Për t`u rënë në sy djemve shumica e vajzave, adoleshente, refuzojnë atletet në shkollë
Jo për të gjithë është e rëndësishme të jesh rehat dhe komod. Pothuajse pjesa më e madhe e adoleshentëve preferojnë të qëndrojnë në majë të takave dhe për to nuk ka rëndësi se është mëngjes apo darkë, se po shkojnë në shkollë për të mësuar, në gjimnaz, apo për të dalë shëtitje. Për shumicën e vajzave, adoleshente, primare është të duken seksi, moderne dhe jo të jenë komode… Përgjithësisht, femrat janë të fiksuara pas këpucëve dhe çizmeve me taka. Në rregulloren e shumë prej gjimnazeve të kryeqytetit nuk lejohet përdorimi i këpucëve me taka të larta, por sa zbatohet? “Mua më pëlqejnë shumë çizmet me takë të lartë, pasi me to bëj figurë dhe dukem shumë bukur, por unë nuk mund të prononcohem, pasi prindërit e mi, megjithëse kam “luftuar” shumë për t’u mbushur mendjen, nuk duan që unë të shkoj me taka në shkollë.
Por ç’të keqe ka? Unë detyrohem t’i mbaj në çantë çizmet e mia dhe dal nga dera e shtëpisë me atlete dhe i vesh çizmet para se të dal nga pallati ose nëpër lokale. Ç’të bëj?!” - shprehet një 15-vjeçare, e mërzitur që prindërit nuk “e kuptojnë” dhe nuk e lejojnë të veshë taka të larta. Për vajzat adoleshente, kryesisht të moshës 15 deri 18-vjeçare, nuk ka rëndësi rehatia: ato duan të kenë sukses me djemtë, dëshirojnë t’u pëlqejnë atyre, por në fakt… “Të them të drejtën, përveçse nuk kam simpati për vajzat e shkollës sime, të cilat veshin taka, i kam inat, pasi nuk mund të vihet, aty ku shkon për të mësuar, në majë të takave. Nuk mund të jesh rehat sipër një hekuri 10 cm. Këto adoleshente nuk e kuptojnë që po shtrembërojnë këmbët, duke veshur këpucë me taka shumë të larta çdo ditë”, - flet Erjoni, djali që s’ka simpati për vajzat që preferojnë këpucët me taka. Megjithëse të paktë, ekzistojnë edhe ato që: “Nuk më intereson në jem moderne, e kohës apo jo, nuk më intereson në dukem tërheqëse apo jo, për mua mjafton të jem rehat, sidomos në këto rrugë, që janë duke u rregulluar dhe nuk është e lehtë të ecësh mbi to. Unë i dua shumë atletet e mia”, - tregon për Gazetën e Tiranës Erjola Krasniqi, 17-vjeçe.
Valbona Ndreka
Krijoni Kontakt