pedagogët, që po ua vjedhin notat studentëve për 10 mijë lekë, do të hapin universitet të ri? Më mirë ti investojnë ato lekë në universitet që kanë, në infrastrukturën, konviktet, sesa të ndërtojnë edhe një problem tjetër. Ehuuuuuuu, ça nuk dëgjon nga Berisha!

bonehead thotë:

Shkurt 2007, 7:00 pm

E vërteta është se nuk ka ndonjë ligj që ta kufizojë hapjen e universiteteve ose, më mirë, institucionet e edukimit të lartë. Problemi është se këto universitete ose, të paktën ato që janë për specializim në një fushë të veçantë, janë të gjitha të vendosura në kryeqytet. Përse duhet të jetë Universiteti i Bujqësisë në Tiranë? Shpërndaji universitetet në rrethe, bashki ose komuna. Fundi i fundit, ku mund të jenë më afër zonave, ku mund të ushtrohet edukimi i përfituar në klasa në formën e praktikës? Kjo po, që vërtet mund të jetë një shembull i parëndësishëm, pasi problemi qëndron te vetë studentët. Në këtë pikë mund të jem edhe gabim, se nuk e di se si mund të jenë marrëdhëniet midis studentëve dhe profesorëve, por kur studentët shqiptarë largohen nga Shqipëria për të studiuar jashtë, dhe përfundojnë të marrin diploma në Ekonomi, Biznes dhe, më e keqja, në Shkencat Politike atëherë... Jo se dua ti ul këto fusha, por universitet “e përgjithshme” mbahen gjallë vetëm nga këto. Dhe, në qoftë se nuk vlerësohen këto bursa nga shoqëria, edhe ne nuk mund ti fajësojmë studentet shqiptarë që mësojnë në Shqipëri, as profesorët që japin mësim, dhe as institucionet e edukimit të lartë. Më shumë institucione për Shqipërinë, do të thotë ASGJË.

The_Burrel thotë:

Shkurt 2007, 9:04 pm

Në të gjithë Veriun e Shqipërisë kemi vetëm një universitet.

Dibra, Mati, Mirdita, Lezha, Kruja, Kurbini, Tropoja etj. Banorëve të këtyre zonave u duhet të shkojnë në Tiranë, Shkodër, Durrës etj., që të studiojnë. Pse mos të ketë një Universitet Mati, vendi ku kanë lindur shkrimtaret me të vjetër të letërsisë shqipe, vendi i kuvendeve historike dhe i heronjve, vendi i kastriotëve, i Mbretit Zog l, i Pjetër Budit të madh? Pse mos të ketë Mirdita, tempulli i qëndresës antiturke, pse mos të ketë Dibra bujare, Tropoja e trimave, Lezha e kulturës, Kruja e pathyeshme, Kurbini i burrave etj? Secili ta pyesë veten, pse?

Enver Hoxha malësoret i quajti fashistë, reaksionarë, nazistë, njerëz kriminelë, që njohin vetëm armët etj. Edhe sot, në demokraci, Veriut nuk i jepet ajo që i takon.

kujtesa thotë:

Shkurt 2007, 9:19 pm

Sistemi i arsimit në Shqipëri është pak lindor, pak perëndimor, pak i pastabilizuar, pak unik, pak i varfër dhe, në fund, mund të themi se produkti i këtij sistemi është në nivele të mjerueshme. Kur një diplomë blihet ose konvertohet me çdo gjë, kur shumë veta kanë diploma në xhep, që nuk njihen gjëkundi, edhe në tregun vendës konkurrenca është e pandershme, sepse kriteret për pranime në punë, qoftë në administratën publike, qoftë në tregun privat nuk funksionojnë sipas parimit “punës duhet ti gjemë njeriun, dhe jo njeriut ti gjejmë punën”. Në Perëndim, këndej ku jetojmë ne, edhe për një punë ordinere, hidraulik, murator, bojaxhi duhet të testohesh dhe të jesh i suksesshëm, që të kesh një punë. Kush jeton në Perëndim, e di mirë këtë punë. Pastaj, nuk diskutohen rangjet e punëve të tjera, që kanë të bëjnë me drejtimin e sektorëve të tjerë të shtetit, komunës, lagjes etj. Por në Shqipëri çdo gjë është mbrapsht, çdo gjë është vetëm slogan i tipit komunist, por me një fytyrë demokratike. Vetëm dogma fjalësh dhe, në realitet, asgjë! Asnjë ndryshim esencial drejt përmirësimit. Në Shqipëri delli i politikës është aq i trashë sa zor të zhduket. Kur një diplomë blihet, dhe pastaj fillohet punë si deputet, atë shtet e ka marrë lumi. Universiteti i parë shqiptar i vitit 1957, megjithëse ishte i ideologjizuar, bëri një hop përpara në arsimin e popullit. Ishte një bazë e mirë për një zhvillim. Një arsim që nuk reformohet, është i vdekur. Tregu i lirë privat i kupton më mirë reformat, zgjedh më të mirin, se i duhet ta zgjidhë shpejt problemin ”koha është flori”. Në 17 vjet kemi humbur shumë kohë, shumë florinj, por ta hajë dreqi, nuk jemi kaq të pasur!

gazetaetiranes

[imodhjom]

turp eshte kjo puna e universiteteve!ne vend qe te rregullojn kto qe kemi po hapim edhe te tjera.pale bejne edhe diferencime veri-jug.Tre universitete mire i ka shqiperia Tirane-Shkoder-Vlore(Durresi dhe Korca mund te ken njefare kuptimi gjithashtu),madje edhe kto po nuk qene cilesore jane te teperta.Shpresoj gjithashtu qe universitetet te krijojne nje fare lidhje mbare kombetare ku pse jo nje nenshtetas shqipetar te studioje ne prishtine apo ne tetove.