Arkivi i gazetës elektronike sportive: "FUTBOLLI"

[Manci]

Luka Toni zgjedh Bajernin e Mynihut

Duke përfituar nga fakti se nuk ka luajtur dje në darkë kundër Kievos, për shkak pezullimi, Luka Toni ka kapur momentin duke u larguar për një moment nga Firence dhe është takuar me drejtuesit e Bajernit të Mynihut. Sulmuesi kampion bote me Italinë ka rënë dakord formalisht që të luajë me gjigantët gjermanë gjatë sezonit të ardhshëm. Për ta vënë nën urdhrat e Hicfeld, Bajerni është i gatshëm t‘i ofrojë Fiorentinës 18 milionë euro, ndërkohë që lojtari do të përfitojë një rrogë vjetore që i kalon 5 milionë eurot. Me këtë kalim, Toni ka mundësinë të luajë në Champions dhe një arsye tjetër është fakti se ai nuk dëshironte të përforconte një rivale direkte të Fiorentinës në kampionatin italian.

[Manci]

Deshamps: Në klub dikush ka dyshime për aftësitë e mia

Dominimi i Serisë B nuk mjafton që në radhët e Juventusit të mos ketë polemika rreth trajnerit apo lojtarëve


Një fitore pa shumë probleme në fushën e Hellas Verona ka qenë mënyra më e mirë që Juventusi të fillonte sforcon e fundit drejt Serisë A: takimi i së premtes ka qenë transferta e parë nga tri radhazi. Grinte, vëmendje dhe përqendrim. Këto ishin kërkesat e Didier Deshamps pak orë përpara ndeshjes, që janë zbatuar menjëherë nga i zakonshmi Nedved, nga luftaraku Del Piero dhe nga mbrojtja që nuk ka bërë asnjë gabim (përkundrazi ka ndihmuar në arritjen e fitores me golin e Boumsong). Tri pikë në xhep, por dy futbollistë k.o., ky ka qenë bilanci i ndeshjes së Juventusit, ku Xhanikeda ka dalë për probleme muskulore, ndërsa Legrotalie ka rënë keq pas një dyluftimi. Deshamps është i kënaqur për ndeshje, por e njëjta gjë nuk mund të thuhet kur flitet për të ardhmen e tij. Lajmet e publikuara në mediat italiane dhe zërat që dalin nga brenda klubit bardhezi, nuk duket se e prekin shumë teknikun francez. "Flitet emri i Lipit? Nuk besoj se ka ndonjë problem. Nuk qenkam i aftë që të drejtoj skuadrën në ‘A‘? Shumë mirë nëse dikush e mendon në këtë mënyrë, objektivi im është që të arrij sa më shpejt në Serinë A. Dikush është skeptik edhe në klub? E pranoj një fakt të tillë. Doni të dini emrin e personit që ka dyshime? Jo në këto momente (sipas mediave italiane bëhet fjalë për drejtorin sportiv, Alesio Seko)". Tekniku e qetëson situatën duke thënë: "Klubi më konfirmoi dhe situata nuk ka ndryshuar. Nuk mendoj se jam më i miri, por besoj se di ta bëj punën time. Verona na ka krijuar pak probleme vetëm në pjesën e fundit të takimit, ndërsa ne kishim edhe dy mundësi shumë të mira me Del Pieron. Skuadra ka luajtur shumë mirë". Ndërkohë, drejtuesit e klubit torinez flasin edhe për futbollistët më të spikatur të skuadrës, që po përfliten shumë në këtë merkato. Administratori i deleguar, Zhan Klod Blank, mbron Trezegen dhe pohon se portieri Bufon shumë shpejt do publikojë vendimin e tij, duke u treguar i sigurt se ai nuk do t‘i thotë "jo" qëndrimit te Juventus

[Manci]

