Arkivi i gazetës elektronike sportive: "FUTBOLLI"

[km92]

Milito: Që tani, në histori!

3 Gusht Mbrojtësi argjentinas Gabriel Milito, i cili sezonin e ardhshëm do të veshë fanellën e Barcelonës, në një intervistë të dhënë për të përditshmen spanjolle “SPORT”, ka folur mbi skuadrën e tij të re. Milito është shprehur shumë i kënaqur dhe ka deklaruar edhe objektivat e sezonit. “Barcelona është një nga klubet më të mëdha të Europës dhe jam shumë i lumtur që jam pjesë e këtij klubi. Kur mora vesh për ofertën që më ishte bërë, unë menjëherë shpreha dëshirën time për të luajtur në “Camp Nou”. Isha në Venezuelë kur e mora vesh dhe kur e pashë që Barcelona e kishte seriozisht, atëherë nuk ngurova aspak për të firmosur për këtë skuadër. Skuadra e këtij sezoni është një nga më të mirat e të gjithë historis` së Barcelonës”, tha Milito. I pyetur mbi marrëdhënien e tij me Leo Mesin dhe se për çfarë bisedonin gjatë grumbullimit me kombëtaren, Milito tha: “Kemi folur pak dhe më ka shpjeguar disa gjëra. Leo është një lojtar i madh dhe me këshillat që më ka dhënë, jam i bindur që do të më ndihmojë shumë”. I pyetur se pse zgjodhi skuadrën e Barcelonës si aventurën e tij të re, argjentinasi tha: “E thashë dhe pak më parë që Barcelona është një nga klubet më të mëdha të Europës dhe çdo lojtar e ka ëndërr që të veshë fanellën e kësaj skuadre. Për më tepër, unë kam shumë miq që luajnë këtu dhe me të cilët ndihem shumë mirë. Te Barcelona luajnë lojtarë fantastik si Ronaldinjo, Mesi, Eto’o, Henri e shumë të tjerë dhe jam shumë i bindur se do të jetë diçka fantastike të luash përkrah tyre”. Milito gjendet ende me pushime dhe nuk është bashkuar akoma me skuadrën. I pyetur nëse ka biseduar me trajnerin Frenk Rajkard, argjentinasi tha: “Akoma jo. Kur erdha skuadra ishte me pushime dhe nuk arrita ta takoja. Kam shumë dëshirë që ta njoh”. I pyetur se pse zgjodhi fanellën me numër “12”, Milito tha: “Ajo më ra. Më thanë se ishte larguar Xhovani dhe se fanella me numër “12” ishte e lirë. Për mua nuk ka asjë rëndësi numri i fanellës. E rëndësishme është që të jap maksimumin për Barcelonën dhe të fitojmë sa më shumë tituj”.

[km92]

Dinjo: Rajkard, na more shpirtin

3 Gusht Për Barcelonën nuk ka kohë për të pushuar. Katër seancat stërvitore që skuadra katalanase ka zhvilluar përpara nisjes për në turneun e Azisë, kanë qenë shumë të rënda dhe të një intensiteti të lartë. Mes stërvitjeve tërënda dhe vapës së madhe në Barcelonë, ishte pikërisht një nga yjet më të mëdhenj të Barcelonës, Ronaldinjo, i cili ka shprehur shqetësimin e tij për këto seanca stërvitore të rënda dhe për mbarimin e fuqive në ushtrimet fizike të përgatitura nga trajneri Rajkard dhe ndihmësit e tij. “Kjo nuk është jetë”, i tha braziliani Frenk Rajkardit në ambjentet stërvitore, “na e more shpirtin”. Por e gjithë kjo u shoqërua me të qeshurat e grupit dhe të trajnerit holandez, të cilët më pas vazhduan punën e tyre. Duket qartë që përgatitjet për fillimin e sezonit të ri po zhvillohen me një kërkesë të lartë nga ana e stafit teknik. Tani vjen radha e turneut të Azisë, ku Barcelona do të vazhdoj përgatitjet e saj, edhe pse i nxehti në Barcelonë nuk mund të krahasohet me atë në Kinë dhe Japoni.

[RaPSouL]

Robinjo baba: Jam më i pjekur!

