Arkivi i gazetës elektronike sportive: "FUTBOLLI"

[RaPSouL]

Zyrtarët e kampionit evropian, Milan, kanë bërë të ditur se u kanë dështuar bisedimet me Real Madridin rreth angazhimit të Emersonit - mirëpo thuhet se kanë arritur pajtueshmëri për Julio Baptistan.
Në ueb-faqen zyrtare të Milanit, janë hedhur poshtë raportet për ardhjen e Emersonit në këtë ekip – pasi që nuk kanë mundur të merreshin vesh me madrilienët, për çmimin e dëmshpërblimit.
Megjithatë, gazeta spanjolle “AS’, ka raportuar se Milan dhe Real Madrid janë marrë vesh për transferimin e Julio Baptistas në klubin italian, për 14 milionë euro.
Megjithatë për t’u realizuar ky transfer nevojitet edhe pajtimi i futbollistit brazilian, i cili në kohën e fundit ka deklaruar se, do të dëshironte të mbetet në Spanjë.

[RaPSouL]

David Beckham shënon golin e parë për LA Galaxy

Beckham ka mbajtur shiritin e kapitenit në daljen e parë që nga fillimi me Los Angeles Galaxy, duke shënuar edhe gol dhe duke asistuar tjetrin, në fitoren 2-0 ndaj DC United, në gjysmëfinale të SuperLiga.
32-vjeçari, që kishte qenë i penguar nga lëndimi i gjurit të majtë për dy muajt e fundit, lëshoi fushën në minutën 63-të. Beckham shënoi golin e parë për ekipin në minutën 27, nga gjuajtja e lirë, duke ndezur 17 mijë shikuesit e pranishëm.

“E ndieja se do të shënoja së shpejti dhe e mora topin në duar të mia”, ka thënë Beckham, duke shtuar se nuk e kishte praktikuar gjuajtjen e lirë që kur i është bashkuar ekipit. “Ishte gjuajtja e parë e lirë që e kam realizuar gjatë këtyre tetë javëve dhe ishte shumë tërheqëse. Isha plotësisht i lumtur me këtë”.
Në fillim të pjesës së dytë (47’) Beckham dërgoi një top të saktë për kapitenin e zakonshëm të Galaxy, Landon Doovan, i cili shënon golin e dytë, për të shënuar rezultatin përfundimtar 2-0.

[RaPSouL]

Ronaldo skuqet, derisa Manchester sërish barazon

Kampioni i Anglisë, Manchester United, sërish ka barazuar gjatë javës së dytë të Premier Ligës, kësaj here si mysafire e Portsmouthit, ndërsa Cristiano Ronaldo u përjashtua nga loja në minutën 85 të ndeshjes.
Ndeshja u dallua edhe për debutimin e shumëpritur të Carlos Tevezit, por as ai nuk arriti të ndikojë që Manchester United të arrijë fitoren.

Goli i parë në ndeshje erdhi për mysafirët të cilët shënuan përmes Paul Schooles (15’), por në pjesën e dytë të ndeshjes vendasit barazuan përmes Mwaruwari.
Kur kishin mbetur edhe pak minuta, ndeshja kaloi në një konfrontim që ndodhi në pjesën e fushës së Portsmouth, derisa Manchester përgatiteshin të ekzekutonin goditje nga këndi, që rezultoi edhe me kartonin e kuq të Ronaldos. Nga vendasit u përjashtua Muntari, pas kartonit të dytë.

[RaPSouL]

Një milion euro ndan Cicinhon nga Roma

Mbrojtësi brazilian Cicinho së shpejti mund të bëhet pjesë e ekipit Roma, pasi që dy klubet pritet të gjejnë një marrëveshje rreth shumës së transferimit që duhet paguar.
Roma dhe Real Madrid tash janë shumë afër marrëveshjes e cila do t’i mundësojë Cicinhos të zhvendoset në kryeqytetin e Italisë, gjatë ditëve të ardhshme.
Sipas “Sky”, ekipi italian e ka rritur ofertën e tij në 8 milionë euro, derisa spanjollët e kanë ulur ofertën nga 10, në 9 milionë euro. Kjo do të thotë se vetëm një milion euro i ndajnë të dy ekipet dhe çdo gjë çon në drejtim të plotësimit të marrëveshjes, që pritet të ndodhë në ditët e ardhshme.