Rexhina, në gjurmët e Igli Tares

Klubi kalabrez kërkon të zëvendësojë Biankin, e kërkuar nga shumë klube të mëdha


Rexhina është vënë në gjurmët e Igli Tares. Skuadra kalabreze, që gjatë këtij sezoni ka qenë protagoniste e një kampionati të jashtëzakonshëm (nëse nuk ishte penalizuar në fillim të sezonit, do ishte në garë për Kupën UEFA) po kërkon të përforcojë repartin ofensiv. Gjithçka, sepse sulmuesi kryesor i kontingjentit të drejtuar nga trajneri Valter Mazari, Ronaldo Bianki, autor i 16 golave është shndërruar në objektivin e shumë klubeve të mëdha, për sezonin e ardhshëm. Pikërisht kjo ka bërë që drejtuesit e klubit të kërkojnë një zëvendësues me peshë në repartin ofensiv, nëse skuadra do qëndrojë në Serinë A (aktualisht Rexhina është në garë me Parmën, Kievon, Katanian e Torinon për të mbijetuar). Kjo është arsyeja kryesore që kalabrezët po vëzhgojnë me vëmendje merkaton dhe sipas "sportal.it", zërat më të fundit brenda skuadrës flasin për një interesim të fortë për ish-kapitenin e Kombëtares shqiptare, Igli Tare. 33-vjeçari ka vuajtur mungesën e hapësirave te Lacio gjatë këtij sezoni dhe pavarësisht dëshirës për të qëndruar në kryeqytetin italian, largimi duket një alternativë e mundshme. Pikërisht për faktin se shqiptari nuk ka pasur shumë hapësira në skuadrën e Delio Rosit, kalimi i tij në Rexhio-Kalabria cilësohet si një lëvizje më se e mundshme. Në të kaluarën, ngjyrat e Rexhinës i ka mbrojtur sulmuesi tjetër shqiptar, Erjon Bogdani, që në vitin 2000 ka debutuar në Serinë A, pikërisht me këtë fanellë. Megjithatë, aventura e lojtarit që gjatë këtij sezoni ka kaluar nga Siena te Kievo nuk ka qenë nga më të mirat. Për të marrë shërbimet e Tares gjatë sezonit të ardhshëm janë interesuar edhe skuadra si Breshia apo Bolonja, megjithatë, ai ka preferuar qëndrimin te Lacio përpara faktit se në një klub tjetër do mund të luante më shumë.

[km92]

PSV, kampione për një gol!

30 Prill PSV Eindhoven shpartalloi dje Viteshe Arnhemim 5?1 duke fituar kështu titullin kampion në Holandë falë diferencës së golave më të mirë. Në javën e fundit, vërtet dramtike, PSV e mbylli me 75 pikë me një diferencë golash plus 50. Ajaksi i Amsterdamit, që fitoi 2?0 po dje ndaj Vilem II Tilburg, gjithashtu grumbulloi 75 pikë, por me një diferencë golash plus 49 dhe e humbi titullin e 30?të vetëm për një gol. AZ Alkmari, skuadra që kryesonte renditjen para javës së fundit dhe i duhej fitorja për t’u shpallur kampione, e mbylli ndeshjen me dhjetë vetë në humbjen 3?2 ndaj Ekselsior Roterdam. PSV shënoi shumë shpejt dy gola me anë të Aleksit dhe Xheferson Farfanit, por në të 12' Teo Jansen realizoi një gol për Viteshen me anë të një goditjeje dënimi. Ibrahim Afelai shënoi sërish për PSV?në pa kaluar një orë lojë dhe Farfan shënoi golin e tij të dytë disa minuta më vonë duke vulosur përfundimisht fitoren me një rezultat tepër të favorshëm, 4?1. Por goli që doli të ishte vendimtar për fitimin e titullit u realizua nga kapiteni Filip Koku kur duheshin edhe 13 minuta lojë. Alkmari, e cila kryesonte renditjen dhe kishte një diferencë golash plus 7, pësoi zhgënjimin e parë kur pas 19 minutash lojë Boi Vaterman u përjashtua nga loja me karton të kuq pasi shkaktoi një penallti në zonë e cila u realizua nga Luixhi Bruins i Ekselsiorit. Tre minuta më vonë, mesfushori Simon Ciomer barazoi rezultatin, duke i dhënë ndonjë shpresë Alkmarit, por pas gati një ore, Henriko Drost riktheu skuadrën vendase në avantazh. 19 minuta para përfundimit Dani Koevermans barazoi sërish rezultatin por në minutat shtesë, Johan Voskamp shënoi për herë të tretë duke i dhënë fitoren Ekselsiorit, që gjithashtu përfundoi me dhjetë vetë pas përjashtimit të Rene van Dieren. Por edhe Ajaksi nuk mund t’i shpëtonte zhgënjimit pasi, megjithëse Urbi Emanuelson dhe Klas?Jan Huntelar shënuan nga një gol për pjesë ndaj Vilem II, titulli nuk shkoi dot në Amsterdam.

