Qeveria Berisha, 1,3 milionë $ shpenzime abuzive.

[Humdinger]

Raporti: “Administrata, 1.3 milionë dollarë më shumë shpenzime abuzive”

Gazeta Albania


Qeveria dhe administrata publike kanë harxhuar fonde pa kriter për shpenzime operative gjatë vitit 2006, duke kaluar disa herë më tepër shkeljet e konstatuara në vitin 2005. Një gjë të tillë e ka konstatuar raporti më i fundit i Kontrollit të Lartë të Shtetit, i cili ka kapur abuzime të mëdha me fondet publike dhe në shpenzimet qeveritare. Sipas KLSH-së, në fushën e shpenzimeve operative, janë konstatuar shkelje dhe abuzime në masën e përgjithshme prej 178,3 milionë lekësh të reja, çka përbën një rritje prej 1,3 milionë dollarësh amerikanë, në krahasim me shkeljet e konstatuara në vitin 2005. Në vitin 2005 ishin konstatuar dëme në masën 45,7 milionë lekë të reja në shpenzimet operative. Por, nga ana tjetër, kjo përbën një rritje prej gati katër herësh. Këto shkelje janë konstatuar vetëm në 47 subjekte të kontrolluara nga ekipet e institucionit kryesor të Kontrollit të Shtetit shqiptar. Ndërkohë, burime konfidenciale pranë KLSH-së kanë bërë të ditur për gazetën “Albania ”, se “gjatë kontrolleve të kryera mjaft dokumente nuk janë bërë publike, si dhe është bërë presion prej drejtuesve të këtyre institucioneve”.

Abuzimet me pagat

Në fushën e pagave, shkeljet, sipas Kontrollit të Lartë të Shtetit, kanë qenë mëse pesë herë më të larta se një vit më parë. Në rast se në vitin 2005 janë konstatuar gjatë kontrolleve të këtij institucioni shkelje në masën 12 milionë lekë, në vitin 2006 konstatimet kanë zbuluar shkelje në masën 60 milionë lekë, që kanë të bëjnë me paga të llogaritura në kundërshtim me dispozitat ligjore në fuqi, pagesa të pamerituara dhe pagesa të dhëna tepër në kundërshtim me dispozitat ligjore. Gjithashtu ka patur dhe pagesa të padrejta për punonjësit dhe anëtarë të këshillave drejtues, përfitime të padrejta të dietave, si dhe abuzime të tjera në blerje të ndryshme.

Abuzimet në prokurime

Vlera e shkeljeve të konstatuara në prokurimet publike, nga ana e institucioneve shtetërore, ka qenë 556.993.000 lekë gjatë vitit 2006, thekson raporti i KLSH-së. Duke vënë në dukje se këto abuzime janë vërejtur në 70 subjekte të kontrolluar prej kontrollit. Gjithashtu në raport shtohet se ato kanë të bëjnë me një dëm ndaj buxhetit të shtetit, që është 10 për qind më i lartë se dëmi i evidentuar nga kontrollet një vit më parë në këtë drejtim.

Dëmi i përgjithshëm

Ekipet e KLSH-së kanë konstatuar se, në përgjithësi, shkeljet ekonomike në veprimtarinë e organeve shtetërore të kontrolluara gjatë vitit 2006 kanë qenë mbi 73 milionë dollarë. Kjo shifër është 23 milionë dollarë më e lartë se ajo e abuzimeve të konstatuara nga kontrollet e ushtruara nga KLSH-ë një vit më parë.

E. Koçi


26 Shkurt 2007
-----------------------------------



... dhe njerzit rrinë pa drita sepse qeveria "nuk ka lekë" të importojë energji, por për të harxhuar për xhepin e tyre ka lekë... bankat janë PLOT.