Arkivi i gazetës elektronike sportive: "FUTBOLLI"

[km92]

Eliminimi në 1/8-t e Championsit nxjerr në pah defektet e të gjithë ambientit "merenges": nga drejtuesit te futbollistët

Real Madrid, dështimi i një projekti

Dështimi i Realit të Madridit për të kapërcyer pengesën e parë të vështirë në Ligën e Kampioneve, për sezonin e tretë rresht, duket se shkatërroi një tjetër projekt të shtrenjtë që "merengesit" kishin ideuar për ekipin. Eliminimi në sezonin e kaluar nga Arsenali sinjalizoi vdekjen e eksperimentit "galaktik" të Florentino Perezit dhe humbja e kësaj jave ndaj Bajernit duket se paralajmëron fundin e programit ringjallës të Ramon Kalderonit. Kalderoni erdhi në krye në korrik me premtimin për të ndaluar thatësirën e trofeve në klub dhe rekrutoi Fabio Kapelon si trajner dhe ish madrilenin Predrag Mijatoviç si drejtor sportiv. Rezultatet, sipas Kalderonit, do të garantoheshin nga një sërë profesionistësh të sprovuar, përfshi këtu kapitenin e Italisë, Fabio Kanavaro, që fitoi Kupën e Botës, sulmuesin holandez Rud van Nistëlroi dhe mesfushorin brazilian Emerson. Në të njëjtën kohë, klubi tha se do të shtronte themelet e së ardhmes, duke blerë një brez të ri lojtarësh premtues si Hoze Antonio Rejes dhe Mahmadu Diarra. Tetë muaj më vonë, pas eliminimit të parakohshëm nga Kupa e Mbretit dhe Liga e Kampioneve, projekti i ri duket në prag kolapsi. Do të duhej një ndryshim dramatik i rrotës së fatit në kampionat, për të mos lejuar që Reali ta mbyllë pa trofe sezonin e katërt rresht. Pas "fiaskos" kundër Bajernit, si Kalderoni, ashtu edhe Mijatoviçi nuk janë në gjendje të garantojnë që Kapelo do të qëndrojë trajner deri në fund të sezonit. "S'mund t'i përgjigjem kësaj pyetjeje, - ishte reagimi i parë i Mijatoviçit, por që në një intervistë më vonë shtoi. - Kapelo do të jetë në provë të shtunën në "Kamp Nou". Kalderoni nga ana tjetër ia lë barrën Kapelos. "Gjithçka tashmë varet nëse trajneri ndihet i aftë të na nxjerrë nga kjo situatë. S'më pëlqen të ndërroj trajner në mars, por patjetër që duhet ta analizojmë situatën".
KRIZA Reali ka qenë larg formës gjatë gjithë sezonit, por një seri hapash fals të rivalëve të tyre në Primera Divizion, i ndihmuan madrilenët të shtyjnë për më vonë kambanat e alarmit. U desh eliminimi nga Bajerni që të ekspozoheshin problemet e tyre që patjetër përligjin përkufizimin e një krize. Mbrojtje e pasigurt, mesfushë aspak krijuese dhe një sulm "pa dhëmbë", kontribuan në shuarjen e ëndrrës së Realit për të fituar për herë të 10 kurorën e Europës. Edhe pse pësuan një gol që pas 10 sekondash në takimin e kthimit, Reali kishte boll kohë për të kthyer rezultatin, por nuk arritën të mundnin një Bajern që, me thënë të drejtën, ishte disi mediokër. Reali u dëmtua edhe nga mungesa e Devid Bekhamit që pati gisht në të tre golat e ndeshjes së parë (3 2). Vendimet e klubit për të dhënë hua sulmuesin Hulio Baptista tek Arsenali dhe pastaj largimi i Ronaldos te Milani, tashmë po rezultojnë të gabuara. Treguan mungesën e planifikimit në klub, pasi Antonio Kasano që më tepër luan me emër se me këmbë dhe Robinjo ishin dy lojtarët që u ngarkuan me përgjegjësinë më të madhe për të bërë realitet rikthimin e Realit. "Më vjen keq, sepse kanë ndodhur gjëra që nuk arrij t'i shpjegoj, - e pranon Mijatoviçi. - U eliminuam nga një ekip që nuk është shumë i mirë".