[km92]

Maradona, jeta e re në spital

30 Prill Diego Armando Maradona ka fituar diçka shumë të madhe për rikuperimin e tij: të jetë afër të gjithë zërave që qarkullojnë mbi të, përfshirë edhe ata që deklaruar vdekjen e argjentinasit përpara disa ditësh. Në gati tre raste, media të ndryshme të botës kanë deklaruar në muajin e fundit vdekjen e yllit argjentinas, por Maradona vazhdon të jetë gjallë. E përditshmja spanjolle “SPORT” ka bërë një analizë mbi jetën e re të Maradonës në klinikën psikiatrike ku ai është shtruar. Burime të brendshme në këtë klinikë sigurojnë se Diego Armando Maradona është në gjendje shumë të mirë shëndetësore dhe se deklaratat e fundit nga media të ndryshme për vdekjen e tij nuk janë aspak të vërteta. Kjo gjë nuk e ka shqetësuar aspak argjentinasin i cili vazhdon të ndjekë me qetësinë më të madhe kurat e dhëna nga doktorët. Maradona ka takuar të fejuarën e tij, Veronika Oheda, vajzën e tij Xhaninan dhe ish?gruan e tij Klaudian. Dje në mbrëmje, argjentinasi u takua edhe me prindërit e tij, Diegon dhe Totan. Maradona është i qetë dhe po ndjek me kujdes e i përqëndruar kurat e dhëna nga mjekët të cilët po merrem me rikuperimin e tij. Flitet se Diego trajtohet njësoj si të gjithë pacientët e tjerë dhe respektohet shumë nga të gjithë ta që ndodhen aty brenda. Maradona ka filluar të realizoj disa ushtrime fizike për të qenë sa më në formë. Disa aktivite që duhet të zhvilloi i pranon me kënaqësi por disa të tjera jo. Mërzitet shpejt. Për sa i përket pacientëve të tjerë, ata duhet të flënë në orën dhjetë dhe kur ka ndeshje futbolli, iu lejohet që të shikojnë televizor në sallën e përbashkët. Në këtë kontekst Diego është shumë i kënaqur dhe i ndjek me kënaqësi ndeshjet e futbollit që transmetohen. Jeta e tij në këtë klinikë nuk është edhe aq keq sa të tjerët mund të mendojnë, por Maradona është i detyruar që t’i nënshtrohet kurave dhe aktiviteteve që i kërkojnë mjekët.

[km92]

Trapatoni: Jo e lehtë në Austri!

