Pirati i Uraleve që sfidon Bill Gates-in

[Davius]

Pirati i Uraleve që sfidon Bill Gates

I mbrojtur nga Putin e i kërcënuar me burg nga Microsoft, rusi është kthyer në VIP-in e momentit

Paguhet rreth 170 euro në muaj, banon pak a shumë 10 mijë kilometra larg nga Siatëlli, në një nga fshatrat e humbura të Uraleve, ka një mbiemër mjaft qesharak, mban mjekër që do të ishte e denjë për një shenjt ortodoks dhe akuzohet se ka vjedhur njeriun më të pasur në botë. Akuzohet se ka shkaktuar dëme "mjaft të ndjeshme" (rreth 7600 euro) duke dhunuar të drejtat e autorësisë së kompanisë gjigande që është njëherësh pronë e njeriut më të pasur në botë, Bill Gates. E thënë me fjalë më të thjeshta, ka instaluar në kompjuterët e shkollës një sistem operativ Windows pirat dhe rrezikon dënimin me burgim që mund të shkojë deri në pesë vjet. Por çdo e keqe e ka një të mirë. Si për të kompensuar gjithë këtë, Aleksandër Ponosov, nga drejtor i një shkolle të humbur province, është kthyer në rusin më të rëndësishëm të momentit: mjafton të mendojmë që në mbrojtje e kanë marrë figura të tilla të rëndësishme të politikës globale, siç janë Mikhail Gorbaçov e Vladimir Putin. Gjithashtu, me kuptimin e plotë të fjalës, interneti zien nga moria e njerëzve që janë hedhur në mbrojtje të tij në shenjë solidariteti. Të gjithë janë vënë përkrah tij, njeriut të vogël që po bëhet viktimë e dy gjigandëve të pashpirt, drejtësisë ruse dhe Microsoft-it të Bill Gates.

Rendja e Ponosovit drejt madhështisë e famës, kundër dëshirës së tij, filloi më 1 shtator të vitit 2005, ditën kur në fshatin Sepik - një ndër vendet më të humbura të Rusisë që nuk gjendet as në hartat gjeografike - më në fund u inaugurua një shkollë e re. Punimet për ndërtimin e saj kishin nisur që në epokën e Brezhnjevit, por pas 30 vitesh më në fund mrekullia u krye falë këmbënguljes së drejtorit të ri energjik. I ri, i paalkoolizuar, punëtor i palodhur, kishte pranuar të merrte përsipër atë detyrë në një vend nga i cili të gjithë përpiqeshin të zhdukeshin sa më parë. Një njeri nga ata që nuk gjenden më në ditët e sotme, që punën e sheh si një mision të cilit i duhet shkuar me çdo mënyrë në krye. Arriti të gjente një sponsor për të financuar vazhdimin e punimeve dhe mes shtëpive të ndërtuara me trungje pemësh, ku njerëzit ende ngrohen me soba druri, mbiu një shkollë model: e lartë dy kate, e ndërtuar me tulla, me palestër, mensë, dushe, madje edhe kompjuterë, të cilët fëmijët e Sepikut i kishin parë vetëm nëpër filma. Një dhuratë nga sponsori i përgjigjej krenar kureshtjes së njerëzve.

Ponosovi mori personalisht përsipër t‘u mësonte fëmijëve informatikën. Me ritëm shumë të shpejtë, ata që ndiqnin kurset e tij, fëmijë nga mosha 6 deri në 17 vjeç, u bënë plot 380. Mblidheshin nëpër 15 fshatrat e zonës me një autobus shkollor, tamam si në filmat amerikanë.

Por ky ishullth i lumtur ishte "ishull piratësh", siç deklaruan organet e rendit kur sekuestruan 12 kompjuterët e shkollës, duke i komunikuar drejtorit se gjendej edhe nën akuzën e përdorimit të programeve pirate. Sipas llogaritjeve, dëmi i shkaktuar ishte 266 mijë rubla, 7600 euro dhe për t‘u hyrë tratativave me drejtësinë nevojiteshin plot 2 mijë euro: një shifër që në Sepik është po aq astronomike sa vetë miliardat e Bill Gates.

