Esmeralda Laho është ekzekutuar mbrëmë në afërsi të Shkollës së Baletit nga i dashuri i saj, Matjon Mërtiri
I dashuri, plumb në zemër 25-vjeçares
Plagoset në këmbë kushërira e viktimës. Dyshime për motive xhelozie, autori ende i lirë
Lindita Çela
TIRANË- Më mirë e vdekur sesa në krahët e një tjetri. Duket se ky ka qenë fati tragjik i Esmeralda Lahos, e cila është ekzekutuar mbrëmjen e djeshme nga i dashuri i saj. Ngjarja tragjike ka ndodhur dje rreth orës 21.00 të mbrëmjes, pranë shkollës së Baletit, në afërsi të një lokali në këtë zonë. Policia konfirmoi mbrëmë në darkë se Matjon Mërtiri ka qëlluar me një plumb në zemër të dashurën e tij, e cila ka gjetur vdekjen e menjëhershme. E plagosur në vendngjarje ka mbetur edhe kushërira e viktimës, Marsela Guri e cila ndodhet jashtë rrezikut për jetën. Nga të dhënat paraprake mësohet se 32- vjeçari nga qytetit i Fierit ka qëlluar të dashurën për motive xhelozie, ndërkohë që të pranishmit në vendngjarje kanë dëgjuar vetëm dy të shtëna me armë.
Ekzekutimi
Një histori dashurie ka përfunduar tragjikisht mbrëmë në darkë, ku burime nga vendngjarja tregojnë se 32-vjeçari fierak ka qëlluar me pistoletë mbi të dashurën e tij, duke i marrë jetën. Rreth orës 21.00 të mbrëmjes, 32- vjeçari ka mbërritur në shtëpinë e të dashurës së tij, në rrugën “Mihal Grameno” duke kërkuar të takohet menjëherë me të. Për të realizuar qëllimin e tij, Matjon Mërtiri ka kërkuar ndihmën e kushërirës së të dashurës që duket se e kishte braktisur. Sipas burimeve të policisë, Esmeralda ka zbritur nga pallati së bashku me kushërirën e saj, Marsela Gurin. Burime të policisë thanë se viktima ka qenë e veshur me rroba shtëpie, ç’ka lë të kuptosh se ajo ka zbritur vetëm për pak kohë në rrugë. Por duket se autori i krimit e ka patur të pamundur të kontrollojë situatën. Pas shkëmbimit të disa fjalëve, Matjon Mërtiri ka qëlluar mbi të dashurën e tij, të cilën plumbi e ka goditur në zemër, duke i shkaktuar vdekjen e menjëhershme. E plagosur ka mbetur edhe kushërira e saj, e cila ka marrë një plumb në këmbë. Sipas burimeve të policisë, thuhet se autori i krimit ka dashur të qëllojë edhe mbi kushërirën e të dashurës së tij, ndërkohë që nuk përjashtohet mundësia që Marsela të ketë mbetur e plagosur nga një plumb rikoshet. Ndërkohë, banorët e terrorizuar të lagjes thonë për “Shekullin” se kanë dëgjuar vetëm dy të shtëna pistolete. Pasi ka kryer krimin, 32-vjeçari është larguar menjëherë nga vendngjarja në drejtim të qytetit Studenti. Banorët thonë se kanë parë të largohet me shpejtësi, menjëherë pas të shtënave, një makinë tip “Benz” në ngjyrë gri me targa të huaja.
Hetimet
Pak minuta pas krimit, në vendngjarje kanë mbërritur forca të shumta të policisë. Ngjarja e ndodhur thuajse në qendër të Tiranës ka alarmuar jo vetëm banorët përreth, por edhe drejtuesit më të lartë të policisë së shtetit. Përveç oficerëve të shumtë, në orët e vona të mbrëmjes së djeshme, në vendngjarje është parë të mbërrijë edhe zv.ministri i Brendshëm, Gjergj Lezhja. Vetëm pak minuta pas ngjarjes, policia ka bërë të mundur identifikimin e autorit të krimit, ndërkohë që menjëherë janë urdhëruar të vendosin postblloqe të shumta nëpër rrugët dalëse të Tiranës, për kapjen e tij. Deri në orët e vona të natës së mbrëmshme, policia nuk ka mundur të kapë 32- vjeçarin nga qytetit i Fierit. Hetimet paraprake, policia i ka zhvilluar në dy pista hetimi. Fillimisht është dyshuar se Esmeralda Laho ka vendosur të lërë të dashurin e saj, e ky i fundit ka reaguar duke e qëlluar me një plumb në zemër, ndërkohë që nuk ka mbetur edhe jashtë hetimeve një refuzim i vajzës për të shkuar në Itali, çka 32-vjeçari i është përgjigjur me një plumb pistolete. Gjithsesi, hetimet e mëtejshme pritet të zbardhin saktësisht krimin e ndodhur mbrëmjen e djeshme, që i mori jetën 25-vjeçares Esmeralda Laho.
30/10/2006
KATEGORIA: Kronike nga Tirana
SHEKULLI
Përgjigju Duke Cituar
Postuar më parë nga Zemrushja
.Ngushellimet e mija familjes se saj.
Krijoni Kontakt