Cicinho nuk bën pjesë në planet e Real Madridit dhe kjo është bërë shumë e qartë në para-sezon, kur braziliani e kishte të vështirë të jetë pjesë e njëmbëdhjetëshes së parë.
Lojtari brazilian tashmë ka shprehur dëshirën e tij t’i bashkohet klubit të Romës.

[RaPSouL]

Stiv: Mungesën e Runit e kompenson Oueni!

16 Gusht Trajneri i kombëtares angleze, Stiv MekKlaren, pranon që dëmtimi i Uejn Runit është një goditje e madhe për Anglinë, por ai është i bindur që kombëtarja mund të fitojë edhe pa yllin e Mançester Junaitedit. 21?vjeçari pësoi një frakturë në këmbë, në javën hapëse të Premier League dhe pritet të qëndrojë jashtë fushave në dy muajt pasardhës. Edhe pse MekKlareni pranoi që Runi është një futbollist shumë i rëndësishëm në skuadrën e tij, ai nuk sheh asnjë arsye përse mungesa e Uejnit të pengojë “luanët” në arritjen e sukseseve të mëtejshme. “Runi do të jetë një mungesë e rëndësishsme për ne, sidomos pasi tregoi një formë shumë të mirë gjatë fazës përgatitore. Ai është një futbollist shumë i rëndësishëm për Anglinë, kështu që dëmtimi i tij ishte një lajm i keq për të gjithë, por duhet të ecim përpara. Patëm një verë pozitive në ndeshjet me Shqipërinë, Brazilin dhe Estoninë. Runi mungoi në të gjitha këto ndeshje. Për më tepër, dëmtimi i Runit do të kompensohet në një farë mënyre nga rikthimi i Majkëll Ouenit. Fola me të në telefon dhe ishte në një gjendje shpirtërore shumë optimiste. Me disa ditë stërvitje, Oueni mund të gjejë shumë shpejt një formë që ta lejojë të luajë pa probleme që nga minuta e parë për Anglinë. Pastaj, vazhdojmë të kemi Piter Krauçin, Alan Smithin, Darren Bentin, Endi Xhohnsonin, Xhermein Defonë dhe David Nagentin. Të gjithë këta janë futbollistë të një niveli të lartë, kanë luajtur më parë me Anglinë dhe mund ta bëjnë këtë përsëri pas asnjë problem”, deklaroi MekKlareni.

[RaPSouL]

