Arkivi i gazetës elektronike sportive: "FUTBOLLI"

[RaPSouL]

Nani ia siguron fitoren e parë Manchester United

Kampioni i Premier-Ligës, Manchester United, më në fund ka shënuar fitore këtë sezon – duke mposhtur në Old Trafford ekipin e Tottenhamit, me rezultat 1-0.

Mesfushori portugez, Nani, shënoi golin e vetëm të ndeshjes, respektivisht golin e dytë të ekipit United këtë sezon.

Loja pati kthesa të papritura për të dy ekipet, ndërkaq Owen Hargreaves filloi ndeshjen përkundër paralajmërimeve se ai do të mungojë në këtë takim.

[RaPSouL]

Michael Owen është i lumtur në Newcastle

Michael Owen ka premtuar që do të kalojë të ardhmen e tij me Newcastle United, duke hedhur poshtë thashethemet se ai ka në “plan” largimin nga klubi.

Sulmuesi anglez është përfolur për një largim nga St James’ Park pothuajse prej momentit që ai i bashkua klubit të Newcastlet.

Ish sulmuesi i Liverpoolit ka thënë për “News of the World”: “Kam qenë në Newcastle vetëm për dy vite dhe spekulimet kanë qenë të pabesueshme. Në fund të çdo sezoni, njerëzit pyesnin ‘A do të qëndrojë Michael Owen a jo?’”.

“Unë jetoj atje dhe fëmijët e mi janë shkolluar atje për dy vite. Edhe bashkëlojtarët më pyesin ‘a je këtu sot’ dhe unë ju them ‘Po, ashtu siç jam çdo ditë’. Që kur kam ardhur në Newcastle, njerëzit mendojnë se do të largohem. Shumica mendojnë se kam ndonjë plan, por jo”, ka shtuar Owen, duke pohuar dëshirën për të mbetur në klubin aktual.

[RaPSouL]

Inter e nis keq, Udineze është sërish një makth

Interi e ka nisur në mënyrën më të keqe sezonin e ri, teksa nuk ka shkuar më shumë se një barazim 1-1 në "San Siro" përballë Udinezes. Pasi humbën në finalen e Superkupës me Romën, kampionët e Italisë kanë pësuar dje një tjetër goditje, kësaj radhe duke u ndalur në fushën e tyre nga ajo që është quajtur shpesh si "macja e zezë" e tyre. Miqtë nga Friuli barazuan në minutat shtesë, duke siguruar një pikë mjaft të vlefshme në kuadër të sezonit të ri. Teksa ekipi i Mançinit duket se ka ende shumë punë për t'u rikthyer skuadra që i trembte të gjithë në Itali. Stankoviç gjeti rrugën e golit që në minutën e 9-të dhe dukej se gjithçka do të ishte e lehtë për zikaltërit, por dalja me karton të kuq e Hulio Cesar në minutën e 57-të, e ndryshoi supremacinë në fushën e lojës. Autogoli i Kordobës në fund, bëri që Udineze të realizojë një tjetër sukses përballë kampionëve të Italisë. Ndërkaq, nuk ka falur Milani, që në transfertën e Xhenoas ka arritur të triumfojë 3-0. Masimo Ambrozini ka qenë ai që ka hapur serinë e golave për kuqezinjtë, ndërkohë që më pas do të vinte edhe dopieta e parë e brazilianit Kaka, i cili gjithsesi njërin gol e shënoi me penallti. Takimi i "Marasit" u luajt pa praninë e tifozëve milanistë, teksa edhe masat e sigurisë kanë qenë shumë të forta.
Takimet
Pas Lacios e Juventusit, dje kanë zbritur në fushë të gjitha skuadrat e tjera të Serisë A. Fiorentina e ka nisur gjithashtu mjaft mirë sezonin, duke arritur të fitojë 3-1 në fushën e saj përballë Empolit. Pazini zhbllokoi rezultatin në minutën e 56-të, ndërkohë që Adrian Mutu dyfishoi 8 minuta më vonë. Montolivo gjeti edhe ai rrugën e golit, duke mbyllur llogaritë për ekipin e Prandelit, pavarësisht golit të Luka Saudatit në minutën e fundit. Ndërkohë, Napoli është befasuar nga një humbje 0-2 në "San Paolo" përballë Kaljarit, ekip që këtë verë i kanë ikur disa futbollistë, mes të cilëve David Suzao. Goli i të riut Matri në minutën e 49-të dhe ai i Foxhias me penallti, i dhanë triumfin ekipit sard, që merr 3 pikë mjaft të vlefshme. Ndërsa nuk mund të kishte një nisje më të mirë për Sampdorian, që në minutat e fundit ka marrë një fitore të madhe në transfertën e vështirë të Sienës. Golat e Klaudio Beluçit në fillim dhe të Vinçenco Montelës pak minuta para fundit, e bënë të pavlefshëm barazimin e përkohshëm të Korvias. Ndërkaq, Rexhina është ndalur në një barazim 1-1 në "Granillo" përballë Atalantës, ndërsa Parma ka barazuar në shifrat 2-2 në "Tardini" kundër Katanias.