[km92]

Podolski: Tani gjithçka është e mundur

Lukas Podolski ngul këmbë që "gjithçka është e mundur" për Bajernin pas fitores kundër Realit, që u siguroi çerekfinalen në "Champions" për herë të parë pas tri sezonesh. "Hymë në fushë për të dhënë maksimumin që në topin e parë dhe u shpërblyem", - tha Podolski. 21 vjeçari humbi një rast të mirë për ta dyfishuar rezultatin nga mesi i pjesës së parë, kur Bajerni e spostoi lojën në gjysmëfushën e miqve dhe Makai bashkë me Van Bomelin e detyruan Iker Kasiljasin të bënte dy pritje të vështira. Vendësit më në fund shënuan golin e dytë në minutën e 66-të që i dha qetësinë Bajernit. Por gjermanët u detyruan të shtrëngojnë dhëmbët dhe të rrinë me zemër në dorë në tetë minutat e fundit kur Nistëlroi shënoi dhe dy lojtarë u larguan me të kuqe. Një psherëtimë çlirimi do të kenë lëshuar të gjithë gjermanët kur goli i Serxho Ramosit në fund u anulua për prekje të topit me dorë. "Në 10 minutat e fundit ishim nën presion, sepse ata u hodhën të gjithë në sulm, por rezistuam. Nëse luajmë dhe vrapojmë si sot, gjithçka është e mundur për ne në "Champions", - thotë Podolski.

[km92]

Trajneri: Dua që të mbetemi realistë, por nga Anglia largohemi me ëndrrat tona

Ronald Kuman, me PSV-në drejt historisë

Trajneri i PSV Eindhovenit, Ronald Kuman, i ka shtuar karrierës së tij një tjetër moment të bukur në Ligën e Kampioneve, së bashku me të besuarit e tij, duke eliminuar Arsenalin dhe duke arritur çerekfinalet. Ish-lojtari i përfaqësueses holandeze shënoi golin e fitores për Barcelonën kundër Sampdorias në finalen e 1992-shit në "Uembli" dhe vitin e kaluar, si trajner i Benfikës, ai eliminoi kampionët në fuqi të Liverpulit në "Anfild". Gjithashtu, ai ka ishte në drejtim të Ajaksit në 2002 03, kur barazuan në shtëpi dhe jashtë fushe. Barazimi 1-1 i së mërkurës në "Emirates Stadium", një rezultat që i dha kualifikimin PSV-së, ka qenë momenti i tij më i bukur si trajner. "Nuk e di se cila është magjia që ka Anglia, - tha Kumani për gazetarët. - Këtë e kam bërë edhe me Ajaksin dhe me Liverpulin kur isha te Benfika, dhe ky ishte rasti i fundit. Ndoshta duhet të marr ndonjë klub anglez në drejtim". Kanë mbetur dhe tri skuadra angleze në 1/4 e Champions-it dhe ndoshta Kumani po i uron vetes një përballje me një nga skuadrat e mbetura angleze. "Është gjithmonë bukur të ndeshesh me skuadrat angleze, sepse atmosfera është e mrekullueshme, - tha ai. - Janë tetë skuadra të mbetura, por do të dëshiroja të hakmerresha ndaj milanit për disa gjëra të së kaluarës". Besimi i Kumanit si trajner është rritur pas dy ndeshjeve shumë të disiplinuara ndaj Arsenalit dhe tashmë PSV-ja është duke ripërsëritur historinë e sezonit 2004 05, kur humbi ndaj Milanit në gjysmëfinale. "Ëndrrat janë të bukura, por dëshiroj të jemi realist. Të dielën do të ndeshemi me Ekselsiorin dhe duhet të jemi të kujdesshëm, - tha ai përpara se të falënderonte lojtarët për arritjen. - Taktikisht ishim perfekt. Ndërsa në aspektin cilësor, skuadrat e tjera janë më mirë. Në pjesën që na ka mbetur, mund të ndodhë gjithçka. Kjo është fantastike". Një poblem për holandezët ka qenë dëmtimi i sulmuesit të Bregut të Fildishtë, Aruna Kone, i cili ka dalë para përfundimit të pjesës së parë nga fusha, për shkak të një problemi me gjurin. "Ai do të mungojë për dy ose tri javë", - tha Kumani. Mbrojtësi brazilian, Aleks, tha se ndeshja ndaj Arsenalit ishte e çuditshme, pasi ai asnjëherë nuk kishte shënuar për dy skuadra më parë.
Autogoli i brazilianit ndikoi disi në rrjedhën e takimit, por më pas ai është shndërruar në hero duke shënuar golin e barazimit dhe të kualifikimit vetëm shtatë minuta nga përfundimi i takimit. "Është hera e parë që kam luajtur një ndeshje të tillë, - tha 24-vjeçari. - Nuk mendoj se ka shumë lojtarë që mund të kenë një histori të ngjashme. Jam i lumtur që arrita ta shlyeja gabimin dhe që arritëm të kualifikoheshim".

