Arkivi i gazetës elektronike sportive: "FUTBOLLI"

[km92]

Krujf: Të luajnë më të mirët!

25 Gusht Në prag të fillimit të kampionatit spanjoll, ish trajneri i Barcelonës, Johan Krujf, në një intervistë të dhënë, ka analizuar situatën e dy gjigantëve të futbollit spanjoll. Gjatë intervistës së tij, Krujf ka folur gjatë për skuadrën katalanase dhe deklaroi se lojtarët e Barcelonës duhet të njohin përgjegjësitë e tyre dhe nuk duhet të bëjmë të njëjtat gabime që bënë sezonin e kaluar. Krujf tha gjithashtu se numri i madh i yjeve në skuadër, do të rrisë konkurencën në radhët e Barcelonës. Për sa i përket filozofisë dhe sistemit të lojës që përdor Barça, holandezi tha se këto nuk duhet të ndryshojnë. “Struktura e skuadrës nuk duhet prekur. Duhen mbajtur të njëjtat linja, asgjë nuk duhet ndryshuar. Sistemi duhet të jetë fiks, kështu që çdo lojtarë që do të luajë në mesin e fushës, duhet ta ketë të qartë se çfarë duhet të bëjë. Barça do të zhvillojë dy ndeshje në javë, do të ketë ndëshkime me kartona dhe dëmtime dhe nuk mund të ndryshosh sistemin në çdo ndeshje. Flitet për një strukturë skuadre sepse gjithmonë është skuadra ajo që fiton, kurrë nuk është një lojtar i vetëm, qoftë ai edhe futbollisti më i mirë në botë. Skuadra duhet të tregohet e fortë dhe duhet t’i përballojë ndeshjet si një grup i vetëm. Nuk është problemi që të fitosh tre apo katër ndeshje, e rëndësishme është që skuadra të ketë vazhdimësi”. Për sa i përket “4 Fantastikëve”, Krujf tha se konkurenca midis tyre do të rrisë nivelin e skuadrës. “Nuk ka arsye që të luajnë të katërt në formacion. Nuk ka asnjë detyrim dhe asnjë urgjencë. Nëse dikush nuk ndihet mirë apo nuk është në 100% të formës, atëherë mund të luajë sulmuesi tjetër. Për mendimin tim, askush prej tyre nuk është i pazëvendësueshëm. Por nuk duhet të harrojmë gjithashtu se Rajkard ka në dispozicion edhe dy të rinjtë, Bojan Krkiç dhe Xhovani dos Santos”. Për sa i përket zhgënjimit të Barcelonës në sezonin e kaluar, Krujf tha se problemet në këtë skuadër ishin si brenda fushës ashtu edhe jashtë saj. “Të gjithë kanë mësuar nga eksperienca e keqe e sezonit të kaluar. Frenk Rajkard ndoqi një rrugë shumë të thjeshtë, duke i lënë lojtarët e tij shumë të lirë. Një skuadër mund të funksionojë në këtë mënyrë, por duhet treguar shumë kujdes. Nëse jep shumë liri, duhet të kërkosh shumë përgjegjësi”. Megjithatë, ish?trajneri holandez, mendon se në skuadrën e Barcelonës duhet të luajnë lojtarët që e meritojnë. “E di që Rajkard do ta ketë shumë të vështirë të bëjë zgjedhjet e tij, por jam i bindur se do t’ia dalë mbanë. Barça ka shumë lojtarë cilësorë, por mendoj se formacioni i skuadrës nuk duhet të bëhet në bazë të emrave. Trajneri duhet të analizojë të gjithë problemet e lojtarëve të tij dhe unë mendoj se duhet të luajnë ata futbllistë që po kalojnë një formë shumë të mirë”.