[RaPSouL]

Panik në Spanjë, lojtari i Seviljes rëndë në spital

Momente tmerri në takimin Sevilja-Getave të dy netëve më parë, kur Antonio Puerta u shtri në fushë duke kërkuar ndihmë. Ishte shoku i skuadrës Dragutinoviç, ai që nuk lejoi që t'i kalonte gjuha poshtë, por drama nuk ka mbaruar këtu. Ai braktisi fushën i shoqëruar nga mjekët, por është ndjerë keq në dhomat e zhveshjes. "Tani ai është në spital në gjendje të rëndë për jetën", ishte njoftimi i klubit dje. "Ndodhet në një situatë ku nuk lëviz fare dhe nuk jep asnjë shenjë reagimi", kanë thënë mjekët.

Lajmi ka tronditur gjithë botën e futbollit në Spanjë, teksa kujtimet kanë shkuar pak mbrapa në kohë, duke kujtuar Miklos Feher dhe Vivien Foe. Askush nuk ka dashur të kujtojë këta dy lojtarë që vdiqën në fushë, megjithatë në momentet kur Antonio Puerta u shtri në fushë, askush nuk mund të mos ketë menduar më të keqen. Dragutinoviç i shpëtoi jetën, duke i nxjerrë gjuhën, ndërsa më pas është marrë vesh për një problem kardiak dhe lojtari është dërguar menjëherë në spitalin Virgen del Rocio të Seviljes në kushte mjaft të rënda.

[RaPSouL]

Mançesteri, vjen fitorja e parë në premier

Mançester Junajtid ka marrë fitoren e parë për këtë sezon, pasi ka mposhtur në "Old Traford" Totenhemin, me rezultatin 1-0. "Djajtë e Kuq" kanë qenë më kërkues përgjatë 90 minutave, megjithatë shumë të pasaktë përpara portës. Skuadra e Ferguson është parë shumë nervoze në fushë dhe vetëm në minutën e 68-të arriti të gjente golin e fitores me anë të portugezit të sapoardhur, Nani. Ndërkohë, në takimin tjetër të ditës së djeshme, Njukasëll ka marrë një barazim 2-2 në fushën e vështirë të Midëllsboros.

[RaPSouL]

Lazio e interesuar për portierin Abbondanzieri

Portieri i klubit spanjoll Getafe, Roberto "Pato" Abbondanzieri, mund të merr rrugë drejt kryeqytetit italian, nëse Lazio bën një ofertë të pëlqyer për portierin argjentinas.
Ekipi nga Olimpico, momentalisht ka në portë, Marco Ballotan, 43-vjeçar, derisa portieri tjetër, Juan Pablo Carizzo, është i lënduar, dhe kjo mund të çojë në një kalim të argjentinasit të vlerësuar lartë.

Abbondanzieri sezonin e kaluar u shpërblye si portieri më i mirë në La Liga, duke ndihmuar mbrojtjen e Getafes të shënonte rekord në La Liga – pasi që ka pësuar vetëm 33 gola në 38 ndeshje.

Portieri tashmë ka refuzuar një kalim të tij në Angli, tek Manchester City, por Lazio mund të jetë më tërheqës, pjesërisht me perspektivën e Ligës së Kampionëve.
Shuma për të cilën Lazio mund të transferojë portierin do të ishte rreth 4 ose 5 milionë euro.

[no name]

Shuster: U treguam perfekt!