Shol, lamtumira mes yjeve

16 Gusht Me miqësoren e djeshme me Barcelonën, Mehmet Shol i tha përfundimisht lamtumirë futbollit të luajtur. Në fakt gjermani me origjinë turke shpalli tërheqjen e tij që në përfundim të sezonit të kaluar dhe drejtuesit e Bajernit organizuan takimin e djeshëm (Kupën “Franc Bekenbauer”) për nder të tij. Bajerni i rinovuar u mund nga Barcelona pas një goli fantastik të Lionel Mesit, por kur u zëvendësua me Frenk Riberinë në pjesën e dytë, ishte Sholi që ngriti në këmbë të gjithë të pranishmit në “Allianz Arena”. Në fakt, Mehmet Jyksel (mbiemri i tij i vërtetë, Shol e ka marrë nga burri i dytë i të ëmës, kur ishte 5 vjeç) është futbollisti që ka fituar më shumë tituj kampion në Bundesligë, plot tetë, të gjithë me Bajernin e Mynihut. Përveç kampionateve, Shol ka fituar edhe pesë herë Kupën e Gjermanisë, Kupën UEFA në vitin 1996 dhe Champions League në vitin 2001, po Bajernin. Me kombëtaren gjermane ka fituar Euro 96. Nga viti 1982, deri në vitin 1992 ka luajtur për Karlsruhen, para se të kalonte te Bajerni. Debutimin në Bundesligë e ka bërë më 21 prill 1990, në moshën 20?vjeçare. Në Bundesligë ka luajtur gjithsej 392 ndeshje (58 me Karlsruhen dhe 334 me Bajernin), ku ka shënuar 98 gola (11 me Karlsruhen, 87 me Bajernin). Por dëmtimet e shpeshta që ka pësuar përgjatë gjithë karrierës e kanë penguar të jetë titullar i rregullt në kombëtaren gjermane, por edhe në mos aktivizimin e tij gjithmonë për 90 minuta. Në fakt, ai është lojtari i zëvendësuar më shpesh në historinë e Bajernit. Në 468 ndeshje në total është zëvendësuar 149 herë dhe është futur si zëvendësues 147 herë. Shol ka qenë ndër lojtarët më të dashur të tifozëve gjermanë, të cilët kërkuan që Klinsmani ta grumbullonte edhe në Botërorin e kaluar, por në fund, ish?kolegu i tij nuk e mori në skuadër.

[RaPSouL]

Ançeloti: Po shkartis letrat

16 Gusht “Mora sinjale pozitive nga djemtë dhe ditët në vazhdim do të nisim të mendojmë seriozisht për kampionatin”



Edhe pse humbja ndaj Interit, në finalen e trofeut “Tim”, ka lënë një shije të hidhur te Milani, më shumë për atë që pa në ndeshjet e zhvilluara, Karlo Ançeloti, trajneri kuqezi, nuk flet për “dramë”, por shprehet i kënaqur për lojën e zhvilluar nga skuadra e tij. “Përtej rezultatit, më pëlqeu sidomos ndeshja ndaj Interit: ka më shumë ndërtim loje dhe kontroll topi. Ishin dy ndeshje të mirëinterpretuara. Skuadra është duke u rritur: po shkon gjithçka ashtu si parashikohej. Pashë një punë të mirë nga ana e të gjithëve dhe këto sinjalë më qetësojnë shumë. Çdokush ka hedhur një hap përpara. Tani do të nisim që të flasim më seriozisht dhe të impenjohemi më shumë në fushë. Në 17 gusht është trofeu “Berluskoni”, që për ne është shumë i rëndësishëm. Do të bëjmë provat e përgjithshmë në prag të startit të kampionatit dhe për Superkupën e Europës. Po bëjmë një përgatitje të mirë, ciëlsorë dhe sasiore”, tha Ançeloti, duke u ndalur më pas te paraqitja e Gurkufit. “Johan tregoi cilësitë e tij, që e karakterizojnë. Dhe kur arrin që të lehtësojë lojën e tij, cilësitë dalin më shumë në pah. Duhet të mësohemi më shumë me mbulimin e ashpër karshi Kakasë. Interi dhe Juventusi? Zikaltrit janë një ekip që dihen tashmë, ndërsa Juventusi po tregon përparime dhe do të jetë gati për kampionat”.



Xhilardino: Rilindja ime ka nisur!