“Reali meriton respekt”

Gjatë intevistës, Johan Krujf, foli edhe për Realin e Madridit. “Askush nuk e di se çfarë do të ndodhë. Fakti që po vazhdojnë të bëjnë blerje, do të thotë se nuk janë shumë të sigurtë. Janë shumë ndryshe nga Barcelona, e cila sapo përfundoi kampionatin, menjëherë mori atë që dëshironte. Me këtë dua të them se drejtuesit e Barcelonë kanë punuar shumë mirë dhe e dinin se për çfarë kishte nevojë skuadra. Me Kapelon, Reali mori atë që dëshironte prej shumë kohësh: titullin kampion. Ndërsa tani, me Shusterin kërkojnë të shfaqin spektakël, por po i mungojnë rezultatet. Për drejtuesit e Realit të Madridit ishte një vendim shumë i guximshëm largimi i Kapelos. Megjithatë, nëse e sheh në një mënyrë tjetër, do të thoja se meritojnë të gjithë respektin sepse puna që duan të bëjnë nuk është e lehtë”.

[km92]

Italia "zbulon letrat" e saj

25 Gusht Seria A 2007?08 do të nisë sot, ndaj dhe "La Gazzetta dello Sport" ka bërë një "radiografi" të 20 skuadrave që do të marrin pjesë në këtë kompeticion, duke zbërthyer të mirat, të këqiat, por edhe "armët" të cilat do të përdorin ekipet pjesmarrëse. Edhe pse, në fund të fundit, do të jetë fusha ajo që do të përcaktojë se kush është më i forti dhe më i dobëti. Duke u bazuar te merkato, mënyra e punës, prestigji, por edhe renditja e sezonit të shkuar, për shumicën e ekipeve (hiq Juventus, Xhenoa, Napoli), formacionet e A-së janë ndarë në disa zona, sipas objektivave, si më poshtë.



Lufta për titull



Interi

Mirë: ka grupin më të "pasur" në botë, që përmban një larmi lojtarësh dhe cilësi të jashtëzakonshme. Eshtë një skuadër edhe më e mirë se ajo e sezonit të shkuar.

Keq: jo gjithmonë shpreh një lojë bindëse në fushën e blertë dhe Mançini ankohet për shumë pak alternativa në krahë. Dëmtimi i Materacit do të ndihet shumë. S'duhet harruar edhe figura e shëmtuar me Romën në Superkupën e Italisë, që është një nisje jo e mirë.

Arma: trajneri Mançini duhet që të jetë i aftë në drejtimin e shumë kampionëve, duke zgjedhur gjithmonë lojtarët që janë në formë dhe duke i dhënë pushimin e duhur edhe atyre futbollistëve që konsiderohen si të paprekshëm nga vendi i titullarit (Ibrahimoviç dhe Stakoniviç). Kanë dy emra më shumë, Kivunë dhe Suazon, që i japin shkëlqimin në dy reparte kyçe, mbrojtje dhe sulm.



Milani

Mirë: kur lojtarët titullarë dhe ata që bëjnë diferencën ndihen mirë, atëherë kuqezinjtë mund të fitojnë kundër kujdo në Europë dhe Itali. Kanë një grup të konsoliduar dhe Ronaldon, një "armë" më shumë, që vitin e shkuar erdhi vetëm në fund të sezonit.

Keq: është një ekip më shumë i përshtatur për kupat se sa për kampionatin, ku ndonjëherë zhgënjen, me paraqitje të dobëta. Mesatarja e moshës së lojtarëve është shumë e madhe, mbi të gjitha në mbrojtje. Kanë një program tepër të ngjejur, me sfida të rëndësishme, që përfaqësojnë trofej tepër prestigjoz, ndaj do të përqëndrohen tek ato.

Arma: sulmi varet nga rendimenti i Xhilardinos dhe nga kushtet e Ronaldos, me Inzagin si "as nën mëngë". Dhe, për të qënë më shumë realist, në ekip luan një lojtar i pazëvendësueshëm, Rikardo Kaka. Me brazilianin, loja kuqezi del në pah më shumë. Sedorf mund të jetë, edhe këtë vit, përcaktues në ndeshjet e mëdha, ashtu si edhe Pirlo, i cili me asistet e tij i dhuron Milanit shanse të panumërta.



