Arkivi i gazetës elektronike sportive: "FUTBOLLI"

[Manci]

Roma-Mançester., Prefekti: Policia, korrekte

Gjatë mëngjesit të djeshëm, prefekti i Romës, Akile Serra, ka mbrojtur publikisht forcat e rendit, në lidhje me sjelljen që ato kanë mbajtur gjatë përplasjeve të tifozerive në sfidën Roma-Mançester. "Kritika ndaj forcave të rendit është një sport. Për më tepër një sport anglez, duke qenë se edhe në të kaluarën ka pasur incidente më të rënda se ato që ndodhën dje (të mërkurën)", ka komentuar ai. "Këtë herë mendoj se policia italiane ka vepruar në mënyrën më korrekte të mundshme". Më pas, Serra ka saktësuar: "Nuk është parashikuar hapja e asnjë lloj hetimi në lidhje me gjithçka ka ndodhur në stadiumin e Romës".

[Manci]

Mançester Utd. kërkon ndihmën e qeverisë për të hetuar rreth rrahjes së tifozëve të saj

Sherri në "Olimpiko", çështje diplomatike

13 mbështetës anglezë përfundojnë në spitalin e Romës pas përleshjeve


Drejtuesit e klubit të Mançester Junajted kanë akuzuar policinë italiane për "reagime të tepruara" në konfliktin që forcat e rendit kanë pasur me tifozët anglezë, gjatë ndeshjes së Ligës së Kampioneve në Romë. Mbështetësit e Romës dhe të Mançesterit kanë qenë protagonistë të sherreve jashtë stadiumit "Olimpik", përpara sfidës së luajtur të mërkurën, ndërsa policia ka përdorur shkopinjtë e gomës dhe gazin lotsjellës, për të zmbrapsur tifozët miq, në momentin që trazirat kanë vazhduar edhe gjatë ndeshjes, e cila përfundoi 2-1 në favor të skuadrës së Spaletit. 13 anglezë, të cilët gjendeshin në tribunën e stadiumit, janë shtruar në spital, njëri prej tyre me plagë në qafë, si rezultat i dhunës përpara dhe gjatë ndeshjes. Ndërkohë, UEFA ka bërë të ditur se do të hetojë në lidhje me këtë çështje. "Red Devils" janë shumë të indinjuar me sjelljen e policisë në stadiumin e kryeqytetit italian, pasi këta të fundit kanë goditur edhe tifozë të tjerë, të cilët nuk ishin përfshirë në përplasjet me tifozerinë vendase. Klubi i Premiershipit ka bërë të ditur se ata nuk janë në gjendje të ndërmarrin aksione kundër policisë, por i kanë kërkuar tifozëve që të dorëzojnë deklarata dhe prova të çdo lloji, për të ndihmuar hetimin e shtetit në lidhje me problemet e ndodhura. Në deklaratën për shtyp, të publikuar në sajtin zyrtar të Mançesterit, thuhej: "Skenat e turpshme që u panë në stadiumin ‘Olimpiko‘ të mërkurën në mbrëmje na kanë shokuar të gjithëve në ‘Olld Traford‘. Sipas këndvështrimit të klubit, policia italiane e ka ekzagjeruar me veprimet e saj, duke arritur edhe në goditjen e tifozëve të Junajted. Në situata të tilla, as klubi i Mançesterit dhe as ai i Romës nuk janë në gjendje t‘i kërkojnë policisë shpjegime për atë që ndodhi. Për këtë arsye, klubi e mirëpret shqyrtimin e këtyre ngjarjeve nga qeveria britanike dhe bëjmë të ditur se do mbledhim dëshmi dhe prova nga tifozët e pranishëm në zyrat qendrore të klubit". Sipas ligjeve italiane, policia lokale është përgjegjëse për sigurinë në stadiume, ndërsa zyra e shtypit e Ministrisë së Brendshme në Angli ka bërë të ditur se më parë do mbledhë provat nga burime të ndryshme dhe pastaj do vendosë nëse do t‘i drejtohen UEFA-s për incidentet. Drejtuesi i këtij institucioni, ministri Vernon Koaker, ka deklaruar për "BBC Radio Five Live": "Skenat që pjesa më e madhe e anglezëve pa nëpërmjet televizorit ishin shumë shqetësuese. Jam shumë i interesuar që të shqyrtoj raportimet që do vijnë jo vetëm nga policia italiane, por edhe nga policët anglezë, që ishin në stadium si edhe nga ambasada jonë në Itali. Do dëgjojmë edhe versionin e tifozëve tanë, por do flasim edhe me klubin e Junajted, për të mësuar pikëpamjen e tyre dhe për të vlerësuar se pse ndodhën këto ngjarje dhe nëse vërtet policia ishte përgjegjëse kryesore". Ndeshja çerekfinale në Champions është kthyer në një çështje diplomatike, të paktën deri në momentin që do hidhet dritë për shkaqet e asaj që ndodhi.