27 Gusht Trajneri i Realit të Madridit, Bernd Shuster, u shpreh shumë i kënaqur për fitoren e parë në kampionat dhe sidomos për atë kundër Atletikos, në derbin që idha startin kampionatit spanjoll. Tekniku gjerman përgëzoi kapitenin Raul Gonzales për lojën e zhvilluar dhe deklaroi se skuadra e tij nuk tregoi asnjë pikë të dobët gjatë takimit. “Kemi zhvilluar një ndeshje të mirë. Kemi parë një derbi shumë të hapur dhe një Atletiko e cila luftoi gjatë gjithë ndeshjes. Jemi përballur me një kundërshtarë të fortë, por unë jam i kënaqur me punën e bërë nga lojtarët e mi. Nuk kemi treguar asnjë pikë të dobët. Nuk ishte një ndeshje e lehtë, por kemi bërë një sforco të madhe për të fituar takimin. E filluam keq, duke pësuar gol që në minutën e parë. Por skuadra nuk u dorëzua aspak, por këmbënguli për të shënuar golin e barazimit. Ishte një ndeshje e bukur dhe një shenjë optimizmi për të ardhmen. Kjo është rruga që duhet të ndjekim dhe shpresojmë të vazhdojmë kështu. Tani nuk duhet të mendojmë më për këtë fitore, por të përgatitemi për ndeshjet e ardhshme”. I pyetur mbi lojën e zhvilluar nga kapiteni Raul Gonzales, tekniku gjerman tha: “Ka zhvilluar një ndeshje shumë të mirë dhe është treguar me të vërtetë shumë i rëndësishëm. Ka arritur të udhëheqë skuadrën dhe ka rrezikuar shumë herë portën e kundërshtarëve. Jam shumë i kënaqur me të dhe më të gjithë skuadrën. Nuk kishte fillim më të mirë se ky, por nuk duhet ta lëmë me kaq. Lojtarët duhet të dinë se çdo ndeshje do të jetë e vështirë dh për t’i fituar do të duhet të shumë përqëndrim. Gjatë fazës përgatitore kemi patur disa probleme dhe skuadra nuk është treguar në lartësinë e duhur. Për mua, rezultatet në fazën përgatitore nuk janë të rëndësishme. Skuadra duhet të tregojë forcën e saj në takimet zyrtare, në të cilat nuk na lejohen gabimet”. Bernd Shuster bëri elozhet e tij edhe për ish trajnerin e Realit, Fabio Kapelon, i cili sezonin e kaluar nxorri kampion skuadrën madrilene. “Vetëm një trajner i tillë si Kapelo mund të bëjë atë atë që bëri sezonin e kaluar. Mua nuk do të më pëlqente të kaloja atë që ka kaluar ai sezonin e kaluar. Për mua është një trajner i madh dhe me të gjitha skuadrat ka arritur të triumfojë”.


Sportekspres

[no name]

Ranieri: Ky është vetëm fillimi!

27 Gusht “E kisha thënë se këta djem, nëse japin maksimumin, mund të konkurrojnë edhe me të mëdhenjtë”



Edhe pse “Zonja” e tij, “E Reja”, ka fituar bindshëm 5?1 ndaj Livornos, në premierën bardhezi në Serinë A dhe në javën e parë të kampionatit, Klaudio Ranieri mundohet që të mos thurë shumë elozhe për skuadrën, por qëndron me këmbë në tokë dhe mundohet që të vërë re gabimet e kryera nga djemtë, edhe pse do të duhej një lupë për t’i parë: “Skuadra vazhdoi që të besonte në vetëvete, edhe përpara se të shënohej goli i parë, por edhe kur ishim në vështirësi, pasi presingu i Livornos ishte i madh. Nuk ishte e lehtë, sepse Livorno di të mbulohet mirë dhe të mos hapet shumë, sidomos në krah`. Hapësirat ishin të vogla dhe duhet të bazoheshim te pasimet e shpejta, por djemtë i zbatuan me përpikmëri detyrat që i kisha caktuar. Kontrolluam topin gjatë gjithë ndeshjes dhe ky ndoshta ishte një avantazh më shumë për ne”, tha Ranieri, edhe pse, sipas tij, jo gjithçka ishte perfekte: “Kemi bërë edhe gabime. Disa pasiguri në mbrojtje, ndërsa në miqësore ishim të ndëshkuar sepse nuk arrinim që të shfrytëzonim siç duhet rastet për gol. Por, këtë herë, gjithçka shkoi mirë dhe jam i kënaqur për këtë”. Me “tripletën” e tij, Trezege tregoi se Juventusi mund të besojë shumë te ai: “Të them të drejtën, kur bëri atë xhestin në ndeshjen e fundit në Serinë B, mbeta pak i befasuar, sepse sapo u bë prezantimi im dhe kisha përshtypje të tjera për Davidin. Ndoshta, mendonte se nuk ishte pjesë e projektit tim, por nuk ishte kështu. Zëvendësimi i Del Pieros? Kam shumë sulmues dhe kur ke lojtarë cilësorë, është e vështirë që të zgjedhësh, por këtë nuk e cilësoj si një dëm, por diçka të mirë në shërbim të ekipit. Titulli? Ende larg, por tani jo i paarritshëm. E dija se ekipi ishte i aftë që të luftonte për shumë objektiva dhe këtë provë e dha në fushë. Por, ky është vetëm fillimi, sepse në të ardhmen do të mund të marrim edhe kënaqësi të tjera, nëse vazhdojmë kështu si e kemi nisur”.