Roma

Mirë: luan futbollin më zbavitës në Itali dhe ka lëvizur shumë mirë në merkato, duke i dhënë më shumë alternativa trajnerit Spaleti, që do të mbështetet edhe te lojtarë që sezonin e shkuar kanë qëndruar në pankinë. Tani, verdhekuqtë janë të bindur në forcën e tyre, pas suksesit në Superkupë.

Keq: ndonjëherë, mungon konkretësia, finalizimi para portës dhe mbyllja e ndeshjeve. Për të mbajtur hapin e Interit të vitit të shkuar, nuk mund të lihen pikë gjatë rrugës, por duhet dhënë gjithmonë maksimumi. Këtë herë, zikaltrit dhe verdhekuqtë nuk do të jenë të vetëm, por do të kenë edhe Milanin dhe Juventusin si rivalë.

Arma: nëse Toti është ai i vitit të shkuar, atëherë për të gjithë do të jetë e vështirë që të mundin Romën. E rëndësishme është që të ketë rrotacion, në mënyrë që të shlodhen të gjithë, por kjo duhet të ndodhë pa shpërqëndrime apo ulje të ritmit. Kanë Champions League për të luajtur, ndaj do të jenë edhe më entuziastë.



Juventusi

Mirë: klubi bardhezi ka arritur që të mbajë në ekip kampionët që ka në grup. Sulmi funksionon dhe nuk mungojnë edhe opsionet për Ranierin, ndaj do të jetë diçka e bukur që të shihet një Juventus edhe më i madh, për sa i përket grupit.

Keq: mbrojtja është e pasigurtë dhe në shumë raste ka nxjerrë në pah difektet, që duhen ndrequr shumë shpejt, përpara se "varka" të nisë të fusë ujë. Zebina nuk bind në të djathtë, Tiago dhe Almiron, së bashku në mesfushë, nuk janë një lluks të cilin mund t'ia lejosh vetes, në çdo takim.

Arma: Ranieri duhet që të gjejë ekuilbrin e duhur dhe ky është një "rebus" shumë i bukur: ka cilësi në fazën e sulmit, por nuk mund ta çekuilibrojë shumë skuadrën. Sigurisht, nëse gjërat shkojnë sipas parashikimit, atëherë pritet që bardhezinjtë të befasojnë. Për të ecur sipas ritmit të Interit, Romës dhe Milanit, ekipi i Ranierit duhet të luajë me shpirtin e Serisë B.





Objektivi Europë



Fiorentina

Mirë: Trajneri Prandeli, në pankinë, është një garanci dhe di të punojë me të rinjtë e talentuar.

Keq: lamtumira e Tonit nuk është e lehtë që të harrohet dhe miqësorja e zhvilluar në Bilbao nuk dha asnjë sinjal.

Arma: Pacini mund të jetë zbulimi.



Lacio

Mirë: Delio Rosi di të nxjerrë maksimumin nga grupi i lojtarëve, që edhe sezonin e shkuar nuk zhgënjyen. Kanë Kolarovin dhe Megnin më shumë.

Keq: sfida e Champions League me Dinamo Bukureshtin ka krijuar shumë nervozizëm, ndaj s'do të jetë e lehtë.

Arma: Roki është në një formë të shkëlqyer, por Pandev ka diçka më shumë.



Palermo

Mirë: Kolantuono ka në dispozicion futbollistë të talentuar dhe Amaurin, që është rikthyer.

Keq: mbrojtja duhet parë me kujdes, pasi ka qënë gjithmonë pika e dobët.

Arma: Xamparini dhe tifozët janë të qetë dhe besojnë te projekti.



Sampdoria

Mirë: Kualjarela u zëvendësua nga 4 sulmues me vlerë dhe skuadra tregoi se di të vuajë.

Keq: Maxarri nuk ka mundur të shfaqë ende në lojë të rrjedhshme.

Arma: gjithçka është përreth Kasanos, sepse mund të udhëheqë Sampin shumë lart ose të krijojë vetëm probleme. Edhe Montela duhet parë.



