Urbanistika e Tiranes

[Qyfyre]

Jo o Qyfyre jo - se shqiptaret jane vec botes, edhe per te ble buken dun me dale me makine, me i shit mend komshijve.

E ke parasysh ate skenen te Ollga qe thoshte per katunaret: "kan shit gomeret e kane ble bicikleta dhe po na shesin mend". Kshtu dhe shqiptaret sot: kan shit bicikletat dhe kan ble makina dhe se ca po i duket vetja.

Sdel dot rrugeve se te mbysin makinat, era e qelbet e tymit, burite - pale qe sdo me dit njeri per semafor!!!

Do shesin sa do shesin mend, pastaj do mërziten. Do fillojnë dhe të largohen nga Tirana drejt zonave më të qeta e më të pastra, pasi do jenë jo vetëm me nje kualitet më të lartë jetese, por edhe më të lira se Tirana.

[Ver]

Do shesin sa do shesin mend, pastaj do mërziten. Do fillojnë dhe të largohen nga Tirana drejt zonave më të qeta e më të pastra, pasi do jenë jo vetëm me nje kualitet më të lartë jetese, por edhe më të lira se Tirana.

Po jo o Qyfyre, ajo qe thu ti ska mundsi se sa te ikin robt nga Tirana neper kto "zonat e qeta" edhe ato do bohen me keq se Tirana. Se merr vesh ti se ato zona prandaj jane te qeta se ska njerez??

Le i her qe mileti edhe kur te jen ke zonat e qeta prape do dun me ardh ne Tirane per shopping, e per me marr vesh ca bohet. Imagjino masanej trafiku i autostrades

[Faraoni _94]

urbanistika e tiranes mendoj se dorregullohej po te ms ishte kaq ndotje dhe kaq aerr partamentet me njeri tjetrin

[DYDRINAS]

Keqpërdorimi i pushtetit

Bledi KASMI

Kryetari i Bashkisë së Tiranës kaloi në heshtje zjarrin e rënë katër ditë më parë në një nga pallatet shumëkatëshe, të ndërtuara pranë qendrës së Tiranës me bekimin e tij. Si zakonisht, kur bëhet fjalë për ndonjë çështje që ka një problematikë të theksuar të kryetarit të Bashkisë, Rama rrëshqet dhe shfaqet para mediave si kryetar i PS-së dhe anasjelltas, kur kryetari i PS-së ka një ngërç të shoqëruar me kosto politike i ikën kwtij posti dhe merr pozitat e kryetarit të Bashkisë. Kështu, ditën e zgjedhjeve lokale në Kashar, Rama u shfaq para ekraneve si kryetar i Bashkisë, duke inauguruar një rrugicë dhe duke u bërë thirrje banorëve të kësaj zone të "largonin Berishën". Ndërsa, kur zgjedhësit votuan kandidatin e Berishës, ai harroi të përgjigjej për këtë si kryetar i PS-së, por u shfaq si kryetar Bashkie, duke inauguruar aneksin e një shkolle në periferi të Tiranës.

Është një taktikë që Rama e përdor shpesh për t'i shpëtuar përgjegjësive dhe dështimeve të tij që shfaqen herë në formën e kryebashkiakut dhe herë në formën e kryetarit të PS-së, duke alternuar postet me njëri tjetrin dhe duke u thënë qytetarëve të këtij vendi se Rama, kryetar i PS-së nuk ka lidhje me Ramën, kryetar Bashkie dhe anasjelltas, kur dështon kryebashkiaku Rama nuk e njeh këtë njeri, sepse ai është kryetar i PS-së dhe jo i Bashkisë. Është një çështje e dyzimit të personalitetit të këtij njeriu, i cili po kërkon ta transferojë këtë dyzim edhe tek mbështetësit e tij, duke fshehur dështimet e njëpasnjëshme të tij si kryebashkiak dhe si kryetar i PS-së.