3 Gusht Braziliani Robinjo, i cili sapo ka fituar Kupën e Amerikës me kombëtaren e Brazilit, është bashkuar me skuadrën e Realit dhe është vënë menjëherë nën urdhrat e gjermanit Bernd Shuster. Robinjo, i cili është bashkuar me skuadrën e tij në Hanover, ku Reali po bën përgatitjet e saj, është shprehur shumë optimist për fillimin e sezonit të ri. Ai, Baptista, Marselo dhe Gago (të gjithë të grumbulluar me kombëtaret e tyre deri në fund të Kupës së Amerikës) kanë zhvilluar seancën e parë stërvitore së bashku me skuadrën. Braziliani është shprehur shumë i lumtur për rikthimin e tij, sidomos pas fitimit të Kupës së Amerikës. “Trofeu i fituar më ka dhënë edhe më shumë besim. Kisha nevojë për një titull të tillë dhe për të konfirmuar veten time. Për këtë shpresoj që ky të jetë viti im më i mirë me Realin e Madridit. Kjo është ëndrra ime e madhe. Kam shumë dëshirë të ndihmoj skuadrën time në fitimin e titujve”.

Si Robinjo, ashtu edhe Baptista, Marselo dhe Gago zhvilluan një stërvitje të ngjashme me pjesën tjetër të skuadrës dhe Shuster i ka ndjekur me vëmendje lojtarët e tij. Robinjo, i cili është treguar shumë entuziast në rikthimin e tij, deklaroi: “Gjithmonë e kam thënë se Reali kishte nevojë për të fituar një titull për të filluar një epokë të re në futbolin botëror. Sezonin e kaluar kemi pasur një skuadër të mirë dhe tani kanë ardhur edhe lojtarë të tjerë të cilët do të na bëjnë edhe më të fortë. Megjithatë duhet të punojmë shumë dhe të mbajmë të njëjtën linjë si sezonin e kaluar”.

Robinjo po përjeton një moment shumë të veçantë në jetën e tij, jo vetëm për fitimin e Kupës së Amerikës, por edhe sepse shumë shpejt do të bëhet baba, një nga ëndrrat e jetës së tij. “Kam pushuar shumë gjatë kësaj periudhe. Kam mbyllur makinën dhe kam qenë afër të fejuarës time. Jemi duke pritur një fëmijë dhe të dy jemi shumë të lumtur. Tani jam më i pjekur se kur kam ardhur në Madrid”.

Sezonin e kaluar Robinjo ka ndjekur një plan shumë të veçantë i cili i lejoi të fitonte pesë kilogram të masës muskulare. Ishte atëherë kur rendimenti i tij në kampionatin spanjoll filloi të përmirësohej dhe loja e tij në fazën finale të sezonit ka qenë shumë vendimtare. Zhordi Garsia, përgatitësi fizik i Realit, po përgatit një program stërvitor i cili do t’i lejojë Robinjos, Baptistas, Marselos dhe Gagos të jetë në të njëjtën formë me shokët e tjerë të skuadrës. Do ta kenë pak të vështirë, por gjithçka do të ecë në rrugën e duhur. Në ditët në vazhdim, skuadra e Realit do të zhvillojë ndeshje miqësore kundër Lokomotivës së Moskës, PSV Eindhovenit dhe Milanit, por katër brazilianët do të aktivizohen me skuadrën vetëm pas ndeshjes së parë të Superkupës së Spanjës kundër Seviljes.

[RaPSouL]

Çelsi, “kuçedra” e Premier!