[km92]

Vengeri u ka besuar të rinjve, por eliminimi nga të trija kupat nxjerr disa pikëpyetje


Arsenal, mbetet vetëm kampionati

Një sezon jo i mirë për Arsenalin është prishur më tej nga eliminimi i tyre nga Liga e Kampioneve, nga holandezët e PSV Eindhovenit. Në fillim ata u përgëzuan për talentet e reja që po përdoreshin nga trajneri Arsen Venger, ndërsa tashmë problemet janë shfaqur me eliminimin e tyre nga holandezët e Eindhovenit dhe pas humbjes në finalen e Kupës së Ligës. Ka shumë faktorë prapa këtyre dështimeve, ku përfshihen dëmtime të lojtarëve dhe kalendari i ndeshjeve që komplikohet shumë nga ndeshjet e kupës. Kapiteni dhe frymëzuesi i "Topçinjve", Tierri Henri, nuk është aktivizuar në shumë ndeshje të këtij sezoni dhe rikthimi i tij në pjesën e dytë të ndeshjes së të mërkurës nuk mund të kishte shkuar më keq. Jo vetëm që ai kishte probleme me gjendjen fizike, por edhe me stomakun, të cilat e detyruan Vengerin të deklaronte se do ta detyronte të qëndronte jashtë fushave për rreth tri javë. Dy lojtarë të tjerë sulmues munguan në ndeshjen ndaj Eindhovenit, holandezi Robin van Persi dhe mesfushori çek Tomas Rosiçki, ndërkohë që mbrojtja ishte e rigjeneruar me rikthimin e Emanuel Eboue, ku edhe mesfushori i qendrës, Xhilberto, ishte rikthyer në qendër të mbrojtjes. Kjo u ka dhënë mundësinë dy 19-vjeçarëve, Denilson dhe Çesk Fabregas, mundësinë për të luajtur në sfidën vendimtare. Megjithatë, këta djem të rinj janë ende në fillim të karrierës dhe po zbulojnë nivelin më të lartë, i cili nuk fal as gabimet më të vogla. Duke lënë mënjanë mungesat dhe lodhjen, problemi më i madh i Arsenalit është skuadra e re në moshë, e cila nuk është ende e gatshme për sfidat e mëdha. Të besuarit e Vengerit mund të jenë shumë argëtues në lojën e tyre, por në momente kyçe të këtij sezoni ata kanë treguar se nuk dinë të jenë fituesit. Edhe pse Fabregasi mund të bëhet në të ardhmen një nga mesfushorët më të mirë në botë dhe Xhilberto tashmë i ka këto cilësi, përsëri Arsenalit i mungon disi autoriteti që vjen nga eksperienca. Në të kaluarën, këtë rol e kryente Patrik Vieira. Në mbrojtje ata kanë probleme me topat në ajër dhe këtë e vërteton goli i Drogbasë në finalen e Kupës së Ligës si dhe goli fatal i Aleksit në ndeshjen e e kthimit. Në sulm, Arsenali do të kishte nevojë për një sulmues që nuk di të falë, si Henri. Hulio Baptista nuk ka shkëlqyer në këtë sezon dhe mund të rikthehet përsëri në Madrid, ndërkohë që Emanuel Adebajor ka lënë vetëm një shenjë deri tani me golin fitues ndaj Mançester Junajtid në muajin shtator. Sulmuesi togolez ka shënuar edhe disa gola të rëndësishëm në kupë, por në Premier Ligë nuk ka dhuruar ndonjë gjë të veçantë. Megjithatë, Arsenali ka ende një objektiv dhe ai është arritja e një vendi në katër të parat e Premier Ligës. Kjo pasi në 14 ditë u eliminua nga tri kupat, ku merrte pjesë.