Zjarri i rënë në qendër të Tiranës është një paralajmërim i keq për atë që mund të ndodhë në një të ardhme të afërt nga lukunia e ndërtimeve pa kriter, të dhënë nga kryebashkiaku dhe nuk mund të kalohet në heshtje. Kryetari i Bashkisë nxori zëvendësin e tij për të hequr çdo përgjegjësi nga vetja, në lidhje me mosrespektimin e distancave ndërmjet pallateve dhe duke e kaluar përgjegjësinë, sipas tij, tek zjarrfikëset. Sipas tij, qenkan zjarrfikëset përgjegjëse, pasi ato kanë dhënë për miratim ndërtimin e pallateve të tilla. Po ligjin, që e thotë qartë dhe prerë se cilat duhet të jenë distancat mes pallateve, kush e ka shkelur atë, Rama apo zjarrfikëset, cili wshtw institucioni vendimmarres?

Një alibi e tillë nuk mund të justifikojë në asnjë rast ndonjë tragjedi njerëzore, që urojmë të mos ndodhë. Përndryshe, kuptohet që Rama e ka të sigurtë edhe alibinë e shpëtimit, ndaj ai vazhdon të abuzojë me dhënien e lejeve të ndërtimit. Ajo është e frikshme për vetë faktin se, ai kërkon t'i bëjë njerëzit e këtij vendi të besojnë se, nesër apo pasnesër nëse do të ndodhë ndonjë incident i tillë, faji nuk është i titullarit të institucionit, por është kolektiv. Kjo sepse edhe vetë KRRT-ja nuk është një institucion prej një njeriu, po kështu na dilkan edhe zjarrfikëset përgjegjëse, po kështu është edhe Policia Ndërtimore përgjegjëse, etj. Pra, Rama kërkon ta nxjerrë veten tërësisht të papërgjegjshëm, ashtu si edhe nga absurdi i betonimit të kryeqytetit.

Sa nuk është vonë, duhet reaguar institucionalisht për të shpëtuar atë çfarë mund të shpëtohet, si dhe për të gjetur zgjidhje se si mund t'i imponohet kryetarit të Bashkisë të respektojë ligjin në dhënien e lejeve të ndërtimit. Tirana ka qindra dhe mijëra pallate që janë ngritur mbi supet e njëri-tjetrit, duke rrezikuar herë- herës edhe fundosjen e ndonjërit prej tyre, si pasojë e mosrespektimit të rregullave të ndërtimit. Tirana, sipas specialistëve, përfshihet në një zonë e cila ka një probabilitet të lartë që të përfshihet nga lëkundjet sizmike jo fort të lehta, ndaj duhet menduar që të parandalohet e keqja dhe jo të dëgjojmë alibitë e kryebashkiakut, se në rast se ndodh, fajtorë do të jemi të gjithë.

Duke dëgjuar më vëmendje deklaratën e nënkryetarit të Bashkisë, të binte në sy anatemimi ndaj firmës së ndërtimit, e cila kishte ndërtuar pallatin që u përfshi nga flakët. Kjo nxjerr në pah një tjetër problem. Prej afro një viti mbikqyrësi i punimeve të ndërtimeve, që është Inspektoriati i Ndërtimit, ka kaluar në kuadër të decentralizmit, në varësi të pushtetit lokal. Pra, Bashkia e Tiranës nuk ka se kujt t'i qahet për mosrespektimin e lejes së ndërtimit, sepse ka në dorë edhe arrën, edhe shkopin.

Ajo që po vihet re, jo vetëm në Bashkinë e Tiranës, është një keqpërdorim i këtij pushteti të dhënë në favor të pushtetit lokal. Rama prej vitesh kërkonte të kishte nën varësi Policinë Ndërtimore. Këta pushtetarë lokalë, duke pasur si lejet e ndërtimit në dorë ashtu edhe Policinë Ndërtimore, kanë nisur abuzimin me këto të drejta, duke e përdorur Policinë Ndërtimore në funksion të ndërtimeve që nuk respektojnë kriteret ligjore. Po humbet kontrolluesi dhe ndëshkuesi i babëzisë së një pjese të pushtetarëve lokalë, për të ndërhyrë atje ku shkelet ligji me ndërtime dhe ky është një problem jo i vogël dhe tregues i keqpërdorimit të pushtetit të deleguar, nga qëndrori tek lokali. Policitë ndërtimore po shndërrohen thjesht në subjekte që varen jo nga ligji, por nga uria e disa krerëve lokalë për leje ndërtimi dhe po kthehen në një instrument që po legalizon abuzimin me lejet e ndërtimit.

[Edvin83]

Tirana, pfff nje hale e madhe njerezore me kryetare qe duan ta bejne superhale!

