Mozaik poetik paralelesh biblike_Sot_

[mondishall]

Shën Maria

Më fal, o Krisht
U ktheva në Tokë
Pavdekshëm dot s’ri
Pa qarë e pa lotë.

Ah, njerëzit e gjorë
Të mjerët njerëz
Dy mijë vjet kërkojnë
T’i ndihmojmë, të mjerët.

Të luten për ditë
Për ditë më luten
Në shtëpi, në kishë
Në rrugë e ku munden.

Ooh, prit, mos u kthe
Paska Juda me okë
Kryqëzimi të pret
Nga turmat në Tokë!

[mondishall]

Juda

Kush tha që u çmenda?
Që u vara, kush tha?
Akoma me legjenda?
S’u ngopët, aman!?

Më kini mes jush
Mes vetes, ju kam
Me Judra kaq shumë
Me Krishtra, kaq pak.

Sa shumë më ngjani
Më shumë ju ngjaj
30 aspra më falni
Të “puth” Krishtin, prap’.

[mondishall]

Pilati

Jam bërë hyqlli
Pas ujit në çezmë
Me orë të tëra rri
Pastaj fle i qetë.

Dy mijë vite kështu
I njëjti avaz
I njëjti ujë
I njëjti, Pilat.

Nëse prapë më zgjidhni
Të gjykoj Krishtin tjetër
Pak ujë më sillni
Dhe turmat me njerëz.

[mondishall]

Krishti

Pardje më kryqëzuan,
________ për t’u ringjallur sot.
Prapë dhe dy mijë vite të tjerë!?
Të lutem më kryqëzo
__e mos më ringjall më,
__________________o Zot!

[mondishall]

Maria Magdalena

Sa herë kërkoj falje
Më shumë mëkatoj
Mbetur mëkatare
Dy mijë vite njëlloj.

Më mbrojti një Krisht
Më fitoi një Djall
Jam Maria që vdiq
Tek Magdalena e gjall’.