Dëshmia


"Policia na godiste nga të gjitha anët e mundshme"

Pas deklaratës për shtyp, të bërë nga drejtuesit e klubit të "djajve të kuq", se po mbledhin deklarime dhe prova rreth dhunës, nuk kanë munguar dëshmitë e para. Një tifoz 23-vjeçar i skuadrës së Sër Aleks Ferguson, Karli Lajs, ka bërë të ditur se policia nuk e lejoji që të filmonte skenat e përplasjes, duke e detyruar të fikë kamerën: "Ishte e qartë se policia nuk donte t‘i filmoja duke goditur tifozët tanë", ka pohuar ai. "Ishte e tmerrshme. Në momentin që po tentonin të më kuronin plagët që kisha marrë, policia vazhdonte të godiste tifozët që ndodheshin në vendet më poshtë". Mbështetësi 23-vjeçar ka vazhduar edhe më tej historinë, duke treguar ato që kishte parë: "Një tifoz kishte plagë në kokë, ndërsa një tjetri i kishte rënë të fikët, megjithatë, policia vazhdonte të përparonte drejt nesh dhe të gjuante me shkopinj gome. Po u bërtisja që të ndalonin, por ata më injoruan. Policët italiane nuk flisnin asnjë fjalë, por vetëm gjuanin nga të gjitha drejtimet. Nga plagët që mora thjesht duke u përpjekur të mbaja në duar kamerën time, duket qartë se sa egërsisht policia është sjellë me ne. Taktikat që ata përdornin ishin të shëmtuara".

[Manci]

Kapiteni verdhekuq bëri të ditur se pavarësisht nga goli i pësuar, Roma vazhdon të besojë te kualifikimi 06-04-2007

Dueli: Toti 6 gjuajtje, Kristiano 22 driblime

Sokol Kondi


Finte të dyfishta ose edhe të trefishta kundër gjuajtjeve në portë. Në këtë mënyrë janë sfiduar Kristiano Ronaldo dhe Toti: pritej që mes tyre të kishte një duel dhe kështu ndodhi. Kush fitoi? Është e vështirë ta thuash, përfundoi si një dyluftim i stilit "western", me pistoletat që nxirrnin tym, por kundërshtarët qëndruan në këmbë. Nuk shënuan, por ishin aktivë në pikat më kulminante të takimit. Kristiano Ronaldo ndërtoi golin e Runit dhe për këtë arsye në fund ndoshta fitoi ai: ai gol mund të ndikojë fatkeqësisht shumë për ecurinë e mëtejshme të Romës. U nis siç di ai: finte të dyfishta dhe slalome, e hapi mbrojtjen verdhekuqe dhe në vazhdimin e aksionit mbërriti goli. Një ndodhi kjo që përmban në vetvete një tjetër ngjarje: sulmuesi nga Liverpuli (Runi) kishte 2.703 minuta që nuk shënonte në ndeshje ndërkombëtare. Toti u përgjigj me gjuajtje në portë. Më pas iu përgjigj gazetarëve, ndryshe nga portugezi që u largua nga stadiumi në mesnatë pas testit të antidopingut: "Ky rezultat nuk na jep garanci, por mund t'ia dalim mbanë. Arritëm të mundim një skuadër të vlerës botërore si Mançesteri dhe duhet të ndihemi të kënaqur për këtë. Jam i bindur se në "Old Traford" do të luajmë një ndeshje të madhe, si në Lion." Toti, i cili ndjeu një shqetësim në këmbën e djathtë, e këmbeu fanellën me Rio Ferdinandin dhe, në dhomat e zhveshjes, edhe me Kristiano Ronaldon.
Debutimi në Romë - Ishte hera e parë e Kristiano Ronaldos në Romë. Njerëzit e panë më në fund nga pranë dhe mundën të çmonin një "as". Pas promovimit të Aleks Fergusonit ("është më i forti në botë"), djaloshi nga Madeira u paraqit siç di vetë: dy driblime dhe Mançesteri fitoi faullin e parë të lojës. Lehtësia me të cilën ai driblonte, ishte mbresëlënëse. E kapërcen gjithnjë kundërshtarin kur niset me shpejtësi dhe vetëm një herë Panuçi dhe një herë tjetër Kaseti arritën ta ndalnin. I kryen lëvizjet me lehtësinë e një balerini: është Fred Asteiri i futbollit modern. Gjatë vrapimeve të tij kapërceu edhe disa herë Totin. Kristiano Ronaldo dhe Toti këmbyen edhe rolet në njëfarë mënyre. Toti e nisi si qendërsulmues dhe e mbylli si fantazist. Portugezi e nisi si anësor dhe pas ndëshkimit të Skolsit me karton të kuq, u vendos në qendër të sulmit.
Përpjekjet e romanistit - Toti e kërkoi më shumë golin. Gjuajti 6 herë, 3 në secilën pjesë. Edhe ai hyri në lojë me një driblim në vend që u shoqërua me një harkim për suedezin Vilhelmson. Më pas nisi të kërkonte Van der Sarin. Tentativa e parë mbërriti në minutën e 14-të, një goditje dënimi që nuk e shqetësoi portierin holandez. Në minutën e 23-të, një tjetër tentativë dhe kësaj here Van der Sarit iu desh të hidhej. Në minutën e 32-të, goditja e tretë, një predhë që u nxori djersë të ftohta anglezëve. Por gjuajtja më e fuqishme ishte e fundit, ajo me të cilën ndoshta u mbyll edhe ndeshja: një e djathtë nga 20 metra, e cila mori një të prerë anësore në çastin e fundit.