[Qyfyre]

Qytetet e mëdha kështu janë gjithmonë. Nuk ka faj asnjeri për rrëmujën, trafikun, pisllikun (ktu nuk perfshi malet me plera qe mbetën me muaj të tërë nëpër rrugë) etj. Është thjesht popullsia shumë e dendur.

Dhe New York-u është shumë më i pisët, shumë më i zhurmshëm, i parregulluar, i vjetruar, rrëmujë, me rrugë skandaloze etj etj. në krahasim me vende të tjera në Amerikë.

Ama bashkia duhet të zbatojë ligje e të rregulloj ato gjëra ku ka mundsi. Të dënojë ato firma që ndertojnë pallate jashtë rregullave teknike. Tu japë kontrata atyre që e meritojnë. Mos ndertojë banka e pallate nëpër parqe siç po hidhet ideja e re tani për liqenin. Të organizojë mbledhjen e plerave sa më mirë. Të dëgjojë hallet e popullit e shumë gjëra të tjera. Këto qytetarët e Tiranës duhet ti kërkojnë me çdo kusht, se qyteti ësht i tyre jo i bashkisë. Rama ikën nesër ku të dojë, shkon në Paris, po tiransit do jenë aty akoma dhe do u duhet të jetojnë ms çdo budallik që u lë Rama.

[Edvin83]

Për ajrin e përditshëm*
Deri në prag të viteve `90, Tirana ende klasifikohej si qytet i hijshëm europian, me blloqe ndërtimi të paqme e katror (ish blloku), me lagje, me vila elitare karakteristike (rreth RTVSH), me pallate të ulëta e të ujdisura me intuitën e arkitektëve gjeometër të asaj kohe (shallvaret, pallatet agimi),

Nga Prof.asc. Sazan Guri
Diel, 10 Gusht 2008 08:37:00



Deri në prag të viteve `90, Tirana ende klasifikohej si qytet i hijshëm europian, me blloqe ndërtimi të paqme e katror (ish blloku), me lagje, me vila elitare karakteristike (rreth RTVSH), me pallate të ulëta e të ujdisura me intuitën e arkitektëve gjeometër të asaj kohe (shallvaret, pallatet agimi), me lagje me shtëpi tipike Tiranase (kodra e kuqe) deri në lagje vakëf me shtëpi me qerpiç (varri i Bomit), me rrugë që nuk dalin dot boje qysh për 200 vjet e më tepër (bulevardi madh), por mbi të gjitha Tirana dominohej nga një gjelbërim i krahasueshëm me Berlinin, ku çdo Tiranasi, sikundër dhe një Berlinezi i binte për hise të kishte 15m2 blerim, dhe nëse do të përfshihesh dhe kurora e gjelbër e saj (vargu Selitë, Farkë, Dajt), Tirana mbetej model i bashkëjetesës njeri-natyrë.

Sot kemi mbi 6-7 vjet, që çdo tiranas thith zyrtarisht 73 kg pluhur në vit ose gjysmë bardhaku pluhur në ditë. Ende marrim ujë me racion (në atë masë sa të tjerët në vende të tjera rrëkëllejnë birra), jemi përbri faktit të OBSH, që kemi 4000 raste shtesë në vit të kancereve, rrugë si Komuna e Parisit me dendësi popullsie prej 1500 banorë/ha (Honkongu me 140 banorë merret për shembull negativ) etj. Pikërisht afër kësaj rruge sot flitet për një qendër të dytë për Tiranën.

Cili qytet në Evropë ka dy qendra me Down Town-e? Madje, ka qytete si Berlini, Parisi, Praga, Budapesti e pothuajse të gjitha qytetet e Evropës me jetëgjatësi sa Tirana, që nuk kanë lejuar as dhe një qendër down town-i për hir të konstitucionit arkitekturor të qytetit të vendosur nga intuita popull në kohëra historike. Ndërkohë që, Tirana ka me dhjetëra lagje, ku keqas bashkëjetojnë kullat 13 katëshe me vilat trekatëshe.