Udineze

Mirë: kanë mbërritur shumë të rinj me vlerë në vend të atyre që largohen dhe mbi të gjitha, për sulmin ka ardhur Kualjarela.

Keq: nëse largohet Di Natale, atëherë do të jetë e vështirë për bardhezinjtë.

Arma: në 4?3?3 e Marinos, formacioni titullar është cilësor, por edhe i ri në moshë.





Intertoto dhe qetësia



Empoli

Mirë: Huazimi i Zhovinkos dhe blerja e Xhakomacit. Si dhe qëndrimi i Kanjit në detyrë.

Keq: Sulmi nuk shënon me shumicë, por Poci mund të shpërthejë dhe Saudati ka përvojë.

Arma: Në aspektin psikologjik, do të jetë e rëndësishme të shfrytëzohet suksesi i sezonit të fundit. Në atë fizik, duhet nderuar Kupa UEFA.



Livorno

Mirë: Skuadër e vendosur. Tavano e Tristan janë dy sulmues shumë të mirë, duhet vetëm të rigjejnë formën e tyre.

Keq: Pa Kristiano Lukarelin, mungon udhëqheqësi i vërtetë. Ka dhe disa probleme në mbrojtje.

Arma: Më shumë se sa Tristan, do të jetë vendimtar Tavano. Po u kthye ai i Empolit, sigurisht.



Napoli

Mirë: Ka entuziazëm të madh në popull, Laveci duket blerje e mirë dhe Hamshik mund të shpërthejë.

Keq: Mbrojtja s'duket e pakalueshme. Në trofeun "Birra Moretti" u duk ndryshimi nga Inter e Juve.

Arma: Laveci duhet të merret vesh mirë me partnerin, që do të jetë Kalaio, Zalajeta apo Soza.



Atalanta

Mirë: Del Neri ka gjetur një grup të mësuar duke luajtur bashkë. Lanxhela dhe Flokari shkojnë me Zampanjën në sulm.

Keq: Do të mungojë një si Miliaço dhe vitet e Donit vetëm rriten.

Arma: Gjendja fizike do të bëjë ndryshimin te rendimenti i Donit.



Torino

Mirë: Radhët janë përmirësuar dhe Nivelino e ka përcjellë karakterin e tij te skuadra.

Keq: Prapavija pëson shumë gola. Dhe pezullimi i Di Mikeles do t'ia pakësojë fantazinë sulmit.

Arma: A do të dijë Korini të vërë rregull në mesfushë? Pastaj, Ventola ose Bjelanoviç duhet të shpërthejnë menjëherë.



Xhenoa

Mirë: Gasperini bën që kuqeblutë të luajnë në mënyrë spektakolare. Borielo dhe Papa Uaigo shkojnë me Di Vaion në sulm.

Keq: Moduli 3?4?3 është zbavitës por në A është tepër i rrezikshëm.

Arma: Mbrojtja duhet ndihmuar nga mesfushorët, përndryshe...



Të rrezikuarit



Parma

Mirë: Rexhinaldo i jep pak qetësi sulmit. Mirë që qëndroi Budan.

Keq: Nuk është më talenti i Xhuzepe Rosit. Edhe mbrojtja nuk të jep shumë garanci.

Arma: Morfeo duhet të bëjë kujdes me disiplinën.



Kaljari

Mirë: Fati më i madh është që në stol është sërish Xhampaolo.

Keq: S'duhet të humbeshin njëherësh Esposito, Suazo e Lanxhela.

Arma: Golat e Akuafreskës. Eshtë i talentuar, por i javë vënë shumëpërgjegjësi.



Rexhina

Mirë: Qëndrimi i Amoruzos dhe kthimi i Kocës.

Keq: Largimi i Rolando Biankit dhe trajnerit Maxarri do të peshojnë.

Arma: Mesfusha e rinovuar mund të habisë ose dështojë.



Katania

Mirë: Lojtarët që ka në skuadër trajneri i ri Baldini janë të "kolauduar".

Keq: Largimi i Koronës dobëson sulmin; edhe mbrojtja duket delikate.

Arma: Do të jenë thelbësore magjitë dhe disiplina e Maskarës.



