Njoftim nga Federata Panshqiptare Vatra

[Peace Matters]

Të dashurë miqë,

Kam marrë një njoftim nga Vatra në e-mailin tim e MassAlbanians. Postoj mesazhin poshtë.

Të fala,
David


Federata Panshqiptare Vatra e Amerikës Vatra

2437 Southern Blvd, Bronx, NY 10458

Tel: 1718 365 - 6930 Fax 1718 365- 6852

D E K L A R A T E

Kemi ndjekur me interes të veçantë e me shqetësim të thellë gjendjen tejet të ndërlikuar dhe të rrezikshme në të cilën është zhytur Shqipëria si pasojë e lojës së paprinciptë e destabilizuese e një grushti politikanësh në Shqipëri.

Me brengosje vërejmë se kjo lojë meskine e këtij elementi destruktiv po kalon tashmë rrezen dhe efektin e kafeneve e salloneve politike të Tiranës dhe po shndërrohet në një faktor që rrezikon të bllokojë zhvillimet demokratike në vend dhe rrjedhimisht të dëmtojë procesin e integrimit të Shqipërisë në strukturat euroatlantike si NATO e BE dhe të godasë mbas shpine në këto çaste kritike realizimin e aspiratave të kahershme kombëtare.

Mosgjetja e një kompromisi mes politikanëve shqiptarë është dëshmi e mbivendosjes së interesave egoiste e personale nga ana e disa politikanëve të korruptuar, apo, më keq akoma, vënja e tyre në shërbim të interesave antishqiptare.

Loja me zgjedhjet, përpjekjet për sabotimin dhe bojkotimin e proçesit zgjedhor, është një atentat që kryhet kundër demokracisë. Mospranimi i rotacionit paqësor e normal politik, i cili qëndron në thelbin e pluralizmit dhe demokracisë, ushqimi i ëndrrave dhe iluzioneve për përmbysje politike të dhunshme, që evokojnë hijen e zezë të 1997-tës, janë dëshmi e ruajtjes së kujtesës diktatoriale e terroriste nga sundimi famëkeq komunist 50 vjeçar në Shqipëri.

Çdo krizë, tension dhe destabilizim i Shqipërisë në këtë kohë, është një thikë mbas shpine ndaj shqiptarëve të Kosovës, të cilet tashmë i ndajnë vetëm javë nga nga realizimi i ëndrrës shekullorë për pavarësi. Destabilizimi i Shqipërisë që synon të arrijë një shpurë e papërgjegjshme politikanësh në Tiranë është dhurata më e madhe që mund t'u bëhet qarqeve shoviniste e antishqiptare sërbe.

Populli shqiptar, një ndër më të lashtët dhe krenarë të Eurpës, nuk meriton sot, në agimin e mijëvjeçarit të ri, të njolloset e të përbaltet nga ajo shpurë renegatësh. Historia do t'i dënojë ata përjetësisht.

Vatra mbështet fuqimisht deklaratat e faktorit ndërkombëtar-Departamentit të Shtetit Amerikan, Bashkimit Europian, institucioneve si OSBE dhe ODHIR dhe gjithashtu kërkon nga klasa politike shqiptare përgjegjëshmëri, dinjitet dhe qendrime politike konstruktive.

Në emër të shqiptarizmit për të cilin Vatra është e njohur që nga themelimi i saj 95 vjet më parë, i bëjmë thirrje popullit shqiptar, pavarësisht nga bindjet politike - të majta a të djathta qofshin, të jenë sa më të bashkuar, sa më tolerantë ndaj njeri-tjetrit dhe të kenë parasysh se këto janë çaste tepër kritike për të ardhmen e kombit shqiptar.

Zhvillimi dhe fuqizimi i demokracisë është rruga e vetme e integrimit të vendit dhe realizimit të aspiratave tona të drejta kombëtare. Mbajtja e zgjedhjeve të ardhme vendore në kohë conform me ligjet e shtetit demokratik është kusht i domosdoshëm për të shmangur pasoja me dëme të pallogaritshme..

Këshilli Drejtues i Vatrës

New York, 11 janar 2007