Sa për dijeni për qytetarët, ajri, sot në Tiranë hyn nga veriperëndimi, freskohet në liqenin e madh dhe në kodrat përreth dhe cirkon për të dalë po nga ajo anë, por tashmë duke freskuar qytetin. Megjithëse, për atë, që nuk di ku shkon nuk ka rëndësi drejtimi i erës. Që të bindeni pyesni tiranasit e vjetër, se si gjysma e bulevardit të madh nga treni deri tek sheshi “Skënderbe” ka temperaturë tjetër se ajo nga sheshi deri tek Korpusi. Po nesër, nëse do të kemi edhe 16 ngrehina nga 16 deri në 33 kate tek liqeni? Ç`do të bëhet me kondicionerin natyral tonin? Mund të sajohen dhe të blihen kondicionerë, që të freskojnë shtëpitë tuaja, por për ajrin jashtë, ku këta kondicionerë do të derdhin më shumë nxehtësi, kurrë nuk do të gjenden mjete sado të sofistikuara qofshin për ta freskuar atë.

Në projektin në fjalë zona e kompleksit të pishinave quhet e degraduar; zona e Kopështit Botanik cilësohet si zonë nën mungesën e një mirëmbajtje në vite (pavarësisht nga ngazëllimi që ajo iu sjell çifteve përgjatë ditës së dasmave, si i vetmi vend parajsë për atë ditë parajsë). Për Kompleksin Dinamo, me qenë se nuk gjejnë dot fjalë të mbrapshta, thonë se do ta marrin pronarët. (a thua se ky shtet po respekton pronarët?!). Aty mëson, se garda do të spostohet dhe së bashku me të edhe ca dhjetëra hektarë pyll i sotëm. Me qenë se, zona është e ndjeshme dhe investimi është pothuajse i nivelit strategjik do të pyesnim: E kemi studimin mjedisor? Po atë të vlerësimit strategjik mjedisor? Po studimin e leverdishmërisë ekonomike, për të vlerësuar realisht, nëse ia vlen të shembet kjo zonë apo të rimëkëmbet ajo?

Tirana i ka pasur mundësitë për të zhvilluar realisht qendra të reja, si në qytezat përkatëse, Kombinat, Laprakë, Kinostudio, Kamëz, ndoshta dhe për të zhvilluar qytete të reja si “Tirana e re”, sikundër Beogradi i ri, në zonat Sauk, Bathore, Paskuqan, Autostradë. Por jo. Na duhet një emër i madh (qendër).

Në këtë “qendër urbane”, me rreth 25 hektarë do të ndërtohen rreth 400,000m2 sipërfaqe banimi, ku do të vijnë të jetojnë të kurthuar rreth 4000 familje ose 16,000 banor, të ndjekur nga 6-7000 makina. Pra, në vend se kjo zonë, përfshirë pjesë të parkut pyll artificial, gjithë kopshtin botanik, kompleksin e gjelbëruar e sportiv Dinamo, etj., të ripërtërihej në identitetin e saj për 1500 banorët/ha të lagjes pranë, si Komuna e Parisit, zihet edhe më, pikërisht me 800 banor/ha, duke e bërë këtë lagje të rrethuar nga betone gri, nga tarraca me depozita uji gri, nga pallate me saçe gri, dhe duke e dënuar përjetësisht këtë lagje me mesataren më të lartë në botë për banorë për hektarë, përpos një jetesë pa gjelbërim, pa sheshe shplodhjeje, me probleme parkimi, me kabllo telefoni e vizioni tebdil hava (sepse dihet që në Shqipëri një kokërr mollë fut mbreti në gurmaz, sejmenët shkulin pemën nga pas).

Po mirë mund të thotë dikush. Çfarë u bë nëse vijnë 16 grataçielat? Bëhet shumë! Dihet se çdo person thith 8,000-10,000cm3 ajër me oksigjen, mundësisht me ozon për 24 orë. Mirëpo, ajri për hektarë është pothuajse sasi konstante, që do të thotë se ky oksigjen në vend që të përpjesëtohet për maksimum 100 njerëz/hektarë do të shkojë për 1500 të tillë/ha, pra mua si qytetar më është sekuestruar lënda e parë bazë për të jetuar O2 ose O3.

Shto këtu fshirjen e zonave të gjelbra, (oksigjen më pak e CO2 më tepër), shto këtu tarracat pa çati (estetikë vrastare, rrezatim më i lartë, temperaturë me e lartë), shto këtu zhdukjen e pasqyrave ujore (lagështi më pak), shto këtu betonizimin (freski më pak) e kurorës së gjelbër (Selitë, Farkë, Dajt). Atëherë llogaritet që të ndjejmë temperaturën mbi 10 gradë më tepër, që nuk është pak mbi një maksimum të mundshëm (mesatarisht 360-380) të saj gjatë stinës së beharit.

