Arkivi i gazetës elektronike sportive: "FUTBOLLI"

[Noizy]

Barazimi 0-0 ndaj Lacios e ka kënaqur pjesërisht Karlo Ançelotin:

"Nuk ndihem i zhgënjyer nga paraqitja, shpjegoi trajneri i Milanit, - luajtëm mirë, por në fushë kishte shumë trysni. Na mungoi pasimi i fundit përpara, ndërsa nga faza mbrojtëse ndihem i kënaqur. Ndoshta gabuam më tepër se zakonisht." Xhilardino pësoi një ndërhyrje të rëndë nga ana e Behramit: "Ishte anjë faull që duhej të ishte ndëshkuar me kartonin e kuq, kështu që arbitri gaboi."
Ndeshja me siguri nuk ishte prej atyre për t'u mbajtur mend, por barazimi në "Olimpiko" nuk ka qenë për t'u flakur tutje për Milanin, përkundrazi. Në kuadër të Champions-it, situata ka mbetur e pandryshuar, ndërsa në nivel loje u bë një hap prapa, edhe pse Karlo Ançeloti nuk u duk edhe aq i zemëruar nga paraqitja e djemve të tij: "Ishte një ndeshje disi e bllokuar, por nuk luajtëm keq. U treguam të zotë dhe nuk i lejuam shumë hapësira Lacios. Mund të kishim bërë diçka më shumë në sulm dhe të tregoheshim më të saktë." Trajnerit nuk i erdhi mirë që ndërhyrja e Behramit ndaj Xhilardinos nuk u ndëshkua: "Duhej të ishte dhënë kartoni i kuq, - shpjegoi ai, - tani Alberto ka një dëmtim në kavilje dhe të shohim për sa kohë do të mungojë."

[Noizy]

Pas humbjes ndaj Liverpulit, gjysmëfinalja e kupës duket jetike për të ardhmen e trajnerit portugez.


E ardhmja e Hose Mourinjos te Çelsi është vënë në dyshim pas humbjes ndaj Liverpulit si dhe pas diferencës prej gjashtë pikësh që është krijuar me rivalët për titull. Imagjinoni pozicionin e tij nëse Çelsi do të humbasë në ndeshjen gjysmëfinale të kthimit ndaj Uajkombit për Kupën e Ligës. Uajkombi ka barazuar me "blutë" në ndeshjen e parë të zhvilluar para dy javëve. Pas humbjes 2-0 ndaj Liverpulit ditën e shtunë, turpi i humbjes ndaj një skuadre tri divizione më poshtë mund të jetë shumë për tifozët e Çelsit dhe për pronarin e klubit Roman Abramoviç. Por Çelsi ka avantazhin e të luajturit në shtëpi ndeshjen e dytë ndaj Uajkombit dhe kjo mund të jetë hera e parë që të besuarit e Mourinjos arrijnë në një finale të kupës në këto tri sezone. Në gjysmëfinalen tjetër do të përballen Arsenali dhe Totenhemi. Mourinjo, i cili e udhëhoqi Çelsin drejt dy titujve kampionë radhazi, është i vetëdijshëm që gjërat nuk po shkojnë për së mbari në "Stemford Bridge". Atij i është komunikuar se nuk mund të sjellë lojtarë të rinj në skuadër gjatë merkatos së muajit janar, edhe pse mbrojtja e Çelsit po vuan mungesën e kapitenit Xhon Terri dhe ka humbur shërbimin e Arjen Robenit për një muaj, pas një dëmtimi të holandezit në këmbë. Mourinjo ka deklaruar se skuadra e tij konkurron ende për katër kompeticione, jo si Mançester Junajtid dhe Liverpuli që janë respektivisht jashtë Kupës së Ligës dhe dy kupave. "Liga e Kampioneve na pret në fund të muajit shkurt kur shpresoj që situata të ketë ndryshuar, - tha Mourinjo. - Në Carling Cup, edhe pse kemi këto probleme, duhet të mundim Uajkombin dhe të arrijmë finalen". Premier Liga do të mungojë për një javë, pasi skuadrat do të jenë të impenjuara në ndeshjet e kupës, me raundin e katërt të FA Cup si dhe gjysmëfinalet e Kupës së Ligës. "Është njëlloj si në FA Cup, - tha Mourinjo. - Duhet të mundim Notingem Forest (të dielën) dhe të arrijmë në raundin tjetër. Në Premier Ligë do të ndeshemi me Blekbërnin më 31 janar dhe me ta duhet të fitojmë me çdo kusht. Duhet të futemi në fushë me mentalitet të fortë, jo duke qarë dhe me mendje te ndeshja e radhës. Jam i lumtur që ndeshja do të luhet ditën e martë. Kur nuk fitoj, shpresoj që në ndeshjen e radhës të arrij objektivin sa më shpejt". Çelsi shpreson të harrojë sa më shpejt ndeshjen e dobët që zhvilloi ndaj Liverpulit me një fitore bindëse ndaj Uajkombit, të cilët arritën ta barazojnë rezultatin, pasi gjendeshin me një gol disavantazh në "Adams Park". Gjërat mund të shkonin edhe më keq për Mourinjon. Mançester Junajtid ka qenë shumë pranë thellimit të diferencës me vendin e dytë, kur udhëhiqte 1-0 vetëm shtatë minuta para përfundimit të takimit me Arsenalin. Por "Topçinjtë" kanë shënuar dy gola në minutat vendimtare dhe kanë fituar tri pikët. Pasi Robin van Persi barazoi, Tierri Henri ka shënuar me kokë golin e fitores në minutën e tretë shtesë, duke u mohuar "Djajve" thellimin e diferencës me kampionët në fuqi. Të kënaqur pas atij kthimi të rezultatit në minutat e fundit, "Topçinjtë" shkojnë në "White Hart Lane" të mërkurën në formë të mirë dhe me rezultate pozitive në ndeshjet e fundit. "Kemi mbërritur në një moment kur çdo gjë ka rëndësi, - tha trajneri francez Venger, skuadra e të cilit fitoi pesë ndeshje kupe dhe kampionati radhazi, duke shënuar 17 gola. "Objektivi ynë është të mbetemi në këtë gjendje". Por Vengeri mendon të lërë në pushim disa nga lojtarët e formacionit bazë dhe në ndeshjet e kupës të aktivizojë disa lojtarë të rinj.