Bufon: Titulli? Tani jo i pamundur!

Juventusi është kthyer dhe e ka bërë në mënyrën e saj, duke fituar ndeshjen e parë të Serisë A, ndaj Livornos, duke bindur në lojë dhe duke shënuar një “rrebesh” golash, plot pesë ndaj toskanëve. Në fund, Xhixhi Bufon ka qënë shumë i lumtur dhe i kënaqur nga paraqitja bardhezi dhe në intervistën për shtyp të dhënë për “Sky” është shprehur optimist për të ardhmen. Portieri i “Zonjës”, i cili ka folur shpesh për vështirësitë që do të haste skuadra e tij me ngjitjen në A dhe konkurrencën e fortë, mundohet që të qëndrojë me këmbë në tokë dhe të mos fluturojë. “Ky Juventus mund të shkojë shumë larg, por vetëm nëse ruan qetësinë e nevojshme dhe nëse ruan rendimentin e lartë. Ishte vetëm ndeshja e parë e kampionatit, ndaj Livornos, që është një ekip jo i rangut të lartë, por tre pikë do të thonë shumë. Mund të them se e nisëm me këmbën e duhur dhe tani të mendojmë për ndeshjen e rradhës. Dhe, një tjetër fakt që më gëzon është se nuk zhgënjyem tifozët, të cilët besojnë shumë te ne. Shpresoj që të jetë viti i duhur. Të gjithë ishim të bindur për forcën tonë, por duhet vetëm të dilnim në lojën e bukur dhe me pasime. Në pjesën e parë Livorno u mblodh shumë mirë, por më pas dominuam dhe merituam këtë fitore. Goli i pësuar? U nervozova shumë, sepse nuk doja që të pësoja asnjë gol, si për premierën në Serinë A. Pastaj, e kam thënë shpesh, s’më pëlqen që të mbledh topat në rrjetë. Trezege? Davidi është një bomber i mirfilltë dhe jam i kënaqur që zgjodhi Juventusin, edhe pse kishte probleme, gjatë kampionatit të Serisë B. Por, ai, unë, Del Piero, Nedved dhe Trezege e njohim mirë historinë e këtij klubi dhe për këtë arsye nuk mund të tradhëtojmë këto ngjyra. A jemi për titull? Të presim, për të caktuar më pas objektivat. T’ia lëmë në dorë kohës, që do të gjykojë për ne, ashtu si bëri fusha”.



Aleks: Mbetemi gjithmonë Juventusi!

Ashtu si i gjithë ambjenti bardhezi, edhe Aleks del Piero është i kënaqur për fitoren e thellë ndaj Livornos, në javën e parë të Serisë A, edhe pse fantazisti i “Zonjës” u zëvendësua në pjesën e dytë nga Iakuinta, që shënoi një “dopietë” të rëndësishme. Por, kapiteni nuk shqetësohet edhe aq shumë: “Trajneri Ranieri duhet të bëjë disa zgjedhje dhe nuk është e lehtë. Vinçenco është një futbollist i madh dhe cilësor dhe këtë e konfirmoi edhe në fushë. Isha i pafat në disa raste, por nëse do të kisha luajtur edhe disa minuta më shumë, ndoshta...”, tha Aleks, duke u ndalur më pas te objektivat e të ardhmes dhe duke iu përgjigjur pyetjes së ditur tashmë: A mund të fitojë Juventusi titullin? “Gjithçka është e mundur, por duhet të dimë se skuadra ka nevojë të përmirësohet shumë dhe për këtë arsye na duhet punë dhe kohë. Nuk mund të pretendojmë se jemi kthyer në nivelet e larta, vetëm sepse fituam një takim, por duhet të vazhdojmë kështu. Ishte një nisje e rëndësishme dhe nga më të mirat. Tre pikë të para dhe të nevojshme, për rrugën që sapo ka nisur”, tha Ale, duke folur edhe për lojën më pas: “Në fillim kishim vështirësi, sepse Livorno mblidhej shumë mirë në mbrojtje, por më pas u hapëm dhe dolëm në lojën tonë. Edhe në Serinë B ishte kështu, ndaj them se na ka shërbyer, për sa i përket aspektit të durimit dhe organizimit të lojës.