Por edhe Tirana, nëse lejohet kjo “qendër” dënohet, sepse do të hapet sipari për 21 qendra të tjera ekzistuese sportive në Tiranë. Detyra nuk është thjesht luks qytetar drejt një jetë më të mirë, nuk kërkon as veprim të çastit, por një trimëri shkencore e përgjegjësi të matur qytetare. Për ajrin e përditshëm.

[Ver]

Z. Kryetar i Bashkisë, 2000 të rinj të Tiranës…
Gazeta Panorama
Vendosur: 09/08/2008 - 10:32

Romeo Hanxhari

I nderuar zoti Kryetar i Bashkisë! Ndoshta nuk është momenti më i përshtatshëm “politik” për t’ju shkruar publikisht për një temë që ka të bëjë me politikat tuaja urbane. …Por në fund të fundit, kur mund të jetë një i tillë?! Ndoshta asnjëherë. Prandaj, meqë unë ju njoh si Kryetar të Bashkisë sime, pikërisht në këtë cilësi do të doja ta lexonit këtë letër. I vetmi qëllim imi është të loboj publikisht me ju për një ide të 2.000 të rinjve, të cilët me një projekt konkret kanë depozituar firmat pranë administratës suaj rreth 6 javë më parë.I nderuar Kryetar, sot në botë po flitet (dhe po veprohet) se si ta ulim varësinë tonë nga nafta, sot po flitet (dhe po veprohet) se si të kemi qytete të shëndetshëm, flitet (e veprohet) në fund të fundit se si të kemi qytet për qytetarët. Kjo e fundit do të thotë pikërisht që të kemi një qytet me dimensione njerëzore, ku njerëzit të ndihen pjesë dhe jo tepricë, të ndihen qendër dhe jo periferi, zgjidhje dhe jo problem. Një qytet pra, ku njerëzit të jetojnë harmonikisht me elementët e tjerë urbanë, ose më mirë, ku elementët e tjerë urbanë të krijohen harmonikisht me njerëzit. …Sepse më në fund të gjithë po kujtohemi se çfarë ka ndodhur në origjinë të “qytetit”: pra që pikërisht “njerëzit” e kanë krijuar “qytetin”, dhe absolutisht jo e kundërta, dhe për rrjedhim është qyteti që duhet t’u adoptohet njerëzve të vet dhe absolutisht jo e kundërta.

Marr me mend që ju këto i dini, marr me mend edhe që ndoshta ju do të donit që të ishte kështu. Për qytetin tonë, flas. Veçse, i nderuar z. Kryetar, vështirë se realiteti në Tiranë i përgjigjet këtij vizioni, të paktën për problemin që po ju ngre unë, në emër të atyre 2.000 të rinjve që kanë iniciuar me firmat e tyre këtë ide. …Dhe, do isha vetëm pjesërisht dakord me ju nëse do thoshit se “kemi prioritete të tjera”. Kjo sepse, ju siguroj që për të zbatuar projektin që kërkojnë këta të rinj, nuk është e nevojshme të anashkaloni prioritetet e tjera. I keni (dhe i keni patur deri tani) të gjitha mundësitë që njëkohësisht duke zgjidhur prioritetet e tjera, të zgjidhni paralelisht dhe në mënyrë fare të thjeshtë e pa kosto edhe këtë. Çfarë po kërkojnë ata të rinj? Ata po kërkojnë që të kenë korsi të ngushta biçikletash në disa rrugë të Tiranës, duke filluar së pari me rrugët buzë Lanës. Konkretisht për rrugët e reja. Para 5 javësh ju përuruat punimet e rrugës buzë Lanës tek Materniteti i Ri …dhe aty as kishte fare asnjë lloj projekti për korsi biçikletash. Para 4 javësh ju inspektuat punimet në unazën e vogël te 9-katëshet …dhe as aty nuk kishte asnjë korsi për biçikleta. Pra, z. Kryetar, në të vjetrat jo e jo, por edhe në asnjë rrugë që po bëni të re, ju si Bashki për fat të keq nuk po planifikoni asnjë korsi biçikletash. Dhe do mjaftonte jo më shumë sesa 1 metër gjerësi që ju mund t’ia merrnit rrugës apo trotuarit, dhe në këtë mënyrë do ta kishit renditur Tiranën në qytetet bashkëkohore. Po, bashkëkohore. Sepse, z. Kryetar, Tiranën nuk e bëjnë “moderne” as asfalti i ri i rrugëve të makinave dhe as pallatet e larta. Fatkeqësisht jo. Rrugët për makina qytetet e tjera i kanë bërë me kohë e me vakt, ndërsa tani ato qytete po u kthehen të bëjnë rrugët për këmbësorët apo për biçiklistët. Tirana ka shansin që të dyja këto tendenca t’i bëjë në të njëjtën kohë. Pra, jo thjesht “hapësirat për makinat e qytetarëve”, por sidomos “hapësirat për qytetarët pa makina”, ky është moderniteti i qytetit sot: t’u afrohet njerëzve dhe jo makinave.