[Noizy]

Fitorja e Arsenalit në minutat e fundit ka pasur edhe çmimin e saj, pasi autori i golit të parë të "Topçinjve", Robin van Persi, ka thyer këmbën dhe do të mbetet jashtë fushave për rreth gjashtë javë. Holandezi u fut në fushë si zëvendësues dhe shënoi golin e barazimit vetëm shtatë minuta nga përfundimi i takimit. Tierri Henri shënoi golin e fitores në minutën e fundit shtesë. Robin van Persi ishte në dyshim me një problem në kavilje që në fillim të takimit.

[Noizy]

Trajneri i Arsenalit: Ku i duhet...ne dhe Liverpuli mund të pretendojmë.


Trajneri Arsen Venger tha se Arsenali e ka mbajtur të hapur luftën për titullin e Premier Ligës, me fitoren 2-1 në minutat e fundit ndaj udhëheqësve të Mançester Junajtid. "Djajtë" kanë humbur mundësinë më të mirë për të thelluar avantazhin në tabelën e kalsifikimit, pasi goli i Uejn Runit është zhvlerësuar nga ai i holandezit Van Persi si dhe nga goli në minutën e fundit shtesë nga francezi Tierri Henri. Pas humbjes së Çelsit ndaj Liverpulit, distanca mes katër skuadrave të para në tabelën e klasifikimit është ngushtuar ndjeshëm. Mançesteri gjendet në kuotën e 57 pikëve pas 24 javëve të para, Çelsi ka 51, Liverpuli 46 dhe Arsenali 45. I pyetur për garën drejt titulli kampion, Vengeri tha: "Do të jetë e hapur për këdo, për ne dhe Liverpulin më pak, por asnjëherë nuk i dihet. Në dhjetë minutat e fundit të takimit, Mançesteri ishte kampion. Por tashmë nuk mund ta themi këtë. Junajtidi do të jetë pretendenti kryesor për titullin, sepse edhe sot luajti shumë mirë. Sigurisht që nëse ata nuk arrijnë objektivin e tyre, do të zhgënjeheshin shumë. Të gjithë kanë ende nga një shans, ne mbase më pak se të tjerët, por nga ky moment e tutje do të luftojmë për të fituar çdo ndeshje". I kënaqur nga mënyra se si skuadra e tij e interpretoi ndeshjen, pasi ishte në disavantazhin e një goli, ai tha: "Kjo skuadër po zhvillohet shumë, me lojtarë të rinj, të etur dhe të udhëhequr nga Tierri Henri. Më pëlqen kur i shoh në ndeshje të tilla si ajo me Mançesterin, ku në fund fitojnë, edhe pse gjenden për pjesën më të madhe të 90 minutave në disavantazh". Vengeri shtoi: Këto lloj ndeshjesh na japin më shumë fuqi, më shumë besim dhe më shumë respekt. Skuadrat që luajnë kundër nesh, janë të kujdesshme".