Alberto Xhilardino e ka “thyer” tersin, duke e nisur sezonin, edhe pse jo në një ndeshje zyrtare. Goli i shënuar nga ish?”xhevahiri” i Parmës kundër Juventusit ka bërë që e gjithë tribuna kuqezi e “San Siro”?s të shpërthejë nga entuziazmi dhe gëzimi. Kampioni i botës, që ishte parë mirë edhe ndaj Betis Seviljës, ku shpërdoroi shumë raste përpara portës, këtë herë, ndaj bardhezinjve, pasi është pasuar në kufi të hyrjes në zonën e rreptësisë, nuk ka gabuar, por me një gjuajtje me të “thatë” me të brendshmen ka kaluar Bufonin, duke e adresuar topin në rrjetë. Gëzimi i Xhilës ka qënë i veçantë dhe në sytë e tij është dalluar një lumturi e madhe, të cilën Alberto e shpjegoi më vonë në një intervistë të dhënë për “Sky”, në fund të ndeshjes: “Jam shumë i kënaqur për golin dhe për rezultatin e ndeshjes së parë që luaj ndaj Juventusit. Ishte e rëndësishme që të shënoja ndaj bardhezinjve. Eshtë e qartë se me ngarkesat fizike dhe atletike të kësaj periudhe nuk mund të shkëlqejmë shumë. Për mua ky është viti i parë që kur kam ardhur këtu te Milani, në të cilin arrij që të zhvilloj një përgatitje të plotë. Kam dëshirë dhe do të jap maksimumin. Eshtë e vështirë që trë gjykosh Interin dhe Juventusin në këtë moment, por me siguri duhet të them se janë dy skuadra të mëdha që këtë vit, në kampionat, do të jenë protagonist dhe do të mundohen që të luftojnë për titull. Të shënosh gol për një sulmues është sigurisht diçka e rëndësishme. Në ndeshet e djeshme arrita që ta bëj këtë dhe jam i lumtur, por duhet të punoj edhe pak për të mbërritur në 100% të formës dhe për t’u kthyer si dikur. Klubi beson shumë te unë dhe nuk dua që të zhgënje drejtuesit, sepse mendojnë se jam e ardhmja e Milanit, bashkë me Kakanë. Dhe, kështu do të jetë, sepse do të impenjohem deri në maksimum”.



Gurkuf: Besoni te unë!

I kënaqur dhe i lumtur për paraqitjen e tij në trofeun “Tim”, edhe pse luajti vetëm 45 minuta ndaj Interit, në mini?finalen e trofeut trekëndor. Johan Gurkuf ka marrë në fund të ndeshjes duatrokitjet e publikut kuqezi dhe të trajnerit Karlo Ançeloti, që beson shumë te cilësitë e talentit francez, që ishte drejt largimit, për shkak se nuk gjente shumë hapësira në ekip. Gurkuf ka qënë edhe autor i një shtylle të goditur me një gjuajtje të jashtë zone, por nuk mendon për fatin e keq: “Nuk ishte e lehtë që të luaje ndaj një skuadre të madhe si Interi. Fizikisht nuk ishte e lehtë sepse i kemi këmbët pak të rënduara. Tani, në përgatitje jemi duke nisur që të punojmë në lidhje me shpejtësinë. Jam i kënaqur nga paraqitja, por duhet të impenjohem edhe më shumë, nëse dua që të jap më të mirën në të ardhmen. Për mua, e rëndësishme është që të kem besimin e të gjithëve. Ndihem mirë kur luaj përpara me Sedorfin dhe Favalin prapa. Kur ka më shumë lëvizje në sulm, atëherë puna ime lehtësohet shumë dhe kam hapësira për të zhvilluar lojën dge fantazinë. Tani kemi trofeun Berluskoni, që është shumë i rëndësishëm për klubin. Shpresoj që trajneri të më japë mundësi të luaj. Do të bëj të pamundurën për të mos zhgënjyer. Shtylla e goditur? Do të shënoj shumë shpejt”.

[RaPSouL]

Mançini: Kujdes “Zonjën”, do të na çudisë këtë vit!

16 Gusht “Kanë ndryshuar shumë lojtarë, por janë konkurrues dhe do të luftojnë në një plan me ne. S’duhet t’i nënvlerësojmë”