3 Gusht Brenda katër ditësh në prill, sezoni i fundit u shndërrua në një makth për Çelsin. Një eliminim i dhimbshëm nga Champions League, pas humbjes me Liverpulin dhe një barazim në kampionat me Boltonin, që dëmtoi shpresat për titull, detyroi “blutë” të shihnin realitetin e hidhur. Çelsi kishte shpenzuar shumë para për të fituar, por ku ishte ai titull që me të vërtetë kishte rëndësi? Megjithatë, ndërsa Çelsi bëhet gati për sezonin e ri është e drejtë të kujtojmë listën e gjatë të lojtarëve të dëmtuar në sezonin e shkuar. Xho Kol mundi të luante në vetëm 13 ndeshje kampionati, Çeh në 20, Eshli Kol dhe Roben në 21 ndeshje, ndërsa Terri mungoi në 11 takime. Pavarësisht kësaj dhe polemikave të brenshme në “Stamford Bridge”, Çelsi mundi të përfundonte sërish i dyti, fitoi dy tituj (Kupën e Anglisë dhe Kupën e Ligës) dhe u kualifikua deri në katërshen finale të Champions. Që prej atëherë, Hoze Murinjo ka përforcuar pikat e tij të dobëta në krah dhe në mbrojtje, me blerjet e Florent Maludasë dhe Tal Ben Haimit. Me futbollistët që formojnë shtyllën kurrizore të skuadrës, Çeh, Terri, Esien dhe Drogba, të gjithë të rikthyer dhe në formë, Çelsi është shndërruar përsëri në skuadrën për t’u mundur.

Maluda dhe Ben Haim “mbushin” vrimat

Kësaj radhe, shtëpitë e basteve e kuotojnë suksesin e Çelsi në kampionat me 4/6, ndërsa një vit më parë ishte i kuotuar me 4/9. Pa dyshim, kjo nuk do të thotë që do të jetë një detyrë e thjeshtë, sidomos pasi Kupa e Kombeve të Afrikës do të privojë Çelsin nga Esien, Drogba. Xhon Obi Mikel dhe Kalu për rreth një muaj. Mançesteri do të jetë kërcënimi kryesor dhe mbase edhe Liverpuli do të rivalizojë. Murinjo, gjithashtu, duhet të gjejë disa përgjigje. Taktikisht, ai ende nuk ka vendosur në do të përdorë skemën 4?3?2?1, që i siguroi dy tituj radhazi në vitet 2005 dhe 2006, apo do të rikthehet tek skema e zakonshme 4?4?2. Në qoftë se do të përdorë skemën e vjetër, a do të jetë i mjaftueshëm Mikeli për të zëvendësuar Makelelen në rolin e shkatërruesit? Nëse do të zgjedhë skemën e dytë, a do të jetë në gjendje Murinjo ta shndërrojë në të efektshme skemën e tij 4?4?2?

A mund ë sakrifikohet Balak e Sheva?

Pa dyshim, Çelsi u duk i shpërbërë në humbjen 2?0 në miqësoren me Rejnxhërsat dhe ajo ndeshje ngriti shumë pikëpyetje në mendjen e Murinjos. Pyetja që të gjithë janë kurioz të mësojnë përgjigjen është se sa i afrtë do të jetë Murinjo të lërë në stol disa futbollistë që kanë ardhur në “Stamfored Bridge” me status tjetër. Eshtë diçka tjetër kur rezervat e tua quhen Glen Xhohnson apo Tiago dhe diçka krejt e ndryshme kur ata janë Mikael Balaku dhe Andrij Shevçenko. Njëkohësisht, do të jetë interesante të shihet nëse Murinjo do të jetë në gjendje të përmbajë egon e tij personale. Gjatë tre viteve të tij në Londër, portugezi ka luajtur vazhdimisht rolin e Makiavelit dhe nuk ka kursyer asnjë prej atyre që kanë guxuar ta kundërshtojnë. Situata e Avram Grantit është shndërruar në një bombë me sahat. Çfarë do që të ndodhë në këtë sezon, Murinjo do të ketë edhe një sfidë më shumë. Roman Abramoviçit nuk i mjafton më vetëm fitorja, pasi përveç saj pronari rus dëshiron edhe që të zbavitet në shkallët e “Stamford Bridge”?s. E ndërsa me nisjen e sezonit të ri shumë pyetje pritet të marrin përgjigje, mbetet e qartë që Çelsi do të mbetet skuadra për t’u mundur në këtë sezon të Premier League.



Ndryshimet në “Stamford Bridge”

Të ardhur: Florent Maluda (13.5 m), Stid Siduell, Tal Ben Haim, Klaudio Pizarro.

Të larguar: Khalid Bulahruz (borxh), Xheremi, Iv Makabu?Ma Kalambai, Nunjo Morais, Ben Sahar (borxh).