[Noizy]

Geri Nevill, kapiteni i "Djajve", e ka përshkruar humbjen 2-1 ndaj Arsenalit si një "thyerje dhëmbësh", por ka thënë se shokët e tij do të rikthehen përsëri te fitorja. Nevilli tha: "Ishte një ndeshje dramatike, por kjo duhet harruar sa më shpejt. Fakti që jemi akoma gjashtë pikë larg Çelsit, nuk na ngushëllon aspak. Është e vështirë ta mendosh këtë si një gjë pozitive. Kemi luajtur shumë më keq këtu dhe në fund të fundit kemi arritur të fitojmë"

[Noizy]

Trajneri i Mançesterit: Jua siguroj, do t'u rikthehemi shpejt fitoreve.


Sër Aleks Ferguson ka këmbëngulur se humbja dramatike në "Emirates Stadium" do të ndihmojë skuadrën e tij të vazhdojë me vullnet maksimal luftën për titullin e Premier Ligës. Fergusoni ka mbetur i shtangur në mbrëmjen e së dielës, duke parë skuadrën e tij të shkatërrohet në minutat e fundit të takimit me anë të golave të Robin van Persit dhe Tierri Henrisë, ku dukej se goli i Uejn Runit u kishte dhuruar atyre tri pikë tepër të vlefshme që do ta thellonin në nëntë pikë diferencën me kampionët e Çelsit. Por Fergusoni ka qenë optimist pas përfundimit të takimit me Arsenalin, megjithëse "Djajtë" nuk kanë arritur të nxjerrin përfitime nga fitorja e Liverpulit. "Jemi të gjithë të dëshpëruar, - deklaroi Fergusoni, - por kemi dhe shtatë ndeshje të tjera jashtë fushe, të cilat janë njësoj të rëndësishme dhe me siguri që kjo humbje do të na ndihmojë për ndeshjet që na kanë mbetur. Do të rikthehemi përsëri te fitorja dhe nuk do të bëjmë gabime të tilla, për këtë mund t'ju siguroj". Mançesteri dukej se kishte siguruar tri pikë të tjera pas golit të Uejn Runit, i cili nuk shënonte në shtatë ndeshje radhazi. Por goli i Van Persit, i shërbyer nga Çesk Fabregas, i ka hapur rrugën një tjetër goli nga francezi Tierri Henri, i cili e ka lënë të shtangur trajnerin skocez. Fergusoni duhet të shikojë problemin që mund të ekzistojë në mbrojtjen e Mançesterit, pasi të dy golat e pësuar kanë ardhur nga krosime nga e majta e zonës së rreptësisë. "Këto lloj ndeshjesh janë gjithmonë të vështira, - shtoi ai. - Nuk mund të thuash se mund të dominojmë një ndeshje për 90 minuta. Në disa momente, Arsenali kishte kontrollin e lojës, sidomos në pjesën e dytë. Forma jonë ishte e mirë dhe sipas meje lojtari më i mirë në fushë ishte Majkëll Kerrik", - shtoi Fergusoni.

[Noizy]

Kapiteni, sa shumë faulle të pësuara!
Françesko Toti reagoi ndaj goditjes me bërryl të Galantes, por ai i livornezit ishte faulli i 61-të i pësuar nga romanisti gjatë këtij sezoni dhe i 1652-ti në 15 vite karrierë. Një goxha shifër shqelmash apo të shtyrash të marra, po të kihet parasysh se Del Pieros në 16 vite i janë shkaktuar 1242 ndërhyrje të parregullta. Një reagim i justifikueshëm me pak fjalë, sikurse kanë pohuar shokët e tij fill pas ndeshjes, të bashkuar në "slloganin" "Toti duhet mbrojtur".

[Noizy]

Pas ndëshkimit të kapitenit të kryeqytetasve me karton të kuq si rrjedhojë e reagimit ndaj Galantes, ka gjykime të ndryshme.