Siena

Mirë: Forma e Makarones. Loria do të garantojë ndonjë gol që nga mbrojtja.

Keq: Në miqësoret e verës, skuadra nuk ka bindur.

Arma: Lukareli, nësë është në formë, mund të jetë vendimtar. Por problemet e mëdha janë në mbrojtje.

[RaPSouL]

Del Piero: Të tregojmë dhëmbët!

25 Gusht Ishte më i miri nga "axurrët" në ndeshjen e Kombëtares së Italisë në Budapest, në miqësoren me Hungarinë (djemtë e Donadonit humbën 3-1), por tani është i përqëndruar te Juventusi, ekipi i tij i zemrës. Java e parë e vendos përballë Livornos, pas "tmerrit" të kaluar në Serinë B. Rendimenti i kapitenit bardhezi është i lartë dhe, për këtë arsye, Aleks është i bindur se këtë sezon do të japë maksimumin. Kur dikush e akuzon për paraqitje gati "hyjnore" me një qëllim të vetëm, rinovimin e kontratës, "Pinturikio" nuk është dakord: "Po tallemi gjë. Nuk ka të bëjë fare kjo. Kam luajtur në të tilla nivele edhe kur nuk isha në tratativë me klubin. Kur zbres në fushë nuk mendoj për situata ekstrafutbollistike". Objektivi i vetëm i tij, për momentin, është Champions League, një vend që do t'i lejojte "Zonjës së Vjetër" të mos mungonte në skenën europiane, sezonin e ardhshëm. Tifozët besojnë te magjitë e tij dhe, për këtë arsye, i kanë përgatitur një parrullë të veçantë, që është surprizë. Aleks i ka idetë e qarta: "Sigurisht, nuk them se do të futemi në fushë me mendjen se duhet të fitojmë titullin, por me idenë për të nderuar këtë fanellë, që është gjithçka për ne lojtarët, dhe për të zhvilluar një sezon sa më të bukur. Livorno është kundërshtari ynë i parë, ndaj duhet ta nisim me tre pikë këtë vit të ri, këtë kthim në Serinë A. Kur mendoj për ato që na ndodhëm, kam më shumë shtysa për të dhënë më të mirën në fushë. Shpresoj që të vazhdoj kështu, duke shënuar. Jo vetëm unë, por të gjithë, përfshirë këtu Nedvedin, Kamoranezin, Bufonin, Trezegenë, por edhe blerjet e reja, janë të vetëdijshëm se duhet të japin diçka më shumë për të qënë konkurrues".



Bufon: Periudha më e keqe kaloi

"Mendoj se sezoni më i vështirë ka kaluar dhe nuk duhet të mendojmë më për të shkuarën, por për të ardhmen, duke parë se për ne është e rëndësishme që të synojmë për më lart, tani që vijmë një vit tepër shqetësuar dhe i mbushur me probleme. S'ishte e lehtë të luaje në Serinë B, por ia dolëm dhe për këtë ndihem mëse krenar. Tani që vuajtëm dënimin, mund të futemi në fushën e lojës me kokën lart. Seria A, këtë vit, do të jetë shumë më e bukur. Konkurrenca do të jetë e madhe, sepse të gjithë ekipet janë forcuar dhe për këtë arsye do të bëhet e vështirë, për këdo. Por, jemi të përgatitur për këtë vit të gjatë dhe të mbushur me ndeshje të mëdha. Juventusi nuk do të zhgënjejë, keni për ta parë".