[Manci]

Trajneri i Mançesterit: Do të kualifikohemi në "Old Traford", si gjithmonë 06-04-2007

Ferguson beson te gjysmëfinalja

Ergi Lubani


Trajneri i Mançester Junajtid, Aleks Ferguson, ka besim se skuadra e tij do të arrijë gjysmëfinalen, edhe pse ka humbur 2-1 me Romën në ndeshjen e parë në Itali. Roma mori kontrollin e lojës në "Olimpiko" pas kartonit të kuq të Pol Skolsit në minutën e 34-t. Golat nga Rodrigo Tadei dhe Mirko Vuçiniç u dhanë italianëve fitoren, edhe pse goli i Runit do të jetë i rëndësishëm në ndeshjen e kthimit. "Prej shumë vitesh në "Old Traford" vijnë skuadra shumë të mëdha, por nëse shënojmë, do të arrijmë të kalojmë në gjysmëfinale. Ky është mendimi im, - tha Fergusoni në një konferencë për shtyp, përpara se të mohonte fjalët e gazetarëve se e kishte konsideruar Romën si një kundërshtar të lehtë. - Çdo ndeshje në Europë është një test i rëndësishëm, por në këtë sezon jemi çuditur veçanërisht nga Roma. Ata janë fantastikë kur luajnë në stadiumin e tyre. Kështu që e dinim se do të ishte e vështirë dhe kështu doli. Vështirësia kur përballesh ndaj tyre qëndron në sistemin që ata luajnë. Pa asnjë sulmues, ata e mbingarkojnë mesfushën, kështu që herë pas here humbet topin". Fergusoni ka përgëzuar Runin, i cili ka stopuar me gjoks asistin e Solskjaerit duke shënuar golin e vetëm të "Djajve". "Ai mund të kishte goditur menjëherë, por priti që mbrojtësi të lëvizte, bëri një hap e më pas goditi, - tha Fergusoni. - Ai është vetëm 21 vjeç dhe tregon aftësi të mrekullueshme para portës". Megjithatë, skocezi ka qenë disi i mërzitur nga mbrojtësi rumun Kristian Kivu, i cili ka inkurajuar gjyqtarin gjerman, Helbert Fandel, të nxjerrë kartonin e dytë të verdhë për Skolsin. "Nuk mendoj se kartoni parë i verdhë ishte i padrejtë. Por mendoj se ishte Kivu ai që ndikoi në kartonin e dytë. Gjyqtari na tha në mëngjesin para ndeshjes se çdokush që do të inkurajonte të nxirrte ndonjë lojtar jashtë me karton, do të dënohej. Kjo nuk ndodhi".

[Manci]

U luajtën çerekfinalet e Kupës UEFA. Osasuna fitoi në Leverkusen. "Andaluzianët" mundën Totenhemin. "Paqe" në Alkmar 06-04-2007

Kupa UEFA, mbreme "foli" spanjisht

Ergi Lubani


Incidente në Sevilje...
Policia spanjolle është "përleshur" me tifozët e Totenhemit gjatë ndeshjes që skuadra angleze luajti mbrëmë në Sevilja, për çerekfinalet e Kupës UEFA. Një televizion vendas pohoi se tifozët e Totenhemit ishin përleshur me policinë, pasi më parë kishin prishur karriget e stadiumit "Sançez Pizjuan", duke i lëshuar drejt tifozëve të Seviljes. Këto incidente vijnë 24 orë pas zënkave të ndodhura në "Olimpiko", që dërguan në spital 14 tifozë të Mançesterit.


