Analiza dhe komente për zgjedhjet lokale, 18 shkurt 2007

[Zemrushja]

Sekretari i Përgjithshëm, Mark Perë de Brishambo, viziton Tiranën, takime me krerët e shtetit e opozitën

"Nëse duan shqiptarët, votimet e reja janë një proces i pranueshëm"

Ndërkombëtarët, për herë të parë pas zgjedhjeve lokale të 18 shkurtit, jo vetëm që nuk kanë përjashtuar mundësinë e zgjedhjeve të parakohshme në vend, por i kanë cilësuar si një opsion i mundshëm. Pas disa hezitimeve të përfaqësuesve të Bashkimit Evropian, apo dhe vendeve të tjera, dje për herë të parë gjasat për një ballafaqim elektoral parlamentar në mënyrë të parakohshme janë dhënë zyrtarisht nga një përfaqësues i lartë i Organizatës për Siguri dhe Bashkëpunim në Evropë (OSBE). Bëhet fjalë as më pak e as më shumë, por për sekretarin e Përgjithshëm të OSBE-së, francezin, Mark Perë de Brishambo, i cili dje ka vizituar zyrtarisht Shqipërinë dhe është takuar me të gjithë krerët e shtetit shqiptar, por edhe me liderin e opozitës, Edi Rama. Duke folur në një konferencë për shtyp, të mbajtur pas takimit me shefin e diplomacisë shqiptare, Besnik Mustafaj, Mark Perë de Brishambo deklaroi se "zgjedhjet e parakohshme janë një proces i pranueshëm në një shoqëri demokratike. U takon shqiptarëve të vendosin nëse do të ketë ose jo zgjedhje të parakohshme". Deklarata e sekretarit të Përgjithshëm të OSBE-së është bërë pak ditë pas qëndrimit politik të opozitës shqiptare, të mbajtur në Kongresin e para pak ditëve të Partisë Socialiste, ku kreu i selisë rozë, Edi Rama, deklaroi se zgjedhjet e parakohshme janë synimi kryesor i opozitës shqiptare, duke bërë të ditur se nuk do të jepnin konsensusin për zgjedhjen e Presidentit të Republikës. Por versionin e votimeve parlamentare para kohe e ka bërë të ditur si një mundësi edhe Kryeministri Sali Berisha, gjatë një mbledhjeje të Grupit parlamentar të Partisë Demokratike, pak kohë më parë. Sekretari i Përgjithshëm i OSBE-së, Mark Perë de Brishambo, ka kërkuar dje në takimet me autoritetet që të nisë menjëherë përgatitja e kushteve normale për zgjedhjet e reja parlamentare në vend. Gjë që tregon se jo vetëm politika vendase, por edhe komuniteti ndërkombëtar është i përgatitur për zgjedhje.

Moisiu

Në takimin me Presidentin e Republikës, Alfred Moisiu, sekretari i Përgjithshëm i OSBE-së, Mark Perë de Brishambo, ka shprehur edhe një herë vlerësimin e tij për kryetarin e shtetit dhe rolin e tij në procesin zgjedhor për organet e qeverisjes vendore. Presidenti Moisiu nga ana e tij vlerësoi rolin e OSBE-së dhe kontributin e saj për zhvillimin dhe konsolidimin e demokracisë në vendin tonë, si dhe asistencën e dhënë në këtë kuadër, sidomos në trajtimin e çështjeve zgjedhore. Presidenti theksoi rëndësinë që ka për vendin tonë realizimi në kohë dhe i plotë i reformës zgjedhore, duke u ndalur në nevojën për pajisjen e qytetarëve me kartat e identitetit dhe përgatitjen e regjistrit kombëtar të zgjedhësve.

Berisha

Në takimin me sekretarin e Përgjithshëm të OSBE-së, Kryeministri Berisha theksoi se "bashkëpunimi do të ketë një përqendrim më të madh në reformën zgjedhore, në reformën në sistemin e drejtësisë, në bashkëpunim me Këshillin e Evropës, të qeverisjes së mirë dhe në fusha të tjera me interes të përbashkët". Por, nuk theksoi se në ç‘fazë është qeveria në përgatitjen e kartave të identitetit. Mirëpo zyrtari i lartë i OSBE-së e ka ngritur këtë problem gjatë takimit që ka zhvilluar me ministrin e Brendshëm, Bujar Nishani. Në këtë takim, sekretari i Përgjithshëm i OSBE-së ka ngritur problemin e krijimit të regjistrit të përhershëm të zgjedhësve dhe për listën e votuesve në Shqipëri.

Topalli

Problemi i përgatitjes së infrastrukturës zgjedhore është ngritur edhe në takimin që zyrtari i lartë i OSBE-së ka zhvilluar me Kryeparlamentaren Jozefina Topalli. Kreu i Kuvendit theksoi se ekziston vullneti për një reformë zgjedhore të qëndrueshme, duke u ndalur në angazhimin për pajisjen sa më shpejt të qytetarëve me kartat e identitetit.

© Gazeta Shqip - 2006-2007