30 Prill Ish?trajneri i Juventusit, Interit, Bajernit dhe Benfikës, Xhovani Trapatoni, ka arritur të fitojë një tjetër kampionat, këtë herë në Austri, nën drejtimin e skuadrës Red Bull Salcburg. Në javën e 31? të të kampionatit, skuadra e drejtuar nga Trapatoni ka arritur të marrë një barazim 2?2 përballë Austria Vienës, rezultat që i jep matematikisht titullin kampion Salcburgut. Bëhet fjalë për kampionatin e dhjetë të fituar nga tekniku italian gjatë karrierës së tij. Në një intervistë të dhënë për të përditshmen italiane “La Gazzetta dello Sport”, Trapatoni komenton suksesin e arritur, duke pranuar se ka ndjerë ende emocione kur ra vërshëllima e fundit. “Emocion nuk diksutohet, por edhe një kënaqësi shumë e madhe. Që kam fituar titullin e dhjetë, këtë po e marr vesh nga gazetarët. Nuk ka asnjë klasifikim, por e rëndësishme është që arritëm të fitonim kampionatin dhe të realizonim objektivat që kishim”. Edhe pse niveli i kampionatit austriak nuk është ndër më të lartit, dhe Salcburgu është skuadra më e pasur, tekniku italian nuk pranon se ka qenë shumë e lehtë për të. “Kurrë nuk është e lehtë. Me të njëjtën ekonomi një vit më parë përfunduam të dytët. Unë jam një i huaj që drejtoj për herë të parë një skuadër në Austri. Skuadra është e rindërtuar dhe çdo sezon ndryshohen më shumë se dhjetë lojtarë. Duhet të formonim grupin, të fusnim mentalitetin në skuadër dhe për këtë gjë kemi bërë një punë shumë të madhe. Kush mendon se ky titull ka qenë shumë i lehtë për ne për t’u fituar, mund t’i them se e ka shumë gabim”.

Italiani që ka fituar më shumë

Xhovani Trapatoni ka lindur në Kusano Milanino, më 17 mars 1939. Në nivel klubesh, është trajneri italian që ka fituar më shumë tituj. Ka drejtuar Milanin në sezonet 1973?74, më pas në 1975?76, pastaj Juventusin në 1976?87, Interin në 1991?1992, përsëri Juventusin në 1994, Bajernin në 1994?95, Kaljarin në 1995?96, përsëri Bajernin në 1996?1998. Më pas është rikthyer përsëri në Itali duke marrë drejtimin e Fiorentinës deri në vitin 2000, dhe më pas është emëruar trajneri i kombëtares së Italisë. Katër vjet me shumë pak lumturi, me eleminimin në 1/8 nga Koreja e Jugut në Botërorin e vitit 2002 dhe më pas lamtumirë Itali. Trapatoni është rikthyer përsëri, por këtë herë në Portugali duke marrë drejtimin e skuadrës së Benfikës dhe duke fituar me këtë skuadër titullin kampion në sezonin 2004?05. Më pas vendosi të rikthehej në Gjermani duke marrë drejtimin e Shtutgartit, por pa arritur asnjë sukses. Pas largimit nga Shtutgarti, për Trapatonin vjen një ftesë nga Austria dhe kërkesa ishte që të drejtonte skuadrën e Salcburgut. Këtë herë ka arritur një sukses tjetër me skuadrën austriake, duke fitur kamponatin e dhjetë në karrierën e tij. Trapatoni ka arritur të fitoj kampionate në vende të ndryshme si: një në Gjermani (1996?97) dhe në Portugali (2004?05), shtatë në Itali (1976?77, 1977?78, 1980?81, 1981?82, 1983?84 e 1985?86 me Juventusin, 1988?89 me Interin). Në karrierën e tij figuron edhe një Champions League (1984?85), një Kupë Interkontinentale (1985), një Kupë Kupash (1983?84), tre Kupa UEFA (1976?77 dhe 1992?93 me Juventusin, 1990?91 me Interin), një Superkupë Europe (1984), një Superkupë Italiane (1989) dhe një Kupë Gjermanie, dy Kupa Italie (1978?79, 1982?83) dhe një Kupë Gjermanie. Si lojtar ka luajtur 17 ndeshje me ekipin kombëtar duke shënuar dy gola, nga viti 1960 deri më 1964. Ka luajtur me Milanin nga 1959 deri më 1971, dhe e ka mbyllur karrierën e tij me Varezen në 1971?72. Në Serinë A ka luajtur 284 ndeshje dhe ka shënuar tre gola. Ka fituar dy kampionate (1961?62, 1967?68), dy Champions League (1962?63, 1968?69), një Kupë Interkontinentale (1969), një Kupë Kupash (1967?68), një Kupë Italie (1966?67).

[km92]

Verderi, ç’rast i shpërdoruar!