Dje u luajtën katër çerekfinalet e para për Kupën UEFA. Sevilja, mbajtësja në fuqi e këtij trofeu, përmbysi golin e disavantazhit dhe fitoi 1-0 ndaj Totenhemit. Totenhemi e filloi ndeshjen në mënyrën më të mirë të mundshme duke kaluar në avantazh me Robi Kinin, pas vetëm një minute lojë. Sevilja barazoi 19 minuta më vonë me një 11-metërsh të dyshimtë, të shndëruar në gol nga Frederik Kanute. Goli i fitores për "andaluzianët" erdhi në fundin e pjesës së parë me anë të rusit, Aleksandër Kerzhakov, i cili përfitoi nga përgjumja e mbrojtjes mike. Gjithsesi, humbja minimale me një gol të shënuar në trasferë i jep shpresë "gjelave" të Martin Jolit për ndeshjen e kthimit.
Osasuna ndodhet me një këmbë në gjysmëfinale, pasi ka fituar 3-0 në fushën e Leverkusenit, në çerekfinalen e parë të luajtur dje për Kupën UEFA. Osasuna kaloi në avantazh që në minutën e parë me anë të mbrojtësit Havier Kuejar, i cili shënoi me kokë pas krosimit të David Lopezit. Ky i fundit ishte autori i golit të dytë në të 71-tën. Dy minuta më vonë, i sapofuturi Pierr Uebo, trefishoi rezultatin duke mposhtur portierin Rëne Adler. Padyshim, që ky rezultat i jep mundësinë Osasunës të ëndërrojë gjysëfinalet në pjesëmarjen e parë të saj në historinë e Kupave të Europës. "Eshtë një ditë e madhe për Osasunën, - tha trajneri Hoze Angel Ziganda. -Një fitore e tillë, ndaj një kundërshtari të fortë si Levekuseni, na bën të ndihemi krenarë." Ndërkohë, trajneri i "aspirinave", që praktikisht janë të eliminuara, Mikael Skibe, tha: "Goli i pësuar në minutën e parë na shkoi totalisht dhe mesa duket për një kohë të gjatë. Për gjatë gjithë ndeshjes së djeshme, dhe kompormentoi edhe takimin e kthimit."
Në barazim pa gola është mbyllur ndeshja e luajtur mbrëmë në Holandë, ndërmjet Alkmarit dhe Verderit. Vendasit e Luis van Galit patën rastet e tyre për ta fituar takimin, por nuk patën fatin e duhur përpara portës së Tim Vises. Ky i fundit bëri mrekullinë në minutën e 54-t, pas tentativës së Kovermansit. Miroslav Klose, për Verderin, shpërdoroi rastin më të mirë për të shënuan golin e fitores në fundin e pjesës së dytë. Gjithçka do të vendoset në takimin që do të luhen në Bremen, javën e ardhshme. "Mund të kualifikohemi dhe tani ne jemi favoritët, - tha trajneri i gjermanëve, Tomas Shaf. - Alkmari tregoi edhe sot, që është një kundërshtar i vështirë për t'u mundur, por e dinim paraprakisht diçka të tillë dhe jemi gati për të fituar në Bremen." Ndërkohë, dy gola të shënuar në harkun e dy minutave, pas një ore lojë, nga Nuno Gomesh dhe Simao janë përgjigja që Benfika i ka dhënë Espanjolit, duke e mbyllur 3-2 çerekfinalen e parë të luajtur dje në Barcelonë dhe duke lënë gjithçka të hapur për ndeshjen e kthimit në Lisbonë. Për Espanjolin gjithçka po shkonte sipas ëndrrave më të bukura kur pjesa e parë u mbyll 2-0 me golat e Raul Tamudos dhe Reinas. Skuadra e drejtuar nga Valverde gjeti edhe golin e tretë me Valter Pandianin në minutën e 58-të. Por pikësisht atëherë kur dukej se Espanjoli po garantonte kalimin e turit erdhën dy golat e portugezëve. Fabricio Mikoli pasoi te Nuno Gomesh, i cili ngushtoi rezultatin në 3-1, përpara se dy minuta më vonë, Simao të vuloste shifrat përfundimtare të ndeshjes në 3-2.
Ergi Lubani

Leverkusen - Osasuna 0-3
Në "BayArena", Levekusen
Shënues: Kuejar 1', D.Lopez 71', Uebo 73'
Levekuseni: 22 R.Adler, 5 Hagui, 4 Huan, 19 M.Babiç, 27-Kastro (13-Athirson 69'), 11-Kieseling (10 P.Freier 46'), 25 B.Shnajder, 6 S.Rolfes, 7 T.Barneta, 9 S.Barbarez, 12 A.Voronin.
Osasuna: 13 Rikardo, 2 H.Izkuierdo, 7 S.Kruçaga, 5 Kuejar, 19 E.Korrales, 12 Huanfran (11-Valdo 67'), 6 R.Garsia (22-Munjoz 82'), 16 D.Lopez, 35 I.Domingez, 9 S.Milosheviç, 18 R.Soldado (15-P.Uebo 72').
Gjqytar: T.Hauge (Norvegji)
Kartonë të verdhë: Huanfran, Athirson, D.Lopez, Korales