Për t’u kthyer tek tema jonë, nëse do të thoshit se ju keni përuruar para disa javëve unazën e vogël te Banka, ku u tha se “për herë të parë në këtë qytet ka edhe korsi për biçikleta”, më vjen keq t’ju them me plot gojën që juve ju kanë gënjyer z. Kryetar. Dikush është kujtuar ndonjë ditë para inaugurimit të rrugës që të vizatojë një biçikletë mbi rrugë dhe t’jua quajë “korsi biçikletash”, por ajo është vetëm publicitet, asgjë më shumë. Sepse, ekspertët tuaj ishte dashur ta dinë, dhe unë po jua them juve nëse nuk e dini: nuk mund të kenë të njëjtën korsi edhe “autobusi” edhe “biçikleta”, sepse autobusi në korsinë e vet duhet të ecë shpejt dhe pa pengesa, pa u kujdesur se mos vë përposhtë ndonjë biçiklist të gjorë, ndërsa biçiklisti (fëmijë, grua, apo i moshuar) i gjorë në korsinë e vet duhet të ecë i qetë dhe i sigurt, pa qenë nevoja ta mbajë kokën prapa se mos e vë përposhtë ndonjë autobus. Kjo është e thjeshtë. Ju siguroj se në asnjë qytet të botës nuk do të gjeni një “gjetje” të tillë të çuditshme të ekspertëve. Dhe në atë rrugë që ju përuruat kishte mjaftueshëm vend edhe për një korsi të vogël biçikletash. Mjaftonte një vullnet nga lart, dhe mjaftonte që dikujt nga ekspertët tuaj t’i shkonte mendja më parë, ose të dëgjonte propozimet që vinin “nga baza”. Prandaj ju them që ajo që ekspertët tuaj kanë bërë tek unaza e vogël, nuk është aspak serioze. Jua them këtë që ta dini, dhe mos të lejoni që një gjë e tillë të përsëritet në ndonjë segment tjetër rrugor. Të paktën pra të mos përsërisin show-n.

Po cilën zgjidhje propozojnë ata 2000 të rinj që kanë firmosur projekt-idenë që ju ka ardhur në Bashki shumë javë më parë? Ata propozojnë që të rezervohet një hapësirë nga 1 m për çdo anë, midis trotuarit dhe brezit të gjelbër përgjatë gjithë aksit të Lanës. Kjo ndërhyrje nuk kërkon investime të mëdha, por ama i jep Tiranës një aks të plotë Lindje-Perëndim për përdoruesit e biçikletave. Dhe ky projekt mund të fillojë fare lehtësisht tek pjesa që ju po ndërtoni pikërisht tani me paratë e taksapaguesve të Tiranës, pikërisht buzë Lanës, te Materniteti i ri. Në takimin që këta të rinj patën me Komisionin për Shëndetin dhe Mjedisin të Këshillit Bashkiak të qytetit të tyre, morën përkrahje entuziaste për këtë iniciativë, dhe morën premtimin për lobim institucional. Edhe në takimin e tyre me një bashkëpunëtoren tuaj shumë të ngushtë në administratën e Bashkisë, përkrahja me fjalë nuk mungoi. …Veçse, nga e thëna në të bërë qenka në mes një harresë e tërë.