Shënim: Shifrat shprehen në milion stërlina



Kenion: Hoze, s’ka shans tjetër!

Shefi ekzekutiv i “bluve”: “Të fitosh kampionatin është gjithmonë bukur, por një klub me ambicjet tona ka nevojë për suksesin në Europë”



Shefi ekzekutiv i Çelsit, Piter Kenion, pranon që skuadra e tij duhet të fitojë fillimisht Champions League, përpara se të konsiderohet si një forcë madhore në botën e futbollit. Në tre sezonet e fundit, skuadra e Murinjos ka fituar dy herë titullin kampion, i pari pas gjysmë shekulli “thatësirë”. Çelsi ka fituar dy herë edhe Kupën e Ligës si dhe Kupën e Anglisë, por skuadra nuk ka mundur të avancojë kurrë përtej gjysmëfinaleve në Champiobns dhe Kenion pranon që ky është hapi i radhës që duhet të hedhë skuadra e tij. “Champions është titulli më i vështirë për t’u fituar, por duhet ta fitojmë, në qoftë se dëshirojmë të përmbushim objektivat tona për t’u shndërruar në një klub me reputacion botëror”, deklaroi Kenion në një intervistë për “Chelsea TV”. “Për të qenë një skuadër e madhe duhet të fitosh tituj në mënyrë të vazhdueshme. Në tre vitet e fundit kemi fituar gjithmonë diçka dhe kjo na bën një skuadër të madhe, por ne duam të shndërrohemi në një ekip me reputacion botëror. Duhet të fitojmë Premier League dhe Champions League për t’u ngjitur në ato lartësi që do ta na bënin të njiheshim si një klub me reputacion botëror. Mendoj që kemi brumin e nevojshëm për të bërë këtë, sepse kemi një skuadër të madhe dhe një trajner që e di se çfarë duhet të bëjë. Në këtë sezon, disa futbollistë të tjerë të mëdhenj i janë bashkuar skuadrës dhe gjëja që duket më qartë është dëshira e të gjithë futbollistëve për t’u rikthyer tek titulli kampion. Me cilësinë që kemi në skuadër mund t’ia dalim mbanë. Kam të qartë që jemi më të fortë se sezonin e shkuar dhe besoj me të vëretë shumë tek ky grup”.



Murinjo: Jam në “fije të perit”!



Trajneri i Çelsit e di që vetëm një fushatë e suksesshme në Champions do të kënaqte shefat e tij



Hoze Murinjo e di që suksesi në Champions League është e vetmja mundësi për të kënaqur shefat e tij në “Stamford Bridge”. Disa orë pasi shefi ekzekutiv, Piter Kenion, foli për ambicjet e mëdha të klubit në një intervistë në televizionin e klubit, trajneri portugez deklaroi: “Pas titujve kombëtarë që kemi fituar në tre vitet e fundit ka ardhur momenti që të fitojmë edhe në Europë. Champions është një kompeticion shumë i ndërlikuar dhe nuk mjafton të jesh më i miri për ta fituar, por ne kemi kapacitetin e duhur për të tentuar dhe besoj që mund t’ia dalim mbanë”. Andrij Shevçenko dhe Mikael Balak mbërritën sezonin e shkuar për të ndihmuar Çelsin që të fitonte Champions League, por asnjëri prej futbollistëve nuk mundi të luante në nivelin e reputacionit të tij. Për Shevçenkon përflitet një rikthim i mundshëm tek Milani, ndërsa Balaku ka ngjallur interesin e Realit të Madridit. Megjithatë, Kenion këmbëngul që të dy futbollistët do të qëndrojnë dhe besoj që të dy do të japin më të mirën e tyre në sezonin e ri. “Përsa i përket Andrij dhe Mikaelit, nënshkruam përpara një vitit kontrata 4?vjeçare me ta dhe jam i sigurt që nuk e kemi parë ende më të mirën e tyre”.