Sevilja - Totenhem 2-1
Në "Sançez Pizjuan", Sevilje
Shënues: Kanute 20' (pen), Kerzhakov 36' / Kin 1'
Sevilja: 1 A.Palop, 4 D.Alvesh, 2 H.Navarro, 14 Zh.Eskude, 3 D.Kastedo (19-Dragunoviç 68'), 15 H.Navas, 8 K.Poulsen, 11 Renato (18-Marti 61'), 6 Adriano, 9 A.Kerzhakov, 12 F.Kanute.
Totenhemi: 1 P.Robinson, 7 P.Stalteri, 2 P.Shimbonda, 20 M.Douzon, 3 Li Jong, 8 Xh.Xhenas, 4 D.Zokora, 6-T.Tianio (14-Gahli 84'), 25 A.Lenon (15-S.Melbrank 80'), 9 D.Berbatov, 10 R.Kin.
Gjyqtar: A.Hamer (Luksemburg)
Kartonë të verdhë: David, Robinson, Li, Zokora, Tianio

Espanjol - Benfika 3-2
Në "Olimpiko", Barcelonë
Shënues: R.Tamudo 17', Reira 33', Pandiani 58' / N.Gomesh 63', Simao 65'
Espanjol: 1 G.Iraizoz, 30 F.Çika, 21 D.Harke, 19 M.Torrejon, 8 M.Zabaleta (4-La Kruz 69'), 18 F.Rufete (14-Ito 80'), 22 Moises, 9 I.De la Penja, 11 A.Riera, 10 L.Garsia, 23 R.Tamudo (7-V.Pandiani 53').
Benfika: 12 Kuim, 22 Nelson, 28-Zh.Koimbra (10-M.Rui Kosta 36'), 3 Anderson, 5 Leo, 6 Petit, 23 M.Marinjo, 26 Karagunis, 20 Simao, 21 N.Gomesh, 27 Darlei (30-F.Mikoli 30').
Gjyqtar: E.Bramhar (Holandë)
Kartonë të verdhë: Anderson, Simao, Zabaleta, Riera

Alkmar - Verder 0-0
Në "DSB-Stadium", Alkmar
Alkmar: 16 B.Vaterman, 23 G.Steinson, 2 K.Jaliens, 14 R.Donk, 5 T.De Kler, 27 Zh.Jener (29-Lens 87'), 20 D.De Ziuv (3-Luirnik 76'), 11 M.Martens, 18 M.Dembele, 9 Sh.Arveladxe, 19 D.Kovermans (10-Kziomer 83')
Verder: 18 T.Vise, 8 K.Fritc, 29 P.Mertesaker, 4 Naldo, 5 P.Uome, 7 J.Vranjes, 15-P.Ovomojela, 22 T.Frings, 10 Diego, 23-H.Almeida (14-A.Hunt 67'), 11 M.Klose.
Gjyqtar: O.Benkereça (Portugali)
Kartonë të verdhë: Stienson, Jener, Fritz

[Manci]

Një muaj "stop" për Visenten

Driten Vishe


Mesfushori i Valencias, Visente Rodriguez, do të mungojë në ndeshjen e kthimit ndaj Çelsit pas dëmtimit në "Stemford Bridge", ka konfirmuar klubi të enjten. Mesfushori është dëmtuar në minutën e 57-të dhe nuk do të luajë në sfidën e kthimit. Akti i dytë do të luhet të martën e ardhshme në "Mestaja". Mjekët e klubit kanë deklaruar se Visente do të mungojë për rreth një muaj. Është dëshpëruese, pasi ai na jep cilësi. Ai mund të ndryshojë rrjedhën e lojës dhe kur nuk është ai, ne nuk jemi më të njëjtët, - tha trajneri i Valencias, Kike Sançez Flores. - Tani kemi shumë lojtarë në infermieri, por nuk duhet të shqetësohemi për një kohë të gjatë", - shtoi Floresi.

