Mbinjeriu, postnjeriu dhe njeriu

[intel inside]

Mbinjeriu, postnjeriu dhe njeriu

http://admirim.blogspot.com/2006/12/...he-njeriu.html
Njohja e realitetit të botës fillon nga njohja e vetvetes. Mosnjohja e vetvetes është pika ku burojnë të gjitha problemet e njeriut. Kështu që, para se të fillojë gjurmimin e ekzistencës së gjerë, njeriu duhet të zbuloj se kush është dhe çfarë roli ka në këtë jetë.



Filozofit gjerman Friedrich Nietzsche nuk i pëlqente njeriu. Ai dëshironte një mbinjeri, që e projektonte në mendjen e tij si një njeri të fortë, individualist dhe të pavarur nga vlerat morale. Charles Darwin-it më joshëse i dukej idea e një njeriu që erdhi në këtë jetë pas një numri të madh të rastësive dhe të ndikimit të forcave të verbëra të natyrës, e një makine të vërtetë luftarake që për qëllim të vetëm kishte luftën e egër ndaj të tjerëve. Njeriu Darwinian është vetëm një lloj më i avancuar i kafshës dhe asgjë më tepër. Hedonistët bashkëkohorë, në emër të shkencës, përparimit e modernizmit, mundohen që të gjithë njerëzve t'ua imponojnë mentalitetin ateist e materialist, që sipas të dhënave historike ka zanafillën e tij që në Greqinë Antike. Ha, pi, bëj gjumë, thjesht kënaqu, asgjë tjetër nuk është me rëndësi, thonë ata! Kinematografët e Hollywood-it bëjnë filma rreth Superman-it, një heroi me aftësi mbinjerëzore dhe me këto filma arrijnë përfitime të mëdha materiale. Transhumanistët, në anën tjetër, dëshirojnë të limitojnë "paaftësitë" e njeriut, të eliminojnë vuajtjet dhe vdekjen nga ai përmes teknologjisë. Thënë ndryshe, duan të krijojnë një njeri-robot, një "postnjeri". Pra, njeriu sot e ka humbur rrugën. E ai nuk e di nga t'ia mbajë.



Kush me të vërtetë është njeriu? A janë të vërteta këto që po thonë këta? A është njeriu një kafshë? Një qenie e ulët? A ka nevojë që të bëhet mbinjeri, postnjeri apo Superman që të jetë i lumtur në jetën e tij? A është i pavarur? A ekziston ai për një qëllim të caktuar apo ekziston diçka e quajtur "rastësi"?



A kemi ndonjë përgjigje të pabazuar në relativizëm për këto pyetje të parashtruara?

Po , këto përgjigje na i jep një Libër i mrekullueshëm që skeptikët besojnë se e ka shpikur një i pashkolluar që ka jetuar në Arabinë e shekullit të shtatë. Ky është Kur'ani.



E Ai është që krijoi qiejt dhe tokën me qëllim të caktuar… (Kur'an, 6:73)

… All-llahu nuk krijoi qiejt dhe tokën dhe çdo gjë që gjendet ndërmjet tyre pa ndonjë qëllim të caktuar… (30:8)

Ai krijoi qiejt e tokën me qëllim të caktuar… (Kur'an,39:5)

Por, Ne i krijuam të dyja me qëllim të caktuar, mirëpo shumica e tyre nuk dinë. (Kur'an, 44:39)



Pra, çdo gjë që ekziston është krijuar me qëllim të caktuar. Qiejt dhe toka janë krijuar për të mirën e njerëzimit:



A nuk e dini se All-llahu nënshtroi për të mirën tuaj çka në qiej e çka në tokë… (31:20)



Pra, njeriu nuk është kafshë, nuk është as qenie e ulët, sepse në shërbimin e tij janë vënë të gjitha gjërat që ekzistojnë në qiej e në tokë. Ai është krijuar në formën më të bukur. (Kur'an, 95:4, 64:3). Është nderuar dhe lartësuar nga All-llahu:



Ne, vërtet nderuam pasardhësit e Ademit (njerëzit), u mundësuam të udhëtojnë hipur në tokë e në det, i begatuam me ushqime të mira, i vlerësuam ata (i lartësuam) ndaj shumicës së krijesave që Ne i krijuam. (17:70)



Për qëllimin e krijimit dhe ekzistimit të tij mësojmë nga vargu Kur'anor në të cilin Krijuesi ynë thotë:



Unë nuk i krijova xhinët dhe njerëzit për tjetër pos që të më adhurojnë. (51:56)



Po ashtu, Zoti thotë:



Thuaj: "Namazi im, sakrifica ime, jeta ime dhe vdekja ime janë thjesht për All-llahun, Zotin e botëve." (6:162)



Pra, qëllimi i krijimit të njeriut është adhurimi i Zotit të botërave, me dashuri e frikërespekt të denjë, duke iu përmbajtur udhëzimit të Tij. Duke iu bindur Krijuesit të tij ai arrin majet e suksesit.



Çka nëse njeriu nuk i përmbahet udhëzimit të Zotit (Kur'anit)? Atëherë njeriu do të humb statusin e qenies së lartë dhe do të zbresë në shkallën më të ulët (shih Kur'anin, 95:5).



Jo, është e vërtetë se ai i kalon kufijtë,

Për shkak se e ndien veten të pavarur.

Po kthimi është vetëm te Zoti yt. (Kur'an, 96:6-8)