Xhilji: Tani me këmbë në tokë

E priste këtë ditë që në momentin kur u emërua në “fronin” e klubit të Juventusit, por sot ka më shumë motive për të festuar dhe duatrokitur projektin e tij. Xhovani Koboli Xhilji, presidenti bardhezi është i lumtur për suksesin e parë të “Zonjës së Re”, në sezonin e saponisur, në Serinë A. Pas skandaleve dhe polemikave, gjithçka i është rikthyer normalitetit. “E dija se do të ishte një start i furishëm për Juventusn, sepse kjo skuadër nuk ka frikë askënd. E thashë këtë edhe përpara ndeshjes dhe kur ishim në Serinë B, por të tjerët na shihnin me shumë dyshime. Nuk them se jemi për titull, sepse kjo duhet të shihet vetëm kur të luajmë me kundërshtarët e tjerë, sepse ishte vetëm java e parë, por fitorja ndaj Livornos tregon se duam që të arrijmë sa më lart të jetë e mundur. Champions League është synimi ynë dhe do të bëjmë të pamundurën për ta arritur. Projekti është afatgjatë dhe ekipi do të konsolidohet me kalimin e kohës. Shpresoj që të rritemi takim pas takimi. Ranieri? E kam thënë që në fillim që është një trajner me përvojë dhe se ka ndërtuar një ekip që duhet të mësohet me përgjegjësitë. Ka shumë të rinj në ekip, por me ndihmën e kampionëve si Del Piero, Trezege, Nedved dhe Bufon do të mësojnë shumë mbi fanellën bardhezi. Ky klub ka një histori të madhe dhe për këtë arsye duhet të jetë gjithmonë në majat e klasifikimit. Objektivi ynë? E them edhe njëherë, nuk duhet të kemi ide fikse titullin, sepse kjo mund të jetë vetëm në dëmin e kësaj skuadre. Merkato? E deklaroj të mbyllur dhe Kielini nuk do të largohet. Ai është një mbrojtës i rëndësishëm dhe që na nevojitet shumë. Edhe në ndeshjen ndaj Livornos, tregoi se sa është i lidhur me Juventusin dhe se dëshiron që të vazhdojë me këtë skuadër. Trezege? Asnjëherë nuk ka qënë në qëllimet tona që të lëmë të ikë Davidi, duke parë se po flasim për një bomber të madh, që ka shënuar 143 gola me fanellën bardhezi”.



Iakuinta: Golat ia dedikoj familjes!

Vinçenco Iakuinta ka fituar mbrëmjen e të shtunës “skenën” e “Olimpico”?s së Torinos, duke shënuar dy gola me fanellën bardhezi, në ndeshjen e parë të sezonit, në Serinë A, ndaj Livornos. Ish?sulmusi i Udinezes ia dedikon familjes së tij këtë “dopietë”: “Ia dedikoj familjes, që më ka mbështetur gjithmonë. Në dëshirat e mia ishte që të bëja një paraqitje sa më të mirë me Juven, në këtë takim të parë në A, ndaj jam i kënaqur dhe i lumtur për të gjithë skuadrën. Tani, të mendojmë për Kupën e Italisë, duke parë se do të kemi një takim të vështirë ndaj Parmës. Suksesi i arritur na jep moral të lartë, ndaj duhet të vazhdojmë kështu. Kartoni i verdhë i marrë për heqjen e fanellës pas golit? Qëndron, do të paguaj gjobën dhe premtoj që të mos e përsëris, por goli i parë më fanellën bardhezi është një emocion i madh. Zëvendësimi me Aleksin? Eshtë një nder për mua që të futem në vend të kapitenit. Ale është një lojtar fantasik dhe meriton respektin e të gjithëve”.