"Duhet të ecim përpara sa më të qetë, nuk dua të flas për titullin." Kanë qenë këto fjalët e Rozela Sensit në hyrje të hotel Sheratonit në Romë, ku po zhvillohej asambleja e jashtëzakonshme e Federatës Italiane të Futbollit, për miratimin e statutit të saj të ri. Duke iu kthyer reagimit të Totit, që solli ndëshkimin e kapitenit të Romës me karton të kuq, Sensi shtoi: "Nuk kam asgjë për të thënë për sa i takon vendimit të gjyqtarit, - saktësoi ajo. - E konsideroj shumë të shëmtuar dhe të dhunshme goditjen e Galantes me bërryl, por kjo nuk e justifikon reagimin e Françeskos, por besoj se edhe kjo do t'i shërbejë." Lidhur me një gjobë të mundshme nga ana e klubit ndaj kapitenit, e bija e presidentit Sensi ka theksuar: "Janë gjëra që i përkasin ekskluzivisht klubit..." Por ndërkohë që Roma e dënon gjestin e Françesko Totit, ka edhe nga ata që e "mbrojnë" kapitenin verdhekuq. Si në rastin e ish-zv.komisionerit të federatës, Demetrio Albertini, apo të presidentit të Livornos, Aldo Spineli.
Demetrio Albertini "Padrejtësia e vërtetë ka qenë gjykimi i ndryshëm për episodin: Airoldi nuk u ndihmua nga gjyqtari i katërt... Në atë rast një karton i verdhë për të dy lojtarët do të kishte qenë më i drejtë, ose nëse donte të tregohej më i rreptë, mund t'u nxirrte të dyve të kuqin. Nëse Françesko u provokua? Këto janë gjëra që ndodhin në fushë, tha ish-lojtari i Milanit, - problemi nuk është kufja e arbitrit, por një gabim në gjykim. Besoj se në fushë si ndihmë teknologjike do të ishte më e dobishme të kishte gjithnjë sensorë në vijën e portës si në Udine, më tepër sesa këto radiot me kufje", - ka përfunduar Albertini.
Aldo Spineli "Disa reagime të Totit duhen kuptuar. Ai është një kampion i madh që merr shumë shqelma." Në mbrojtje të kapitenit të Romës ka dalë edhe presidenti i Livornos, Aldo Spineli. "Për mendimin tim, gjyqtari nuk e ndëshkoi për reagimin ndaj Galantes, - shpjegoi ai më pas, - por sepse Toti nuk iu afrua atij pasi drejtuesi i takimit e thirri të paktën dy herë. Ka qenë ajo sjellje që e bëri të vendoste t'i nxirrte kartonin e kuq. Përndryshe mendoj se do të kishte ndëshkuar me karton të verdhë si Totin, ashtu edhe Galanten."
Roberto Donadoni "Nëse ka marrë karton të kuq, do të thotë se ka gabuar me siguri. Unë aksionin nuk e kam parë, por nga gazetat që kam lexuar, duket se gjesti që ka kryer nuk ka qenë dhe aq i rëndë." Kështu është shprehur trajneri i kombëtares italiane, Roberto Donadoni, lidhur me ndëshkimin e Totit me karton të kuq në ndeshjen Livorno-Roma. Kjo është një gjë e keqe edhe për kombëtaren? "Nuk është se duhet të diskutojmë për çdo episod që i ndodh Totit, - është përgjigjur Donadoni. Vlerësimet bëhen duke marrë parasysh shumë gjëra." Po sikur Toti të telefononte për t'ju thënë se është i gatshëm të grumbullohet me përfaqësuesen? "Do të mendohemi, të shohim", - buzëqeshi trajneri.
Xhixhi Riva "Ata që flasin, nuk e dinë ç'do të thotë të goditesh me 100 shqelma. Toti gaboi, por reagimi është njerëzor. Edhe një baba mund ta humbasë ndonjëherë kontrollin ndaj të birit, edhe pse është e gabuar."

[Noizy]

Katalanasit do të luajnë nesër ndeshjen e fundit të fazës së parë. Trajneri: Sakrifica, mbi spektaklin.