[RaPSouL]

Lipi, gati të rimarrë "axurrët"

25 Gusht Marçelo Lipi, pas triumfit në Botëror, ka marrë një vit pushim, duke u shlodhur nën hije ose duke lundruar në det me jahtin e tij. Por, tani është gati që të kthehet në "pistë". Nuk flitet për pankinën, por ashtu si të gjithë dinë, me televizionin, sepse është thirrur që të komentojë ndeshjet e Champions League. Pse jo si komentator i Serisë A: "Sepse nëse do të kisha marrë përsipër këtë detyrë, atëherë çdo deklaratë e imja do të kishte shkaktuar shumë polemika. E pranova këtë detyrë sepse ky impenjim më lejon që të azhornohem, por jam një trajner që është i lidhur fort pas televizionit", tha Lipi. Por, nuk ka asnjë dyshim që... një ditë, Marçelo do të kthehet. Nëse do t'i vinte një ofertë prestigjoze, Lipi do të largohej menjëherë nga televizioni. Por, nuk është për t'u përjashtuar edhe një kthim në pankinën "axurre", nëse gjërat do të shkonin keq për Roberto Donadonin. Një ide për t'u vlerësuar më mirë, edhe pse të gjithë presin që kjo të ndodhë. Ndërkohë, Xhankarlo Abete, presidenti i Federatës Italiane të Futbollit, iu përgjigj atyre që kishin hipotizuar një ofertë të tij për kampionin e botës: "Nuk i kam bërë asnjë ofertë Marçelo Lipit, për ta marrë në Kombëtare. Janë vetëm shpikje gazetareske".

[RaPSouL]

Ronaldinho: Ky do të jetë sezoni im më i mirë

Ronaldinho është i sigurt se do të kthehet në formën e tij më të mirë, gjatë këtij sezoni, dhe është i gatshëm ta lë sezonin e kaluar prapa dhe të luftojë për vend në sulmin e ri të Barcelonës.
Superylli brazilian është akuzuar se ka qenë “i lodhur” në edicionin e fundit dhe për mosparaqitje të mirë në ndeshjet thelbësore - po ashtu edhe i implikuar në probleme jashtë fushe me klubin.

“Do të bëj përpjekje të mëdha të sigurohem që ky të jetë sezoni im më i mirë”, ka thënë 27-vjeçari. “Jam vërtetë i kënaqur me mënyrën se si kanë kaluar gjërat në parasezon. Kur je në formë të mirë fizike, gjërat janë më lehta dhe çdo ditë ndjehem më i motivuar”.

Dështimi të fitojnë ndonjë trofe të madh sezonin e kaluar, problemet prapa skene dhe ndikimi që patën ato në fushë, dolën në pah në fund të kampanjës - por Ronaldinho beson se lojtarët tashmë janë tërësisht të fokusuar.
“Ne kemi biseduar rreth asaj çfarë kemi bërë keq sezonin e kaluar dhe të gjithë punojmë në drejtim të bëhemi ekip kampion sërish”, ka konfirmuar ai.

[RaPSouL]

Henry: Messi është talent shumë i rrallë

Ish-sulmuesi i Arsenalit, Thierry Henry, beson se Lionel Messi mund të bëhet njëri nga futbollistët më të mirë në historinë e futbollit botëror.

"Messi do të arrijë shumëçka në karrierën e tij. Ai tashmë po shfaq lojëra të cilat lojtarët kulmor i arrijnë në moshën 25, 26 ose 27-vjeçare. Ndoshta pas 10 vjetësh do të them se kam pasur nderin të luajë përkrah tij. Një lojtar i tillë është thuajse unikat”, ka lavdëruar Henry bashkëlojtarin e tij.
I pyetur nëse Barcelona do të gjendet nën presion nga tifozët gjatë këtij sezoni, henry ka thënë: "Presion? Presion mund të ndjeni kur e keni jetën të kërcënuar, kur ballafaqoheni me dënim të burgut, ose kur nuk keni para dhe ushqim. Të lush futboll nuk është presion”, ka thënë përfaqësuesi i kombëtares së Francës

[RaPSouL]

Arsenal i jep fund fillimit të suksesshëm të Cityt

Një gol nga Cesc Fabregas, dhjetë minuta para përfundimit të ndeshjes, ia shkaktoi humbjen e parë të sezonit, Manchester Cityt, derisa Arsenal fitoi me rezultat 1-0 në Emirates Stadium.