Babai i Robenit: Madridi s’është i pamundur

“Kontratën e re të Çelsit e kemi refuzuar për momentin. Tani do të shohim se çfartë do të ndodhë”



Babai dhe menaxheri i Arjen Robenit, Hans Roben, ka deklaruar se djali i tij ka marrë një ofertë të rëndësishme për të rinovuar kontratën me skuadrën e Çelsit. Por nga ana tjetër ai nuk ka ngurruar të shprehë besimin se djali i tij mund të luajë me Realin e Madridit sezonin e ardhshëm. Emri i Robenit ka kohë që është lidhur me Realin dhe vetë tekniku Bernd Shuster ka kërkuar ta ketë holandezin në radhët e skuadrës madrilene. Megjithatë situata është ende e paqartë sepse Çelsi nuk është shumë i gatshëm të largojë lojtarin për një shumë më të ulët se 36 milionë euro, të cilën Reali nuk ka ndërmend ta paguajë. Gjithsesi, babai i Robenit shpjegoi atë që mund të ndodhë në ditët e ardhshme. “Eshtë thënë se Arjen ka marrë një ofertë prej 7 milionë eurosh në sezon. Nëse do të ishte kështu, tani do të kishte firmosur. Kontrata e re nuk plotësonte ashtu siç duhej interesat tonë dhe për momentin e kemi refuzuar”, tha Hans Roben, duke shtuar më tej: “Ndoshta djali im mund të shkojë te Reali i Madridit ose ndoshta qëndron te Çelsi dhe përmbush kontratën e tij prej dy vjetësh”. Pra, në ditët në vazhdim do të kuptohet me siguri më mirë se çfarë do të ndodhë me lojtarin e talentuar holandez.

[km92]

Reali kërkon Zidanin e ri dhe... mendon për Nasrinë

3 Gusht Janë të dy algjerianë me kombësi franceze, janë të dy fantazistë dhe kanë lindur në periferi të Marsejës. Por vetëm Samiri ka luajtur me Olimpikun



Drejtuesit e Realit të Madridit po vazhdojnë punën e tyre në merkato. Pas dëshirës për të sjellë në Madrid holandezin Arjen Roben, madrilenët kërkojnë të blerjën edhe një mesfushor fantazist. Humbja e ditës së martë përballë Hanover 96 (0?3), ka bërë që drejtuesit madrilen të hidhen në merkato për të blerë një mesfushor ashtu siç e dëshiron Bernd Shuster. Në rast se nuk arrihet blerja e brazilianit Kaka, i zjedhuri do të jetë francezi Samir Nasri.

Nasri është një nga talentet më të rinj të futbollit botëror dhe tashmë është lideri i Olimpikut të Marsejës, sidomos pas largimit të Frenk Riberisë. Pjekuria dhe loja e tij e kanë bërë që të gjithë ta admirojnë dhe shumë klube europiane i janë vënë pas për të blerë kartonin e tij. Sipas të përditshmes “AS”, si Predrag Mijatoviç, ashtu edhe Migel Angel Portugal, janë të “dashuruar” me këtë lojtar dhe janë të bindur se është një lojtar i aftë për të zënë vendin e fantazistit te skuadra e Realit. Edhe trajneri Bernd Shuster është informuar për këtë marrëveshje. Vetë trajneri gjerman ka dhënë pëlqimin e tij, edhe pse në dispozicion ka lojtarë si Guti, Granero, De la Red dhe Gago, por sipas tij cilësitë e Nasrisë nuk mund të krahasohen me ta. Drejtuesit e Realit e kanë ndjekur lojtarin francez në katër ndeshje. Tre prej tyre kanë qenë në ndeshjet me kombëtaren e Francës. Në fillim ka qenë debutimi i tij me fanellën e kombëtares në 28 marsin e kaluar përballë Austrisë (dha pasimin e golit të vetëm të ndeshjes të shënuar nga Benzema). Më pas ka qenë ndeshja kundër Ukrainës dhe ajo kundër Gjeorgjisë ku shënoi golin e vetëm dhe të fitores për francezët. Ndeshja e katërt që drejtuesit e Realit e kanë ndjeur talentin francez, ka qenë në një ndeshje kampionati kundër Sent Etienit. Reali do të fillojë tashmë kontaktet e saj me drejtuesit e Marsejës dhe mendohet që marrëveshja për blerjen e Samir Nasrisë të jetë midis 12 dhe 15 milionë eurove.