Sportekspres

[no name]

Interi “humb fillin” me Udinezen

27 Gusht Pritej një start i bujshëm nga kampionët e Italisë, priteshin gola dhe spektakël, pritej një publik i zjarrtë, pritej një Suazo dhe Krespo në rolin e “aktorëve”, por asgjë nga këto nuk ka ndodhur. Vetëm barazim për Interin e Mançinit, që në javën e parë të kampionatit, ndaj Udinezes. Pas humbjes një javë më parë në Superkupë, ndaj Romës, zikaltrit bllokohen brenda fushës ndaj friulianëve, në debutimin sezonal në Serinë A. Tani, kampionët e Italisë detyrohen të vihen në ndjekje të Milanit dhe Juventusit, me nga tre pikë të plota. Edhe njëherë, tabuja me Udinezen nuk është shkelur, sepse edhe vitin e shkuar, pikërisht bardhezinjtë ndaluan zikaltrit në “San Siro”, në barazim. Edhe njëherë, skuadra e Mançinit është shfaqur pa ide, jo në maksimum të formës. Vetëm fantazia e Ibrahimoviçit nuk ka mjaftuar, ashtu si edhe bollëku i lojtarëve në dispozicion të trajnerit. Gabimi i portierit Sezar, që e preku me dorë topin jashtë zonës së rreptësisë, kushtoi rëndë, sepse braziliani doli me karton të kuq, duke lënë ekipin me dhjetë. Në vend të tij Toldo. Dhe, pikërisht në momentin e epërsisë numerike, Udineze ka përfituar, duke luajtur minutat e mbetura të pjesës së dytë në sulm, kundrejt një Interi të pafuqishëm, që shënon me Stankoviçin në pjesën e parë, por që e sheh veten të barazohet në fund të ndeshjes, në minutën e tretë shtesë, kur Kordoba devijon në ortën e tij një krosim të ardhur nga krahu. Kampionët, edhe njëherë, nuk kanë bindur, duke treguar dobësitë e tyre dhe duke i dhënë një sinjal të qartë rivalëve të tjerë për titull: Nuk do të jetë “arratisje”.

Mançini i pakënaqur: Bëjmë gabime pa fund!

Nuk ishte fillim sezoni që priste Roberto Mançini. Humbja në Superkupë ishte vetëm një këmbanë alarmi, sepse barazimi i arritur ndaj Udinezes është diçka më shumë. Interi është inekzistent në fushë. Trajneri zikaltër pranon gabimin: “Duhet ta kishim mbyllur takimin që në pjesën e parë, sepse i kishim të gjitha rastet për të shënuar. Në pjesën e parë të ndeshjes bëmë shumë mirë, duke krijuar shumë raste për të mbyllur ndeshjen, por nuk arritëm të ishim më konkret. Më pas, në pjesën e dytë, paguam për inferioritetin numerik dhe për një gol krejt të rastësishëm. Por, kështu janë ndeshjet e fillim sezonit. Kur mbetëm me dhjetë vetë vuajtëm, por ishte diçka normale. Gjendja fizike nuk është nga më të mirat. Shpresoj që me kalimin e kohës të rikuperojmë dhe lojtarët të jenë edhe më të freskët”.

Stankoviç: Faji është vetëm i yni!

Dejan Stankoviç është në një mendje me trajnerin Mançini dhe në analizimin e barazimit ndaj Udinezes pranon se zikaltrit gabuan shumë dhe e pësuan sepse nuk e mbyllën ndeshjen atëherë kur ishte mundësia: “Kur shënuam golin e parë, mund të kishim realizuar edhe të tjerë, duke mbyllur ndeshjen, por e lamë të hapur deri në fund dhe pasi Sezari doli me të kuq, mbetëm me dhjetë vetë. Kundërshtari e shfrytëzoi këtë rast, duke ushtruar më shumë presion dhe duke fituar hapësirë në mesfushë. Pra, e pranoj se ishte faji ynë, por premtoj se këtej e tutje do të bëjmë vetëm fitore, për të treguar se Interi i javës së parë ishte thjesht një rastësi. Duhet të fitojmë formën e mirë fizike, për të qënë në maksimum”.