Zoti Kryetar, këta të rinj u koordinuan me shumë dëshirë të mirë nga shkruesi i kësaj letre dhe nga aktivisti i shquar Ardian Klosi. Idesë të rinjtë iu bashkuan me entuziazëm, dhe kanë vendosur që mos ta lënë këtë ëndërr të tyre të shkojë në të zbrazët. Kanë krijuar “Rrjetin e të rinjve për qytet me biçikleta” me shumë më shumë anëtarë se ç’kanë firmosur. Mund të keni rast shpejt të shihni se sa shumë janë. Do të organizojnë ndoshta edhe manifestime në shtator. Ju pra, keni shansin që t’i bëni ata që tani “partnerë”, pra pjesë të politikave tuaja urbane. Konkretisht duke ndikuar të modifikohen fare pak projektet teknike të rrugëve, të cilat ju po i ndërtoni aktualisht. Do të ishte shumë e thjeshtë për ju, por do të fitonit në sytë e këtyre të rinjve …dhe të qytetit.

Zoti Kryetar, po e mbyll duke ju kujtuar se prej ndoca kohësh Bashkia ka filluar të nisë ca emaile automatike për të reklamuar punën e saj. E, para 1 jave unë mora një email të tillë, ku ju personalisht, duke i kthyer përgjigje një qytetari që ankohej, tregonit se si i merrnit shumë seriozisht të gjitha rekomandimet e publikut. Ndoshta është kështu. …Por, po rekomandimi i këtyre 2.000 të rinjve z. Kryetar, vallë a nuk është një rast shumë më i rëndësishëm për të treguar se kjo që ju propagandoni është reale dhe jo show? A nuk është rast ideal për t’iu përgjigjur njëkohësisht kaq shumë qytetarëve të qytetit tuaj? Unë mendoj se po. Dhe ata të rinj nuk propozojnë diçka të parealizueshme, as nuk ankohen për askënd. Thjesht propozojnë diçka konkrete dhe lehtësisht të bëshme. Është shumë e lehtë që ju të bindeni për këtë. Dhe pasi të bindeni, nuk është nevoja të shkruani emaile, …veç ndikoni që ëndrra e tyre të fillojë menjëherë të sendërzohet.

Me respekt, firma e 2001-të e projektit për një qytet me biçikleta.

[Ver]

Qendra e Tiranes, ja si do te shnderrohet

Gazeta "Koha Jone"

Luljeta Ndoka, E Merkure, 14 Nentor 2007


Nje hapesire publike e gjelber, vetem me kembesore, pallat modern kulture dhe fasada per t’u pasur zili. Kjo do te jete pamja e sheshit “Skenderbej”, ne te 45 mije katroret qe bejne pjese ne te. Struktura arkitektonike nuk do te preket, godinat ekzistuese po ashtu. Projekti i ri per sheshin “Skenderbej” parashikon ndryshime thelbesore, qe do te perfshijne madje edhe nentoken. Te gjitha keto do te mund te realizohen nga 4 firma, qe do te perzgjidhen ne nje konkurs nderkombetar.

Keshilli i Rregullimit te Territorit (KRRT) vendosi dje qe te miratoje detyren e projektimit per sheshin “Skenderbej”, duke shpallur keshtu te hapur fazen e pare te projektimit. “Gjate mbledhjes se ardhshme, pritet qe te percaktohen kriteret, te cilat do t’u parashtrohen firmave pjesemarrese ne tender. Me vone, ne nje faze te dyte, ato do te paraqesin projektet e tyre, me ane te te cilave do te shnderrojne qendren e Tiranes kur te shpallen fituese”, thane dje anetaret e Keshillit te Rregullimit te Territorit. Kryebashkiaku Rama tha dje se konkursi nderkombetar do te jete i nje niveli shume te larte dhe pritet ta transformoje sheshin “Skenderbej” ne nje model te planifikimit urban, duke u bazuar ne trashegimine e vyer kulturore dhe arkitektonike te ketij sheshi. Nga ana tjeter, sipas Rames, sheshi i ri duhet te perballoje edhe sfidat e kohes dhe nevojat e reja te kryeqytetit