[km92]

Klod Pyel: Vendosën episodet

Trajneri i Lilës, Klod Pyel, është i mendimit se ka pasur pak diferencë mes skuadrës së tij dhe Mançesterit në ndeshjen e "Old Trafordit". Skuadra franceze u fut në takimin e kthimit me disavantazhit e një goli në fushën e saj dhe ka humbur edhe në ndeshjen e dytë falë një goli të bukur me kokë të suedezit Henrik Larson. Por Lila e vendosi Mançesterin nën presion të madh përpara minutës së 72-të, kur anglezët kaluan në avantazh dhe Pyeli është i mendimit se ata mund të kishin barazuar në rast se Mançesteri nuk do të kishte shënuar me anë të Larsonit. "U vendos me disa momente të vogla, - tha Pyeli. - I vendosëm nën presion dhe krijuam disa raste për të shënuar. Është për të të ardhur keq që e pësuam atë gol në atë moment, pasi po e kontrollonim ndeshjen". Ngjarjet nga ndeshja e parë kanë dominuar shtypin në javët e kaluara, por Pyeli mendon se ato momente i përkasin së kaluarës. Ai shpjegoi: "Nuk duhet të flasim më për ndeshjen e parë. Kemi folur mjaft". Mbrojtësi i Lilës, Matjë Shalme, ka qenë krenar për përpjekjet e skuadrës së tij, por ka pranuar se Mançesteri e meritoi kualifikimin. "Dhamë aq sa kishim mundësi dhe nuk kemi asnjë arsye që të na vijë turp nga vetja, - tha ai. - Nëse merr parasysh dy ndeshjet, mendoj se skuadra më e fortë arriti të kualifikohet".

Trajneri i Sëlltikut
Gordon Strakhan përgëzon skuadrën
Gordon Strakhan nuk mund të bëjë asgjë më shumë sesa të përgëzojë lojtarët e tij, pasi Sëlltiku u eliminua nga Milani në kohën shtesë. Skocezët kanë arritur ta frenojnë Milanin në kohën e rregullt deri në momentin kur Kaka theu heshtjen në minutat e para shtesë. Të besuarit e Strakhanit nuk kanë arritur të bëjnë më asgjë dhe kjo mund të quhet një humbje me nder. "Ishte një mbrëmje e mrekullueshme, - tha Strakhani. - Një stadium i mrekullueshëm, atmosfera si dhe të dyja skuadrat. Milani është në nivel më të lartë teknik se ne, ndërsa ne kemi më shumë shpirt skuadre, vullnet dhe vendosmëri. Jam shumë krenar për lojtarët e mi. Nëse do të ekzistonte ndonjë trofe i Ligës së Kampioneve për përpjekjet dhe vullnetin, atëherë ne do të mbanim vendin e parë". Strakhani mendon se eksperienca në Ligën e Kampioneve të këtij sezoni do t'i ndihmojë shumë lojtarët e tij. "Nëse do të përmirësohemi në nivelin teknik, atëherë do të ishim një skuadër e vështirë për t'u mundur, - vazhdoi ai. - Kemi kaluar një eksperiencë të bukur dhe mendoj se lojtarët kanë kaluar një mbrëmje të mirë". Ndërkohë, Strakhani ka refuzuar të komentojë një moment të një penalltie të dyshimtë, kur Paolo Maldini preku topin me dorë në hyrje të zonës. Ai shtoi: "Nuk dëshiroj ta prish një mbrëmje të tillë me tema gjyqtarësh. Kjo natë u përket lojtarëve që luajtën në këtë ndeshje dhe tifozëve të të dyja skuadrave".