Stiven Xherrard mendon për Liverpulin finalist
Stiven Xherrard ka paralajmëruar rivalët e mundshëm në Europë, duke këmbëngulur se ai po arrin formën më të mirë. Mesfushori nuk e nisi mirë sezonin, pas një vere të vështirë pas përfundimit të botërorit. Në javët e fundit ai ka zhvilluar disa ndeshje të mira me Anglinë dhe me klubin, madje shënoi për "të kuqtë" në ndeshjen e parë kundër PSV-së. Fitorja e anglezëve në Holandë i ka vendosur ata shumë pranë gjysmëfinales dhe Xherrardi mendon se forma po i rikthehet në momentin e duhur. "Që nga Krishtlindjet ndiej se po rikthehem në formë, - tha 26-vjeçari. - Po stërvitem më mirë fatmirësisht, sepse tashmë do të luhen ndeshjet e rëndësishme. Ndihesha shumë i mërzitur në fillim të sezonit, sepse ndihesha i pafuqishëm dhe letargjik, si fizikisht, ashtu dhe mendërisht". Liveruli fitoi Championsin në 2005-ën dhe ai ka thënë se klubi po ndien përsëri shijen e suksesit. Ai shtoi: "Na është rikthyer ajo shije e para dy viteve kur fituam trofeun në Stamboll, megjithatë jemi të kujdesshëm. Kemi shumë punë për të bërë para se të mendojmë për finalen e Athinës".

[Manci]

Spanjollët kanë marrë rezultatin ideal në transfertën në "Stemford Bridxh" 06-04-2007

Valencia: Arritëm atë që deshëm

Driten Vishe


Valencia ka besim se ky barazim 1-1 ndaj Çelsit do t'i ndihmojë ata të kualifikohen në gjysmëfinale. "Na ka lënë një shije të mirë, - tha mesfushori David Albelda për gazetarët. - Na ka vendosur në pozitë më të mirë për ndeshjen e kthimit. Para ndeshjes të gjithë kërkonim një rezultat të tillë. Kundër Interit barazuam në "San Siro" dhe arritëm të kualifikohemi pa pësuar gol në "Mestaja". Do të na duhet të zhvillojmë një tjetër ndeshje të madhe, në mënyrë që të avancojmë në gjysmëfinale", - shtoi ai. Ish-mbrojtësi i Çelsit, Asier del Horno, tha: "Arritëm rezultatin që kërkonim". David Silva ka kaluar Valencian në avantazh në minutën e 30-të, pas një goditjeje të mrekullueshme nga 25 metra. Por Çelsi ka barazuar në të 53-ën me anë të Didië Drogbasë, i cili ka shënuar golin e 30-të në këtë sezon. "Duhet të jesh i përqendruar për të luajtur në ndeshje të nivelit të tillë dhe i vetmi gabim që bëmë në 90 minuta, na kushtoi fitoren", - deklaroi Albelda. Ndërkohë që të kënaqur me rezultatin, lojtarët e Valencias kanë pranuar të gjithë se do të jenë të kujdesshëm në ndeshjen e kthimit. "Kualifikimi për ne është 51% i mundur, - tha drejtori teknik i Valencias, Amedeo Karboni. - Çelsi është një skuadër e madhe, me shumë stil italian në lojë dhe përqendrohet më së shumti në mesfushë. Kjo do të thotë se në Mestaja ata do të jenë më të rrezikshëm". Një nga lojtarët që mund t'u mungojë spanjollëve në ndeshjen e kthimit, është Visente. Mediat spanjolle kanë shkruar se ai do të mungojë për rreth një muaj. "Nuk do ta kemi Visenten në dispozicion për disa ndeshje. Është dëshpëruese, pasi ai është tepër i talentuar dhe kur ai nuk është, mungesa e tij ndihet shumë", - tha trajneri i Valencias, Kike Sançez Flores.

[Manci]

"Blutë" rrezikojnë eliminimin nga Valencia, që në "Mestaja" ka eliminuar italianët falë "katenaços" 06-04-2007

Çelsi, frikë nga "precedenti Inter"