Nuk vlejnë për asgjë as justifikimet e "piratit", sipas të cilit kompjuterët i ishin dorëzuar me programe të instaluara paraprakisht: "Nuk jam i aftë as të dalloj një Windows falas nga një origjinal". Për të gjithë ata që në mbrojtje të Ponosovit mbushin forumet me shprehjen e famshme që tashmë është kthyer në një moto "Kill Bill" (vrisni Billin), duhet shtuar edhe diçka: Vetë Microsoft nuk ka pranuar të jetë pala paditëse, duke qenë se "drejtori i shkollës nuk është ndonjë pirat i rrezikshëm". Është mekanizmi gjigand i drejtësisë ruse, i cili shtyhet prej vitesh nga vetë gjigandi Microsoft. Olga Dergunova, presidentja për Rusinë, e cila shfaqet shumë shpesh nëpër gazeta e revista si biznesmene mjaft e suksesshme dhe e pamëshirshme, që tani është vënë në lëvizje. Nga ana tjetër, një ndër kushtet që do ta lejonin Rusinë të përfshihej në WTO (organizata botërore e tregtisë) ishte pikërisht lufta kundër piraterisë, ndërkohë që në Moskë një Windows pirat mund të blihet në çdo cep të qytetit vetëm për pesë euro. Në gjithë këtë mish-mash, drejtori i ngratë i shkollës përfundoi përpara gjykatësit, nga i cili iu dha edhe masa e arrestit në shtëpi.

Nxënësit e shkollës, të cilët manifestuan në mbrojtje të drejtorit, u pyetën shumë shpejt në prokurori: "Kisha shumë frikë, ishte hera e parë që dikush më merrte në pyetje", tregon Anja 14-vjeçare, e pyetur gjerë e gjatë nga gjyqtari që kërkonte me çdo kusht të zbulonte në mos profesori kishte abuzuar me detyrën, duke i trembur fëmijët që këta të manifestonin në favorin e tij.

Për t‘i dalë në mbrojtje Ponosovit, u detyrua të thoshte një fjalë edhe vetë Vladimir Putin: "Të kërcënosh dikë me burgim sepse ka blerë një kompjuter, është budallallëk prej qensh", deklaroi publikisht me gjuhën e tij që shumë shpesh nuk lë vend për keqkuptime. Mikail Gorbaçov, nga ana e tij zgjodhi rrugën e komunikimit si VIP-i me VIP-in, dhe shkroi një letër për të bindur Bill Gates që të mos lejojë të merren masa kundër profesorit të ngratë: "Mësuesi që i ka përkushtuar jetën edukimit të fëmijëve dhe që ka një rrogë mjaft të ulët, të pakrahasueshme me ato të të punësuarve të kompanisë suaj, Microsoft-it, rrezikon të përfundojë në një nga burgjet e Siberisë. Fajësia e tij është e paqartë, ju lutem të tregoheni i arsyeshëm". Bill nuk ka dhënë përgjigje, por Microsoft ka reaguar duke kërkuar një "zgjidhje jo të rëndë", por duke nënvizuar nga ana tjetër se mbështet mjaft fort Kremlinin në luftën kundër piraterisë: "Ishin autoritetet ruse ato që nisën procedurat për ndjekje penale e shpresojmë në një masë të drejtë nga ana e gjykatës".

Ndërkohë, fshatarët e Sepikut pa arritur të kuptojnë shumë mirë kompjuterët e koncepte kaq të vështira sa ç‘është ai i së drejtës së autorit, kanë nisur të gjykojnë përmes atyre që dëgjojnë të thuhen në ekranet e televizorëve: "Profesori dukej burrë mjaft i mirë, por paska qenë hajdut".

GAZETA SHQIP
.