Në Francë të gjithë mendojnë se Samir Nasri është Zidani i ri dhe të dhënat e konfirmojmë më së miri këtë gjë. Mesfushori i ri i Marsejës ka karakteristika të ngjashme me ish?yllin e Francës, tashmë të tërhequr nga futbolli i luajtur. Paralelizmi midis profesorit dhe nxënësit fillon që herët dhe gjtihçka është e ngjashme, e vetmja gjë që mbetet për t’u parë është e ardhmja e Nasrisë. Zidan ka luajtur te Reali i Madridit dhe Nasri është shumë afër realizmit të kësaj ëndrre. Të dy lojtarët kanë lindur në një lagje në veri të Marsejës dhe të dy janë me origjinë nga Algjeria. Nasri ka debutuar në futbollin profesionist në moshën 17?vjeçare, njëlloj si idhulli i tij Zinedin Zidan. Kombësia franceze është një tjetër ngjashmëri e tyre, sepse të dy e kanë marrë atë në moshën 19?vjeçare. Në debutimin e tij të parë në kampionatin francez, Nasri është cilësuar si lojtari më i mirë i ri i kompeticionit, njësoj si Zidani. Për Samir Nasrinë, Zidani nuk është vetëm pika e tij e referimit, por edhe këshilltari i tij. Marsin e kaluar, Nasri vendosi të ndryshonte menaxherin e tij. I zgjedhuri ishte Alen Miliaço, menaxheri i dikurshëm i Zidanit. Ndoshta ndryshimi i vetëm midis dy lojtarëve, është se Zizu nuk ka luajtur te Marseja, ashtu siç po bën Nasri.

[Cimo]

Flash: Torres shënon golin e parë për Liverpool

VIDEO: http://www.albania-sport.com/mat.php?idm=5273

[RaPSouL]

Real Madrid mund thellë moskovitët e Lokomotivës

Kampionët e Spanjës, Real Madrid, kanë debutuar në mënyrë të shkëlqyer në turneun e Moskës, duke mundur thellë vendasit e Lokomotivës

Takimi ka nisur i shpejtë për moskovitët, të cilët kanë kaluar dy herë në avantazh me Ivanoviç dhe Traore në minutat '4 dhe '21 të pjesës së parë. Pjesën e dytë, tekniku gjerman Shuster e ka hedhur Realin në sulm për të përmbysur rezultatin. Objektivi është përmbushur brenda 20 minutave të para të pjesës së dytë. Për Realin shënuan dy herë Guti, Higuain, Saviola dhe Balboa.

[RaPSouL]

Liteks, kundërshtari i Besës në turin e dytë

Skuadra bullgare e Liteks Loveç do të jetë kundërshtari i Besës së Kavajës në turin e dytë të kupës UEFA. Shorti i hedhur dje në mesditë në Nion të Zvicrës, ka vënë përballë fituesve të Kupës së Shqipërisë, finalistët e kupës së Bullgarisë, një skuadër kjo e njohur në vendin tonë për shkak se ne kulmin e shkëlqimit të saj, kanë luajtur dy lojtarët e kombëtares tonë Alban Bushi dhe Altin Haxhi.

Shorti e ka shmangur Besën nga rivalë të pakalueshëm si Atletiko Madrid apo Sampdoria, por gjithsesi kundërshtari i tyre nuk është një ekip i lehtë. Pavarsisht kësaj kavajasit shprehen entuziastë se do të ballafaqohen denjësisht me bullgarët e Liteks. Kavajasit do të kenë mundësi që ndeshjen e parë ta zhvillojnë në stadiumin kombëtar "Qemal Stafa" më datë 16 gusht, ndërsa takimin e kthimit do ta luajnë dy javë më vonë në Bullgari.

Kundërshtari
Portokallinjtë e Liteks janë një nga skuadrat më të mira të viteve të fundit në Bullgari, pas Levskit të Sofjes dhe CSKA-së. Liteks merr pjesë në kupën UEFA si finaliste e kupës së Bullgarisë. Ajo u mund në finale nga kampionët e Levskit. Takimi i rregullt përfundoi pa gola, por në minutën e 111 të kohës shtesë, Levski kaloi në avantazh duke fituar kupën. Levski e mundi Liteksin edhe në takimin e Superkupës së Bullgarisë të zhvilluar më datë 26 korrik.