Sportekspres

[no name]

Milani e nis me një “tris”

27 Gusht Me një paraqitje të shkëlqyer, spektakolare, të denjtë për kampionët e Europës, Milani mbyll llogaritë ndaj Xhenoas që në pjesën e parë, duke shënuar plot tre gola ndaj kuqebluve, që vetëm në pjesën e dytë dalin në pah, por pa frikësuar kuqezinjtë e Ançelotit. Një trepikësh i parë që shkon në “kasafortë” për “Djallin” dhe dy gola që vendosen në renditjen e golashënuesve për Riki Kakanë (njëri nga të cilët me penallti). Ambrozini tregon se meriton shiritin e kapitenit, pas Maldinit, dhe shënon golin e parë të takimit, me një zhytje të bukur me kokë. Pasi shënon tre herë në portën xhenoane, Milani administron rezultatin me qetësi, duke ruajtur forcat për Superkupën e Europës, që do të luhet të premten, ndaj Seviljës. Nuk mund të kërkonte më shumë se kaq Ançeloti nga ekipi i tij, që vendos “diktatin” që në javën e parë. Pa Ronaldon dhe Inzagin në sulm, pa dy blerjet e merkatos, Patonë dhe Emersonin, fituesit e Champions bindin, në një transfertë tepër delikate. Tani, sytë e drejtuar në Monako, për të pritur më pas, në “San Siro”, Fiorentinën.

Ançeloti: Të mos ndalemi me kaq!

Edhe pse i nxehti ishte shumë i madh në Xhenova, Milani i tij nuk ka zhgënjyer në premierën e kampionatit, por me një 3?0 ka çuar në shtëpi një trepikësh të rëndësishëm, që hap kështu zyrtarisht sezonin kuqezi. I lumtur Karlo Ançeloti për paraqitjen e të tijëve: “Zhvilluam një pjesë të parë në mënyrë të jashtëzakonshme, duke interpretuar në mënyrën e duhur ndeshjen, me ritëm dhe shpejtësi. Gjithçka shkoi shumë mirë, edhe pse kisha frikë, sepse ndeshja e parë e sezonit është pak delikate, pasi nuk je ambjentuar ende me fushën e blertë dhe nuk e njeh mirë kundërshtarin”, tha trajneri i “Djallit”, duke u ndalur më pas te paraqitja e Kakasë, i jashtëzakonshëm, me “dopietën” e tij dhe formën e shkëlqyer: “Edhe pse jo gjithçka ishte perfekte, jam i kënaqur, sepse morra përgjigje të mira. Riki? Nuk do të habitesha nëse do të bëhej golashënues. Ka cilësi të mëdha dhe është i motivuar. Mund të bëjë edhe më mirë se ajo që ka bërë deri tani. Xhilardino? Nuk ka shënuar, por e pashë shumë aktiv në fushë dhe të pranishëm në fushë, në disa raste”. Në fund, Ançeloti foli për Ronaldon dhe Emersonin, që ishin të pranishëm në tribunë: “Ronido të jetë i disponueshëm të premten, ashtu si Emersoni”.

Kaka: Golashënues? Nuk mendoj!

“E nisëm vitin mekëmbën e duhur”. Riki Kaka është i lumtur për suksesin në Xhenova, por edhe për golat e shënuar, një “dopietë” që i jep mundësi të synojë edhe titullin si golashënues më i mirë në Serinë A, në këtë sezon. “Eshtë diçka e bukur kur fiton bindshëm, ashtu si bëmë ne. Më vjen keq që nuk ishin tifozët tanë për të na parë dhe për të qënë krenar për këtë skuadër. Jam i kënaqur për golat, por s’mendoj për renditjen e golashënuesve, sepse dua vetëm të ndihmoj shumë skuadrën. Forma e ekipit është e mirë dhe rreshtimi i aplikuar në fushë është nga më të mirët, sepse na ndihmon shumë. Arrijmë të gjejmë hapësira, luajmë dhe ndihemi mirë, psikologjikisht dhe fizikisht. Që prej 25 vitesh Milani nuk fitonte në Xhenoa dhe është një kënaqësi e bukur. Tani të mendojmë për Seviljën, jemi gati për këtë sfidë, ashtu si edhe kundërshtari, duke gjykuar sipas rezultateve të tyre. Dua që të fitoj sa më shumë me këtë skuadër, sepse është nga më të mirat në botë. Pato? Mezi pres që ta shoh, sepse jam i bindur se me atë, Emersonin dhe Ronaldon, mund të arrijmë majat. Shpresoj vetëm që të mos kemi dëmtime. Botërori i Klubeve? Eshtë një trofe që e dua”.



Sportekspres