Në fund të fundit, fjala e Roberto Mançinit, që është trajneri kampion në fuqi, për Serinë A, është më e rëndësishme në vlerësimin e një kundërshtari dhe në analizimin e sezonit që do të vijë. Dhe, si për çudi, për të parën herë, pas trofeut “Tim”, tekniku i Interit e sheh Juventusin si rivalin për t’u mundur, në luftën për titull: “Bardhezinjtë janë për titull dhe nuk kam asnjë dyshim që do të përpiqen të shkojnë deri në fund, ashtu si ne”. Nuk janë elozhe për të maskuar grindjet dhe polemikat e ngjallura pas “Calciopoli”?t mes dy klubeve, por deklarat e një trajneri që ka fituar, sezonin e shkuar, kampionatin italian dhe që është i bindur për forcën e skuadrës së tij, edhe për këtë vit. Manço është i vetëdijshëm se Juventusi i Ranierit, edhe pse vjen nga Seria B dhe nuk ka një grup lojtarësh të krahasueshëm me ata zikaltër, nuk është inferior karshi dikujt. Mançini duket i qartë: “Juventusi? Më duket një skuadër e mirë dhe që gëzon shëndet të plotë. E shoh si në rival në luftën për titull. Ndoshta, do të hasë në vështirësitë e fillimit, sepse ndryshoi shumë lojtarë dhe ndaj i nevojiten mekanizma të rinj, por janë shumë konkurrues dhe blerjet e reja janë të një niveli të lartë. Pastaj, nuk ka kupa për të zhvilluar, ndaj ky është një avantazh”. Në fund, Manço u ndal te takimi i Superkupës, që do të luhet të në 20 gusht dhe do të shohë Interin e tij përballë Romës së Spaletit: “Eshtë një takim i rëndësishëm por nuk besoj se do të mbërrijmë në formën më të mirë, ashtu si verdhekuqtë. Do të ishte e gabuar nëse do të mbërrinim në 100% të formës që në gusht”.



Zaneti: S’kemi ndryshuar aspak!

“Këmbët i kemi më të lehta dhe loja është bërë edhe më e rrjedhshme, ndaj them se po kthehemi si sezonin e shkuar”. Eshtë i kënaqur Havier Zaneti, kapiteni i Interit, në fund të edicionit të 7?të të trofeut “Tim”, i fituar për të pestën herë nga kampionët e Italisë. Lumtur jo shumë për rezultatin, por për paraqitjen e skuadrës dhe për atë të shokëve të tij argjentinas, që janë kthyer në fushën e blertë pas një mungese të gjatë, duke parë se kanë qënë në Kupën e Amerikës dhe kanë pushuar më shumë se të tjerët. “Edhe pse kemi vetëm një javë punë në këmbë, këto ndeshje të para tregojnë se jemi ambjentuar shumë shpejt dhe nëse vazhdojmë të stërvitemi me intesitet. Shpresojmë që puna e bërë të japë frytet e saj. Jam i lumtur nga paraqitje ime dhe ajo e skuadrës.Kam rigjetur Interin që njoh, një skuadër që ka gjithmonë dëshirë të fitojë dhe që i ka të gjitha cilësitë për t’u përballur me një sezon tepër të vështirë. Do të jetë ndryshe këtë vit, sepse edhe Juventusi më duket në një formë të mirë dhe i ka të gjitha shanset për të qënë me ne në luftën për titull. Sigurisht, është edhe Roma me Milanin, për të mos harruar pengesat e ashtuquajtura të mesme, Fiorentina, Lacio dhe Palermo”.



Kordoba: Mendjen te Superkupa!