Sa me shume hapesire publike dhe rregull ne qendren e Tiranes. Kjo eshte ideja e gjithe shnderrimit, qe pritet te pesoje sheshi me i madh ne Shqiperi. Nje gje e tille do te mundesohet kryesisht duke e shnderruar sheshin ne qender kembesoresh dhe jo automjetesh. Parkingjet nentokesore do ta bejne te mundshme kthimin e nje metropoli plot zhurme, ne nje te ngjashem me kryeqytetet evropiane. Sipas njerit prej anetareve te Keshillit te Rregullimit te Territorit, Sokol Behaj, parkingjet mendohet te jene moderne. “Nentoka do te sherbeje jo vetem per parkime, por edhe per qendra tregtare, siperfaqja e te cilave nuk eshte percaktuar ende”, shprehet ai. Behaj sqaron se gjithcka eshte ende ne fazen e propozimeve. Sheshi “Skenderbej” perfshin nje hapesire prej rreth 45 mije m2. Nga keto, 4500 meter katrore jane te zena nga godina publike. Pra, rreth 41 mije meter katrore jane hapesire publike. Nderkohe qe eshte menduar se rreth 4500 metra te tjera do te zihen nga parkingjet nentokesore.

Parkime dhe qendra tregtare te nendheshme

Jo vetem parkime madheshtore, por edhe qendra te reja tregtare, pritet qe te ndertohen ne zemer te Tiranes. Sipas anetareve te Keshillit te Rregullimit te Territorit, parkimi eshte nje nga problematikat me delikate te kryeqytetit, ndaj eshte menduar te zgjidhet duke mos zene hapesire publike, por te nendheshme. Paraprakisht eshte propozuar qe krahas tyre, te ndertohen edhe qendra te vogla komerciale. Gjithsesi, kriteret e qarta pritet te parashtrohen gjate mbledhjes se ardhshme te KRRT-se per firmat qe do te marrin pjese ne konkursin e nivelit nderkombetare. Vetem 4 prej tyre do te shpallen fituese, ndaj gara pritet qe te jete shume e forte. Firma qe do te paraqese projektin me te mire do te jete nje nder ato fituese, te cilat do te kujtohen per shnderrimin e sheshit “Skenderbej” ne nje shesh te parametrave bashkekohore.

Ndryshimi

Pallati i Kultures, shkalle dhe fasada moderne

Projekti nuk do te jete thjesht mbushje gropash apo shtrim asfalti, por shume me teper. Sipas anetareve te KRRT-se, projekti do te perfshije edhe godinat shteterore qe bejne pjese ne sheshin “Skenderbej”. Nje prej tyre eshte edhe Pallati i Kultures, gjendja e te cilit le per te deshiruar. Te pakten per nga fasadat dhe shkallet. “Ende nuk e dime se si do te behen konkretisht, por tjetersimi i Pallatit te Kultures do te jete njeri prej kritereve qe do t’u paraqitet firmave per ta perfshire ne projekt”, shprehet anetari Sokol Behaj. Godina madheshtore e Pallatit te Kultures, me nje arkitekture te lakmueshme, do te kompletohet nga ana vizuale, pasi firmat fituese te konkursit kombetar do ta marrin ne dore per ta ndryshuar. Por, ky eshte vetem nje propozim, i cili i perket fazes se pare te detajimit te kritereve. Ky proces do te shqyrtohet gjate mbledhjeve te ardhshme.

Hotel “Dajti”, 18 mije m2 per Ministrine e Jashtme

Kalimi i Ministrise se Jashtme ne godinen e hotel “Dajtit” do te shoqerohet me shtesa te mundshme ambientesh. Keshtu, sipas anetareve te Keshillit te Rregullimit te Territorit, nga 14 mije metra katrore, qe eshte siperfaqja aktuale e ketyre ambienteve, mund te linde nevoja qe dikasterit ne fjale t’i jepet edhe nje siperfaqe prej 4 mije metra katrore, qe do t’i “merren” lulishtes mbrapa hotel “Dajtit”. Shtesa ne kete mase do te jete e mjaftueshme per Ministrine e Jashtme, e cila do te transferohet prane qendres se Tiranes. Kjo shtese do te shqyrtohet gjate mbledhjeve te ardhshme, axhenda e te cilave pritet te jete mjaft e ngjeshur, per shkak te bllokimit te Keshillit te Rregullimit te Territorit per nje vit rresht. Kthimi i hotel “Dajtit” ne godinen e nje prej ministrive me te rendesishme, pervec pikepamjes funksionale, pritet ta zbukuroje nga ana estetike kete pjese te kryeqytetit.

[SKRAPARI]

Me sa shoh un do zhduket sheshi Skenderbej. Do mbushet me ndertime....