[km92]

Telefoni i mjekut, në duart e gabuara!

Një telefon i shtrenjtë, me të gjithë numrat e telefonit të lojtarëve të Mançester Junajtid, është vjedhur pak ditë më parë dhe kjo vjedhje mund të ketë pasoja të papëlqyeshme për të gjithë "Djajtë e kuq". I përkiste mjekut Xu, specialist i agopunturës dhe mjekësisë alternative, i cili shpërndan te mjekët kinezë të gjithë lojtarët me probleme të komplikuara. Telefoni përmban shumë të dhëna të domosdoshme për punën e tij dhe tashmë ka rënë në duar të keqbërësve, me një plan për të shqetësuar Runin dhe pjesën tjetër të skuadrës. Ai që e ka vjedhur, ka kontaktuar me disa nga lojtarët, duke u bërë të ditur që nëse nuk paguajnë një shumë të madhe stërlinash, do të shqetësohen në çdo orë të natës. Madje janë dërguar shumë mesazhe me provokime nga më të ndryshmet.

Mesfushori i Mançesterit
K.Ronaldo mendon për rinovimin
Ronaldo dëshiron të qëndrojë te Mançesteri, por një ditë të ketë mundësinë për të luajtur në Spanjë. Kristiano Ronaldo ka hapur bisedimet me Mançester Junajtid për të zgjatur kontratën e tij, sipas lajmeve nga Anglia. Por 22-vjeçari, kontrata e të cilit përfundon në 2010-n, ka përsëritur dëshirën e tij që një ditë të luajë në Spanjë. "Kemi biseduar dhe shpresoj të arrijmë një marrëveshje sa më shpejt të jetë e mundur, - tha ai për radion portugeze, Antena 1. - Asgjë nuk është vendosur dhe do të dëshiroja të qëndroja. Do të doja që një ditë të luaja në Spanjë, por këtu në Mançester ndihem i lumtur". Mançesteri kërkon që me çdo kusht ta mbajë në skuadër dhe të mos e lërë të largohet me çdo kusht, pasi Fergusoni e ka cilësuar Ronaldon si lojtari më i mirë në botë. Ai ka qenë objekt i spekullimeve, duke e lidhur me një transferim te Reali i Madridit apo te Barcelona. Ai shtoi: "Nuk mund të jesh asnjëherë i sigurt, por këtu ndihem i lumtur dhe dua të qëndroj. Në futboll nuk ka garanci. Nëse nuk largohesh tani, mund të largohesh edhe pas dy ose tri sezonesh. Luaj për një klub të madh". Ronaldo firmosi me Mançesterin nga Sportingu i Lisbonës në gusht të 2003-shit, për pesë vite, të cilën ai e zgjati me dy vite të tjera në nëntor të 2005-s.

[km92]

"Djajtë" e Fergusonit kanë mundësinë të përsërisin vitin 1990, ku fituan kamionatin, Championsin dhe Kupën e Ligës


