Edukatoret i dallojnë hapur këta fëmijë, pasi janë qaramanë dhe dembelë
Fëmijët që rriten me gjyshërit nuk socializohen shpejt në shoqëri. Këta fëmijë janë më të përkëdhelur dhe më dembelë sesa fëmijët që kanë shkuar në çerdhe ose kopsht. Vitet e tranzicionit u shoqëruan me shkatërrimin e shumë kopshteve apo çerdheve, si dhe me mbylljen e vendeve të punës. Nga ky fakt, shumë gra ngelën të papuna dhe nuk u është dashur që t’i çojnë fëmijët nëpër kopshte apo çerdhe. Kjo ka bërë që fëmijët të mos i frekuentojnë këto institucione, të cilat ndikojnë drejtpërsëdrejti në formimin dhe edukimin e tyre. Nga kontakti që “GT”-ja ka marrë me Lindita Jançen, edukatore kopshti, ajo shpreh shumë qartë diferencën që ka midis fëmijëve të rritur në shtëpi dhe atyre që frekuentojnë kopshtet dhe çerdhet.
“Fëmijët që janë çuar në çerdhe apo kopsht janë më të shkathët dhe më të aftë për të marrë informacion, pasi me ta është bërë një punë e kujdesshme, e ndjekur hap pas hapi,” thotë ajo. “Përveç të tjerave, kategoria e fëmijëve që nuk shkojnë në shkolla apo kopshte, por janë nën kujdesin e gjyshërve, kanë edhe probleme të tipit qaraman, të përkëdhelur apo që nuk pranojnë këshilla,” thotë Ermira Kurti, punonjëse sociale. “Zhvillimi psikomotor i fëmijëve që frekuentojnë institucionet e lartpërmendura është shumë më i zhvilluar se i atyre që rriten me gjyshërit në shtëpi, pasi informacioni që ata përthithin është shumë më i kufizuar,” vijon ajo. Problemet e para të këtyre fëmijëve shfaqen dukshëm në momentin kur ata fillojnë klasën e parë, pasi nuk janë më gjyshërit që të kujdesen për gjithçka. Kjo çon edhe në mbylljen e këtyre fëmijëve në vetvete, si dhe distancimin e tyre nga bashkëmoshatarët e tyre.
Kopshtet
Kopshtet janë hallka më e rëndësishme e fillimit të jetës së një fëmije. Edhe pse në kushtet ekonomike të sotme, ku shumë prindër janë të papunë dhe merren vetë me rritjen e fëmijëve të tyre, propaganda për ta çuar fëmijët aty dhe për të marrë sa më shumë informacion është shumë e rëndësishme.
Gjyshërit
E vetmja punë e bukur që mund të bëjnë të moshuarit është të merren me nipërit dhe mbesat e tyre. Edhe pse është shumë e domosdoshme që ata të shkojnë në kopsht, pjesa më e madhe e tyre nuk pranojnë, pasi pretendojnë që është më mirë t’i rrisin vetë, pasi mund t’u mësojnë më shumë sesa kopshtet.
Fatiola Kurteshi
Përgjigju Duke Cituar
Postuar më parë nga Davius
Krijoni Kontakt