30 Prill Verder Bremen mbylli si mos më keq një javë të “errët” për të pasi u mund 3?2 dje në Bielefeld, duke zbritur në vend të tretë në renditjen e Bundesligës, tri javë para përfundimit. Verder, i mundur 3?0 të enjten në gjysmëfinalen e parë të Kupës UEFA nga Espanjoli, kishte mundësinë më të mirë dje për të kaluar n- krye të renditjes pas humbjes së Shalkes të premten. Por përkundër asaj që pritej, Verderi e mbylli javën në vend të tretë duke e bërë edhe më të fortë luftën për titullin. Në fund, më e fituara del Shalke, e cilaedhe pse humbi ndaj Bohumit qëndron ende në krye me një pikë më shumë se Shtutgari. Në përfundim të ndeshjes, tekniku Tomas Shaf, u shpreh: “Lufta për titullin do të jetë shumë e fortë deri në fund të sezonit, kjo është e sigurt. Ky ishte një rasti i mirë për ne për të kaluar në krye të renditjes por nuk e shfrytëzuam si duhej dhe zbritëm një vend. Të dy skuadrat zhvilluan një ndeshje të madhe, edhe pse mendoj që ne bëmë disa gabime më shumë. Mendoj se ndeshje të këtij niveli dhe një garë e tillë për titullin i bëjnë mirë futbollit gjerman”.Arminia, e cila me fitoren e djeshme mund të jetë më e sigurt për qëndrimin në Bundesliga, kaloi tri herë në avantazh pasi Verderi arriti të barazonte në dy herët e para. Vendasit kaluan në avantazh në të 30' kur Heiko Vesterman shmangu më sëmiri mbrojtësit e Bremenit dhe goditi saktë mekokë pas krosimit nga një goditje dënimi e Jërg Bëhmes. Miroslav Klose barazoi në të 59', nga një pozicion i favorshëm shumë pranë portës. Por pas vetëm dy minutash, Jonas Kamper kaloi vendasit sërish në avantazh me një gjuajtje nga larg. Hugo Almeida u fut nga stoli dhe barazoi në të 74 për miqtë pas një krosimi të gjatë të Kloses, por lojtarët e Arminias nuk e lëshuan fitoren. Autori i golit të tretë, që vulosi fitoren, ishte Kristian Aigler, i cili realizoi në të 79' kur, pasi u përplas me portierin e Verderit, Andreas Reinke dhe mbrojtësin Naldo, zotëroi topin dhe e dërgoi në portën e boshatisur. “Mënyra se si luftuam dhe kaluam tri herë në avantazh ishte vërtet e pabesueshme”, tha pas takimit trajneri i Arminias, Ernst Midendorf, skuadra e të cilit tani është tri pikë larg zonës së rënies nga kategoria. “Por përsëri na duhen më shumë pikë. Ishte një hap përpara, por nuk jemi ende të sigurt plotësisht”.

[km92]

Rajkard: Rezultati i bukur, loja jo!

30 Prill Në përfundim të takimit të djeshëm ndaj Levantes, të fituar minimalisht nga skuadra e tij, trajneri i Barcelonës, Frenk Rajkard, shprehu zhgënjimin për paraqitjen e lojtarëve të tij. Tekniku holandez tha: “Nuk jam aspak i kënaqur me lojën, por të kundërtën mund të them për rezultatin. Por po të kishim shënuar qoftë edhe një gol tjetër nuk do të kishim vuajtur aq shumë. E rëndësishme është të krijosh raste, por këtë herë nuk arritëm të shfrytëzonim asnjë mundësi. Në minutat e fundit vuajtëm presionin e kundërshtarit dhe kjo nuk duhet të ndodhte. E ndërlikuam vetë ndeshjen sepse nuk realizuam golin e qetësisë dhe në fund fituam vetëm 1?0. Por kjo është pjesë e futbollit dhe nuk ka të bëjë fare me përgatitjen e skuadrës. Madje në pjesën e dytë ne luajtëm më mirë dhe pat?_astet më të mira për të shënuar golin e qetësisë. Mbrojtësit e Levantes luajtëm me shumë kujdes duke ruajtur një për një Ronaldinjon dhe Eto’onë, prandaj e lëviza Dinjon në qendër dhe Samuelin në krahë, për t’i shpërqendruar. në pjesën e parë ishim shumë të palëvizshëm dhe nuk krijuam aq shumë raste të rrezikshme, por fituam dhe pikët kanë rëndësi të madhe”

[km92]

Barça e kursyer, Reali pa mëshirë!