Ivan Ramiro Kordoba, mbrojtësi i Interit, për mikrofonat e “Inter Channel”, pas trofeut “Tim”, është ndalur te analizimi i paraqitjes zikaltër: “Ishte një test i mirë dhe i kënaqshëm për ne”, tha kolumbiani. “Mbi të gjitha për ata lojtarë që punonin të veçuar këto nëntë ditë. Këto mini?sfida kanë shërbyer për të shkarkuar të gjithë punën e zhvilluar deri tani. Ne lojtarët që kemi mbërritur shumë vonë në stërvitje jemi prapa, në krahasim me shokët e tjerë, por do të mundohemi të kapim ritmin e tyre shumë shpejt. Jemi në dispozicion të trajnerit edhe për ndeshjen e Superkupës, sepse nuk mund të tërhiqemi, edhe pse këmbët nuk i kemi ende të lehta. Detyra jonë është që i japim Mançinit mundësinë që të zgjedhë. Duhet të mundohemi që ta vëmë në vështirësi: kjo do të thotë që të jesh një grup gjithmonë në dispozicion. Sfidat si ato të trofeut “Tim”, edhe pse janë miqësore, duken të vërteta, sepse tifozët zbaviten dhe ka edhe ndërhyrje të ashpra. Shpirti i lojtarëve është ai i duhuri. Rekoba? Nuk e di se çfarë do të vendosë që të bëjë. “El Çino” është një djalë i vështirë për t’u njohur, por mbetet një futbollist i madh dhe kjo u pa edhe në trofeun “Tim”, në ndeshjen ndaj Milanit, kur shënoi atë gol të shkëlqyer. Sigurisht, do të jetë klubi ai që do të vendosë për të ardhmen e tij”.



Rekoba: Askush nuk beson më te unë!

Një stopin në hyrje të zonës së rreptësisë, një driblim i lehtë përballë kundërshtarit dhe një gjuajtje e kalibruar mjeshtërisht, në këndin e sipërm të portës së mbrojtur nga Kalaç. Topi prehet në rrjetë, ndërsa publiku shtang në vend, i befasuar nga magjia e Alvaro Rekobës. Eshtë sërish ai, “El Çino”, edhe pse me një model të ri flokësh, shumë shkurt, edhe pse i jo i gëzuar për golin e shënuar, edhe pse shumë larg Interit dhe në “ankandin” e merkatos së verës. E gjithë skuadra e përgëzon, përveç një personi, trajnerit Roberto Mançini. Dhe uruguajiani nuk feston, por i heshtur kthehet në mesfushë. “Lamtumira” me fanellën zikaltër është vetëm një hap larg dhe Alvaro e di këtë, ashtu si edhe Manço, i cili nuk shprehet i pyetur për të ardhmen e sulmuesit. Por, Rekoba, në fund të ndeshjes nuk mund të qëndrojë më i heshtur, i qetë, por “shpërthen” në një deklaratë të fortë emocionalisht: “Nuk e kuptoj çfarë po ndodh. Dikush thotë se do të shkoj te Torino, dikush tjetër më dërgon te Napoli dhe, më e keqja, klubi nuk beson te unë. Kjo do të thotë se më janë flakur nga skuadra bazë por jo vetëm, nuk figuroj edhe në listën e futbollistëve të stolit. Asnjë përgëzim për golin nga ana e trajnerit. Kjo do të thotë se lamtumira nga Interi është shumë pranë dhe është momenti për të refletuar më shumë në lidje me atë që do të ndodhë. Tani më duhet të pyes agjentin për të parë ofertat e jashtme. Këtu nuk ka më vend për mua, edhe pse dëshira ime ka qënë që të dallohem gjithmonë me këtë fanellë. Ndoshta i erdhi fundi aventurës. Ku mund të shkoj? Nuk e di, s’mund të flas me qartësi se me cilën skuadër do të jem, sezonin e ardhshëm. Natyrisht, do të doja që të qëndroja edhe një vit në Milano, për të heshtur të gjithë”.



Mihajloviç: Jemi favoritë!

Sinisha Mihajloviç del hapur në deklaratat e tij dhe pas fitores së Interit në trofeun “Tim”, i dyti triumf pas “Birra Moretti”?t, flet për një “ushtri” zikaltër që qëndron në “pole?position” në lidhje me fitimin e titullit, por jo vetëm: “Interi këtë vit do të synojë çdo kompeticion, sepse i ka të gjitha mundësitë dhe futbollistët e duhur për të arritur këtë “Grand Slem”. Sigurisht, do të jetë e vështirë, por do të mundohemi. Edhe sezonin e shkuar, nëse nuk do të kishte qënë për atë mbrëmje në Valencia, do të kishim shkuar në finale dhe kushedi, mund të kishim triumfuar. Pra, mbetemi ekipi për t’u mundur dhe favoritë”.