Mançesteri, drejt treshes historike

Trajneri i Mançesterit, Aleks Ferguson, është përpjekur të shmangë argumentin, por skuadra e drejtuar prej tij është pranë përsëritjes së historisë me çerekfinalet e 1999-s. Një fitore jo shumë e bukur, por e vlefshme, i ka dhënë Mançesterit të drejtën për të vazhduar drejt çerekfinaleve për herë të parë pas katër viteve. "Djajtë" kanë një diferencë prej nëntë pikësh në kampionat me Çelsin dhe do të ndeshen me Midëllsbroun për çerekfinalen e FA Cup. Me të drejtë bazat krahasuese qëndrojnë, pasi në sezonin 1998 99 ata ishin i pari klub anglez që fituan kampionatin, FA Cup dhe Ligën e Kampioneve. Të mërkurën, Fergusoni tha se skuadra e tij është mjaftueshëm e fortë për të vazhduar deri në fund rrugën drejt lavdisë në Champions, por nuk ka pranuar të krahasojë sezonin aktual me atë të 1999-s. "Ajo ishte një skuadër e ndryshme nga aktualja dhe kështu që nuk mund t'i krahasojmë këto dy sezone. Sigurisht që dëshirojmë të arrijmë finalen e çdo kompeticioni, ku marrim pjesë. Forca dhe vullneti janë të pranishme, por është e vështirë të fillosh të mendosh që tani për ato momente".
Larson - Mançesteri e fitoi ndeshjen pa shumë bujë me anë të një goli të bukur të Henrik Larsonit, pas një harkimi të Kristiano Ronaldos nga krahu i majtë. Ky ka qenë goli i 47-të i suedezit në ndeshjen e tij të 93-të në Europë, gjatë një karriere tepër të gjatë me klube si Fejënord, Sëlltik dhe Barcelona. Ka qenë mënyra më e mirë për t'i dhënë lamtumirën Mançesterit, pasi kjo ka qenë ndeshja e fundit e suedezit për "Djajtë". Larsoni, i cili ka shënuar tre gola në 12 ndeshje për Mançesterin, mund të luajë edhe kundër Midëllsbrout. Më pas ai do të luajë edhe në ndeshjen miqësore që "Djajtë" do të luajnë kundër "Yjeve europiane". Më pas ai do të rikthehet te Helsingborgu, pasi afati 10-javor i huazimit do të ketë përfunduar. Pas zëvendësimit të tij, tifozët janë ngritur në këmbë duke e duartrokitur.
Asnjë shans - Duke lënë mënjanë dëmtimet e sulmuesve Ole Gunar Solskjaer dhe Luis Saha, gjithashtu dhe formën e dobët që po kalon Uejn Runi, Fergusoni deklaroi se nuk ka asnjë shans që afati i huazimit të zgjatet edhe më tej për sulmuesin suedez. "Kemi nënshkruar një marrëveshje me Helsingborgun. Shpresonim që ai të na ndihmonte dhe këtë e bëri me sukses. Ka qenë një mrekulli e vërtetë të punosh me të, por fatkeqësisht ai duhet të rikthehet te Helsingborgu. Ata janë prioriteti i tij dhe ai i ka premtuar familjes se do të rikthehet". Larsoni shtoi: "Kalova momente të bukura këtu, por stërvitja me Helsingborgun nis në prill dhe duhet të rikthehem në kohë".
Dëmtimet - Mbrojtësi i majtë i Mançesterit, Mikael Silvestre, ka nxjerrë shpatullën në sfidën e dytë ndaj francezëve të Lilës. Silvestre ka rënë keq, pasi ka kërcyer për të kontrolluar topin së bashku me mbrojtësin e Lilës, Efstatios Tavlaridis, dhe më pas dëmtimi i mundshëm është konfirmuar nga një skanim në spitalin e Mançesterit. Dëmtimi i tij, i cili ka prishur disi festën, është i fundit në listën e krizës së dëmtimeve në kampin e liderëve të Premier Ligës. Francezi Saha do të mungojë edhe për dy javë të tjera, gjithashtu edhe Solskjaeri. Mesfushori Darren Fleçer do të jetë jashtë fushave për rreth dy muaj, ndërkohë që Evra pritet të rikthehet. Henrik Larson do të rikthehet te Helsingborgu dhe problemet për Fergusonin janë të shumta. "Në rangun e një jave, ne kemi humbur pesë ose gjashtë lojtarë, - tha trajneri i Mançesterit për gazetarët e pranishëm pas kualifikimit në çerekfinale. - Ka qenë një javë negative, duke lënë mënjanë rezultatet".