30 Prill Edhe në përfundim të javës së 32?të në Primera Division, gjërat nuk kanë ndryshuar në renditje për sa i përket tri skuadrave që mund të quhen ende në garë për të fituar titullin kampion. Me mënyra të ndryshme, Barcelona, Sevilja dhe Real Madridi, kanë siguruar tri pikët përkatësisht kundër Levantes, Espanjolit dhe Atletik Bilbaos. Katalanasit e Frenk Rajkardit i shpëtoi në “Camp Nou” Samuel Eto’o. Kamerunasi realizoi golin e vetëm të takimit në të cilin vendasit nuk shkëlqyen aspak dhe pas një sërë rastesh të shpërdoruara mund të ishin ndëshkuar në minutat e fundit kur pas një krosimi në zonë, Valdes nuk e zotëroi topin që për disa sekonda mbeti para portës së boshatisur, por asnjë nga lojtarët e Levantes nuk e shtyu dot për në rrjetë. Mesi kishte humbur më parë një rast të mirë, ndërsa edhe Ronaldinjo nuk mundi të shënonte golin e dytë i vetëm përballë portierit kundërshtar. Por e rëndësishme është fitorja, e cila e lë Barçën sërish në krye, me një pikë më shumë se Sevilja dhe dy më shumë se Reali. Para fitores së Barçës, Sevilja e pa veten për pak orë në krye pasi mundi 3?1 Espanjolin. Andaluzianët hasën pak vështirësi me “kushërinjtë” e Barçës, pasi arritën të zhbllokonin rezultatin vetëm në pjesën e dytë. Për dy minuta, Puerta dhe Shevanton kaluan në avantazh të dyfishtë vendasit, por një gol i Koromiasit në të 61 u duk sikur rihapi takimin. Megjithatë, 15 minuta para përfundimit Marti realizoi golin e tretë që mbylli gjithçka. Në takimin e fundit të javës, Reali i Madridit fitoi bindshëm ndaj Atletik Bilbaos. Në “San Mames”, miqtë nuk e patë të vështirë të shënonin shumë shpejt. Pas një krosimi të gjatë të Bekamit nga e majta, Serxho Ramos goditi bukur me kokë për të zhbllokuar rezultatin, ndërsa Van Nistelroi dy herë dhe Guti në fund realizuan golat e fitores 4?1. Golin e ngushëllimit për baskët e shënoi Jorente. Në këtë situatë, takimi i javës së ardhshme mes Realit dhe Seviljes duket se do të jetë tepër vendimtar, përveçse shumë i luftuar.

[km92]

Gulit: Europa, testi i Hozesë!