[RaPSouL]

Ranieri: Gjithçka po shkon vaj!

16 Gusht Një tjetër zhgënjim për Juventusin e Ranierit, këtë herë i dyfishtë, por i ligjshëm deri në një farë pike, duke parë se përballë bardhezinjtë kanë pasur dy ekipet e Milanos, Interin dhe Milanin, respektivisht, sezonin e shkuar, fitues i titullit dhe i Champions League. Ndaj dhe trajneri i “Zonjës së Vjetër”, Klaudio Ranieri nuk shqetësohet. Përkundrazi, ish?”timonieri” i Parmës, sezonin e shkuar, kur udhëhoqi drejt shpëtimit nga rënia skuadrën verdheblu, beson se të djemtë dhe e cilëson si të mirë provën e tyre. “Në krahasim me ndeshjen miqësore në Çezena, ndaj Romës, golat këtë herë munguan, por në “San Siro” skuadra e bëri detyrën dhe lojtarët pjesën e tyre. Si formacioni i zbritur në fushë ndaj Interit, ashtu edhe ai ndaj Milanit, meritonin më shumë, të paktën për atë që u pa në fushën e blertë dhe për rastet e krijuara. Por, edhe këtë herë, kemi hedhur një hap tjetër përpara dhe jemi duke u rritur si grup. Duket një kompaktësi brenda organikës dhe djemtë kanë nisur që të njihen me njëri tjetrin. Problemet e dalluara dy apo tre ndeshje më parë nuk janë parë në këto miqësore. Kjo do të thotë se me punë mund të ndreqen shumë gjëra dhe ekipi është i aftë që të ndryshojë”, komentoi Ranieri dy mini?sfidat e trofeut “Tim”, ndaj Milanit dhe Interit”.

Tofeu “Luixhi Berluskoni” ? Në lidhje me trofeun “Luixh Berluskoni”, që do të zhvillohet të dielën, trajneri i Juventusit tha: “Eshtë një takim i rëndësishëm, sepse për Milanin do të thotë shumë, duke parë se kujton emrin e babait të presidentit Silvio. Por, edhe për ne është një rast për të treguar se si jemi me përgatitjen. Në këtë trofe do të japim më të mirën dhe do të hedh në fushë një formacion bazë, për ta testuar në prag të nisjes së sezonit të ri. Milani do të jetë rivali ynë edhe në kampionat, ndaj duhet ta marrim seriozisht këtë sfidë. Sigurisht, do të jetë një zbavitje më shumë”.

Titulli, jo një fiksim ? Në fund, Ranieri iu përgjigj pyetjeve të lidhura me mundësitë reale që Juventusi ka për titullin e Serisë A: “Eshtë e vështirë që të flasësh për këtë qëllim, sepse kjo do të dallohet vetëm gjatë ecurisë së kampionatit. Sigurisht, nëse gjërat do të shkonin mirë dhe rezultatet nuk do të mungonin, atëherë do të nisja të flisja për një Juventus konkurrues”.