Primera Divizion Ndeshja e Prapambetur Sot.
(21:00) Betis - Barcelona

Barcelona, e bazuar te forma e shkëlqyer që po kalon sulmuesi Havier Saviola, do të përpiqet të shkëputet e vetme në krye të klasifikimit, në ndeshjen e prapambetur që do të luajë nesër ndaj Betisit. Ky takim, i cili duhet të zhvillohej në dhjetor, por u shty për shkak të impenjimit të Barçës në botërorin e klubeve, do të mbyllë fazën e parë të kampionatit spanjoll. Barcelona ka 38 pikë, po aq sa Reali dhe Sevilja. Betisi, pavarësisht se renditet vetëm në vendin e 18-të, ka treguar një përmirësim të dukshëm nën drejtimin e trajnerit të ri, Luis Fernandez, dhe ka eliminuar Realin e Madridit në Kupën e Mbretit.
Rajkard - Barcelona është një skuadër e famshme në të gjithë botën për skpektaklin që dhuron, por trajnerit Frenk Rajkard i pëlqen mënyra sesi futbollistë sakrifikojnë për njëri-tjetrin, për arritjen e fitores. Të dielën, kampionët e Spanjës morën një tripikësh të lehtë pas fitores 3-0 ndaj Gimnastikës. "Nuk ishte një ndeshje shumë tërheqëse, - tha Rajkardi, skuadrës së të cilit i mjafton vetëm një pikë ndaj Betisit për t'u shpallur kampione e "dimrit", - por dua t'i përgëzoj futbollistët e mi që u treguan të matur dhe të qetë deri në fund. Ata ishim shumë seriozë në fushën e lojës dhe punuan shumë për njëri-tjerin. Kjo më pëlqen më shumë mua, ashtu siç u pëlqen tifozëve futbolli sulmues." Ndërsa për kundërshtarin që me vetëm dhjetë pikë mbyll tabelën e klasifikimit, trajneri holandez tha: "Ata kanë mentalitetin e duhur dhe një organizim të mirë. Nëse do të punojnë gjithmonë si sot, do të bëjnë gjëra të mira. Kanë pak mangësi në sulm, por mund të jenë një surprizë në pjesën e mbetur të sezonit."
Saviola - Saviola ishte autori i golit të parë në fitoren e katalanasve. Për argjentinasin, ky ishte goli i shtatë në katër ndeshjet e luajtura në vitin 2007, duke u bërë idhulli i "Kamp Nou"-t, në pritje të Etosë. Ky i fundit do të rikthehet në fillim të shkurtit, ndërsa të dielën tifozët e Barçës kontestuan Rajkardin kur zëvendësoi Saviolën me Gudjohnsenin. Golat e tjerë për kampionët e Europës u shënuan nga Zhyli dhe Injesta. "Ishte një natë shumë e bukur, - tha Saviola. - Unë jam i kënaqur me punën që bëmë për ta fituar ndeshjen. Personalisht po kaloj një nga momentet më të lumtura, ndërsa skuadra nuk mund të japë maksimumin e saj nëse elementët thelbësorë nuk janë në formën më të mirë." Më pas 25-vjeçari shtoi: "Ishte një fitore e vështirë ndaj një skuadre të mirorganizuar, për këtë e vlerësojmë maksimalisht tripikëshin e marrë. Kemi mundësi ta mbyllim të parët fazën e parë dhe kjo na jep besim."

[Noizy]

"Don Fabios" i pëlqen fytyra e re "merengese": Jemi në rrugën e duhur. E ardhmja do të flasë për ne.

Trajneri i Realit të Madridit, Fabio Kapelo, ka përgëzuar futbollistët e rinj në skuadër për punën e mirë të bërë të dielën në Majorka, ku Reali fitoi 1-0. Hoze Antonio Rejes shënoi me një goditje dënimi golin me vlerë tri pikësh, 13 minuta nga fundi. Tani skuadra e "Don Fabios" ndodhet në vend të parë me 38 pikë, aq sa Barcelona dhe Sevilja. Barça ka një ndeshje më pak, por ka mbetur edhe e gjithë faza e dytë për t'u luajtur. "Jam shumë i kënaqur me paraqitjen e futbollistëve, - tha trajneri italian. - Skuadra është në kushtet ideale psikologjike. Të fitosh në Majorkë, nuk është aspak e lehtë. Deri të mërkurën do të jemi në vend të parë dhe kjo më bën dyfish të lumtur. Na ka mbetur edhe një pjesë kampionati, por mendoj se ky ekip e ka kaluar më të vështirën." Kapelo ka sfiduar presion e krijuar nga mungesa në skuadër të Raulit, Bekhamit, Ronaldos, Emersonit, Roberto Karlosit, Gutit, Salgados dhe Kasanos, që për arsye të ndryshme nuk ishin në Majorkë. Ish-trajneri i Juves vazhdon të bazojë gjithçka te një "look" i ri, që së fundi ka bërë për vete edhe tifozët "merenges". Gago, Diarra, Robinjo, Higuain dhe Rejes janë përfaqësuesit. "Jam i lumtur që këta "fëmijë" luajtën mirë në një fushë kaq të vështirë, - vazhdoi Kapelo. - Jemi në rrugën e duhur dhe jam i bindur se e ardhmja do të flasë për ne." Ndërkohë, autori i golit, Rejes, tha: "Kjo ishte një fitore shumë e rëndësishme, sepse tani jemi në vend të parë, së bashku me Barcelonën dhe Seviljen. Mendoj se po luajmë në nivelet që dëshirojmë. Fatmirësisht do të kalojmë një javë pa ndeshje kupe, në të cilën do të përgatitemi si duhet për Vilarealin. Një tjetër fitore do të ishte shumë e rëndësishme para ndeshjeve të vështira që na presin në tre muajt e ardhshëm."