[km92]

Braziliani rrëfen: Me Moratin kemi mbetur miq, ish-trajneri im është një njeri në vështirësi

Ronaldo sulmon Kapelon dhe Kuperin

Ronaldo është kthyer, nuk humbet rastin të qëllojë kundër Kapelos pas shumë mosmarrëveshjeve te Reali. "Nuk i duhet besuar, - zbuloi braziliani, - është një njeri në vështirësi. Ka mbetur prapa në marrëdhëniet me lojtarët. Por Kuperi ka qenë më keq. Roni bën një reflektim edhe mbi futbollin italian: "Që komandonte mafia, këtë e dinin të gjithë, por nuk kishte prova. Tani gjërat kanë ndryshuar." Ronaldo tashmë në prag të derbit me Interin, që për të vlen natyrisht dyfish, duke parë vitet e kaluara te zikaltrit, rrëfen se nuk e ka harruar as Masimo Moratin, një njeri që për të ka qenë më shumë se një president, pavarësisht fjalëve zhgënjyese në momentin e kalimit të tij kuqezi: "Ato gjëra të rënda kundër meje mund t'i thoshte, por privatisht, sepse do të ishte një tjetër histori. Publiku duhej të thoshte gjëra të tilla, por mes nesh është një tjetër gjë, e dua shumë", - shpjegon Roni. Por tani e ardhmja e "Fenomenit" është gjetkë. "Dua të sjell zbavitje në futboll, është misioni im te Milani."
"Fenomeni" vazhdon të sulmojë ish-trajnerin e tij në kohët e Realit, por jo vetëm kaq. Nuk ka fjalë të mira as për Hektor Kuperin që e ka drejtuar në kohët e Interit, prej të cilit u largua në 2002-shin nga Milano. "Nuk është më koha e trajnerëve gjeneralë, - shtoi Roni, - Por Kuperi ishte edhe më keq. Kapelo të paktën ka një histori pas krahëve, Kuperi çfarë ka fituar?" Roni bën shaka edhe mbi akuzat e mbipeshës: "Herët a vonë do të bëj një foto nudo për të mbyllur të gjitha zërat që qarkullojnë mbi shëndetin e tepërt timin." Braziliani nuk kërkon të dëgjojë për një jetë të mundshme mondane që flitet në mjediset e Milanos: "Diskotekë? Vajzat më pëlqejnë, por më e rëndësishmja mbetet mamaja ime. S'është e vërtetë që dal në lokale e diskoteka. Bëj një jetë të mërzitshme." Sulmuesi i Milanit ndalon edhe mbi një argument serioz si ajo e "Calciopolit": "Për mafien që komandonte futbollin italian, të gjithë e dinin, por nuk kishte prova. Tani ekziston një tjetër frymë. Gjyqtarët gabojnë, por kuptohet që e bëjnë pa qëllim."

[km92]

Braziliani, që u dha kualifikimin kuqezinjve të mërkurën ndaj Sëlltikut: Këtu jam i lumtur