Edhe në këtë takim rivaliteti mes këtyre skuadrave ka qenë i madh, pasi kampionët e Bullgarisë e mposhtën Liteksin vetëm në kohën shtesë duke fituar 2 me 1. Sezonin e kaluar Liteks është renditur në vendin e katërt. Shkëlqimin më të madh kjo skuadër e ka patur në sezonet 1998-1999, kur është shpallur dy herë rresht kampione e Bullgarisë. Këto janë të vetmit tituj kampioni të Liteks, që ka fituar gjithashtu dy herë kupën e këtij shteti në vitet 2001 dhe 2004, ndërkohë ka dalë pesë herë në finalen e këtij kompeticioni.

Legjionarët
Liteks i themeluar në vitin e largët 1921, kulmin e vet e ka patur në sezonet 1998-1999 kur është shpallur dy herë rresht kampione e Bullgarisë. Në këtë kohë në radhët e kësaj skuadre kanë milituar dhe dy lojtarët e kombëtares sonë Alban Bushi dhe Altin Haxhi. Legjionarët shqiptarë kanë shkëlqyer gjatë paraqitjes në kampionatin bullgarë, duke arritur madje dhe formën më të mirë të gjithë karrierës së tyre futbollistike.

Bushi me golat e tij u kthye në një nga lojtarët më të mirë të portokallinjëve të Liteks, dhe njëkohësisht ishte idhulli i tifozëve të Loveç. Por pas atyre dy sezoneve të shkëlqyera Liteks nuk ka arritur më të ngjitet në ato nivele. Bullgarët kanë kaluar në turin e parë maltezët modestë të Sliema Uanderers duke i fituar të dyja ndeshjet 3 me 0 dhe 4 me 0.

[RaPSouL]

Armando Lukaj, talenti shqiptar që kërkohet nga Lacio e Roma

Deri tani shumë gazeta dhe revista sportive italiane kanë folur për talentin shqiptarë që po rritet në Romë.

Armando Lukaj është nga qyteti i Shkodrës. Prej 13 vitesh sëbashku me familjen e tij ka emigruar në Itali. Ai është vendosur në Romë sëbashku me prindërit që në vitin 1994. Ka qenë vetëm gjashtë muajsh kur ka lënë qytetin e tij të lindjes, Shkodrën dhe është vendosur në Itali. Flet shumë pak shqip, madje është vështirë të kuptohesh me të. Armando është një djalë i gjatë, tërheqës dhe duket një djalosh me karakter, pavarsisht moshës së njomë. Ka nisur stërvitjen që në moshën gjashtë vjeçare me ekipin e Morenës në Romë, një nga shkollat e futbollit më të mira në Itali, e cila është e pronë e ish-futbollistit të Lacios Roberto Muci. Falë talentit të tij ka bërë që shumë shpejtë të futet në ekipin e moshave.

Aktualisht luan në mesfushë, por dëshira e tij është sulmi. Ka fituar anketën e 11 futbollistëve të vitit në Romë, ku ka shënuar 24 gola në kampionat. Kjo ka bërë që dy ekipet me të mira në Itali të kërkonin të kalonte tek ta, për t'u aktivizuar me ekipet e moshave. Ekipet që kanë kërkuar shërbimin e tij janë Lacio, ku aktualisht luan edhe futbollisti i kombëtares shqiptare, Tare dhe Roma. Por prindërit e tij janë këshilluar me specialistët e futbollit italian, të cilët i kanë adresuar që të vazhdojë në "shkollën" e Cisko Romës. Eshtë vetëm 13 vjeç dhe aktualisht ka nënshkruar një kontratë me ekipin Cisko Roma, aty ka edhe më parë kanë dalë gjenerata të futbollistëve të kombëtares Italiane, si Toti, Toni, Nesta, Akuilani e mjaft futbolllitë të tjerë që edhe tani aktivizohen jo vetëm me ekipet italiane, por edhe me kombëtaren e Italisë.