Driten Vishe


Çelsi është përballë të njëjtit fat si viktima e fundit, Interi, pasi spanjollët kanë arritur të marrin një barazim 1-1 në ndeshjen e parë çerekfinale me anglezët. Valencia është një skuadër e mrekullueshme kur luan në "Mestaja", ku ata kanë humbur vetëm një ndeshje në shtëpinë e tyre gjatë të gjithë sezonit, duke e ndërtuar suksesin mbi një stil pak sa "katenaço" në mbrojtje dhe duke përfituar nga kundërsulmi. Valencia u dha fund shpresave të Interit në raundin e parë duke barazuar 2-2 në Itali dhe kontrolloi lojën në "Mestaja" duke barazuar 0-0, ndeshje që përfundoi me një "sherr klasik" mes lojtarëve të të dyja skuadrave. Ashtu si Interi, i cili dështoi në përpjekjet e tij, tashmë Çelsi duhet të shkojë në Spanjë me mendimin për të shënuar të paktën një gol dhe të parandalojë ndonjë gol të Valencias. Ka qenë goli i David Silvas shkaktari i kësaj matematike që do të "torturojë" Çelsin në ndeshjen e kthimit të javës tjetër. "Blutë" kanë barazuar pas një gabimi të mbrojtjes së Valencias, ku Eshli Kol harkoi një top vertikal për Didië Drogbanë, i cili u gjend i vetëm para Kanizaresit. Por për fatin e tyre të keq, Çelsi nuk ka arritur të shënojë një tjetër gol që do t'ia lehtësonte detyrën në ndeshjen e kthimit. Mbrojtja e Valencias u është përgjigjur shumë mirë sulmueve të Çelsit pas barazimit, ndërkohë që ka rrezikuar disa herë me anë të David Vilës. Trajneri Kike Sançez Flores pret që në javën tjetër skuadra e tij të sulmojë më shumë, por pritet që Valencia të mos ndryshojë asnjë lojtar në formacion dhe as modelin e lojës. "Mendoj se do të luajmë në të njëjtën mënyrë si në ndeshjen e dytë kundër Interit, - tha ai për gazetarët. - Imagjinuam vetëm se nuk kishim shënuar në ndeshjen e parë dhe luajtëm në atë mënyrë. Mendoj se do të gabojmë nëse do të qëndrojmë në mbrojtje kundër një skuadre si Çelsi. Kështu që s'do ta bëjmë diçka të tillë". Anglezët duhet të jenë më të freskët javës që vjen, për të mundur mbrojtjen e Valencias dhe dëmtimi i Arjen Robenit do të jetë një minus i madh për "Blutë". Edhe pse Xho Kol, një tjetër lojtar sulmues i Çelsit, u rikthye pasi mungonte që nga muaji nëntor, është shumë larg formës së mirë fizike dhe ka luajtur ndaj Valencias vetëm 15 minuta. "Më vjen mirë, por kam nevojë për Xho Kolin e vërtetë, - tha trajneri Hoze Mourinjo. - Ai është një djalosh fantastik dhe luftoi shumë për t'u rikthyer te ne. Mendoj se do të vazhdojë ta bëjë. Kemi ende një muaj e gjysmë për të luftuar dhe do të kemi nevojë për të, për këtë ndihem i lumtur. Por duhet të jemi pragmatistë... ai nuk ishte gati për më shumë se 15 minuta". Koli nuk mendohet se do të zërë menjëherë një vend në formacion pas një mungese aq të gjatë, e cila e lë detyrën për të shënuar përsëri mbi shpatullat e Drogbasë dhe të Shevçenkos. Megjithatë, Mourinjo ka paralajmëruar Valencian të mos gëzohet para kohe. "Nëse do të isha në vendin e tyre, do të isha tepër i kujdesshëm, - tha ai. - Por nëse kemi një gjyqtar të mirë, i cili nuk do të ndikohet nga atmosfera, çfarë na mungon të marrim rezultatin që duam atje?" Mourinjo shtoi se nëse Çelsi do të eliminohet atë natë, ai do t'i çojë fëmijët e tij të shohin keç. "Nëse fitojmë, atëherë do të kemi arritur në gjysmëfinale, nëse humbasim, do të çoj fëmijët e mi të shohin ndeshje keçi më 24 prill".

[Manci]

Trajneri i Çelsit ka blerë një veturë me timonin majtas, si në Europë dhe ndryshe nga Anglia 06-04-2007

Hoze Mourinjo përgatit arratisjen

Driten Vishe


Gjërat sa vijnë e qartësohen: Hoze Mourinjos i ka ardhur në majë të hundës te Çelsi dhe po përgatitet për t'u larguar. Në anën tjetër, mendohet se tashmë marrëdhëniet e tij me pronarin rus janë prishur dhe janë të parikuperueshme, dhe ka ardhur koha që këtë verë ai të largohet për të kërkuar fatin gjetkë në këtë kontinent". Nuk është aspak surprizë, pasi trajneri portugez është kapur nga paparacët në Angli, duke blerë një Porshe Kajen me timon nga krahu i majtë.
Madrid Natyrisht, në Angli timoni është në krah të djathtë dhe për të marrë një makinë me timon nga krahu i majtë, duhet ta porosisësh prej disa kohësh dhe të presësh shumë. Është e qartë që trajneri portugez e ka kryer me një qëllim këtë porosi, në mënyrë që ta përdorë makinën në ndonjë shtet tjetër, ku timoni është në krahun tjetër. 44-vjeçari Mourinjo, i cili ka fituar dy sezone radhazi Premier Ligën dhe që është në garë për të tretin, përveç Ligës së Kampioneve dhe Kupës së Anglisë duket se në kohët e fundit ka humbur nga ai shpirt konkurrues dhe i fitores që e karakterizonte që nga mbërritja e tij në Angli.
D.Visha

[Manci]

Trazirat ndërmjet tifozëve të Mançesterit dhe policisë romane po shndërrohen në një "çështje" ndërkombëtare! 06-04-2007

UEFA heton përleshjet në "Olimpiko"

Ergi Lubani


11 tifozë të Mançesterit kanë përfunduar në spital pas trazirave të ndodhura të mërkurën në "Olimpiko". UEFA pret raportin e të deleguarit përpara se të fillojë hetimin. Klubet rrezikojnë dënime të rënda, ndërkohë që shtypi anglez "shpërthen" kundër italianëve: "Policia i rrahu tifozët si më 1998-n."