30 Prill Një prej lojtarëve më të mëdhenj në historinë e Çelsit, Rud Gulit ka paralajmëruar Hoze Murinjon që ky sezon mund të konsiderohet si i dështuar, në qoftë se skuadra e tij nuk do të arrijë të triumfojë në Europë. Ish?futbollsti dhe trajneri i bluve, i pari trajner i huaj që fitoi një trofe në Angli, kur Çelsi fitoi Kupën e Anglisë përpara një dekade, rrit trysninë mbi Murinjon, përpara gjysmëfinales së kthimit në Champions. Blutë zhvendosen në “Anfield”, me avantazhin 1?0 të ndeshjes së parë, me dijeninë që do të luajnë përballë Mançesterit ose Milanit, nëse kualifikohen në finalen e Athinës. Me Kupën e Ligës të fituar, Çelsi e sheh veten në finalen e Kupës së Anglisë dhe vazhdon të jetë n` garë për titullin kampion, por Gulit mendon se është Champions League ajo që do t’i vendosë “etiketën” këtij sezoni. “Një sezon i suksesshëm për Çelsin do të thotë triumf në Champions League”, tha holandezi, i cili fitoi dy herë Kupën e Kampionëve si futbollist, me fanellën e Milanit. “Ata vazhdojnë të kenë shanse në kampionat, pa dyshim, por besoj se një sukses në Premier do të shihej si një plus për Murinjon, nëse do ta fitojë sërish. Megjithatë, është e qartë që Champions është i vetmi trofe që ky klub nuk ka fituar dhe Europa ka qenë gjithmonë një përparësi për këtë skuadër dhe Abramoviçin. Eshtë shumë e vështirë që një skuadër të fitojë kampionatin dhe Champions në të njëjtin sezon, por në qoftë se Çelsi do të arrijë të fitojë në Athinë, atëherë suksesi i mundshëm i Mançesterit në kampionat nuk do të bënte të ndihej keq asnjë tifoz në “Stamford Bridge”. Mendoj që Çelsi ka bërë një punë shumë të mirë në këtë sezon dhe janë shumë pranë finales, por për ta cilësuar këtë vit si të suksesshëm, duhet të fitojnë”. Gulit shton: “Kupa e Anglisë dhe ajo e Ligës? Po, është diçka e bukur t’i fitosh, por këto trofe nuk do ta shpëtonin sezonin për Çelsin. Murinjo ka nevojë të fitojë në Europë dhe vetëm kjo mund ta bëjë të madh këtë sezon. Në qoftë se nuk do t’ia dalin mbanë, atëherë të gjithë do të ndiheshin pak të hidhëruar nga ky vit, pavarësisht atyre që mund të arrihen”.Gulit, i cili foli për shtypin që nga Mançesteri, i pranishëm në një seminar ku u trajtua problemi i futbollit të skuadrave të fëmijëve, mendon se në çdo rast, kritikat për Murinjon janë të tepruara. Holandezi, fitues i Topit të Artë në 1987?n i dha Çelsit trofuen e parë të madh pas 26 vitesh, kur fitoi Kupën e Anglisë në drejtimin e kësaj skuadre, në vitin 1997. Sipas shtypit, Abramoviçi mund të shkarkojë në fund të sezonit Murinjon, i mërzitur nga loja e tij aspak argëtuese, por Gulit thotë: “Murinjo luan për rezultatin, ai luan për të fituar dhe suksesi do të jetë gjithmonë gjëja që do të motivojë atë. Eshtë gjithmonë e rrezikshme të përcaktosh spektaklin si përparësi. Gjëja më e rëndësishme është të fitosh tituj dhe në qoftë se këtë e bën duke argëtuar njerëzit, kjo përbën vetëm një plus. Murinjo ndërton lojën e tij duke u motivuar vetëm nga suksesi, siç bën edhe Rafael Benitezi tek Liverpuli. Përse askush nuk thotë që edhe loja e Liverpulit është e mërzitshme? Më lini t’ju them diçka, pashë çerekfinalen e Champions, atë ku Çelsi luajti me Valencian dhe mund t’iu siguroj që ishte një ndeshje argëtuese. Nuk pranoj që Çelsi është steril, ashtu siç shumë njerëz pretendojnë. Ata mund të luajnë mirë dhe kanë një aftësi të madhe për të marrë rezultatet e duhura. Të gjesh barazpeshën e duhur midis suksesit dhe spektaklit është pothuajse e pamundur. Në fakt, nëse do të më kërkonin që të drejtoja një skuadër, me kusht që të argëtoja njerëzit dhe të fitoja, atëherë nuk do të pranoja”. Në fund, Gulit thekson që nuk i beson fjalëve të Fergit, sipas të cilit kampionati është një përparësi për skuadrën e tij. Holandezi thotë: “Nuk besoj se Mançesteri dëshiron të fitojë më tepër kampionatin sesa Champions. Mendoj që Fergi i thotë këto fjalë për të lehtësuar trysninë mbi skuadrën e tij, por nuk ka asnjë arritje më të madhe se sa suksesi në Champions”.