Eshtë i gjatë 1.80 metra. Armando është tifoz me Romën, me ekipin që tashmë është rritur, ndërsa me kombëtaren është me Shqipërinë. Dëshira e tij është që një ditë të luajë për ngjyrat e kombëtares shqiptare, duke mos e ndërruar me asnjë ekip tjetër. Luan me të dyja këmbët dhe dallohet edhe në goditjet me kokë. Deri tani shumë gazeta dhe revista sportive italiane kanë folur për talentin shqiptarë që po rritet në Romë.

[RaPSouL]

Tuluza, pengesa e parë për nënkampionët e Liverpulit

Nënkampioni në fuqi, Liverpuli, do të ndeshet më francezët e Tuluzë, një skuadër kjo që luan për herë të parë në nivelin më të lartë të futbollit evropian

Shorti për turin e tretë paraeleminator të Kupës së Kampioneve i hedhur dje në Nion të Zvicrës, ka ofruar disa përplasje të forta duke i vënë përpara rriskut të eleminimit disa nga skuadrat më të njohura të kontinentit. Nënkampioni në fuqi, Liverpuli, do të ndeshet më francezët e Tuluzë, një skuadër kjo që luan për herë të parë në nivelin më të lartë të futbollit evropian. Tekniku spanjoll i Liverpulit, Rafa Benitez u shpreh pas hedhjes së shortit se nëse do të kishin patur më shumë fat, përballë tyre do të ishte një skuadër më e lehtë. Gjithsesi Liverpul po bën përgatitjet e duhura për të mos u surprizuar qysh në pragun e sezonit.

Në 15 çiftet e tjera bien në sy përballjet mes kampionëve të Skocisë, Sëlltik Gllazgou dhe Spartakut të Moskës, apo Benfikës me FC Kopenhagen, dy skuadra që sezonin e kaluar kanë qenë në të njëjtin grup të Kupës së Kampioneve. Fituesja për dy vite me radhë e kupës UEFA, Sevilja do të ndeshet me nënkampionët e Greqisë, AEK i Athinës. Duele interesante janë dhe takimet me Arsenalit dhe Spartës së Pragës, apo Lacios me Dinamon e Bukureshtit. Takime jo më pak interesante parashikohen dhe ato ndërmjet Fenerbahçes dhe Anderlehtit, apo Gllazgou Rejnxhërs dhe Crvena Zvezdës së Beogradit.

Fati
Për disa nga pjesëmarësit me emër të këtij raundi të Ligës së Kampioneve, shorti është treguar mjaft bujar duke u vënë përballë kundërshtarë të lehtë në letër. Steaua e Bukureshtit, e cila ka fituar takimin e parë me kampionët e Polonisë Zaglebie jashtë fushës së saj, në turin tjetër e pret Bate Borisov, kampionia e Bjellorusisë. Nëse nuk ndodh ndonjë surprizë në takimin e kthimit me polakët në Bukuresht, Steaua mendohet ta ketë të lehtë kalimin në fazën e grupeve. Shorti ka qenë me fat edhe për Verder, që është vënë përballë Dinamos së Zagrebit, apo Valencias që do të ndeshet me suedezët modestë të Elfsborgut.

Debutuesit
Specialistët parashikojnë se mes ekipeve që mund të kalojnë në fazën e grupeve nuk është çudi të jenë dhe disa debutues. Konkretisht Levski i Sofjes duket se i ka të gjitha shanset të kalojë për herë të parë në fazën e grupeve kur përballë tij në turin e ardhshëm të ketë Norvegjezët e Rosenborg, që nuk janë më në nivelin e disa viteve më parë. E njëjta gjë mund të ndodh edhe me kampionët e Zvicrës, që do të kenë përballë turqit e Beshiktash. Ndërsa skuadra e Trapatonit dhe Mateus, kampionët austriakë të Salsburg duket se i kanë të gjitha mundësitë që të synojnë kalimin në fazën e grupeve nëse triumfojnë ndaj ukrainasve të Shahtjorit. Takimet e para do të luhen në datat 14 dhe 15 gusht, ndërsa ndeshjet e kthimit në datat 28 dhe 29 gusht.