11 tifozë të Mançester Junajtidit kanë përfunduar në spital pas përplasjeve me policinë italiane përpara dhe gjatë ndeshjes së luajtuar të martën në "Olimpiko", për çerekfinalet e Ligës së Kampioneve. Sipas BBC-së, që i referohej një burimi në Ambasadën Angleze në Itali, dy prej këtyre tifozëve e kanë kaluar gjithë natën në spital nën vëzhgimin e mjekëve. Ndihmën e parë mjekësore e kanë marrë edhe dy tifozë të Romës.
Hetimi i UEFA-s - UEFA do të hetojë në lidhje me ato që kanë ndodhur në "Olimpiko". Zëdhënësi i shtypit në organin drejtues të futbollit europian, Gailard, u shpreh: "Hetimi akoma nuk ka nisur, sepse po presim të veprojmë në rrugë zyrtare. Po presim raportin e delegatit dhe në bazë të tij do të vendosim se çfarë do të bëjmë në lidhje me këtë çështje. I takon komisionit të disiplinës të studiojë pamjet dhe të shohë çfarë ka ndodhur në të vërtetë. Ligji italian thotë se policia duhet të mbajë rregullin brenda dhe jashtë stadiumeve. Në Itali impiantet ku zhvillohet ndeshja, i përkasin bashkisë dhe jo skuadrave të futbollit. Nuk ekzistojnë "stewards"-it si në Angli. Ky mund të ketë qenë shkaku i irritimit, por do të shohim se çfarë masash duhet të martë UEFA për të parandaluar këto incidente."
Dënimet - Roma dhe Mançesteri rrezikojnë dënime të rënda. Verdhekuqtë mund të dënohen, sepse nuk kanë garantuar kushtet e duhura të sigurisë në stadiumin "Olimpiko", ndërsa "Djajtë" rrezikojnë për faktin që zënka masive është shkaktuar nga tifozët e tyre, deri diku provokatorë ndaj policisë. Për Mançesterin ky është rasti i dytë i tillë, pas atij të ndodhur në Lilë, në raundin e kaluar. "Do të shohim rolin e tifozëve të Mançesterit, sepse edhe më parë na kanë krijuar probleme," - tha Gailardi. Precedenti Fejënord po tremb britanikët. Skuadra nga Roterdami u skualifikua nga Kupa UEFA, pasi tifozët e saj u konsideruan si provokatorë në dy "përleshje" të njëpasnjëshme.
Shtypi anglez - "Roma, vend i rrezikshëm, sulmohen tifozët e Mançesterit." Shtypi anglez u ka kushtuar një hapësirë të gjerë incidenteve të ndodhura në "Olimpiko". Titujt dhe artikujt e tyre tregojnë sesi për tifozët e Mançesterit, mbrëmja filloi keq dhe u mbyll akoma edhe më keq. "Pavarësisht nga problemet që Mançesteri pati në fushën e lojës, - shkruante "The Times", - vizita në stadiumin "Olimpiko" do të mbahet mend për dhunën e pësuar nga tifozët e tij, prej policisë italiane që shkaktoi të plagosur edhe brenda stadiumit. Policia sulmoi tifozët, ashtu siç ndodhi në vitin 1998, kur Anglia luajti me Italinë për eliminatoret e Kupës së Botës."
"The Sun", kundër policisë - Ndërkohë që shoqata e tifozëve të Mançesterit po përgatit një dosje me foto dhe dëshmi në lidhje me ngjarjen, e përditshmja prestigjioze "The Sun" kapet kryesisht me forcat e rendit në Itali, që sipas saj nuk kanë hezituar për të ushtruar dhunë fizike. "Një polic, - shkruante "The Sun", - u pa që e goditi për dhjetë herë me radhë një tifoz. Një tjetër pati nevojë për ndihmën e dy miqve, për t'i shpëtuar nga duart." Në gazetë flet edhe për ngjarjet që ndodhën jashtë stadiumit, përpara fillimit të ndeshjes. I përfshirë në këtë zënkë ka qenë edhe fotografi i kësaj redaksie, 45-vjeçari Xhim Klark. "Një bandë me fytyrë të mbuluar" i mori aparatin e punës me vlerë 7 mijë euro. "Mendova se do të më rrihnin, - tregoi ai. - Pata frikë për jetën time."