Kaka: Goli, motiv special për derbin

Faleminderit Kaka. Është ulërima e Milanit pas një mbrëmjeje frike dhe ankthi. Këndojnë tifozët pas dy orësh pasion dhe shqetësim. E mendon ndoshta edhe Mishel Platini, presidenti i UEFA-s, tepër i lumtur që kampionët e mëdhenj janë protagonistë të kupës. Dukej thuajse që Championsi donte të linte mënjanë yjet e tij më të pritur. Në shtëpi Ronaldinjo, në shtëpi Ibrahimoviçi, pastaj Henri e Van Nistëlroi. Iku Barça, iku dhe Interi, lamtumirë Arsenali dhe Reali i Madridit. Pa llogaritur kampionët që Ligën e Kampioneve këtë vit vetëm mund ta shikojnë: Ronaldo, që rregullorja nuk e lejon të zbresë në fushë me fanellën e Milanit, pasi kishte luajtur me atë të Realit; Del Piero, që po shlyen në Serinë B fajin e tij. GOL FANTASTIK - Riki Kaka deshi t'i shpjegojë tërë botës pse është aq shumë special. Aksion vendimtar që e dërgon Milanin në çerekfinale (konfirmimi i vetëm mes tetë "big"-ëve në krahasim me 2005-06) dhe Sëlltikun në shtëpi, tregon në sintezë të përsosur të gjithë ndeshjen. Ambrozini, një luftëtar i shkëlqyer në mesfushë, fiton një top në duelet e shumta dhe pason për Kakanë. Riki sheh rreth, nuk dallon shokë të lirë dhe vendos të fluturojë drejt portës i vetëm, duke marrë me vete edhe shpresën e tifozëve kuqezinj. Shpërtheu në mesfushë si një "regbist", si një atlet, por synoi vetëm objektivin. Përshkoi 43 metra në 5.5 sekonda. Pastaj një driblim, një e majtë rrashqanazi që çan më në fund një Boruc të jashtëzakonshëm dhe gol. Një aksion shumë i shpejtë personal që i vetëm vlen më shumë se 210 minuta (mes ndeshjes së parë dhe të kthimit), të një futbolli zbavitës, por rrallë të rrezikshëm.
KËNAQËSI - Faleminderit Riki, pra. Për mënyrën tënde spektakolare të të përjetuarit të ndeshjes edhe kur trysnia është shumë e lartë dhe për alegrinë që dhuron me fjalët e tua pas triumfit: "Jam i kënaqur që e ndihmova Milanin edhe këtë radhë, - komenton braziliani duke qeshur. - Në fund ishim edhe të lodhur, por ishim të aftë që bëmë gjithçka që na duhej për të kaluar turin. Sëlltiku është një skuadër shumë e pjekur, por ne arritëm të shënojmë dhe të marrim një kualifikim të merituar." Tashmë kryqëzohet me të ardhmen, Riki e di që është e pashmangshme: "Tani kemi një karikim të madh për derbin, - siguron Kaka, - edhe pse Interi do të japë maksimumin për të fituar pikërisht pse është skualifikuar nga Liga e Kampioneve: do të jetë një ndeshje e madhe. Për sa i takon së ardhmes sime, nuk mendoj, por për mua të luaj te Milani, është një kënaqësi. Tani jam i lumtur dhe më mjafton kaq."
OBJEKTIVI - Goli i së mërkurës është i gjashti në Champions, shifër që e lejon të arrijë "bomberin" Rud van Nistëlroi te Realit. Braziliani deklaron: "Për mua është një sezon zbavitës. Edhe pse jam golashënuesi i Milanit në Europë, goli nuk është objektivi im kryesor kur luaj. Më pëlqen të ndihmoj në zona të tjera, por pa dyshim jam shumë i kënaqur që ndodhem mes sulmuesve më të mëdhenj në renditjen e shënuesve. Deri tani ka qenë një Champions vërtet special." Kaka s'ka parapëlqime për kundërshtarin e radhës: "Për mua s'ndryshon gjë, - shtoi ai. - Milani është i aftë të luajë me emra të mëdhenj, por edhe me skuadra më pak favorite. Të mëdhatë e mbetura në lojë janë shumë, por nëse janë skualifikuar, ka një pse. Milani është në gjendje të përballojë çdo skuadër që është në garë. Fitimi i trofeut ka qenë objektivi ynë që nga fillimi dhe me kalimin e viteve dëshira ime për të fituar shtohet. Nuk ia kam dalë ende, por duke parë që është një turne special, do të më pëlqente të fitoja kupën."

[km92]

Galiani: Karlo u tregua i zoti

Ndonëse ka shënuar në fund me një gol të Kakasë që i dha kualifikimin Milanit, Adriano Galiani s'e fsheh që kishte frikë, por në fund aprovon që moduli i Ançelotit me një sulmues ka dhënë frytet e veta: "Duhet të them se kam qenë dakord totalisht për zgjedhjen e Ançelotit për të luajtur vetëm me një sulmues dhe për ta mbajtur skuadrën të mbrojtur në mesfushë. Nëse do t'u kishim lejuar superioritet numerik skocezëve, besoj se do të kishim rrezikuar shumë, ndaj dhe i besuam vullnetit për të kufizuar rreziqet, të ndërgjegjshëm që me cilësinë e sulmuesve tanë, goli herat a vonë do të shënohej, - tha Galiani. - Iu afruam shumë golit edhe në kohën shtesë, por edhe pse fituam me shtesë, nuk ka problem. Besoj se ishte një Milan inteligjent dhe shumë i duruar,
një Milan që konfirmohet për të pestin vit radhazi në vendet e para të futbollit europian."