Për Del Pieron afron rinovimi

Alesandro del Piero do të qëndrojë bardhezi dhe kontrata e tij do të zgjatet deri në vitin 2010. Eshtë vetëm çështje kohe, duke parë se ekziston dëshira reciproke për të vazhduar përpara të bashkuar. Nuk do të ketë “lamtumira”. Sepse Ale është një “flamur” i Juventusit dhe “Zonja e Vjetër” është familja e tij. Sigurisht, ka disa aspekte ekonomike për të sistemuar, por epilogu do të mbetet ky. Dhe, nëse Del Piero tani për tani preferon heshtjen, Alesio Seko, drejtori sporiv bardhezi është i bindur se shumë shpejt do të mbërrijë “po”?ja që të gjithë presin: “Do të mbërrijë momenti i marrëveshjes me Aleksin”, shpjegoi drejtori sportiv bardhezi. “Gjërat nuk mund të zgjidhen menjëherë. Ka pasur një takim të parë mes nesh dhe do të ketë një të dytë, për këtë nuk duhet të keni asnjë frikë, sepse Del Piero duhet dhe do të qëndrojë me këtë fanellë, edhe për disa vjet të tjerë. Nuk mund ta imagjinojmë Juventusin pa kapitenin në krye”. E ndryshme nga kjo duket situata e Kielinit, duke parë se për mbrojtësin në fjalë ka ardhur një ofertë prej 14 milion eurosh nga ana e Sandërlendit të Roi Kinit, një propozim që Juventusi ka marrë në konsideratë, pa hapur një tratativë. Seko vazhdon të përsërisë që lojtari është jashtë merkatos, ashtu si Ranieri, por bardhezinjtë vazhdojnë të ndjekin situatën.

[RaPSouL]

Olas: Unë, si Jezu Krishti!

16 Gusht Ka ringjallur një skuadër duke e çuar nga “llumi” i kategorisë së dytë franceze në majat e kontinetit, duke e transformuar në një makinë qëprodhon tituj kampion. Ka ndryshuar mentalitetin, shpirtin e futbollit francez, duke e futur në tregjet financiare. Dhe në javët e fundit, është kryqëzuar, i tradhëtuar nga një seri e pafat dëmtimesh të lojtarëve kyç. Ndoshta edhe për këtë arsye, kur “France Football” e pyet në trupin e kujt do të donte të ringjallej, Zhan Mizhel Olas, presidenti i Lionit, përgjigjet memodestinë e tij franceze: “Në trupin e Jezu Krishtit”. Olas është në krye të futbollit të ri francez. Një status ky i arritur pas 20 vitesh punë të palodhshme dhe pasion për Lionin. I biri i dy arsimtarëve, themelues i shoqërisë së kontabilitetit informatik “Cegid” (e kuotuar në bursë), Olas është një njeri i “gatuar vetë”. I nisur nga hiçi, i futur në botën e futbollit që kur “djalli” Bernard Tapi paralajmëroi se do të drejtonte një skuadër që rrezikonte të binte në kategorinë e tretë. Më 15 qershor 1987 u prit te Lioni si shpëtimtar. Dhe sot, historia e klubit është e ndarë në dy epoka: Para erës së Olasit dhe Pas erës së Olasit. Lioni, me një bilanc prej 150 milionë eurosh, është bërë përcjellësi i mesazhit të futbollit francez në kontinent. Olas ishte bariu i shpritrave të humbur që, paspesë vitesh betejash ligjore me shtetin francez, mori autorizimin për t’u futur në bursë dhe për të konkurruar me të mëdhenjtë e tjerë. Olas në Francë i ka ndryshuar rregullat, duke i detyruar klubet kundërshtarë që të ndërrojnë metodën e administrimit, të tregohen rigorozë me buxhetin e tyre, të llogarisin rreziqet, duke u mbështetur ne nuhatja e tij e spikatur për biznesin dhe te strategjia e rritjes bazuar në një rregull të thjeshtë në jetë: “Të jesh i pari. Në gjithçka”. Moto e çuar çdi verë deri në korenë e Jugut nëpërmjet Kupës së Paqes. Kjo metodë drejtimi i ka dhënë mundësi Lionit që të fitojë gjashtë tituj kampionë radhazi dhe po kaq Superkupa të Francës (dhe një Kupë Lige). E megjithatë, ka një boshllëk. Shenjtërimi europian. Fitimi i Champions League, fiksimi i fundit i Olas. Edhe këtë vit Lioni do të përpiqet që të futet në Parajsën e kontinentit. Ndërkaq, Olas ka kapërcyer kufirin dhe është futur mes të “fortëve” në G14. Dhe nëse i shkon sërish keq, mund t’i kushtohet pasionit të tij në kohën e lirë: peshkimit. Në pritje të ringjalljes së radhës.