Ndeshja dukej se do të përfundonte me pikë të barabarta, pasi që portieri i Cityt, Kasper Schmeichel, bëri një paraqitje të mrekullueshme, duke mbrojtur një sërë shansesh të pastra - përfshirë edhe një penalti të gjuajtur nga van Persie, 20 minuta para përfundimit të ndeshjes.

Por, një rënie në koncentrimin e mysafirëve, në minutën e 80-të, i lejoi Alexander Hlebit të pasojë për Fabregas, i cili gjuajti për të shënuar golin e vetëm të ndeshjes, dhe të vetmin të pranuar nga Schmeichel në katër ndeshje.

Me këto pikë, Arsenal mban pozitën e pestë me shtatë pikë, por me tri ndeshje të luajtura, derisa Manchester City, zbret në vendin e dytë, me nëntë pikë nga katër ndeshje.

Chelsea po ashtu fitoi me rezultat minimal 1-0 ndaj Portsmouth, për të marrë tre pikë të plota që e ngrejë në vendin e parë të Premier Ligës me dhjetë pikë. Kampioni aktual Manchester United pret të dielën në shtëpi ekipin e Tottenhamit.

[RaPSouL]

Marseille shënon fitoren e parë, Cana kapiten

Olimpique Marseille ka shënuar fitoren e parë këtë sezon si mysafir i ekipit Caen, me rezultat 2-1, derisa futbollisti kosovar, Lorik Cana, ka mbajtur shiritin e kapitenit.

Marseille deri tani kishte shënuar tri barazime dhe një humbje, një fillim i dobët për sezonin e ri, derisa në ndeshjen e parë këtë sezon me kapiten Canën ka shënuar edhe fitoren e parë.

Goli i parë i mysafirëve erdhi nga Rodriguez në minutat e fundit të pjesës së parë (44’), derisa avantazhin e rriti Niang në pjesën e dytë (minuta 54).

Portieri i dytë, Steve Mandanda, mbrojti disa raste të mira, por nuk mundi të mbrojë golin e vetëm të vendasve që erdhi në minutat shtesë të ndeshjes përmes Samsonit. Megjithatë mysafirët shmangën një skenar të ngjashëm me atë të ndeshjes së kaluar.

Kujtojmë që edhe në ndeshjen e kaluar si vendas, Marseille pati avantazhin 2-0, por mysafiri Nancy (që kryesojnë në Ligue 1), shfrytëzuan lodhjen e vendasve dhe kishin barazuar rezultatin në 2-2.

Me këtë fitore Marseille grumbullon gjashtë pikë nga 5 ndeshje dhe radhitet në pozitën e 10-të. Lider në Ligue 1 edhe më tej mbetet Nancy që siguron 13 pikë, pas fitores 4-1 në vend të vet nga Auxerre.

[RaPSouL]

Sneijder ia siguron fitoren Realit kundër Atleticos

Goli i shënuar nga holandezi i ri i ardhur në Real Madrid, Wesley Sneijder, dhjetë minuta para përfundimit të ndeshjes, i solli fitoren kampionit spanjoll në derbin e qytetit, kundër Atletico Madrid.

Real Madrid u trondit që në fillim të ndeshjes nga goli i minutës së parë i shënuar nga, Sergio Aguero, që do të mund të ishte shumë dëshpërues për trajnerin Bernd Schuster.

Sidoqoftë, kampioni u rikthye duke shndërruar disavatazhin në barazim, dhe duke kaluar më pastaj në avantazh, në dhjetë minutat e fundit të ndeshjes. Goli i barazimit erdhi nga kapiteni Raul në minutën e 15-të. Në minutën e 79-të ishte Wesley Sneijder që nxori tri pikë për Realin.

Ndeshja ishte e para e sezonit të ri në La Liga, dhe gjatë gjithë kohës u luajt me ritëm të shpejtë. Të dy ekipet kanë luajtur futboll të hapur dhe ofensivë, por ishte Real që dukej më i rrezikshëm, dhe që me meritë siguroi fitoren e parë.

[vedat_milani]

heheh urime real madrid ishalla te shkon mbar tan kampionati por mos harro se e ke mbrapa thieri henry me barcelonen hehehe tung